預算案 - 又繼續補遺 (2)

原本唔想再講，不過見張良篇文幾好，咁copy落黎，快手寫兩句。

******

佢篇文既好係，夠簡單，就寫左好多我長篇大論講既野。

不過，佢好多地方，仍然聽到你想講粗口。

佢講公務員改革，好核心既一句係﹕「並確定哪些是政府治理核心業務，哪些較為外圍可聘用非公務員條款員工，甚或外購商業/非政府機構服務」。

佢講衣句，應該係善意，或者係學者式天真，真係講緊公共行政改革。

不過，你將衣句放返入香港，你會發現到乜野﹖

而家有關愛隊。

政府成日話，關愛隊係有社區建設輔助角色，支持政府社區建設工作。不過佢地既功能同民政署及社署其實有咩分別﹖甚至以「專業」黎計，關愛隊班海岸線同鄉會就更加係算把啦。

咁好啦，我用張良個邏輯，關愛隊係支援政府架麻；有左關愛隊，政府係衣方面米可以用小D人囉。不過我求其搵預算案，民政處「綱領2社區建設」係2026/27年既人手編制係885人，2019/20年未有關愛隊時都係885人。

咁你問下張良，而家有咁Q多隊關愛隊支援，咁點解民政處相關工作既人手又唔見縮減﹖

你又再問下張良，政府而家攪北都，咁究竟北都攪創科園公司，其實係米要繼續搵阿常秘做主席﹖

之前攪咁多年創科，其實都外判左比科技園公司，而家政府自己參與返，咁創科又係米「政府治理核心業務」﹖公務員以至政府又係米應該咁「玩產業政策」呢﹖

你問張良，佢夠唔夠膽講丫拿﹖

***********

講起阿常秘，早兩日沙嶺單野，獨媒又講返，當年沙嶺做骨灰場個時，係問立法會扲左幾十億做平整。

咁我都話，你要計北都盤數，計佢各個項目既發展成本，其實真係計到你傻，好多數係好耐歷史甚至收埋左唔知係邊度。

之但係，我唔記得講，沙嶺單野另一個嘔心位係邊。

當明報個題係「中標者承諾3年投資238億」，內文仲要講到﹕

今次是政府首次對大型產業投資項目採「雙信封制」招標，評審時「非價格建議」和「價格建議」比重為70%和30%，標書須同時符合兩者條款規定。孫東稱，中標公司在非價格建議提出5項承諾，包括由開發至投入營運首3年估算累計投資238億元、預計營運首3年可創造經濟產出約46億元及創造約180個技術職位等（見表）。

孫東要強調「雙信封制」，仲講到中標者有好多承諾，講到好似係政策創新，講咩「產業先行」，成功令到入標公司會承諾做到好多投資。

不過，實情係，如果塊地係用100億投返黎，我中標既話，都會拿拿聲開工興建好棟野快手營運投資好多個百億落去啦。事關，我要盡快扲返投資回報麻。

唔通，中移動之前中標火炭塊地，又或者新意網54億扲到將軍澳塊地之後，會攤凍佢10年唔做野，之後有心情先開工呀﹖

我根本唔駛承諾咩未來投資幾多、創造幾多經濟產出，我比左咁貴既地價，我就會盡快去做野。

而家明報 和應 政府 同 大公之流，係個社評九唔搭八講咩「產業先行」招標新模式 沙嶺數據園AI攻堅，仲要講到「事實上，本港發展創科產業，高地價是一個極不利的因素」，其實佢明唔明所謂既「高地價」係代表乜野﹖

地價，係代價。

我比得出高代價，一方面就證明我預計我既生意會有相應回報；另一方面，就係有高地價，先確保到中標者會「創造經濟產出」。

如果地價平就所有野都攪掂，咁以往十幾廿年，科學園數碼港都相對上平租比租戶 (即係平地價啦)。不過，咁多年黎，科學園數碼港出過咩公司出黎﹖

平地價既後果係乜﹖你記唔記得之前有單咩DR誤殺案﹖之前米租左科學園做所謂既幹細胞研究囉。科學園平租，吸引左幾多九唔搭八既公司。

認真講。

你話要攪「產業政策」，以後賣地要用「雙信封」，除左睇地價仲要睇其他產業承諾，咁又真係冇問題，甚至某些情況下係需要既。

例如，如果你話北都將來有塊工廠地，我淨係指明做車廠，咁我緊係要用非價格因素，先會吸引到最勁既公司黎。你係衣D情況下，個「雙信封」非價格比重多D都冇問題丫。

(當然，我講既「冇問題」，其實係有condition既 -- 如果係用「雙信封」唔洗比地價淨係講技術，之後tesla 同 小鵬都話要黎，咁你估香港政府會選擇邊個丫拿.........)。

不過，而家係數據中心咋喎，有幾多非價格因素呢﹖

即係，一黎你就唔好講到係咩政策創新講到好把閉，事關地價平到咁，仲要真係得個一間公司咁大把入標，就真係令人懷疑你係塊地希望發展個「產業」既吸引力有幾大。

二黎，數據中心講算力，又有幾多非價格既「產業導向」呀﹖

當然，實情唔知係米，因為佢個地價底價訂得太底，真係可能會有企業求其攪D好低端既數據中心就算，所以先要係個「非價格因素」定返高個要求。

衣樣真係要業界先知 -- 有冇人敢講，就另一回事。

*******************

ANYWAY，衣個其實亦都係所謂既產業政策問題﹕當政府有產業政策，比左咁多優惠政策出黎之後，點樣確保個回報出黎﹖

又或者係，個「非價格因素」其實點先為之係合理，係真係對經濟有幫助 -- 我已經唔講，你點做所謂既監管，確保佢達標。

你自己google 半導體+破產潮，上年大陸有幾多半導體公司破產之餘，衣幾年又有幾多半導體公司註冊開業，又有幾多公司破產。

破產，原因就唔洗解；開業，原因都好簡單。

有咁多政府補貼優惠資助，我緊係開業啦。

大陸可以玩咁多年「產業政策」，係因為佢地有「無限資源」 (地方政府而家冇資源，米遠洋捕撈囉；中央政府冇錢，米追返你稅囉)。

香港，我地都有無限轉撥。

*********************

未完。

預算案 - 又繼續補遺 (1)

2026年3月5日星期四

張炳良：香港財赤危機已過？

【明報文章】去年初政府《財政預算案》公布前後，社會及立法會普遍擔心財赤惡化，紛紛主張削支。政府除厲行財政整合計劃、強制各部門逐年縮減支出，也決定行政、立法、司法機關人員（包括全體公務員和議員）凍薪。當時我在本版撰文〈怎樣的財赤問題？〉（2025年2月4日），指出政府面對的財赤危機難逃結構性，財赤不再是周期性的問題，也不止於理財，更涉及政經大局之變和政策選擇之再思。在此不贅。

「轉赤為盈」只見於經營帳目

過去一年，儘管金融市場主要因大量內企來港上市及「北水」支撐再呈興旺，樓市跌後稍為穩定下來，但全球經濟前景仍波動（註1），地緣政治動盪加劇，最新中東局勢嚴峻。香港乃外向型經濟，且稅基狹窄，公共財政際此絕不能掉以輕心。財政司長2026/27年度預算案發表後，不知為何坊間有奏起「轉赤為盈」的旋律，好像財赤危機已過。

預算案演辭是這樣說（段251至252）：「去年訂下的目標是在2026/27年度及2028/29年度起，分別在經營帳目及綜合帳目達至盈餘。過去一年，我們全力落實財政整合計劃，同時受惠於股票市場表現突出及經濟增長加快，令印花稅及利得稅較原來預算合共增加近500億元，2025/26年度的經營帳目提前恢復盈餘，綜合帳目計及發債淨所得則大致平衡。」

「轉虧為盈」只見於經營帳目，綜合帳目一直仍然赤字（2030/31年度預測384億元）；帳面上計及發債淨所得方能平衡。

若分析預算案附錄有關5年中期預測的細數，可清楚知道，過去一年的突破是經營帳目取得7年來首次盈餘，但非經營帳目仍會因增加投資基建與其他大型項目（包括北都），而持續存在資金缺口，需靠擴大發債規模（由佔本地生產總值(GDP)14.4%增至19.9%），並由外匯基金分兩期調撥共1500億元往基本工程儲備基金。附圖列出自2019/20年度（即連年財赤之始）至2030/31年度（即新中期預測之尾）的結算和預測盈赤數字。從逾10年之趨勢去看，結構性財赤危機尚未脫險，目前慎防心存僥倖、故態復萌，並要有居安思危意識。

《基本法》規定特區公共財政量入為出，力求收支平衡，並保持開支與經濟增長相適應，故理論上不應出現結構性財赤。了解公共財政是否回復穩健，應同時看負債水平及財政儲備水平。發達經濟體中，香港政府舉債佔GDP比率仍低（如新加坡便超過170%；註2），所以毋須憂慮靠舉債度日，惟已進入以發債為常態的新時代。

發債為常的新時代

香港過去近半個世紀的發展有賴土地財政，才產生所謂「低稅、不錯福利」的傳奇。幾年跌市後房地產界開始看好樓價，有指今年有望增一至兩成，但政府預計未來5年土地收益維持於較低水平，2026/27年度預算地價收入只有180億元，2027/28年度起假設只逐步升至GDP的2%（約700億元），低於過去20年歷史平均比率的3.2%。房地產興衰折射財富資產效應，大上大落都非好事。若地產融資時代告終，但創科產業發展需時、實效未至，債券融資便成為無可迴避的出路。

財政司長表示，綠色債券及基建債券的合共借款上限，將由去年公布的7000億元增至9000億元（超過香港GDP四分之一）；未來5年，把每年發行約1600億至2200億元債券，其中約一半用於為近年發出的短期債務再融資；日後將發行更多較長期債券，讓現金流年期與工程項目的資金需要更匹配。

債務須負息及還本，所以關鍵在於舉債所得是否投放得宜，帶來中長期可觀財務回報與經濟效益。政府表明發債盡用於公共投資項目（包括基建工程），不會用作填補經營帳目收支失衡，這是合理並須堅持的原則。一向被譽為理財穩健的新加坡政府，其發債政策也是一樣，既作長遠基建和策略投資，也為搞活債券市場。

至於本港財儲水平，已從2018年3月底高位（11,030萬億元）持續下降，現估計2026年3月底為6572億元，高於去年預算案所估的5803億元，但也只夠應付政府約10個月開支。而儘管未來5年政府預測經濟平均每年實質增長3%，財儲仍將停留於10個月水平，低於亞洲金融風暴後，時任財政司長梁錦松修訂下調之12個月（註3），更遑論過去好景高峰時曾高達22個月。當然，儲備不是為了守財，乃積穀防饑，應付下雨天時所需。惟無論如何，目前所處並非佳境。

財政司長並決定40多年來首次動用外匯基金調撥以助現金流，引起社會關注會否削弱外匯基金維護港元穩定和金融安全的能力。查外匯基金分兩大組合：（1）支持組合，以確保本港貨幣基礎（包括鈔票和外匯基金票據(EFBN)）完全有支持，通常維持在105%至112.5%之間，投資於流動性高、短期以美元計價的證券；（2）投資組合，透過投資全球債券股票，及自2009年起的長期增長投資組合（私募股權、房地產），來維持長期購買力。

現時政府擬轉撥之金額，低於去年外匯基金投資盈利3310億元之一半，應不觸及捍衛港元所需。司長說把錢放在外匯基金投資，或撥去基本工程儲備基金投資於北都，皆是投資，不無道理。但外匯基金有投資回報往績可尋（2025年投資回報率8%，其中投資組合為12.4%、支持組合為5.2%），而北都乃新發展規劃，故政府須向社會說明其中長期的回報與經濟效益及估算基礎，好讓疑者釋疑。

平衡收支 不外乎開源和節流

要達到結構性收支平衡，不外乎做好開源和節流兩側。以一個成熟型社會和發達經濟體而言，應致力開源；節流有賴重建財政紀律和資源配置再平衡，錢須用在刀口上，不慷公家之慨，但往往壓支不易。香港公共財政結構內，醫療衛生、社會福利和教育皆為大用家，經常開支加起來佔57%，惟在人口高齡化及少子化、面對經濟放緩和轉型之痛，且政府大力推動「留學香港」及投資科研之際，要大幅壓縮三大範疇開支，說易行難，因而往往叫停和削減一些小處資助而引起不同群體不滿。經濟前景不明朗下，也容易衍生錢去了哪裏、大眾有否受益等質疑。

預算案指出，公務員編制在未來兩個財年每年分別縮減2%，預計至2026年4月減至約18.8萬個職位。本屆政府任內累計削減逾1萬個職位，這是去年初提出的指標，以顯示力度。政府值得考慮重啟公營部門改革，但不是再搬從前新公共管理主義想當然的一套，而是實事求是、理順輕重，勿隨便擴編或增項，真正拆牆鬆綁、改組兼併、去除臃腫，並確定哪些是政府治理核心業務，哪些較為外圍可聘用非公務員條款員工，甚或外購商業/非政府機構服務（當然須有監管），使在開支金額封頂或遞減但工作與服務需求不降之前提下，各部門「有路可走」，用等量或較少資源做更多事（doing more with less）。

全球各地均面對持續的公共財政壓力，舉債日高。去年10月國際貨幣基金組織的財務監察報告（Fiscal Monitor）曾作評估，主張採取投資主導的調整策略，強化經濟增長，透過「支出轉向」（redirecting spending）至提升經濟生產能力的領域，同時提高支出效率，把制度建設與改革列為優先。

放諸香港，過去的鬆懈造成今天稅基和支出格局，短期不易扭轉。開源應靠做大經濟而非廣開徵費增費，尤需開拓新產業及新增長點，同時提升勞動參與率和生產力，為中長期帶來財富增值。這樣方能支持因人口結構變化導致的民生需求，及新科技包括人工智能挑戰帶來的技能轉型。改善支出效率，有賴結構和功能重整，引導財政資源更合理配置，而非墨守成規和過往路徑，避免節省支出流於機械化和硬指標化。

註1：世界銀行今年1月《全球經濟展望》預計今年全球增速將放緩至2.6%，風險仍偏向下行，包括貿易壁壘上升和金融市場壓力。

註2：新加坡官方表示，儘管數字偏高，星洲仍持有零淨債務，因借款主要用於投資，且政府所持資產（如準備金和投資持有）超過其總負債。

註3：其前任曾蔭權採取較充實的財儲方程式，儲備包含3個要素，即（1）營運儲備：政府支出3個月，用於滿足日常現金流需求，並涵蓋財政年度裏支出超過收入的數月；（2）應急儲備：政府支出9個月，用以抵消經濟周期下行影響，或應對世界或地區不可預見事件的後果；（3）貨幣儲備：用以維持匯率穩定，為M1（即港元供應量）的25%（見1998/99年度預算案）。

作者是前運輸及房屋局長（2012-2017）、香港教育大學前校長（2008-2012，時稱香港教育學院）

原文網址：https://news.mingpao.com/pns/%e8%a7%80%e9%bb%9e/article/20260305/s00012/1772643734921

財政預算案 -- 繼續補遺 (3)

講完外匯基金，其實仲有野講。

不過，打左太多字啦，簡單講樣好笑野算。

*********

今日好多新聞頭條都講，數據園5.8億批地 港算力料6年增35倍 中標者承諾3年投資238億 孫東：嚴監察保兌現。

你再睇內文，就真係一片好景﹕

孫東稱，擬發展園區總樓面面積25萬平方米，當中近九成須作高端數據中心用途，相信中標者在完成土地移交手續後會盡快動工。創科局常任秘書長蔡傑銘稱，政府批地後會與相關公司訂立服務契約，他形容園區用地充滿挑戰，包括地方偏大及有不少斜坡，約10公頃土地僅兩公頃已平整，但中標者仍提出超越土地底價的金額，既對公帑有幫助，亦證明該公司對香港市場有信心。

要做咁多地盤平整，滿足咁多政府要求，5.8億真係超出土地底價，更加證明公司對香港市場有信心囉。

不過，丫，早10年前，將軍澳D數據中心地係幾錢話﹖

將軍澳2018年個數據中心地，是這樣的﹕

將軍澳5年多再推出數據中心用地招標，可建樓面面積逾120萬平方呎，屬歷來最大規模，上周截收9份標書，最終由新意網集團以逾54.56億元奪得，為出價最高的投標者。

上面沙嶺就25萬平方米，將軍澳就120萬平方呎，你求其當係11萬平方米多小小。就當係將軍澳地唔洗做斜坡平整物流運輸又更好，不過樓面面積就小一半，之但係地價就係將軍澳塊地多過沙嶺塊地大約9倍。

咁，冇咩既，「亦證明該公司對香港市場有信心」。

遲下北都有好多塊地，都應該好多公司好有信心既。

當然，我求其SERCH，你睇阿市場人士就真係無敵既。當個新聞講到﹕

以總樓面面積269萬平方呎計，每平方呎樓面地價約216元，遠低於中移動2020年火炭數據中心地每呎5,967元及新意網2018年將軍澳地每呎4,500元。用地中標者承諾於約42個月內開始營運，首三年投資額約238億元。

咁阿市場人士都仲可以咁講，就真係天下無敵﹕

高力香港估價及諮詢服務部高級董事林天智表示，是次招標採用雙信封制，非價格因素及價格佔比分別為70%及30%，中標價5.81億元反映政府有意以產業導向作優先考慮。

林天智認為，項目投資規模反映中標者對香港北部都會區中長期發展充滿信心。

***************

ANYWAY，黎緊洪水橋塊地，賣到幾錢，有幾多稅收返黎丫拿。

***************

丫，補多句，有人留言講﹕

「香港工作，深圳居住的香港人他日如果被追税真係唔好嘈」。

衣樣，應該都長遠先要諗既。

一黎，「深圳居住的香港人」又要繼續香港工作既，都唔算多；係深圳居住又係大陸做野夠期交埋社保既，就已經要交稅啦 -- 即係，九菜未夠多，唔割住。

二黎，唔係我講，不過傳聞阿前局長曾國衛係咁講過野﹕「他們來來去去還是那兩招，第一個把你所有錢給你凍結了，第二個就是拿你家裏人威脅你」-- 咁深圳居住的香港人又應該唔係太多屋企人係內地，咁暫時未需要驚住既。

淨係講今時今日，你係高才成家都係大陸，就可能要驚；香港人，都未洗驚住既。

****************

最後，補多句。

千頌C衣篇文可以睇。佢話比你聽，政府個「其他收人」好似追得上地價條數。

不過，衣條數同估預算案係米赤字就無關，事關阿波叔做盤數時，其實係用預算黎做﹕佢係預左利得稅其他收入係會升，所以佢係其他方面既開支先會增加。

問題就係，有冇數係無預計之下，突然多左好多或者小左好多。

今年預算案，收入就係印花稅，開支方面就係成個政府開支，都係出乎波叔預期，即係我好主力講既野。

你睇預算案入面個內部稅收既收入分析，我未睇都知大部份同預算差唔遠。你自己睇，利得稅係較原先多，不過只係多168億，薪俸稅都同估算差唔遠。反而，千頌C提到既博彩稅、飛機離境稅、以至酒店房租稅，都比預算既為小﹗

例如，酒店稅原本估係9.7億，實收係7.7億。比著我，一定抽波叔水，問下佢係米因為收左稅，令到原本住酒店既過夜客較政府預期小左﹗個度小2億，酒店房租稅係3%，咁真係小左幾多過夜住酒店旅客呢﹖﹗

衣樣野，我GOOGLE左，冇人問冇人講過架。

嘿﹗

至於2025/26年個博彩稅修訂預算，就小過原先估算，係向下修訂左2.9億；而2025/26個修訂預算，更加小過2024/25年架下。咁你問下團結基金，如果好似佢地建議，增加六合彩個博彩稅同埋下調佢老尾個分派比率，咁出年個博彩稅收入會點丫拿﹖

呵呵呵﹗橫掂都係，copy埋個團上黎，可以睇下「其他稅收」個估算同最終修訂，有幾攪笑。

anyway，我都係見千頌C講政府收入，我先睇下上面既野。

所以話，真係比人挑釁下或者睇人講下，先會再有動力去講的。

**********

題外話﹕

徐家健成日講政府加煙草稅後，個稅收不升反跌之類既攪笑野。真係，衣幾個其他稅收，都係幾攪笑。

咁我都抽句水先﹕

政府成日話迪士尼海洋公園蝕唔蝕錢都唔好理啦，事關會帶黎旅客會有額外消費增加值有其他經濟價值。咁而家收得個7.7億酒店房租稅，較預期小左2億，即係好多旅客原本過夜變左唔過夜啦﹗咁衣度小左既消費增加值，零售餐飲酒店都小左生意，阿波叔點樣補償返個社會呀﹖下﹗

你估下現任或者前任旅遊界尊貴，識唔識留唔留意到衣樣野丫拿。

****************

完。

財政預算案 -- 繼續補遺 (2)

上面好多字，咁黎緊落黎，簡而精。

之前提過既區景連 Kaniel最近又講外匯基金，仲要講到「由於外匯基金與貨幣發行的運作邏輯極為專業，即便具備所謂經濟學博士背景的人，也可一竅不通 ，因此有必要回歸基礎知識進行剖析」，就真係攪笑。

當佢講到外匯基金分「支持組合」同埋「投資組合」，再講到下面個段，佢真係唔心虛架咩﹕

另外一個部分就是「投資組合」(Investment Portfolio) ，旨在保障購買力，投資於股票、私募股權與房地產等非貨幣資產。今次陳茂波撥給「北部都會區」的資金，來源正是「投資組合」過去累積的投資收益，而非用於維持匯率穩定的「支持組合」。

因此，在技術層面上，這項撥款完全不會影響聯繫匯率的制度基礎。

佢講到「在技術層面上」，其實就已經係心虛。

即係咁，我未得閒聽羅家聰上個禮拜點講，不過，好簡單，如果「投資組合」淨係負責個外匯基金既購買力，咁我將成個「投資組合」轉撥曬去庫房，淨係留底個「維持匯率穩定的支持組合」米得囉﹖

我冇check明報衣個圖係米正確。不過，幅圖話而家「支持組合」同「投資組合」都係各2萬億左右。

咁你驚既話，唔想淨係考慮「技術層面」的話，米淨係將「投資組合」一半即係一萬億撥落去庫房囉。如果政府咁做，你話你技術層面心理層面實際層面whatever之上，對聯繫匯率的制度基礎有冇影響丫拿﹖

*********

當然，就好似區景連自己講，「外匯基金與貨幣發行的運作邏輯極為專業」，所以其實佢都唔太識 -- 我都唔太識，不過真係要識小小歷史，你先明今次波叔個邏輯問題既。

區景連提到衣段，就有d正確，不過大部份攪笑﹕

金管局總裁余偉文曾多次側面提到資產表現受港股美股波動影響，我們大致可以估算，投資組合應該會投資高Beta的資產。陳德霖時代也暗示過會投資大陸相關資產。曾有精明的財經記者抽絲剝繭，找到海外一些地產項目的招標文件出現了金管局的名字，我們也可以順藤摸瓜推論這個投資組合原來也對不動產感興趣。因此，這比較像一個封閉式私募基金，但多年以來，回報不算太差，所以也沒有人深究內裏葫蘆賣什麼藥，總之賣到藥就可以。

部份正確既係，衣個投資組合「原來也對不動產感興趣」。不過，更加正確既講法係，衣個「對不動產感興趣」既，係「投資組合」入面既「長期增長組合」。

係之前講外匯基金時，我應該講左，衣個「長期增長組合」，係大約2010年左右，金管局為左要增加回報，所以係「投資組合」再撥5%出黎，攪左衣個「長期增長組合」。

金管局要另外再攪衣樣野，其實正正係因為佢個「投資組合」唔會投資係「高Beta的資產」，都仲係玩下外匯美債為主，所以先要整個「長期增長組合」去搏。

我唔搵特登資料，不過求其SEARCH，你去金管局官網，都會睇到各組合分佈。我之前都講過，長期增長組合每年大約都有10%以上小小回報 (唔計COVID幾年，我寫個時未有COVID)，不過唔計衣兩年，成個「投資組合」回報之前幾年，其實都係5%左右甚至再低。

所以，區景連講既，係部份正確，不過大部份係錯。當佢係上面個QUOTE話，「我們大致可以估算」，其實憑佢衣句，就知佢唔識，唔知其實金管局過去甚至係佢網頁，都有好清楚交待鳥。

補多句，我突登SEARCH，其實就好易已經搵到外匯基金過去幾十年既每年回報。你睇幅圖，由2009年開始，其實個回報都好麻麻，係有9年超過4%回報，不過同時間有8年係底過4%，2015年仲可以係蝕外匯蝕到負回報加埋蝕左183億 -- 佢係COVID後靠老美先港股衣兩年彈起，個回報先見得下人。

所以，區景連係我上面個QUOTE話，「但多年以來，回報不算太差，所以也沒有人深究內裏葫蘆賣什麼藥，總之賣到藥就可以」，其實又係攪笑。

************

當然，如果你再熟波叔同金管局歷史，除左有好多鬼故之外，其實波叔同金管局係2018年個時，曾經講過，可以投資一帶一路；而金管局係2016年左右，都攪左個基礎融資辦公室阿IFFO，用而家既講法，就係幫一帶一路出海。

當然，你睇個IFFO個既新聞稿一欄，係2019年之後，仲有幾多新消息呢﹖

習大早兩年都小講一帶一路，而家仲要諗緊委內瑞拉同伊朗既投資會點。

ANYWAY，我估金管局同波叔當年話要考慮個長期增長組合同國企一齊出海，不過最尾應該冇點做。

**************

當然，我無啦啦講一帶一路，其實唔係抽水。

我之前就話，「你甚至可以煩D，問埋波叔，其實而家撥走1,500億，計返3%回報都有45億。咁究竟政府係考慮轉撥外匯基金同發債既考慮時，點解情願放棄個3%回報都唔考慮用發債處理﹖」

咁而家波叔開口埋口都話，將外匯基金個1,500億轉撥去基本工程儲備金，其實都係投資，同放係外匯基金係冇分別，「只是轉換個投資方式」。

佢衣句line to take其實好靚，扼到好多人。

不過，咁你其實應該問既係，既然「外匯基金於二零零九年開始透過長期增長組合投資私募股權和房地產」 (衣句係出自上面政府答立法會質詢條LINK)，咁點解唔可以係現時外匯基金既「長期增長組合」，或者係而家既「投資組合」入面，再界一忽例如2千億去做北都或者香港發展﹖

你界出黎，係現有做法，亦都唔涉及轉撥既問題，咁點解唔簡單介出黎既﹖

政府緊係會答，因為靈活性因為咩安排，例如「讓政府按照產業政策發展優次靈活運用資金」 (波叔冇講過衣句野，不過衣句野係米好似佢D官腔呢)，轉撥係最合適既做法。

我既答案係，你放外匯基金，要交代個投資回報架麻，咁所以，緊係唔可以將筆錢繼續放係外匯基金啦。

你有衣個答案，就知道，波叔講咩 外匯基金累計盈餘同轉撥都「只是轉換投資方式」，就係廢話 -- 外匯基金投資，要講要睇要計要交代回報，你轉撥左之後會唔會交代個1,500億既回報丫拿﹖

外匯基金同轉撥，個投資考慮同收入回報，根本係兩回事。

******************

再當然，唔好失憶，波叔係5年前都已經將未來基金撥出部份，做衣個香港增長組合，最後就比埋港投公司去用。

係今年預算案，又話「港投公司每一元的投資成功帶動超過八元的長期資本跟投，高效匯聚國際市場的耐心資本力量，合力推動前沿科技加速發展和應用創新。考慮到港投公司六百二十億元的起始資金已大致分配，我們會適時注資，進一步推動創科發展和產業羣聚。」

咁所以，我再退一萬步啦﹕外匯基金個累計盈餘，與其轉撥去基本工程儲備金，點解又唔轉入去港投公司﹖定係下年預算案，先又再玩轉撥比港投丫拿﹖

當然，個問題係一樣。

港投自己唔講個回報率，不過坊間都計到數。你見顏寶剛，佢又係煩過我，真係好長氣。

咁求其搵經濟日報，佢係咁講﹕

「港投公司周四（4日）發布《2024年年報》，去年投資收入23.45億元；經營利潤22.52億元；總資產640.07億元。

值得留意是，截至去底港投總資本（即港府出資及留存收益合計）634.92億元，粗略推算，相關資本回報率約3.7至3.8%左右。金管局管理的外匯基金2024年投資回報率約5.3%。」

咁你估，如果港投投更多北都，你估佢個回報率會變成點丫拿﹖

「做定期仲好過佢」。

************

未完。

財政預算案 -- 繼續補遺 (1)

米同其他人留言挑釁我呀﹗

不過，common baby，歡迎留言挑釁我，令到我有動力再講 -- 無錯，我係港女，所以留言，我都當係挑釁的。

呵~

*********

正經，開波。

米 留言講個樣野，我都聽過下。除左工程，我都聽過政府去年cut左好多外判。之但係，咁樣係唔會令到經常開支同非經常開支，各自慳到百幾億既。

咁睇完米既留言，我就唔怕煩，做左樣野。

你去預算案，睇佢各部門既預算開支摘要，其實就有樣咁既野，列出各部門係2025/26年既核准預算同修訂預算。

我試過扔份野去Perplexity，佢同我講話自己睇唔到PDF喎﹗可能grok會睇到，不過唔好煩，我轉佢去excel同我計數。

睇個表，淨係睇億億聲既大數﹕

土木工程署小2.08億、海關2.61億、衛生署11.4億、律政司3.98億、環保署4.46億、消防署2.58億、食環2.37億、公務員一般開支3.57億、產業署1.87億、公務員事務局1億、商局經14.72億、文體局10.99億、發展局規畫地政科2.92億、發展局工務科1.14億幾、財經局庫務科2.03億、醫衛局2.42億、民青局1.02億、房屋局2.06億、創科署18.72億、經貿辦1.28億、路政署1.9億、警務署14.95億、法援署2.01億、康文署2.2億、雜項服務15.99億、選舉事務處2.86億、社署59.3億、運輸署19.05億、在職家庭及學生資助處7.24億

衣度加埋，有218.72，即係波叔講既 今年較原來預算用小左331億 既66%。咁加埋其他部門細數同埋其他工程開支，差唔多啦。

上面係跟返個總目順序打出黎。不過，要留意樣野﹕

1.上面係「2025/26年核准預算-2025/26年修訂預算」，即係每個部門同原來預算比較，駛小左幾多錢。

2.有D部門洗小左唔係好多，不過按百份比其實好多。例如，選舉事務處駛小左2.86億，不過佢個核准預算係18.25億，即係駛小左15.67%既錢。

3.同樣道理，社署駛小左59.3億，不過佢核准預算係1251.68億，即係只駛小左4.73%既錢。

4.當然，仲有樣tricky位﹕唔同部門撥款性質唔同，例如有D部門好似商經局既撥款，有好大部份係資助金，咁同佢地既恆常開支或者係一次過既資助金又唔同 (商經局比競委會之類資助金就年年都要比；創科局某些資助金係基金，幾年或者衣世只係比一次)

5.另外，我冇show出黎，係得3個部門用多左錢，包括財庫局財經事務科、物流署、同埋立法會。至於庫務署就要比個獎佢，佢只係用小左1萬4千蚊，同個預算差好好好好小。

咁講正題。

你睇上面個表，以10億計既部門，係有衛生署11.4億、商局經14.72億、文體局10.99億、創科署18.72億、警務署14.95億、雜項服務15.99億、社署59.3億、同埋、運輸署19.05億。

你要再問點解佢地用小咁多錢，就要係個別部門既預算搵線索，衣樣係件好煩既事。

實際操作上，你首先要睇各總目 (即係部門) 入面唔同綱領 (即係政策範疇) 入面有冇講到特別野；之後可以再睇差唔多尾「財政撥款及人手編制分析 」，睇佢點講未來一年預算點解增加，再推佢係米有咩上年冇做留左比出年做。再之後你要睇佢個編制係米突然+已經下趺，所以原來人手編制小左。

除左咁之外，你可以唔用政策範疇去睇，純粹睇佢最尾用「運作開支」「開支帳目」既角度去睇盤數。

要睇，就好曬時間，事關除左睇今年，你仲要比較以往有冇咩慣例，又或者係某些政策係米有咩改變，令到個開支突然唔同左。

不過，我求其快手睇過下，有D有趣發現﹕

1.先講衛生署。

以政策綱領黎計，佢法定職責即係做規管用小左1.幾億，預防疾病0.5億、醫療護理1億、公務員醫療3億。以經營帳目黎計，佢個表入面「分目000運作開支」入面既薪酬相關開支，係用小左4億，即係佔用小左既錢大約4成左右。

衛生署其實唔突別，好多部門都係咁，所以淨係用黎做個GENERAL既示範。

2.商經局就好有趣啦﹕

a.上面話，商經局成個局用小左14.7億。不過，你淨係睇佢「工商業」綱領，淨係一個綱領就用小左14億，即係佔用小左錢既9成。

佢係最尾解出年個預算時係咁講﹕「二零二六至二七年度的撥款較二零二五至二六年度的修訂預算增加9.568億元(8.3%)，主要由於「中小企融資擔保計劃－擔保產品」在二零二五至二六年度的現金流量需求較預期為少」--佢衣度既講法係，出年預算有增加架，不過係因為今年個中小企融資擔保需求係細左。咁即係咩﹖即係預算增加係因為以往需求減小，撥左需求去下年﹖﹖﹖佢個邏輯，都好攪笑 -- 不過，衣種寫法，其實又係經常出現。 

咁其實，佢係米想話，佢「工商業」上年用小左14億，好主要係因為擔保計劃小左人申請，不過唔好意思講出黎呢﹖

至於點解小左人申請﹖係米因為，之前政府拉左批人詐騙個計劃，所以個計劃上年停左一排呢。呵。

b.佢「電訊」綱領由2.6億減到去修訂左之後既1.669億 (出年個預算仲跌到去1.256億)，其實就唔算多，不過又係有趣。

你睇佢又係最尾個解畫講點解出年個預算會小左多，係咁講﹕「主要由於「擴展光纖網絡至偏遠地區鄉村資助計劃」的現金流量需求減少」。

see﹖

以往好多左仔話，資助鄉村裝光纖好呀，要比多d錢預多d錢呀。頂，你攪掂地權先啦。同埋，電訊商咁怕煩，不如用獲用其他野啦 -- 再唔係，電話上網4g5g都唔係好慢丫，咁米整多d基站米攪掂囉，仲鋪乜春光纖呀。

至於點解會有d咁既計劃﹖米因為10年前有錢，政府米求其應酬班人，攪d咁既野囉。當年問左財委會扲7.74億，應該冇人記得；不過，用唔曬，唔知係會回撥返，擺係度，定比ppcw亂用埋佢就算。

c.之後有趣既，令到我想講既係，「競爭事務委員會」綱領，核准預算係1.87億，修訂到變左1.32億，小左3成；出年預算，又上升返去1.89億。

政府係咁解﹕「二零二六至二七年度的撥款較二零二五至二六年度的修訂預算增加5,730萬元(43.3%)，主要由於競委會按近期的調查和訴訟進度預計，其訴訟工作在二零二五至二六年度所需撥款將減少」。

拿拿拿，記唔記得2024年個單寬待協議呢﹖我頭先求其搵，其實判左未架﹖單案係繼續定終止左架，阿神探。你見網上、競委會自己、以至立法會，都冇人再講衣單野架。

競委會前排突然間拉左咁多圍標，佢個撥款增加，係FOR衣d訴訟，定要攪返地產代理佣金個case個pat屎架﹖

anyway，要講曬咁多個部門，就好煩，不過下面衣兩個部門其實先係重要，先真係要講 -- 所以，上面其實唔係最重要既﹗﹗﹗

3.創科署個修訂預算向下調整左18.72億既。你睇佢「綱領(4)：基礎設施支援」，個BUDGET係由18.8億，變左淨係用左0.8億，係小左95.7%﹗不過，佢黎緊一年，又用返18.77億喎﹗

你睇佢解畫，佢係咁樣講﹕「二零二六至二七年度的撥款較二零二五至二六年度的修訂預算增加17.965億元(2 223.4%)，主要由於設立不多於3所生命健康研發院的推行時間表有所更新，以至現金流量需求有所調整。在二零二六至二七年度會淨減少3個職位。 」

see﹖原來，今年應該成立左既「3所生命健康研發院」收左皮攪唔掂，要出年先開到波，所以淨一項item，已經令成個政府BUDGET用小左18億，已經佔個用小左既150億非經常開支既10%有多鳥。

4.最後睇既係社署。

佢整體用小左59.3億。

吊鬼既係，如果你睇佢「綱領2社會保障」，係已經用小左接近50億。

你再去睇佢最尾個經營帳目，兩個社會保障既大項，第一項「綜援」係用小左6.4億。不過，睇埋佢第二項「公共福利金」，佢核准預算係579.48億，修訂預算係541.87億，係用小左37.61億﹗而佢未來一年個預算，又去返618.72億﹗

「公共福利金計劃」係乜黎﹖佢係咁解﹕「向合資格人士發放傷殘津貼、高齡津貼和長者生活津貼，以及廣東計劃和福建計劃下的高齡津貼和長者生活津貼。」

阿哥，衣樣野可以估錯左37.61億﹖個度差唔多係1成喎﹗

我懶，不過我都好好奇，睇返以往估錯幾多。早衣幾年，大約估錯30億左右，再早五六七年，當時預算冇咁多，不過都係估錯20億或者唔夠。

今年估錯37.61億，即係6.4%。

社署同庫務署庫務科班友，個腦裝屎架﹖以往年年估曾5%以內都算，衣幾年係超過5%喎﹗

************

睇完上面堆野，你就知點解，我上星期講預算案時，我話唔想詳細睇個部門預算啦。事關，你淨係要睇佢地用多用小左錢，其實都好煩。

你要搵埋個解釋，估下點解用小左，就更加煩，一般人係做唔到。就算你係庫務署署長係首長級公務員，好熟政府盤數，不過你都唔可能了解各部門既政策同用錢細節。

例如，點解創新科技署攪個生命研發院會遲左咁多，攪錯左盤數﹖

又例如，點解社署年年估個公共福利金都係估錯，衣幾年仲要越黎越錯﹖

部門交單上黎，你坐財經事務局下面庫務科又或者係庫務署個位，不過唔留意或者冇詳細問，就做盤數時，都有機會錯。

************

當然，你睇林妙茵擒晚講，阿波叔仲做緊議員時，阿波叔話，香港應該要整個類似外國既「預算責任辦公室」，即係咩OBR。

拿拿拿，你睇英國新聞，都知衣個OBR係仲存在。而OBR做既野，其實就係我上面做既野囉。你要睇budget，係要由條大數，再各個部門細數去睇，睇佢有點變化 -- 已經唔講林妙茵聲稱OBR會睇埋「評估.....政府在預算案中列出要做的事情是否有超過50%的成功機會」。即係，你係學者係稅務專家JAK，不過你點評估個生命研發院係該財政年度落實既可行性﹖

ANYWAY，上面既野，淨係講左幾個主要部門，都攪左我個幾鐘。

所以，我想講既係，我真係勁，真係唔讚自己都唔得﹗

如果衣度真係有人睇咁長篇咁technical既野，我都會讚，事關衣D野真係好專門，同埋virtually係冇用。

***************

anyway，結論係，上面想講既係，今年點解用小左咁多錢﹖

係因為，有8個部門已經用小左10億以上；再加埋其他用小左億億聲既部門，個度已經加埋係超過2百億。

至於點解用小左咁多億﹖

有好多原因，例如社署計錯數，仲要係個離譜程度較過去更勁。又例如，創科署個18億計劃延左期，跟手商經局個中小企擔保計劃又可能用小左好多錢。

你要再詳細知道點解出左事，其實就真係要問政府先會有答案。例如，個中小企擔保計劃係用小左錢JAK，不過用小左幾多﹖係米其他bud fund之類同樣又派小左錢，所以原來個擔保計劃唔係用小左咁多﹖

***************

最後，補多句。

林妙茵講OBR，其實你唔攪OBR，都有機會有唔同手法，去了解份預算案既。

最出名既係，特別財委會既提問，即係乜春 BUDGET Q。

以往出左預算案，尊貴就大約會有5日左右去問政府書面問題。係泛民時期，就真係有尊貴會問好多問題，例如衣度話泛民係度時，大約係問6千到7千條問題 (而家完善左立法會，多左咁多人，都係3千條左右啦)；上面條LINK都有講，張超雄痴左線，會問成1000條問題。

當然，你有睇過，都知當時有d問題，係翻炒往年，但求充數。不過，有d問題，又係要翻炒，事關每年要扲個UPDATE數字。我唔駛查返，張超雄要問成千條，肯定係因為佢要扲院舍之類最新數字，你要有衣D數字，先可以做政策評估，估下社署既資源運用服務需求係點 -- 你唔係特別財委會問，就好多時政府係唔會答你。

而政府部門會係特別財委會答你，都係因為，大家對口單位都知道你年年都問，咁我米順便年年update埋自己囉 -- 我好相信，好多時係，你未入Q，唔同政府部明都估到你會問，咁我都整理定數據先。

有D奇怪既數，真係好可能係，你唔問，政府自己內部都唔整；你問開，政府自己整開，米大家對到口，年年有功課交囉。

如果用公共行政角度，衣D超大量budget Q係好浪費時間。不過，衣D問題，可以增加政府既透明度同數據應用。除左咁之外，你問得多，政府係推政策前先會諗清楚，唔會有D攪笑巴士安全帶出黎，又或者好次今次預算案要做咁多預算修訂咁。我睇過咁多年buget，正常情況下 (即係唔好理家超見左習大大先啦..........)，點可能出現咁多向下修訂情況，仲要衰到個生命研發所18億竟然講完做唔到喎﹗

當然，講返正題。

要令自己令公眾更了解份預算案，你段數高小小，其實就可以好似我最近衣幾篇文咁樣，問政府究竟點解今年駛小左咁多錢，叫佢解釋；段數再高小小，就可以好似我咁，就某幾個特別部門奇怪既ITEM去問。

段數最高既，就好似我咁，先自己計左次數，再問點解社署估個公共福利金計劃就年年都錯，仲要越錯越離譜，甚至要政府比返過去20年每年個預算同修訂既差額 (你自己計就自己知，政府計出黎就係官府公開文件，是有分別的)；之後再問，佢衣幾年點解錯得特別離譜 -- 究竟佢估既時候，係用左咩MODEL咩假設，負責估算既又係社署入面邊個部門，有冇人要問責，甚至係米要搵第三方檢討，究竟點解會錯得咁出色。

衣d，就係林妙茵講既野 -- 就算冇OBR，其實議會都可以迫到政府做野，要政府係個預算案入面，以後做更多解釋可行性交代之類既野。

************

當然，我上面講既，其實都係廢話。事關，而家個議會有冇人識，就後話，反正而家都油治及興，行政主導鳥。

而坊間，你話咩稅務專家經濟學家，我估大部份都係唔識。就算識，都唔會好深入，亦都唔夠膽講 -- 阿哥，衣D野同升唔升職無關。係行政主導下，亦都唔關你學者事，咁無謂研究啦。

所以，你見D友淨係講咩 發債當收入，或者講咩 公務員人手同人工有空間削減，衣D就真係廢話。

***************

未完。

財政預算案 - 補遺

其實我都寫得太複雜，好多野真係可以簡單D。

********

我上幾個post講到好多例子，入面提到，香港利得稅主要貢獻行業 (地產、銀行)同大陸醫藥研發AI公司，分別係交左幾多稅。

如果將衣D資料做最簡單應用，用個極度簡化既情景，就係咁樣﹕

假設1﹕政府之前完全冇發任何債券，包括零售債券、綠色債券、機構債券等等

假設2﹕為左北都發展，政府一次過發債9,000億，如果息率係4%，咁唔好理佢發幾多年，咁每年既利息開支係360億。

假設3﹕個9千億一次過用曬黎做北都。

咁如果簡單將個D例子應用落去，就係咁樣﹕

要處理既問題係，個每年360億利息開支，如果純粹由利得稅去支付，情景會係點﹖

咁為左方便起見，我甚至簡化到，我當一開頭就所有企業就位，全部都開始交稅。

用返我之前講既資料﹕

小鵬係23/24年交左0.69億稅，要521.7間小鵬先應付到；

純粹講藥物研發﹕中生製藥交左4.92億稅，要73間中生先交到；

唔講中生，講CRO，即係真係藥物研發外包，藥明扣物遞延稅項實交8.89億稅，咁要40間藥明先得；

如果講信達生物，佢仲係蝕緊錢，今年交緊0.16億稅，即係要2,250間信達生物，先可以支付到360億利息開支。

上面係極度簡化，所以攪笑，不過又好清楚講到比你聽，阿波叔講既，「發展北都後稅收會增加可以還錢」既故事，其實係要幾有想象力 -- 係喎，40間藥明黎香港米得囉，不過藥明既收入係186億，係全國以至全世界幾多實驗室加埋廠，先每年提供到8.89億稅。

你如果係搵到信達黎攪個實驗室，又真係可以話搵到龍頭企業黎，帶動咩人才科研官產學研呀。不過，信達係仲蝕緊錢，交個千零萬稅。

所以，其實用上面咁極度簡化既「企業可以提供幾多利得稅貢獻」，就會明白發咁債，一次過攪咁多高科技試驗田去「擴充香港經濟容量」係幾咁危險。

*****************

口痕，咁我又再複雜返，用返政府盤數去睇。

先睇下政府今年財政預算案入面，中期預測盤數﹕

2025/26年既修訂預算，「未計入發行及償還債券款項的綜合赤字 」係1004.9億，即係發債9000億之後第一年就要用1,000億去冚2025/26年既開支。

衣1,000億赤字係點黎﹖係由非經常開支，即係「工務工程-地價入收」得出黎既赤字。

你再睇中期預測個「非經營帳目」，其實每年都係有大約1千億甚至更大既赤字。

咁如果根據假設2，政府每年利息開支係360億，咁政府有冇能力每年還衣筆利息開支﹖

咁我好好心地，唔理個非經營帳目赤字。

你淨係睇經營帳目，入面既經營收入減經營開支，今年有512億盈餘，未來幾年百零億，去到2028/29年就開始有4百億以上，咁米好似夠比360億利息囉。

不過，你睇清楚D，點解個收入增長會咁快既﹖點解去到2030/31年個收入預測，比起2025/26年會多成千億，即係5年間增加左差唔多15%﹖

就算好似預算案261段咁講，政府修訂左稅務條例，「（二） 我們去年修訂《稅務條例》，以落實經合組織的方案，向年度總收入七億五千萬歐元或以上的大型跨國企業集團徵收全球最低稅和實施香港最低補足稅，預計由二零二七／二八年度起，每年可為政府帶來約一百五十億元額外稅收」，不過個收入都唔會無啦啦多成千億架喎﹗

你真係要搵原因，個原因係，除左26/27年會轉撥370億債券基金落去政府綜合帳目之餘，佢中期預測個footnote仲係咁講﹕

「記入經營帳目的投資收入包括政府一般收入帳目下(收入總目物業及投資項下)的投資收入及土地基金的投資收入。二零二六年的投資回報率為 4.8%(二零二五年為 4.4%)，而二零二七至二零三零年則假設介乎 4.4%至6.9%。」

佢假設個投資回報率係4.4%至6.9%呀，大佬﹗

講多心﹕你都仲可以話，如果我假設9千億係一次過用曬黎做北都，咁非經營帳開支米大減，咁非經營帳米唔會有赤字，咁米可以將賣地收入用黎還債券利息囉﹖

少年，你太天真鳥。

你唔記得我講應計帳時，上年個基本工程儲備金個承擔額係8千幾億，今年已經係接近1萬億﹖衣1萬億，好大部份係非北都工程。

*************

不過，更加大既問題係，無論係用個極度簡化既例子，定係用上面講個盤數既問題。

上面講既360億利息開支，其實係大幅低估。有好多原因，求其講都得﹕

1.首先問題係，9000億係一定唔夠。同時間，係現實操作上，政府既9千億債，係上限，係到期再發。所以，政府發債，雖然利息開支上限，可能真係360億，不過個總利息開支，你係估唔到的；

2.個利息開支上限，其實都唔止360。事關，我假設息率係4%。你如果睇返，基建零售債個息率係3.5%，不過個認購額只有89%，係唔足額認購。

你唔睇零售債，你睇個機構債券，2024年有次15年期投標結果係3.62%，2025年8月20年期就3.8%。

咁唔睇美國減唔減息，不過你香港政府發咁多債，之前講過港鐵發永續債要5%以上，衣度又搵到港鐵上年發左3個年期債券，票面息率介乎4.375厘至5.25厘，咁你話我假設息率4%係米保守﹖港鐵其實等同政府，港鐵30年期要比5.25厘，咁政府遲下發債個息率係點﹖

亦所以，抽句水﹕田北辰早幾個星期話，政府可以發9000億債去做3大機建同其他工程，年息估計係270億，就真係低能。佢講年息270億，係3厘，仲低過個 認購不足既機建零售債。佢憑乜覺得政府發債用3厘息就夠吸引力呢﹖佢講緊發50年呀﹖

所以，4%息率，我覺得係樂觀估計黎既。

美債10年期而家都應該仲有4厘幾，老美可以印銀紙還債之餘，全世界央行都仲有美債需求；香港聯繫匯率咁穩固 (﹗﹗﹗)，但係唔可以印銀紙還錢，最終點都真係要靠財政盈餘去還錢，咁你話個息率要幾多﹖

你問莊太量麥萃才啦，我都唔明，點解佢地會將香港同外國甚至美國比，講到發債冇咩問題，香港可以繼續調高發債上限。

************

除左上面講既問題之外，其實「發展北都後稅收會增加可以還錢」既故事，仲有好多問題。

例如，好多投入北都既錢，其實係公共設施，冇稅收比政府的。

我唔講道路渠務公園之類，北都仲有大學城，有牛潭尾醫院，衣D係唔會提供到稅收；你河套區用左咁多錢做地盤平整之類，其實有部份係做左生態區。再加上，成個北都其實有公營房屋發展，衣D都係唔會提供到稅收去支付個債券利息。

你如果睇埋北都有幾多衣類公共工程，咁就可以再reconcile另一樣野﹕

阿波叔同好多友實會話，北都除左利得稅收益之外，仲會有賣地收益呢。你講得衣樣，咁唔該話比我聽，究竟會賣到幾多地，又夠唔夠COVER衣D公共開支﹖

我仲未計，講到北都既利得稅講地價收入，其實波叔係預算案入面，有咁講到﹕

127. 為進一步吸引企業落戶香港，去年《施政報告》提出制訂促進產業和投資的優惠政策包。

128. 我們已就此制訂初步框架，會考慮企業的所屬行業和技術水平、為香港帶來的經濟貢獻和就業機會等。政策工具包括批地安排、財政資助或稅務減免，優惠稅率為半稅或百分之五，我們將於年內提交條例修訂草案。

咁當波叔不停講，北都係經濟擴容提供新增長點仲可以有新稅收返黎，咁北都其實可以貢獻返幾多比庫房，等政府有錢還債丫拿﹖

你一方面話有賣地有稅收，另一方面就話要有優惠政策包，咁真係唔知佢點計條數。

*************

唔係題外話。

所以，你見今日明報衣個關於河套區既標題，其實就好嘔心﹕

創科局：河套經濟貢獻料可達年900億 與新田各注百億為「鼓勵投資」 長遠只需政策支援

佢嘔心在，而家好多人質疑既唔係河套區或者北都有幾多經濟貢獻，甚至係冇人理佢有冇貢獻。

質疑既係，發咁多債，政府有冇能力償還。

你再睇上面條link既內文，就更加嘔心﹕

政府擬向河套及新田兩公司注資100億元，蔡傑銘表示，政府的確希望做到「乘數效應」，曾推算如河套香港園區全面落成，經濟貢獻可達每年500億、甚至900億元，政府有信心做到；單看已啟用首3幢樓宇的招租表現「完滿」，而市場對發展河套土地的興趣濃厚。

阿常秘暨阿港深創科園區主席，你係米咩官場fit碼我就唔知，不過你好有潛質做局長。

因為，你推算經濟貢獻個range闊到500億到900億，你都可以唔面紅咁講出黎﹖你不如話50億到1萬億都有可能丫。

我唔記得邊篇文，不過我早排就講過，每當你見到D官出黎同你講某樣野既經濟貢獻社會效益，你就要好小心﹕講得衣D，你就知道，個樣野本身肯定係蝕錢，所以要用衣D虛無既野去justify個樣野。

以往講海洋公園講迪士尼，甚至再講好多乜乜基金，就會好強調衣D野。

我而家可以再加多句﹕如果政府再同你講乘數效益，即係阿常秘係明報個報導入面咁講，就一定會出事，證明件事本身就冇回報，要靠「乘數」。就好疫情期間幾次派消費券，都係講乘數效益，就真係種下今天的果鳥。

講多句，唔係題外話。

我求其SEARCH，你睇下旅遊事務署係2023年講迪士尼，入面係點樣講經濟效益﹕

香港迪士尼所帶來的經濟效益

3. 根據旅發局的統計數字和香港迪士尼的營運資料：

(a) 香港迪士尼訪客於2023財政年度在香港的額外消費(與沒有香港迪士尼的情況相比)為115億港元；

(b) 計及香港迪士尼訪客額外消費所產生的直接及間接增加值，香港迪士尼於2023財政年度為本港經濟帶來約71億港元增加值，相等於本地生產總值的約0.25%；以及

(c) 香港迪士尼創造了14 000個職位(以人工作年計算)。

香港迪士尼過去18年的營運合共為本港經濟帶來1,296億港元增加值，相等於同期本地生產總值的0.28%，期間為前線員工和旅遊業界創造的職位達290 700個(以人工作年計算)。就更多有關香港迪士尼在聘請和培養本地人才方面的重要性，詳列於下文第9段。

你見到上面個PAT野，基本上就同阿波叔以至常秘局長講北都時，講既都係一樣邏輯。

我地大家要講創造職位講咩增加值 (政府搵親既顧問都係講衣D野架啦)，不過要講究竟實質投入回報係正定負，比左咁多錢就有冇錢賺呢﹖

「我地不如講返個項目有幾多經濟價值啦」。

***************

講完盤數，不如我地又講返抄牌啦。

早個月，阿處長講話，政黨倡警方減夜晚抄牌谷消費 周一鳴指定額告票去年已跌近50萬張，咁我又update下個數先。

根據預算案總目122﹕ 2024年個實際違例泊車定額罰款數目係254.3萬，2025年就係206.8萬；而2026個預算數字，都係206.8萬。

咁加返落去我之前個表，updated完就係咁﹕

2015年 -132.6 萬

2016年 -158.8萬

2017年 -184萬

2018年 -201.2萬

2019年 -141.4萬

2020年 -270.7萬

2021年 -329.8萬

2022年 -336.3萬

2023年 -301.2萬

2024年-254.3萬

2025年-206.8萬

2026年-206.8萬 (預算)

*上面既數字佢會有小小幾萬既修訂，不過唔理喇

WELL，真係小左50萬喎﹗你睇返上年個總目122，其實2025年個預算數字都係254.3萬，即係2025年個實際數字係小過預算。

咁而家突然之間唔驚破窗效應，咁比返個叻佢。

*************

口痕，記得樣我想講既野，「不如我地講返政府盤數丫」。

睇下個冇乜人講，係開支及收入分析入面既預計展開既主要工程。

今年展開工程大約係850億，除左北都之外，將軍澳兩個填海應該好多百億。

另外，個綜合廢物管理設施二期即估IPARK2，就真係延左咁耐，唔通終於可以批錢開工﹖衣度又係好多錢，又係幾百億 -- 不過延左期咁耐，阿局長真係英明，咁都唔洗陪曾國衛一齊被炒。

ANYWAY，想講既係，你睇返上面我COPY左出黎「中期預算」幅圖，睇下政府未來5年個非經營開支係點﹖

係由2025/26修訂左既1,872億，去到之後幾年既2千億樓上。

以往衣筆錢好多都係基本工程，之但係，你睇埋個中期預測附註e既非經營開支breakdown，入面個「政府投資基金」，其實係衣兩年既幾十億，變到達兩年既百幾億。衣度，好可能係預算案講既咩一百億創科產業引導基金。

ANYWAY，黎緊幾年個基本工程儲備金開支每年都會係1700億樓上，咁你話個地價收入就真係，繼續靠發債囉。

***********

題外話，你見波叔同政府新聞網都話，未來幾年基本工程開支預算係1280億，其實就真係攪唔掂。

你睇個中期預測，個基本工程儲備金開支係1700億樓上；你睇再詳細個基金開支分析，就話係1500億左右 -- 政府唔係扣埋基金入面個土地徵用個2千億，所以將個工程開支講做1280億呀麻﹖﹗

如果係咁，就真係語言藝術。

ANYWAY，咁講開又講，我又回帶都要講多次。

你睇個中期預算，佢講到工程承擔額係咁講的﹕

18 預計截至二零二五年三月三十一日及二零二六年三月三十一日止，基本工程尚未支付的承擔額分別為6,869.28 億元及6,190.1億元，當中部分為合約承擔額。

衣個講法，同應計制盤帳既工程承擔額講既9千億，係有分別。咁好相信，衣度現金制講既係，「尚未支付」，應計制講既就包左支付不過未完工 -- 當然，中期預測衣條數，係可以變，例如工程預算增加超支，要扲追加撥款，咁個支付額就會增加。

所以，睇應計制盤帳，係有唔同睇法的。

************

又講左technical野添。

不過，都係冇心機睇各總目，例如醫管局今年既撥款會唔會小左呢﹖

咁，所以，完。

財政預算案 - 動態調校下的借貸渡日 (6)

補多句，講埋我早幾個星期見到單新聞。

*********

你話發展河套區，攪咩洪水橋新發展區，要做咩科技城，其實都冇問題。

好正路咁講，其實香港規劃2030+都講過衣幾個計劃，衣D計劃唔係石頭爆出黎的。

之但係，以往政府做規劃，係慢慢一個個區去做。以往既政府，唔會唔理財力，唔理發展規模，同時做咁多基建。

而家同一時間做，你冇錢，會搶高成本。你同一時間做咁多高科技試驗田，出事時冇位比你做改變 (WELL，例如，唔知大大做乜退位讓賢，到時又唔攪衣D野，咁點算呢)。

*********

除左上面講既政府成本，其實仲有好多隱藏成本。

例如，前排睇到新聞，講到中電係北都興建左3個變電站，跟手仲會有10幾個黎緊。D新聞講到好似喜事，咁我就諗到個問題。

當新聞入面講到，「中電指出，已建好的河套西、馬適路及古洞北變電站，合計供電能力相當於現時4至5個香港科學園的用電量；而河套西變電站現正為河套香港園區已落成的建築物供電，現階段用電仍在起步，遠未達設計總容量」。

咁我就想問，中電係《管制計劃協議》之下，佢既利潤係點計算﹖係固定資產平均淨值8%。

咁無啦啦興建左咁多間變電站，電費會點算﹖

衣個係好吊鬼既問題，我有睇開電力咁耐，到而家都未遇過未考慮過衣個問題。

即係咁，你睇下以往中電興建變電站，係確定個地區有需求先會興建。所以，啟德係啟晴邨入伙先有個變電站，將軍澳工業村都係因為要興建數據中心，先係2014年攪左個變電站。

以往環境局係聲稱會嚴格把關兩電既資產設備開支，以免中電資產膨脹，瘋狂加電費。

咁而家河套區未開始運作，就攪左咁多變電站，咁理論上同實際上，每個變電站都要扲返8%回報啦。

又之但係，河套區未駛用好多電架喎，「現階段用電仍在起步，遠未達設計總容量」架喎﹗咁個資產唔發電，發電量追唔上，之但係個8%准許利潤已經生效，咁點算﹖

米係現有客戶食左佢囉。

咁即係咩﹖即係，加價囉﹗

中電將軍澳另一個變電站，10年前就要1.3億。而家中電快手係河套區起曬個十幾個變電站，拿拿聲增加幾十億資產，就算唔發電都好，都可以狂加基本電費囉 -- 起個變電站，你仲有輸電其他設施，個度既資產真係唔知幾多億烏。

**********

所以，都係個句，你攪北都，慢慢攪，正常咁攪，其實就唔需要發咁多債。之但係，為左唔知咩而全速前進，攪到中電都分到你一杯，就真係，嘿﹗

買中電股票啦。

***********

真係完。

財政預算案 - 動態調校下的借貸渡日 (5)

我打咁多字，其實同我早兩年打個篇神作講既，一模一樣。

只不過，今次係多左稅收數字，update左專才洗唔洗交稅既問題，同埋有UPDATE左其他資料咁樣。

咁，結論係，好多人話，今次發展北都，其實係米益深圳其實係米債冚債。甚至羅尚沛衣排先係度講，北都其實係地產項目，事關你講創科講土地，深圳大把，又點會需要香港。

我個睇法，就簡單D。

你睇河套區好多年前已經講緊白名單，其實緊係試驗啦。

如果河套區白名單開始運作，白名單又恆之有效冇任何問題，咁新田科技城又用唔用白名單呀﹖

新田科技城又係白名單適用的話，咁香港其他地區例如白石角科學園又適唔適用呢﹖

咁你明我講咩啦，下麻﹖

至於債冚債既問題，林鴻達個FB講得幾好。唔係我打字，亦都唔代表我立場，我淨係CAP幅圖咋。

*********

完。

財政預算案 - 動態調校下的借貸渡日 (4)

係我篇神作，我除左講利得稅，我仲講埋衣樣野﹕

而家你要做大個餅丫麻，咁你話一間年賺我當係1千萬既初創黎左香港喇，咁佢要交幾多稅﹖班所謂高才通就算年薪50萬甚至一百萬都好，加加埋埋又係交幾多稅﹖

我講高才通，係錯左。

我都唔明點解會錯，不過，我錯既係，佢地跟本唔洗交香港稅。

*********
羅尚沛衣幾個月不停講，大陸而家追返好多炒港股既人增值稅，我先醒起，係喎，大陸而家冇錢，同埋早幾年已經玩左全球徵稅架喎﹗所以高才通應該要交大陸稅架喎﹗

所以，求其GOOGLE，係2020年時，其實已經有衣篇新聞﹕在港工作內地人需繳內地稅　中資公司發公告催申報　稅率遠超本港。

咁你話，香港既高才洗唔洗交大陸稅﹖我都幾肯定，要。

咁之但係，交左大陸稅，就係米唔洗交香港稅﹖我都幾肯定，唔洗。

事關，香港同大陸神早簽左個避免雙重課稅協定，跟手香港同大陸都係簽左OECD個共同申報準則黎交換稅務資料，所以，專才交左大陸稅，咁係大陸薪俸稅率高過香港咁多之下，佢地就應該唔洗交香港稅的。

當然，求其SEARCH，有人話大陸稅法都有居留日期規定，黎左香港既專才唔一定要交大陸稅。不過，我好懷疑大陸特別係國企會點處理你班專才。

至於河套區個班，你知唔知波叔係預算案講既綠色通道同白名單係咩﹖河套區2018年既時候已經講緊研究衣樣野，孫東早排都講過﹕

「我們東西兩方各有小橋，是人行橋。我們希望兩地，特別是深圳方面的朋友，通過這個小橋，在白名單制度下、預先登記的情況下，可以比較便捷的來香港園區，而且不受其他地方的限制，這個已經在大方向定下來。」

咁衣班人，係深圳園區工作起居，得閒用白名單落黎，咁一定唔係交香港稅啦。

所以，當波叔擒日講話，發展北都會帶黎利得稅同就業機會，就會有薪俸稅收，咁我就真係想問，究竟而家班專才洗唔洗係香港交稅呢﹖而係河套區個班，更加一定唔洗交。

************

所以，波叔話發展北都，會帶黎薪俸稅收入，我就有好大個問號 -- 你而家北都個班，擺明目標就係大陸公司同專才，佢地要交香港薪俸稅咩﹖阿爺會放過佢地咩﹖

結論又係，個發債希望帶黎咩新經濟增長點再之後帶黎稅收去還債，個故事又要打折。

*************

未完。

財政預算案 - 動態調校下的借貸渡日 (3)

我真正想講既係，今次無論係轉撥外匯基金累計盈餘，又或者繼續發債做乜都好，其實都係為左北都發展去籌旗。

D人而家問緊，黎緊既預算案或者係政府，究竟係米要債冚債，係米要再轉撥累計盈餘之下動搖到外匯儲蓄去捍衛聯匯既角色，其實都係要睇成個北都既成本同埋回報。

***********
先講北都成本，甯漢豪早個月其實已經比左個答案你﹕

發展局長甯漢豪回應時重申，難以一概而論提供北都開支總額，因北都發展橫跨多年，不少事項需「動態調校」；又擔心若交代總額，「社會很多時候拿着個總額講很多個故事，說我們庫房每日乾塘」，從而令社會產生誤會。

甯漢豪唔答你，一黎真係成個計劃面積太大，時間太長，咁真係要「動態調校」。二黎，佢緊係唔敢答你，因為筆數係超過天文數字。

不過，甯漢豪講既「動態調校」，實在太有意思，所以我用左黎做個題。

************

當然，好多野，真係長遠，就要慢慢調校。

之但係，有D野已經比左錢，就可以用黎示範計數既。

用個最簡單例子。

你睇已經撥左款既河套區第一期，究竟河套區第一期用左幾多錢﹖

本土研究社就咁講﹕

其實北都有些發展項目已有初步估算，但沒有在今次計算在內：例如時任創科局局長薛永恒於2020年指河套發展未有就項目完整成本估算，亦有「近1000億元」的「暫時估算」。但今日政府只交代河套發展143億的已核准發展成本，與近千億的暫時估算相差10倍8倍，這是否能稱得上是「報細數」?

雜誌社呢，就有類似既講法﹕

更早提出的河套區工程支出，去年項目批出總預算為 158.8 億，今年收窄至約 139.9 億，加上新公司申請撥款，開支仍達 239.9 億元。

不過，我好肯定，佢地兩個都係錯。

我唔查雜誌社個數點黎啦，不過本土研究社143億個數，其實係河套區個地盤平整主體工程同埋消防設，衣條數係2020年同立法會扲既。之但係，係衣條數之前，其實2018年已經扲左個除污同埋個主體工程既詳細設計撥款，衣度大約係8億。

如果你要再查，我好肯定，係衣兩個向立法會財委會申請撥款既項目之前，有一大批項目已經用小型工程既方式，打包左落去基本工程儲備金整體撥款入面，即係林妙茵講衣隻。

除左衣筆數，河套區本身要做環評；佢個d咩連接路又要做環評。衣度加埋又係唔知幾多個億。

又再當然，如果你熟既話，就知上面講既係地盤平整。除左地盤以外，仲有衣樣野﹕「立法會在2021年向港深創新及科技園公司注資約181億元，興建園區首8座大樓和支持園區公司的早期營運。」

咁你話，河套區第一期淨係上面由早期環評到設計加地盤平整再到上蓋建設，用左幾多錢﹖淨係上面求其搵出黎既數，係143+8+181億 -- 即係412億。好多數，其實仲未打入去 -- 仲未計今年預算案又話要注資100億落個園區公司。

而你睇埋上面條link，孫東話，「園區前期工作已進入尾聲，初步估計約要完成餘下的園區建設，造價需要2000億元，直言難以單靠政府投入」。

淨係一個河套區，第一期幾棟樓要412億，其餘個批要多2000億 -- 我仲未計，除左硬件，政府比左好多錢科技園公司做咩培育計劃招商引資，衣d軟件又係好多個億。

*************

我想講既係，淨係河套區咁細地方，仲要唔需要收地，其實都要咁多個億去發展。咁你話，成個北都既成本，會係點樣天價﹖

本土研究社聲稱北都要3萬億，咁甯漢豪講得正確，其實真係估唔到，不過過萬億，係必然的。

又之但係，估唔到成本jak，我地用已知成本既河套區做例子，就大約睇到d野。

**************

上面講到，河套區淨係個8棟樓都要412億。咁第時多幾十棟樓，個地盤平整費用除返開，就到時先算。

咁你又係睇孫東上面條link係咁講﹕

孫東在網誌中透露，河套香港園區將在下周一正式開園。他形容，市場對河套香港園區的發展反應正面，目前有逾60間本港、海內外的生命健康科技、微電子、新能源和人工智能等領域的企業和機構，與園區簽署租約並陸續進駐。孫東透露，計及其他共用設施，兩座濕實驗室大樓的使用率已經達八成。

你自己去睇佢網頁，或者睇陳茂波自己講，「河套聚焦上中游的研發、轉化、中試等」。

咁而家用左412億，究竟河套區做衣批野，可以帶黎幾多回報﹖

陳茂波衣幾日不停講﹕

「便宜了深圳？錯了，其實你想想，我們以往做創科發展，投放資源至科研、大學，然後商業化生產全到了內地，經濟得益就真的在深圳和大灣區。現在我們的做法是發展北都，這是未來的創科載體，我引進的企業落戶在哪裡？落戶在北都、在香港，稅收是我們的、就業是我們的、商業化都是我們的。」

咁我就問下，佢覺得係河套區做研發做轉化，可以有幾多利得稅稅收﹖

我好相信，河套區已付既412億公帑，係10年內利得稅回報都係0。即係，如果個412億係用債券黎融資，咁政府就要靠其他方法或者債冚債方式去還。

*************

當然，河套區係做轉化丫麻，咁新田科技城先係落地丫麻，都時有生產有商品化，咁米會有可觀既稅收回報囉，到時米可以有錢償還債券利息囉。

咁我早幾日好無聊，搵左幾間香港有代表性既公司利得稅比你睇；下面既資料，全部都係2023/24年度既財報 (定好似係24/25呢......是但啦，唔搵返啦)，每間公司應繳既利得稅﹕

港鐵﹕34.58億

長實﹕11億 ；長實係 2018/19年最風光既時候，除稅前溢利係375億；利得稅係74.6億

新鴻基﹕48.7億 (同期除稅前溢利247億) ；新鴻基係 2018/19年最風光既時候，除稅前溢利係544億，利得稅係84.7億 

中電﹕12.1億

港燈(係2638，唔係電能呀下)﹕7.41億

匯豐銀行﹕73.1億美金 (除稅前溢利323億)；2018/19年麻麻地既日子，除稅前利潤係133.47億美金，利得稅係46.39美金

中銀﹕53.44億

中生製藥﹕4.92億

2269藥明生物﹕ 8.89億 (內地﹕10.78億 香港﹕1.6億)

信達生物﹕0.16億

比亞迪股份﹕80.92億

小鵬﹕0.69億

商湯﹕0.069億

中芯﹕1.29億美金 (不過之前幾年平均係6千萬美金)

我上面求其選擇既公司，其實係好有意思的。

不過，睇下面之前，你要知道，由疫情完開關後，衣幾年既利得稅收都係大約1700億；至於covid前，其實係由2015年1400億慢慢升上黎，都係跟通脹啦。

首先，港鐵係民生事業再加地產物管，納左34億稅，就冇野既。

第二樣想講既係，長實新地等地產商，我特登搵佢地2018/19年納幾多稅，係想話比你聽，當時政府除左因為地產市道收到每年過千億地價之餘，仲係發展商手上，收到好多百億稅 -- 淨係新地都84.7億。

之但係，衣幾年地產市道咁款，佢地既利得稅係跌到好離譜，加埋唔知有冇一百億。

第三樣想講既係，除左地產，銀行係香港利得稅大戶。匯豐個利得稅，係73.1億美金，即係570億港紙，亦即係3成既利得稅都係黎自匯豐﹗

第四樣想講既，就係中生、藥明、同信達。衣3隻係咩黎﹖中生 係大陸最大個間彷製藥再加創新藥合體，再加上內地稅率係20% (未計好多研發子公司之類會減稅率啦)，不過佢既利得稅都係4.92億；藥明除左出名批股之外就係做波叔成日講既創新藥研究龍頭，都係8.89億稅。

信達生物就勁，佢係蘇州工業園區有廠，又係中國藥物研發排名前列，近排仲同日本仔武田製藥合作。不過，點解佢既利得稅只係0.16億既﹖佢實在太精彩，所以我cap埋佢個報表出黎﹕

佢有94.21億收入，毛利79.11億。之但係，研發市場推廣個d就已經用左70億 (市場推廣麻，除左要入醫保減價之外，你明係咩麻﹖)。所以，就算佢咁勁都好，全國龍頭又好，都係蝕錢。

第五樣講既就係汽車，講比亞迪同小鵬。比亞迪勁就唔洗講，不過佢今年都大獲；小鵬就係乜春做車新勢力，大陸除左比亞迪係一線之外，小鵬理想個d就係二線。小鵬係香港都賣好多車，不過你睇下佢又係米有錢賺，又係交左幾多利得稅﹖唔夠一億。

第六樣，我講科學園之星阿商湯就係抽水既jak。至於中芯係做芯片，又研發到生產都有。不過，人地做全國性企業，納既稅都係8億。如果中芯黎香港，一年會交到幾多稅﹖

我打咁多字，其實都係回帶，想講我之前係篇神作已經講過既野﹕

1.香港傳統利得稅大戶即係地產商，全部都係交近百億稅。就算衣幾年唔掂，新地都係交差唔多50億稅。不過，所謂既經濟轉型，地產唔得，咁無論係地價或者利得稅收入，究竟點樣可以補返個財政缺口﹖

2.衣幾年好彩，匯豐同好多銀行都神勇。之但係，匯豐個業績其實好飄忽。之但係，就算我當香港銀行繼續回勇，補到個利得稅缺口，令到利得稅維持係1700億水平，穩定到政府個經常收入。不過，地產仲係唔得，咁個非經常性收入，即係地價收入點算﹖

3.你見波叔係今年預算案入面，其實都估個地價仍然係唔得的。咁地價唔得，要繼續玩北都，米靠發債同轉撥囉。

4.靠發債，個問題就係，我發債攪北都丫麻，其實係米只係cash flow mismatch既問題﹖我而家發債比息，遲D有利得稅返黎，咁米一天光曬囉﹖你睇河套區而家做乜，再睇下大陸咁多優秀既企業，已經講緊做全國生意，其實佢地交既稅，分分鐘仲小過大家樂同大快活。

5.咁你話，波叔開口埋口話，投資北都，會有利得稅返黎，咁係米食得屎啦。

***********

未完。

黎緊落黎，係我承認錯誤既時候。

財政預算案 - 動態調校下的借貸渡日 (2)

上面兩樣野，其實都唔係最重要。

第三樣我想講既野，重要小小﹕外匯基金轉撥既問題。

**********

今次預算案話，會將外匯基金今年既投資收益入面，轉撥1,500億去基本工程儲備金。

你見擒日波叔見記者去解畫時，阿常秘就咁講﹕

財庫局常任祕書長（庫務）黎志華表示，當局有與金管局作充分商討，稱《外匯基金條例》對於轉撥款項有嚴格規定，包括確保任何轉撥款項不會影響或削弱外匯基金維持港元穩定及香港作為國際金融中心的地位，當局與金管局確認是次調撥不會影響港元穩定或國際金融中心地位。黎志華續指，條例其中一個規定為確保外匯基金有足夠資產，即105%償付能力，他強調是次轉撥絕對符合相關法定要求，也有鬆動空間。

咁其實，阿常秘扲條例出黎，其實係廢話，係轉移視線。

你可以好似阿econ記者咁，研究下條例入面個105%償付能力係指乜野。不過，個重點，其實就係我篇神作入面講左，當時已經講左幾樣有關既野﹕

1. 當時我話，政府外匯基金係2023年已經有6千5百億累計盈餘，阿波叔一定會打衣個累計盈餘主意 -- 今年就打左1千5百億啦；

2.當時我亦都話，咩為之「超額外匯儲備」，咁我當時係寫錯小小 (份文件講既「政府會採用M1定義的港元貨幣供應作為儲備的基準」，衣度講既儲備應該係財政儲備，而唔係我當時篇文以為既外匯儲備。所以我睇返，發現自己攪錯左)。

不過，當時我特別講M1同M2又冇錯﹕一路以黎，其實講外匯儲備係足唔足夠，都係用貨幣供應去睇去做掛鈎，有人會再加港元資產 (即係樓市同股市)去睇。

例如，雷鼎嗚係2011年仲未痴線 (佢應該係湯家驊既先驅﹖﹖)個時，甚至去到再早期2千年初，其實佢同好多人，都嘈緊究竟外匯儲備幾多先夠，究竟個鈎要點﹕

雷鼎嗚係上面條LINK即係2011年個篇文，就話其實當時香港既M3已經多過外匯基金好多倍，再加銀行資產同股市市值已經有33萬億，如果有信心危機拋售港元就外匯基金點都處理唔到 (佢冇講最後個句，不過其實佢既意思就係咁啦)。

所以，雷鼎嗚就話，其實應該將部份外匯儲備轉撥作其他用途 -- 任志剛早幾年其實都講過超額儲備之類既野，甚至講過要將外匯儲備轉撥去支持北都。

(題外話，早半年前有單花生，係信報 區景連 同羅家聰﹕區景連話聯匯只係需要同M0掛鈎，其實就現實同歷史都錯，仲講話曾澍基當年冇提過M1M2既問題；羅家聰反駁quote返當年曾澍基雷鼎嗚D文，就係我上面講既野)

ANYWAY，我想講既係，如果你真係想就今次轉撥外匯基金既問題，去問阿波叔，咁你就應該要問，係而家聯匯制度下，隨住M3以至香港股市等資產市值不斷上升，咁究竟有冇一條線係代表外匯儲備係「足夠」﹖

而家仲有幾千億累計盈餘，究竟幾多累計盈餘仲可以轉撥返去政府。

你甚至可以煩D，問埋波叔，其實而家撥走1,500億，計返3%回報都有45億。咁究竟政府係考慮轉撥外匯基金同發債既考慮時，點解情願放棄個3%回報都唔考慮用發債處理﹖

係米代表而家增加左個發債上限去到9000億，其實都係唔夠北都發展，起碼要再轉撥1,500億先得﹖

衣D問題，真係好煩。

**************

未完，下篇先係真正我想講既野。

財政預算案 - 動態調校下的借貸渡日 (1)

今次份預算案好多野可以講。我上篇文即時評今次預算案，已經值得講 -- 我估冇人識得由衣個角度去講，所以值得講。

之但係，我擒晚諗諗下，其實有篇神作，已經講曬我想講既野。冇錯，篇神作就係我兩年前寫過講 外匯基金之謎思 既衣篇文 (以下簡篇神作)。雖然而家睇返，衣篇文有個嚴重錯誤。不過，你睇我之下落黎寫既野，其實都係基於衣篇神作。

*********

先講擒日篇文，點解我寫到咁興奮，唔得閒都要出個篇文﹖

原因係，你只要熟財政預算案，識公共行政，甚至淨係做過大公司或者NGO都好，甚至只要你有個sense，你都會知道一樣道理﹕「喂，阿哥，就黎年結，我地部門今年洗錢小過預算喎，咁拿拿臨換電腦買A4紙甚至換個部printer啦，總之就要洗曬D錢佢。如果唔係，出年cut budget架」。

明未﹖

如果唔講sense或者經驗，你熟政府財政同立法會，就知過去十幾年黎，每年10月，都有條《追加撥款條例草案》要上立法會。

我懶，擒日睇有冇人講，咁紫荊黨竟然有講﹗

咁你睇佢解啦，我唔詳細講。

簡單講既係，以往最常見要追加撥款既係，因為公務員薪酬趨勢調查同加唔加人工決定，通常都係每年5月打後先決定，咁所以預算案發表時冇衣筆數 -- 如果公務員加人工，就要追加撥款。

另外，紫荊篇文都講，除左防疫之外，政府好多時有D開支係無啦啦諗起，例如咩咩計劃基金，又或者係突然有咩緊急維修天災人禍或者新政策出黎，都可能突然要錢，咁就要追加撥款。

紫荊話「筆者翻閱了從疫情前的2018-2019年度到最近的2023-2024年度的記錄，果然是年年都有追加撥款」，咁我話埋比佢聽，我唔駛查，都肯定，其實幾十年黎，每年都要追加撥款，事關每年公務員都要加人工，同埋有好多諗唔到既開支。

我求其google一個年份，就搵到係2014-15年度既追加撥款入面，除左有例牌既公務員加薪之外，仲有突發追加撥款，例如細數既有，公路維修船隻打撈，同埋10億既公屋租金代繳再加9千萬既電費補貼撥款 -- 無啦啦要追加，可能係宣讀預算案時冇講衣樣野，公佈完預算案，就可能加碼，所以先有10億公屋租金撥款；電費補貼就唔知係計錯數定點，我唔查啦。

所以，就算2025/26年冇公務員加薪所以唔洗追加撥款都好，政府竟然可以將個經營開支預算向下修訂，其實係史無前例，驚天動地，更加唔合乎公共行政既習慣。

**********

第二樣想講既係，就好似前幾年一樣，由林妙茵到林一嗚再到所有傳媒，都仲講緊政府係靠發債，所以個帳目先有盈餘。

每年都講衣樣，就真係好煩。當然，如果要我重複，我可以好似不負任金融研究中心咁講一句，D友今時今日都仲係唔知政府盤數係用cash basis而唔係用accrual basis，甚至好似佢自己comment加多句「cash basis其實就係直接睇CFS而已」，咁就算數。

咁不過，我會叫你睇返我篇神作同埋以往幾年我評預算案﹕如果你認為「發債當收入」唔合會計原則，咁你睇政府盤數就要用返accural basis去睇。

(我發現，原來我hide左好多以往我評預算既文........咁回帶講多兩句.....................)

即係咁，你去庫務署，其實都會有每年 分別用 現金制同應計制去編制既政府帳目。我篇神作就用22/23年既帳目去討論，衣度就有24/25年既應計制帳目。

你如果用應計制睇政府盤數，睇佢個「綜合財務表現表」，咁入面發債其中一部份就會係「利息開支」，係要盤數入面減左既 (我唔理佢個cfs.....即係現金流量表呀下)。

之但係，重點黎啦﹕如果你用應計制去睇，政府個年度財政表現係好過現金制好多多多多多，事關佢會將「應佔政府企業利潤及虧損」同埋「外匯基金盈餘」放埋係度，所以個非經營收入係有過千億 (係現金制下，衣幾個年非經營收入即係賣地，係得百億左右)。

係應計制之下，好多政府既子公司投資之類，會計埋入政府盤數，所以反而會做靚左政府盤數。

我印像中，以往未見過政府會出衣類新聞稿。不過，衣份新聞稿，就用最簡單方式話比你聽應計制同現金制對政府盤數有咩影響﹕

　「現金收付制帳目綜合匯報政府一般收入帳目及根據《公共財政條例》（第2章）第29條設立的各項基金（債券基金除外，其結餘不屬財政儲備的一部分）。應計制帳目除包括現金收付制帳目綜合匯報的政府一般收入帳目及基金外，亦涵蓋外匯基金、香港房屋委員會（房委會）、政府企業（例如香港鐵路有限公司及九廣鐵路公司），以及其他政府基金（例如債券基金及優質教育基金）。此外，應計制帳目更全面披露政府資產及負債，例如固定資產、退休金準備及政府債項。」

　　按應計制編製的綜合財務表現表錄得141億港元虧損，現金收付制帳目則錄得803億港元赤字。這主要是由於前者計及外匯基金、房委會和其他基金的盈餘。

咁所以，如果你死都要話「發債唔應該當收入」，咁你評政府盤數時，就唔應該用現金制，而要用應計制﹕即係，成份budget既數，其實你都唔應該睇；你要等庫務署出左盤應計制既數，之後先再睇。

又之但係，點解政府或者我都唔用應計制去睇政府盤數﹖或者用應計制時，只係睇某幾個項目﹖

我咁做，原因好簡單﹕

因為應計制入面，會納入好多政府一般帳目以外既基金同埋好多投資公司。例如，你睇我上面條link既24/25年應計制帳目既footnote34，除左各大基本工程儲備金之類，仲包括左好多禁毒基金關愛基金之類；除左咁，仲有好大條數既房委會之餘，就仲有上面新聞稿講既港鐵等機構 -- 除左港鐵，其實仲有好龐大既機管局、市建局、迪士尼、科技園公司等等。

你應計制入面，你要consol返衣批公司既利潤落去政府每年個收支，米有機會令到政府盤數distort左，就好似上面個新聞稿咁講，2024/25年個政府虧損由現金制既803億變到得返141億囉。

至於點解我又會睇應計制盤數，原因係，佢有好多野係現金制盤數睇唔到既野。例如，我上年就講過﹕

衣個FOOTNOTE係叫做「於二零二三年三月三十一日及二零二二年三月三十一日，未包括在本綜合財務報表內的承擔餘額如下」。而係衣個ITEM入面，「基本工程項目、物業、機器及設備和非經常資助金」係2023年係8,373億，係2022年係7,653億。

衣個FOOTNOTE其實即係咩﹖主要既，其實即係每年係立法會財委會批既工程撥款。

係現金制之下，阿波叔就話每年基本工程開支係1千億左右；不過，立法會批既係整個工程項目由開工到工既承擔額，即係就算而家立法會唔再批錢唔比新項目開工都好，未來10年以內，都仲有8千億係要預留左去做工程。

丫，係2024/25年份報表，個基本工程承擔額去到9883.24億，就黎1萬億啦。

好多衣D數，未必係現金制盤帳入面睇到，或者要再慢慢搵先搵到。

除左咁，你再睇個政府債券，你應計制係要入帳，現金制唔洗入帳。而係應計制盤帳入面，個4834億債券亦都係話埋比你聽唔同年期債券幾時到期之類。

***********

未完。

為波叔喝采﹗

今年預算案，我早幾個月前真係完全估錯﹕佢竟然個綜合帳目有盈餘喎﹗

不過，點解有盈餘，就算之前講過野既乜乜學會公會之類，絕大多數都冇講過，更加唔會諗到點解有盈餘。

突然出現盈餘，唔係因為咩印花稅收入大升之類 -- 衣樣所有人都知，所以唔係突然出現。

個盈餘係咁黎，出自預算案第272段﹕

272. 二零二五／二六年度政府整體開支修訂預算為七千八百九十二億元，較原來預算低三百三十一億元。其中，經常開支為五千七百二十四億元，較原來預算低一百五十七億元。

經常開支，竟然可以小左157億﹖個度係經常開支接近3%喎﹗跟手非經常開支，即係又小左174億，真係好多工程拖住未做﹖因為宏福棚架，定係因咩事工程會拖慢﹖買小左電腦機電設備之類，唔會用小左成百億架喎﹗

而家講落，真係好似唔係我錯，係波叔上年估錯個政府開支喎﹗有乜可能差咁遠﹖真係各部門因為家超係大大面前講過，今年政府有財政盈餘，所以慳到咁多錢﹖

ANYWAY，唔得閒，聽日先講份野。之但係，你見佢繼續玩財技玩轉撥，其實全部都係為左北都。所以，要講份野，其實講北都，就已經足夠。

又不過，拿返渣沙先﹕全世界係得特許公認會計師公會香港分會 (同埋上面第一條link既德勤) 咁把炮，估個綜合帳會錄得41億盈餘。

但係，我特登搵返ACCA一月發表個預算案建議，佢地估政府有41億綜合盈餘，個原因都係錯的。今年有盈餘既主要原因，肯定唔係佢地新聞稿講既﹕

「儘管全球不確定性帶來的一些不利因素依然存在，金融和創新等重要產業為香港經濟增長提供動力，加上2025年第三季的強勁表現，令全年增長預期上調。有鑑於此，ACCA預計2025/26年度綜合盈餘將達41億港元。」

講多次，個盈餘主因除左係人都知既印花稅收入之外，另一邊係冇人預計既政府開支大幅減少。如果唔係開支大減，就算印花稅升咁多，個綜合帳目都仍然係赤字來的。

即係，大佬，個修訂開支係減小左331億喎﹗如果開支唔修訂，冇估錯到，咁米即係仲有3百幾億赤字﹗咁即係就算個印花稅收入大增，原來都係填唔到衣條數架喎﹗

至於我衣篇文開頭條link，入面德勤估政府有156億盈餘，就真係攪笑啦。同埋，你認真睇多次個條link，其實我又估得幾準的 -- 淨係講收入，我已經假設印花稅同利得稅超級好過預期，都仍然估個綜合帳目係赤字來的。嘿﹗

*********

過兩日得閒寫下預算案，包保係冇人寫既角度，或者冇人咁講既角度。

不過，而家點都要講句，波叔真係好野。

最後，補多句，熟悉本人文風既讀者，都知我上面其實解左點解今年政府可以駛小咁多錢啦，下麻。

有時D野，真係睇政治，就可以解釋同預測好多野的。係我衰在到而家都唔信邪，仲係太理性，係度計數，未學懂微臣思維。嗚。

承認市場有其自發秩序(3)

咁講到國家國策，可以再講多兩句 -- 雖然我好似之前講過。

anyway，國家點解要有「五年計劃」 (你自己睇wiki，大陸係2001-2005年之前既五年計劃，都係叫計劃，之後先改名做規劃架下)﹖

因為，共產主義麻。

共產主義/馬克思主義係科學 (衣個係共產黨人既認知 -- 如果唔係，阿錦濤點解仲要講科學發展觀﹖再唔係，你睇求是睇人民網甚至睇習大大講野，而家都仲要咁強調的)。所以，有「五年計劃」，係正常的。

當我地要講「與國家發展規劃接鬼」時，咁以往國家計劃/規劃有咩成果﹖

簡單講下。

********

先講「一五計劃」。

你自己睇「一五計劃」(第一個五年計劃)個WIKI，當時係蘇俄專家協助下，米攪重工業，攪農業習體化農村合作社，再攪糧票制統銷統購之類既野囉。

你睇wiki，或者其實而家都仲有人講，「該計劃的成功為中國工業化打下基礎，成為了50年代後發展國家工業化的成功案例。培養了大量的技術專家，產業工人，提高了國民收入，並且通過蘇聯和東歐技術的引進提高了解放軍的現代化水平」 (衣段出自wikik)。

除左咁之外，仲有人會同你講，當期時既國民生產總值GDP同埋工業生產之類，每年都有幾十個甚至近一百個百份比增幅添。

睇完，你唔覺嘔心，就唔知係智商有問題定咩問題﹕你用戰時同戰後時間相比，個GDP所有指標，緊係增長勁啦。

我唔CHECK，不過你睇日本德國，都肯定勁架。

第二樣呢，佢講既發展重工業，真係攪左好多改革開放後好似好勁既鞍鋼呀哈電呀長春汽車呀甚至好多基本設施例如電廠。不過，個d「成功案例」，「培養了大量的技術專家」，其實同改革開放後既企業有幾多關係﹖

中蘇交惡，嚇魯曉夫1959年訪問，蘇聯係1960年撤出所有專家消埋好多技術設計圖紙之後，大陸好大部份科技其實都係收皮；就算蘇聯唔走，你估當時咁多專家，有幾多個捱得過文革，又有幾多個可以係鎖國既情況下，繼續發展科技丫拿﹖

用事實說話既就係，你自己搵，改革開放後幾多汽車電廠機床技術，其實都係西門子日本仔引入。去到而家好勁既核電呀高鐵呀，開初全部都係「引進」德國法國同日本仔技術 -- 你明我點解要加個「」係引號架呵﹖

第三樣呢，「一五」將重工業做重心，忽視輕工業，再攪農村習體化，咁後果係乜﹖我已經唔講人民生活水平，不過，「一五」既後果係，「二五計劃」既失控。

第四樣呢，就意識形態小小，不過係最重要個樣。「一五」其實就係正式將「之前意識形態落實去經濟規劃」，正式落實大陸既「指標經濟」。

即係，你記得我講過土地改革反右運動，甚至再早之前講高華本名作《紅太陽是怎樣升起的》時，提到毛澤東係1929/30年左右，係點樣肅AB團架麻﹖

wiki入面衣段幾好﹕

當月月，李韶九被任命為蘇區政治保衛局江西分局局長，繼續反AB團，此時贛西南地區百分之九十幹部被指認為AB團分子。 由於陳毅不能完成在二十二軍中打擊AB團的規定數字，李韶九認為陳毅有包庇AB團的重大嫌疑，決定認定陳毅也是AB團分子，並把陳毅喊來開會。陳毅遲遲未能回家，其妻蕭菊英擔心丈夫出事，於是選擇投井自盡[5]。

衣段既重點係，「不能完成在二十二軍中打擊AB團的規定數字」。

之後毛主席攪既延安整風，土地改革，以至後黎既「五年計劃」，全部都係用衣個科學既數字，精細到產煤產綱既計劃要去到xxx.x萬噸，連個小數點都要有個指標。

要管到去小數點，你達唔到個指標就收皮，輕則被批評大則肉體收皮。咁，結果係，都係「二五」見到。

**********

講完「一五計劃」，講「二五計劃」。

「二五計劃」個WIKI好小小。

入面有講到，作為頂級技術官僚既周恩來 (你當佢係超高配版林鄭啦) 點樣試圖「糾編」，將「一五」九唔搭八既指標拉返去現實；入面都有講到，毛澤東攪反右攪好多政治運動，最後周恩來又微臣迎合上意，唔敢「反冒進」唔敢「右傾」之下，將個指標拉返上去，最後點樣攪到大躍進全民大煉鋼同埋三年大饑荒。

衣個，米係「二五計劃」既偉大成果囉。

當然，好耐之前係度提過，又係有d下家產講到，全民大煉鋼為地方發展工業提出基礎之類，就真係食得屎。

***********

咁唔講改革開放前既「計劃」，咁改革開放後，經濟發展同各個「計劃」有冇關係﹖

當年改革開放，第一個咁夠薑做改革既人，係已經歷史留名既小崗村18位農民。你求其搵小崗村，大把共產黨網歌頌佢地。

當年衣18位農民做左D咩，會流芳百世﹖係1978，個18位農民係要簽生死狀，先夠膽攪「家庭聯產承包責任制」，將大獲飯，將人民公社變做「承包制」，變相將農地「私有化」或者係「家庭化」。1978年私下攪完，政府同黨唔同層級嘈左幾年，去到1984年先全國攪「承包制」，去到1993年先寫入憲法 (衣段歷史好精彩，wiki都寫簡單得黎不過幾好)。

你唔講農村「承包制」，就算係八十年代玩到好出色既鄉鎮企業，係去到好後期，WIKI話係1997年先有條《鄉鎮企業法》出黎。

所以，改革開放入面好多野，所謂既經濟奇蹟，其實同所有「五年計劃」都係無關 -- 如果有關，就唔會有所謂既「摸著石頭過河」出現。

***********

係改革開放時期，你當大陸係2千年初入世前，所有野其實都係「摸著石頭過河」，試驗完，政治鬥爭完，先再正式成為政策。所以，個時D乜春「計劃」，其實真係冇得計劃，好多所謂成果都係試驗完冇問題，再係好多年後追認比返個名份佢。

個轉折點係，大陸入世，江澤民好利害咁提出，再加落實「三個代表」之後，「五年計劃」先改名做「五年規劃」，之後個所謂規劃先好似有規劃既功能。

又之但係，你見2千年前後，中國經濟好勁，咁究竟係因為「五年規劃」好勁，定因為WTO﹖

我冇仔細研究，不過心入面有個答案，就睇開衣度都好明顯啦。

即係，你要再講衣十年，羅尚沛就講過樣好簡單問題﹕由2010年開始，大陸互聯網經濟發展得好厲害。不過，當時好勁既騰訊、阿里巴巴既發展，有邊個係五年規劃入面有提到，有講到要規劃扶持﹖

衣個，米係我既答案。

當年阿里巴巴開始進軍東南亞，甚至開始佈局美國。之後得罪大大，再一個反壟斷，最後阿里收皮左好多年，其實有咩人得益﹖而家講到labubu講文創，又係五年規劃爆出黎既咩﹖

再唔係，唔講當期時既科技發展，大陸2020年樓市因為三條紅線爆煲，咁你話係2020年之前10年，大陸個樓市瘋狂玩法，谷起成個大陸既GDP同地方財政，又係共產黨各個「規劃」既結果﹖

就算你講「十三五」入面講到中國製造2025，講到個「十三五」規劃都係有成果，個成果都係好勁 (衣排HK01成日都打緊衣隻飛機)。不過，而家去到2025，除左電動車同某幾類應用科技 (例如無人機啦)，中國製造2025講既芯片航天設備就仲食緊屎 -- 而好似好勁既綠色能源同埋新能源汽車，反而玩到內捲，到頭來要攪咩提振內需。

而家攪到要反內捲，又係「規劃」出黎架﹖

***************

所以，我打咁多字，其實都係拉返去個主題﹕承認市場有其自發秩序。

即係，有D好重要既國策，其實係會影響成個國家未來，影響國家經濟發展。例如，唔係有「三個代表」，就算大陸入世，我都認為大陸既經濟唔會係2千年之後咁勁。又例如，唔係有近年習大大既偉大指導，之後各部委得閒就反你壟斷為你好，咁大陸經濟都唔會死死下。

就算係美國日本，你都見到，係侵侵同早苗既重新規劃下，好似經濟真係會有唔同發展。

又之但係，經濟運行，係有佢既自發秩序，政府就算有影響，都係最宏觀既影響。你要親手落去做指導做干預，去做規劃，就好多時，都係，WELL。

*****************

又再不過，如果做既經濟干預係要「與國家接鬼」，係對於自己官運有好處既，就唔同講法啦。

你睇聽日財政預算案，睇波叔點講北都，就會明架啦。

真係未出預算案，我都可以，WELL定。

*****************

我都幾肯定，上面講既野係回帶，我應該講過大陸「五年計劃」既歷史。

原本諗住貼阮篇文算，唔諗住打咁多字。

不過，是但啦，唔打都打左。

*****************

完。

承認市場有其自發秩序(2)

阮穎嫻篇文冇乜特別。

不過，佢係回應左米之前係度既留言，或者係我一直以黎講既野。

咁明報成日都會限期後唔見衣類評論文章，咁儲埋係度啦。

***********

當然，點解而家個政府會「愈管愈窮」﹖

一黎，成班都係警政思維，有權緊係要用，有野緊係要管，「中國人唔管唔得」架麻。

你睇安全帶單野，收回條例前後，家超都繼續講緊，件事件正確，係必須要做 -- 所以美寶米硬膠膠，話會繼續研究安全帶問題囉。

二黎，阿爺叫到，再加上要主動與國家接鬼麻。如果唔係，家超做乜要話，香港要攪五年計劃﹖

***********

正經講兩句。

要攪咩發展規劃，其實外國都有，香港以往都好多。

例如，香港以往最所謂頂層既規劃研究，就係香港2030+個隻發展策略規劃，條LINK入面既簡介都講比你聽，「1970年代起，政府每10年便全面檢討《全港發展策略》，以求與時並進，滿足新的需要和期望，應對挑戰，為香港的發展訂下方向」。

除左上面最高層次個發展策略，衣十年仲突然多左好多咩創科發展、氣候變化藍圖一類，係好政策specific既研究，總之咩都要有研究。

以往好多研究，其實真係超級宏觀；亦由於政府唔係好干預個市場，亦都唔會攪咁多工務工程 (我貼過啦，係2000年開始到2010年，每年工務工程開支都係3百億左右唔過5百億，計埋通脹都唔會好似而家過千億咁勁)，所以好多規劃研究，其實都係好「宏觀」，冇乜大impact，即係唔多駛理。

咁，衣幾十年既研究同以往有咩唔同﹖衣幾十年又點解多左咁多研究﹖

一黎，國際上多左好多氣候變化之類既野，好多地方都要硬食指標，所以就要有action plan (action plan中文係行動藍圖，環保署最鐘意用衣隻字)；二黎，香港政府有錢；三黎，國策麻。

三樣野，特別係後兩者，就真係相輛相乘。

***********

好簡單，比個例子。

由十年前左右開始，政府不停攪咩智慧城市又再攪咩智慧出行路線圖都算。攪完智慧出行，仲要細到再攪咩 香港電動車普及化路線圖。

要攪咁多野，其實係為左乜﹖你睇好早年大約2014年左右既超級電容巴士資助計劃，米預視左而家做乜咁多規劃研究囉。係2024年，AM730係咁報導個電容巴士資助計劃，我COPY個intro精華比你﹕

九巴早年獲政府全額資助3,120萬元，購買8部中國青年汽車超級電容巴士，並在2017年起於沙田的284線和啟德的5M線試驗，惟其製造商在2019年結業，8輛超級電容巴士其後相繼出現問題而停駛，至日前九巴為該8輛巴士招標，進行拆毀或出口用途。

SEE﹖ 

有研究，有政策，有路線圖，就明正言順有資助計劃。咁電容巴士計劃既keywords係﹕ 3千萬資助，國產巴士，製造商20019年結業，巴士相繼出現問題，2025年拆毀。

你唔鐘意睇字，睇車cam人講都得。

Anyway，政府做咁多所謂研究，米係，為大小茶飯鋪路囉。

**********

除左大茶飯，亦因為衣D研究越黎越詳細，越黎越似「計劃」，所以好多時都係做出黎攪下笑。

例如，上面個2030+係2021年發表，入面好重點研究既 土地來源發展策略重點 阿人工島，係報告出版無耐就收皮鳥。

又例如，再micro小小，當運輸署一方面話要嚴格控制私家車增長，另一方面又要做普及電動車路線圖，話要鼓勵普及電動車，咁你就真係唔好問兩個政策有冇矛盾 -- 你唔係以為，所有電動車都係「一換一」，所以個政策唔會令汽車增長呀麻﹖

咁所以，結論係，因為係唔同方面要「與國家接鬼」，所以香港多左好多九唔搭八既規劃研究。

**********

未完。

承認市場有其自發秩序(1)

觀點

2026年2月24日星期二

阮穎嫻：愈管愈窮的政策陷阱——從煙草稅到簡樸房條例

【明報文章】公共政策不應天真地假設市民會機械式接受官員意圖，而必須面對現實中牽一髮動全身的複雜互動。近年的煙草稅「加完又加」、幫助劏房戶的《簡樸房條例》到頭來害了基層居民，正好提醒我們：現實世界中，人的行為會調整、黑市會壯大、官僚會出錯，公共政策往往會產生一連串非原先設想的後果。

煙草稅：加稅不等於多收稅

2023/24及2024/25年度，特區政府分別大幅上調煙草稅，每次加幅超過三成，兩個年度合計稅率累升近七成半，將每1000支煙的稅款由約1900元，推高至約3300元。按政府及會計師行估算，這兩次加稅原意是一石二鳥：一方面透過高價抑制煙草消費，另一方面在政府財赤壓力下增加庫房收入。

然而實際出現的是另一個景象。根據相關研究和政府回覆立法會的數字，2022至2025年間，本港完稅煙消費量大跌近五成，煙草稅收入由2022/23年度約79億元，回落至2024/25年度43億元左右，短短3年流失逾30億元稅收。吸煙率方面，政府公布的調查顯示，2021至2023年間每日吸煙人士數目大致穩定，只是略減約0.7%，吸煙率由9.5%輕微降至9.1%，遠未出現與稅率升幅相稱的戒煙潮。

在完稅煙急跌的同時，非法私煙卻借勢冒起。私煙市場近年的調查估算，2022至2024年間私煙銷量激增逾兩倍，佔整體香煙消費的比例由個位數升至三分之一。高稅差令私煙吸引力大增，形成強烈替代效應，「白牌煙」等低價產品更快速擴張。換言之，一部分煙民並無戒煙，而是由合法市場轉到黑市，以更低價格購買來歷不明、風險更高的產品。

從公共財政角度看，這是一個近乎教科書式的「稅基自我侵蝕」。政府一方面失去部分煙草稅收入，另一方面，海關為打擊私煙需加大人手與執法成本，形成「收入減，開支增」雙重夾擊。若再考慮黑市壯大帶來的治安風險及腐敗誘因，社會總成本恐怕遠高於帳面少收的那幾十億元。

總體而言，加煙稅造成的客觀效果是稅收下降、戒煙成效小、治安風險上升的三輸局面，跟政策原意南轅北轍。

簡樸房條例：保障租客變趕走租客

《簡樸房條例》將於今年3月1日生效，旨在取締劣質劏房，對分間單位訂立最低標準，包括面積、消防及結構安全，並設12個月登記過渡期，合規者可獲36個月寬限，至2027年3月正式執法。​

政府原意無可厚非：提升基層住屋質素，保障住戶安全與尊嚴，避免火警隱患與違建塌樓悲劇。但政策設計忽略了市場行為的調整。在現有公屋輪候時間逾5年、過渡房屋供應仍有限的背景下，劣質劏房往往是部分低收入家庭的底線選擇——租金低至每月數千元，位處市區方便。

當條例強制規定單位最低面積與安全改裝，業主面臨一定的合規成本：面積、窗戶、安全，小改還好，大改的話工程顧問費動輒數萬至十數萬元。條例未生效已起作用，因為部分業主於條例生效前趕走租客，以改裝單位符合規定，並加租去轉嫁成本。業界指出由於改建困難，不少業主會放棄出租劏房，改成倉儲或丟空，或乾脆不登記，轉入灰色地帶。這個由於政策導致單位供應減少的問題，單靠寬限期不能解決。結果便是最廉價租盤供應收縮，租金向上推，令「合規簡樸房」租金比原劏房高出一截，加重劏房居民負擔。

這種反應，會令最弱勢租客最先受創：短期內面臨更高租金，或被迫遷往偏遠地區，通勤成本與時間倍增；若無足夠租金補貼或安置安排，部分家庭更可能流向無牌工廈、牀位分租等更不安全的選擇。去年宏福苑大火，本來用以安置這些居民的過渡房屋亦用得七七八八。這正是「好心做壞事」又一例證：想清理劣質劏房，卻可能製造新一批「居住難民」，總體居住負擔不降反升。​

公共財政角度上，這條例看似可解決住屋問題，實則把成本轉嫁市場：租客以更高租金與更長工時「埋單」，政府日後需為增加的社福開支、火警應急、家庭壓力等支付隱性代價。

扭曲市場 愈管愈窮

香港這幾年的公共財政討論，往往集中在「還可以加什麼稅」——加煙稅、加股票印花稅，甚至新稅種構思。問題在於，當加稅與管制成為政府面對財赤下，欠缺對長期稅基、地下經濟、制度信任的全面評估，便容易出現一種「愈管愈窮」局面。稅率愈高，合法市場愈縮水，黑市愈壯大；管制愈嚴，行政成本愈高，執法成效卻愈不穩定。

政府扭曲市場，反而會放大隱性成本：煙稅少收30多億元，還增加海關工作量；簡樸房制度清理劣質劏房，卻需填補後續社福缺口。若無配套財政投入（例如大量公屋、租金補貼），這些政策便淪為「愈管愈窮」的循環。

倘若要在政府財赤與轉型壓力下走出一條可持續之路，我們可能需要的，並不是更多新稅與新規例，而是更謙卑、更嚴謹的政策分析和想像力：承認人會因為政策而改變行為，承認市場有其自發秩序，承認任何干預都可能帶來非原先設想的後果。因而需要在每一次加稅與立法之前，多問幾句：「替代選擇會是什麼？黑市會否壯大？信任會否流失？」

只有如此，公共財政方能真正成為香港長遠發展的基石，而不是另一個風險來源。

作者是香港大學經管學院講師

原文網址：https://news.mingpao.com/pns/%e8%a7%80%e9%bb%9e/article/20260224/s00012/1771866589645

宏福的政治藝術 (4)

另一樣我想講既係，黃偉綸下面衣幾個有個講法，其實好值得詳細再講。

我成段COPY出黎﹕

被問到若有居民堅持選擇「原址重建」會如何處理，黃認為單位經歷火災很難出售，不能確定有沒有人收購，但政府尊重私有產權，會繼續溝通，亦提及目前無法例適用於不賣業權的宏福苑業主，「如果只有小部分單位（不賣業權）會否透過特別立法處理呢？這個我們將來再探討」。

黃偉綸稱，《基本法》列明若私人業權被徵用須按「實際價值」補償，惟因宏福苑受災，實際價值遠比政府提出的低，倘政府要強制收回業權，必須確保手段符合《基本法》對私有資產的保障，「那條路（強制收回業權）都不容易」。黃重申，業主接受政府收購業權方案絕不代表要放棄民事索償，具體需待法律專家研究。

係同一篇報導，黃偉綸講完，之後明報搵左好多律師講《收回土地條例》點點點。

我既睇法就好簡單﹕用市建米得囉。

************
我之前講用市建，真係唔洗CHECK例都知可以。而家CHECK埋比你，可以睇下市建既宗旨係乜野﹕

5.市建局的宗旨
市建局的宗旨為 ——
(a)作為一個依法設立的法人團體而取代土發公司，負責透過進行、鼓勵、推廣及促進市區重建，改善香港的住屋水平及已建設環境；
(b)透過將老舊失修區重建成經妥善規劃，並(如適當的話)設有足夠交通設施、其他基礎建設及社區設施的新發展區，從而改善香港的住屋水平及已建設環境，以及已建設區的布局；
(c)更良好地利用香港已建設環境中失修地區的土地，並騰出土地以應付各種發展需要；
(d)透過促進對個別建築物的結構穩定性、外部修飾的完整性以及消防安全方面的保養和改善，以及促進改善香港已建設環境的外觀及狀況，從而防止該已建設環境頹敗；
(e)保存有歷史、文化或建築學價值的建築物、地點及構築物；及
(f)從事行政長官在諮詢市建局後藉憲報刊登的命令而准許的其他活動，以及執行該等命令指派予市建局的其他職責。

你睇佢第5(b)同(c)，其實今次事件入面，都已經適用。

你驚法律基礎唔穩固，用埋第5(f)，行政長官指派市建去攪宏福賠償重建，仲講明有個特別補償，就已經天下無敵。

我點解唔CHECK例都肯定市建可以做野﹖事關，好多衣d公共機構既例入面，都係有類似第5(f)，行政長官可以指派個機構去做野的。

所以，黃偉綸無啦啦講基本法講，講「目前無法例適用於不賣業權的宏福苑業主」，其實係因為佢唔用市建局 --當年土瓜灣道塌樓，其實都係市建出手用《收回土地條例》去做重建，係收購過程入面用左個特殊補償。

你睇上面市建局條LINK講到唔清楚，政府新聞稿就好清楚咁講到﹕

合資格的住宅物業業主除了有權獲得法定補償外，在適當情況下亦會獲發特惠自置居所津貼或額外津貼。合資格的住宅住戶可獲安置到由香港房屋委員會或香港房屋協會提供的單位，或可獲特惠現金津貼。

所以，就算你死都要話，「《基本法》列明若私人業權被徵用須按「實際價值」補償，惟因宏福苑受災，實際價值遠比政府提出的低」，咁其實你用返土瓜灣塌樓既先例，攪個特惠自置居所津貼，令到「合資格的住宅物業業主除了有權獲得法定補償外」仲可以有其他補償，就已經付合到所謂基本法既規定。

當然，政府唔用市建局，係因為市建局冇錢，亦都唔肯定收左塊地返黎之後，會有現金流比返市建局。咁，衣樣就後話啦。

************
最後，衣點就涉及宏福塊地既規劃。

係明報入面，黃偉綸係咁講﹕

黃偉綸稱收購業權後傾向拆卸7座大廈，原址不再發展住宅，可建公園或社區設施，預計待5年後清拆完成再諮詢。

其實，佢講既「預計待5年後清拆完成再諮詢」，就係將個波交比下屆政府啦。你5年後拆完，再做樣扮諮詢，即係塊地又要10年後先有野見到呀﹖

冇咁痴線啦。

如果簡單d，或者有長遠規劃，其實塊地而家就可以有兩樣應該研究或者真係去做既規劃。

第一樣係，將拿打素醫院搬過去啦。

而家玩北都，講緊會係牛潭尾發展龍頭醫院，又話將北區醫院擴建。不過，你成個北都，再加人口老化，其實新界東得一間威爾斯同埋牛潭尾做龍頭，就真係唔多掂 -- 而家北都另一邊既新界西龍頭醫院係屯門醫院，佢最出名既係乜，就真係，well，唔知係人定硬件定咩問題。

將拿打素搬過去宏福，再將現址同大埔醫院整合做大個護理甚至寧養，其實合情  -- 雖則，搬拿打素過去，地盤面積又可能未必大好多，但係可以樓高規劃做多好多，就好似廣華重建之後咁樣。

(check返，未計威爾斯係龍頭，沙田有幾間輔助醫院，包括沙田醫院、白普理寧養仲有間慈氏護養院，大埔北區就得兩間急症醫院，同埋一間大埔醫院呢)

當然，搬拿打素個去，係過百億；政府攪緊牛潭尾，就唔會攪拿打素啦。

又之但係，唔攪公院攪私院，批比養和或者扲出黎招標，其實有冇得諗﹖

當年高永文攪過私家醫院用地 (再次證明我記性好﹗﹗)，我CHECK返，大埔塊地收左皮，黃竹坑就做左港怡醫院，間新醫院都好旺下呢。你見港怡不斷開新中心診所，就知生意應該唔錯。

(補多句﹕廢事隨口up，再加八掛，我特登搵埋以前新創建而家周大福創建既2025年報，睇下港怡生意係點。衣幾年既年報話，港怡開返關之後幾年既ebitda增長都好勁，2025年仲開始有錢賺。而家盧寵物不停推人去私院，港怡同其他私院真係有前景囉。)

好啦，咁再睇返大埔以至成個新界，而家成個新界淨係得仁安同中大私院 (再加新界西既港安醫院啦)，所以大埔攪私院一定有吸引力，同埋係政策上都應該做啦 -- 而家講緊咩發展醫療高科技講咩醫療旅遊，宏福塊地近北都近中大近科學園 (港怡有同港大合作的)，而家做私院應該有人會入標，發展私院仲政治正確添啦。

你係大埔開間養和分店，唔洗d同包去曬港島，都係件好事丫，仲分分鐘收返唔小地價返黎。

第二樣可以做同應該做既係，將塊地比科學園做乜春人才公寓。

而家成日講咩人才公寓，其實科學園差唔多成十年前(﹗﹗﹗)已經攪左樣叫innocell既野。衣個報導就精簡同幾好，話比你聽2018年科技園公司問立法會扲8億 (科學園自己有再出錢的)，係2021年左右興建左第一棟INNOCELL，以優惠租金比科學園入面某類租戶入住；再之後係大角咀租多棟酒店攪另類INNOCELL，黎緊2027年科學園入面第二東INNOCELL會入伙。

衣樣野，係科學園小有德政，都受歡迎。

如果將宏福塊地比科學園攪innocell，收返科技園公司幾十億，其實都有著數 -- 科技園公司黎係有大量任務要用錢，不過間野而家仲有接近70億現金，真係「回撥」下佢盤數，比返政府都好丫。

再者，宏福真係近科學園 (大佬，點都近過大角咀啦)，同北都又唔遠，再加上水電煤所有野都齊，咁攪多個大小小既INNOCELL，其實又係政策上配合 -- 班人才唔會怕唔吉利，到時唔肯住掛﹖

********

上面兩樣野，其實真係隨口up都up到，仲肯定好過將宏福塊地做公園 -- 上面兩樣野，都唔係做傳統住宅，算係公益或者公共服務，仲可以賣返塊地出去扲返D錢。你求其係塊地入面整返個公園仔整個紀念碑，成件事就攪掂。

所以，而家黃偉綸話咩5年後先諮詢，擺明就係攪笑，將個波比下界政府囉。

********

最後一句。

淨低一座宏志閣，其實就好吊鬼。

好搶口既測量師學會條友一方面講話唔收宏志閣ok呀無法律問題，另一方面隔左幾日又話公契問題要睇政府點處理，咁就真係吊曬鬼啦。

當佢咁講﹕

「無論塊地或大廈公契層面都牽涉不可分割業權，當政府收購7幢樓的業權時，公契仍然存在其業權，究竟如何處理，如何取消業權，令剩下業權人士管理大廈公契，都有待政府安排 。」

即係點﹖

如果取消左政府收購既業權，將成塊地比曬淨底宏志業主去管，咁第時其他7座塊地做公園 (衣個係黃偉綸聲稱可能既方案之一)，係由業主負責去出錢興建同去做管理呀﹖佢有冇諗到，到時一棟樓業主管理咁大地方，管理費會係點呢﹖

當阿測量師學會條友講，「而保留宏志閣或會涉及重鋪部分公眾喉管及及電力線路，他認為問題不大」，咁其他公共地方公共設施，以後得返宏志業主攬曬上身，都「問題不大」架，係要無啦啦比多好多錢之麻。

就算我當政府好神奇，直頭唔知點解可以將份公契唔知點樣重新攪過，將個地段宏志還宏志，其餘7棟還其餘7棟 (其實係我了解下係做唔到，除非好神奇唔知點立法)，不過你將宏志由屋苑變左做單棟樓，你估個管理費又會多幾多丫拿﹖

遲下應該有人會放風出黎，令到宏志既業主想賣層樓比政府 -- 如果我係業主，我都可能會賣，事關單棟樓同屋苑係管理維修所有野都唔同，仲要宏志已經幾十年樓。

而家麥美娟已經放風，講緊宏志閣要做公共設施維修，講緊既應該係因應火災而要做既野。咁之前強制驗樓要做既野，唔知佢做左未；不過，將來要做日常或者大維修，單棟樓又會比屋苑既單價貴囉。

咁宏志閣最終會點﹖

我覺得係放風下，係會賣的。

********

其實有野想講，不過唔記得左。

丫，原本仲想講預算案，不過唔打字啦。

*******

完。

宏福的政治藝術 (3)

早星期有人放風話，政府會用收購業權方式處理宏福時，我就想講鳥。

咁衣兩日有正式方案，咁講下啦；我懶，唔搵文件，就衣兩個報導黎講。

*********

係一開始，我就已經講左，最「正統」既處理，就一定係搵市建局開個「市價」去收購宏福業權，處理成個賠償之類既問題。

而家唔係用市建，亦都唔係「市價」，不過同我講既係差無己。

衣個係「正統既處理」，之但係同我講既有落差。個分別就好簡單﹕

1. 用市建去處理，我當時係話用個「起碼優厚過7年樓齡既賠償」(大約啦)去處理，其實個邏輯就好簡單﹕

你睇明報同系列報導，之前個調查話，有9%住戶堅持原址重建，有兩成就接納原址重建同其他方案。

咁但係，如果當時個調查講到明，個收購價SAY係$14,000的話，咁都幾肯定，有9成以上都會接受個收購方案。事關，衣度講既$14,000其實係用白石角私樓市價做參考，咁私樓實用係細d，不過用衣個價去買白石角樓，都應該大約可以同班居民現住既單位相比 -- 係日後管理費個d麻煩d囉，咁唔鐘意既，用衣個價錢都勉強買到銀禧花園啦。

再者，而你用衣個價錢，可以選擇既就唔單止係大埔區既私樓，仲可以選擇埋白石角甚至沙田居屋，咁都可以避免收到個收購價之後，係同區有錢都買唔到單位，或者比人座地起價。

如果政府用衣個方法，多數居民一定滿意，就可以快刀斬亂麻，處理左好多唔同方案爭議既問題。

2.我當時講既係「起碼優厚過7年樓齡既賠償」。我當時甚至唔理個單位係米補左地價，都用衣個方式去賠，其實都隱含左個代價。

代價就係，今次政府一定有失職，所以衣個價係某程度上包埋政府個疏忽責任賠償。

*********

咁先唔回帶講我個方案，而家政府個方案，就有d攪笑。

你睇返明報咁樣講﹕

「建議收購呎價8000及10,500元，高於測量業界估價三分之一，居民可取現金或以「樓換樓」購買指定資助出售房屋，業主須於8月31日或之前表態。」

你再睇埋明報個圖，講到「特設銷售計劃」既屋苑名單同落成日期，就真係嘆為觀止。

今年第四季入伙既九龍灣居屋就非常好，位置一流仲只係賣7千幾蚊尺，不過冇講有幾多個單位亦都冇講座向樓高之類；之後2027年入伙個幾個屋苑真係食得屎，咁唔好理；2028年入伙既啟德將軍澳算ok，係貴小小同等耐小小；係同區大埔既要等到2029/30年度先開始入伙，即係其實叫你唔洗等。

而幅圖入面房協係粉嶺同安達臣既，都算把啦。

上面講既居屋包括埋房協個兩個，你仲要諗埋，佢地係米組裝合成，係米漏水個隻。

當然，另一個緊要既問題係，政府比咁既OPTION出黎，其實每個屋苑既單位數目係幾多 (已經唔理係米全部都係豬頭骨，低層對住垃圾房個d啦)﹖

報紙冇寫，我真係好奇再加得閒，所以搵埋立法會份文件，睇下有幾多單位扲出黎賣﹕九龍灣有610個單位，出年落成個批東涌錦田各有140，2028年落成既啟德同將軍澳分別有750同220。

宏福全屋苑有幾多單位﹖份文件話，受影響既7座有1,736，加埋淨低1座我當係2,000戶。上面九龍灣得610個單位，之後就算啟德ok都要等兩年。

你話買唔到或者唔等上面「特設銷售計劃」既單位，咁係二手市場上面買到咩野﹖

上網睇過，而家大埔居屋補左地價係9千蚊，不過供應量肯定滿足唔到宏福班人既需求；沙田就大約1萬蚊，即係扲住個$10,500，應該都要補錢。

衣度講既係已補地價居屋，未補地價既盤就更加小，個價一定會無理頭比人加價，咁扲住$8,000就幾肯定要補錢。

所以，政府個方案既攪笑位係，你出個咁既價，要我係今年8月31日前表態，都係快刀斬亂麻既一種既 -- 九龍灣係得個610個，尺價仲要係7千蚊，咁真係要快手決定搶唔搶啦。

亦所以，你話政府係衣個時間咁樣配合，拋個九龍灣選擇出黎，係米一種藝術呢﹖

************

題外話，明報社咁講，就真係食曬屎﹕

「根據安置方案，政府會為宏福苑居民提供「特設銷售計劃」，居民可選擇接受現金或樓換樓，從綠置居2025、居屋2025、房協及大埔頌雅路西等10個資助房屋項目揀樓，可供選擇單位總數，合計達到3900個，遠多於宏福苑7座受影響樓宇的住戶數目，居民理應有充裕選擇。」

佢講既3900個單位，有1500個係頌雅路兩個盤，要2029至2031年先入伙，你會唔會等丫拿﹖

我上面話啟德同將軍澳ok，其實個度有970個單位，不過所謂既等兩年，其實係2028年第四季先入伙，又真係幾多人會等兩年幾三年丫拿﹖

衣度，已經係2470個單位；唔計九龍灣個610個單位，其他近小小時間可以入伙既，都係九唔搭八錦田東涌屏山粉嶺既盤 -- 另加房協安達臣個積木盤。

你要買，就真係唔好睇胡說樓市。

anyway，所以明報社評真係有形呀，居民真係理應有充裕選擇呀。

************

當然，上面個方案攪笑既地方，係實際操作上既攪笑。

理論上或政治上既攪笑係，今次「收購價」既基礎係乜。

你又睇返上面明報，測量師學會條友開頭走出黎話，今次政府個收購價係高於佢地學會原先估算既三分之一。

佢地個估算，係扲住個所謂既市場價去估算。

咁我好簡單咁問，今次個收購價其實應該用「淨市場估算價」既咩﹖

今次火災，燒既係間屋入面所有既身家性命財產，再唔好彩就包埋你老豆老母全家。係件事上面，你話政府有冇任何疏忽責任，如果有的話，係米要政治上都包括衣個責任落去﹖

好低能既法律觀點係，居民可以等政府個調查委員會完成調查，甚至打官司時，先將個責任計算，再進行賠償囉。

不過，政治唔係咁的，亦都應該唔係好搶口個條測量師學會咁諗掛。

所以，網上有d友帶風向話，做乜要納稅人賠償比班業主。咁除非政府個調查委員會話，屋宇署消防署房屋署係件事入面完全冇失職，咁政府就真係可以唔賠個疏忽責任，甚至唔理佢地既。

之但係，如果今次燒既係誠哥興建同管理既屋苑，就算誠哥管理得好好個責任完全係承建商入面，不過，你估政府同班帶風向既人會講咩丫拿﹖

well，講返正題。

所以，其實政府個方案，又唔係完全攪笑既。

今次政府賠個都算優於市價既收購價，其實都隱含左個補償係入面 -- 如果佢真係出返測量師學會個所謂估價，應該冇業主會接受，到時真係唔知點收課；而家個價，都唔係好價，之但係大部份居民既角度黎講，都應該會接受。

衣個，就係今次收購價既政治藝術。

***********
即係咁，再講多句。

你如果係外國，又用返之前有人提過下英國2016年左右都燒過既例子，你求其搵，都會搵到，當年燒過既Grenfell Tower，係2023年出左衣樣野﹕Grenfell Tower fire: Civil settlement claim worth £150m。

see﹖

因為業主同政府既不作為，個CIVIL SETTLEMENT 係£150m﹗ 

你將佢匯率簡單當係10，即係燒一棟24層tower，死左72人，都賠你港紙15億﹗當然，你再睇詳細報導，衣15億並非全部係claim政府，不過都會見到衣句﹕「A total of £50m, including £25m from government and £6m from Arconic, has been pledged to the settlement fund」。

另外，都仲可以留意，衣個settlement，係政府調查報告未出之前就做左。個報導話，「Meanwhile, it has now been confirmed the Grenfell Inquiry report is unlikely to be published until 2024.」。如果個調查報告有新野，就真係唔知可唔可以再告政府。

咁，anyway，我想講既係，香港油治及興左，應該唔會有人夠膽用民事方式去告政府。事關，而家諗下去靜座拉BANNER，同區議員講完，都會收到重案組電話。

又之但係，如果真係用測量師學會建議個收購價，班居民會唔會自發，又或者係米會有人真係鼓勵佢地，走去學鬼佬告政府﹖世事既野，真係話唔埋，事關個度講緊好多錢 -- 唔止係棟樓，仲有好多條人命。

同埋，我冇真係睇GRENFELL TOWER個CASE係點。不過，宏福個CASE係點，除左承建商之外，政府監管部門有幾多責任，就真係心照啦。

所以，我貼既第二篇新聞入面，黃偉綸其實真係好醒。佢咁講﹕

「黃重申，業主接受政府收購業權方案絕不代表要放棄民事索償，具體需待法律專家研究。」

佢表面上係同傳媒同社會講，居民收左錢，都仲可以向政府或者任何人包括承建商做索償。

之但係，你收左$10,500之後，仲會唔會索償政府﹖

你如果真係走去告政府，要用幾多時間，律師費，以至承受幾多「其他風險」-- 你個收購價學測量師學會咁建議，收得$6,000或者$3,000多小小既賠償，就另一個講法，可能真係夠薑同佢死過既。

至於你話，有D單位係人命冇事JAK，不過有D單位係全家走曬或者死淨一個，都係收咁多補償就算﹖衣幾年，除左無家者控政府之外，最多控政府既係咩人﹖

係警員或者前警員，真係出自優秀部門既人才先會告政府。

所以，黃偉綸講得衣句，其實都幾有信心，業主收左錢，就唔會向政府索償 -- 承建商個d執曬粒，就清左盤破曬產走曬佬，都冇得索償添啦。

***********

咁個結論係，政府衣個收購方案，表面上或者係居民心目中都係攪笑。不過，其實都係幾有政治藝術，比返大筆錢你，或者樓換樓比你，就從新過生活啦。

***********

未完。

宏福的政治藝術 (2)

2026年2月23日星期一

港聞一

「倘餘小量宏福戶不賣 或研立法處理」 黃偉綸認現無例適用 重申售樓非須棄民事索償

【明報專訊】政府擬收購宏福苑受災7座樓的業權，業主可選擇以現金買私樓或「樓換樓」，須今年8月31日或之前表態。「應急住宿安排工作組」組長副財政司長黃偉綸昨稱，若居民有任何原因決定不向政府售賣業權，政府不會向逾時表態者做特殊安排，屬「你情我願」；而若剩下小部分單位不賣業權，將商討會否立法處理。有律師稱《收回土地條例》不適用於宏福苑情况，認同須另立新例處理不願售賣業權情况。

政府向宏福苑居民提供未補地價單位每平方呎8000元的收購價，較參考價高約三分之一。黃偉綸昨接受多家電子媒體訪問時進一步解說方案，他形容收購原則體現人性化處理、以情為先，令居民有能力購買居屋為考量，並強調「公帑的投入都要適度」。按政府向立法會提交文件提供收購價金額，以未補地價住戶呎價8000元計算，1354戶獲344.8萬至386.4萬元不等；已補地價住戶收購價10,500元計，382戶可獲452.5萬元至507.1萬元不等。

強制收回須符基本法保障 「路不易」

被問到若有居民堅持選擇「原址重建」會如何處理，黃認為單位經歷火災很難出售，不能確定有沒有人收購，但政府尊重私有產權，會繼續溝通，亦提及目前無法例適用於不賣業權的宏福苑業主，「如果只有小部分單位（不賣業權）會否透過特別立法處理呢？這個我們將來再探討」。

黃偉綸稱，《基本法》列明若私人業權被徵用須按「實際價值」補償，惟因宏福苑受災，實際價值遠比政府提出的低，倘政府要強制收回業權，必須確保手段符合《基本法》對私有資產的保障，「那條路（強制收回業權）都不容易」。黃重申，業主接受政府收購業權方案絕不代表要放棄民事索償，具體需待法律專家研究。

彭韻僖：引《收地例》不符「公共用途」 易掀議

提到收購計劃未納入宏志閣，黃偉綸稱，當最少一半宏志閣居民達共識，便可開始商討收購該座的方案，但以往幾乎沒試過這樣分配地契及大廈公契，相信最終可能要透過立法處理。

律師會前會長彭韻僖向本報表示，宏福苑受災樓宇的收購與安置，核心目的是解決災民居住問題，而非推動傳統的公共發展項目，並非《收回土地條例》界定的「公共用途」範疇，該條例亦未針對資助房屋的災後整體收購作專門規定，若直接應用於宏福苑情况，易引發產權與補償的法律爭議。

至於《強拍條例》，她稱發起的主體是業主或私人發展商，並實現樓宇重建的商業或自用目的，惟宏福苑的收購是政府主導的災後安置行動，性質不同，她認為若政府在遵守《基本法》前提下考慮另立新例，可保障居民的私有財產權益，同時協調宏志閣不可分割業權的問題。

律師兼立法會前議員江玉歡認為，引用《收回土地條例》需審慎處理，政府暫未明確計劃收回土地後將作什麼公共用途，引用該條例的法定程序需時，且只能用公帑，惟政府將以捐款及公帑收購業權，認同政府考慮另立新例處理未能收回的業權「有道理」。

范凱傑：《收地例》可符 須8座全收

身兼大律師的立法會議員范凱傑則認為，《收回土地條例》的「公共用途」可涵蓋宏福苑現時情况，相信政府毋須另立新例而可引用該條例收回業權，且過去業權人就引用該條例提出司法覆核無成功案例，遭司法覆核的風險非常有限。不過他認為，宏福苑屬不可分割業權份數，倘政府動用條例，則不能遺下宏志閣，必須一併收回全部8座樓業權。

翻查資料，由1997年7月1日至2017年12月31日，業權人就引用《收回土地條例》收地的司法覆核共8宗，未有個案被裁定政府敗訴。

原文網址：https://news.mingpao.com/pns/%e6%b8%af%e8%81%9e/article/20260223/s00002/1771784294553

宏福的政治藝術 (1)

68億購宏福業權 料用40億公帑 「特設銷售」10資助盤 業主限8‧31前揀方案

【明報專訊】大埔宏福苑大火發生至今近3個月，政府昨日公布長遠安置方案，擬用68億元收購7座大廈單位業權，扣除捐款估計需動用40億元公帑，建議收購呎價8000及10,500元，高於測量業界估價三分之一，居民可取現金或以「樓換樓」購買指定資助出售房屋，業主須於8月31日或之前表態。未受大火波及的宏志閣暫未擬收購。「應急住宿安排工作組」組長、副財政司長黃偉綸引述問卷調查結果稱，逾八成業主認為安置要快，74%考慮接受收購。他說收購7座大廈後會清拆，不會原址重建。測量師學會料收購價涵恩恤因素，業主在同區選擇多。

對於不收購宏志閣，黃偉綸稱涉分拆公契等複雜事宜，當該座逾半業主有意出售業權，當局會再探討，現無法例可強制收樓。他說原址重建料需9至10年，時間太長，強調方案難滿足所有居民。有居民對無原址重建選項感失望，嘆現方案下只能無奈接受（見另稿）。

可選樓換樓 差額由業主「多除少補」

政府昨交代將收購宏志閣以外7座宏福苑大廈共1736個單位的業權，成本約68億元，將動用大埔宏福苑援助基金約28億元和額外約40億元公帑，當中部分公帑日後或可藉保險索償取回。業主可選擇接受現金收購，收錢後自行安排居所，或繼而經「特設銷售計劃」，從10個位於啟德、錦田及將軍澳等指定居屋、綠置居或房協出售項目選購單位。業主另可選「樓換樓」，政府會按相同業權收購價代業主經特設銷售計劃買樓，業主「多除少補」差價。

特設銷售計劃約有3900個單位可選，最快入伙項目為九龍灣綠置居盛緻苑及房協粉嶺百和路項目，同預計今年第四季入伙（見表）。

收購呎價高參考1/3 「特殊」不構先例

收購價按實用面積計算，未補價單位每方呎8000元，已補價單位10,500元。黃偉綸說，收購呎價較測量師學會原參考價高約三分之一，是考慮到居民痛失家園、生活困難，以及火災規模及影響，強調是「特殊中特殊」安排，不會構成先例。

房屋局長何永賢稱，倘業主選擇以「樓換樓券」參與特設銷售計劃，須於8月31日或之前確定意向，倘6月30日或之前已決定，則可首批揀樓，最終未被揀選單位將釋出市場；而宏福苑業主所選單位亦將撤銷轉售禁售期。

「解說專隊」將聯繫居民 料第三季付款

黃偉綸說，新成立的「解說專隊」3月起會就收購業權聯繫居民，料5至6月與居民簽臨時買賣合約，今年第三季可向業主付款。他說8月31日限期後計劃會結束，屆時未作決定的業主將「有困難」，「任何計劃總有終結期」，倘業主在限期前仍在處理遺產等特殊情况，安置方案將對他們持續開放。

黃偉綸稱收購業權後傾向拆卸7座大廈，原址不再發展住宅，可建公園或社區設施，預計待5年後清拆完成再諮詢。何永賢解釋，7座樓宇災情嚴重，部分受力牆燒至石屎剝落，亦有樓面板、樑柱彎曲變形，且石屎結構內出現許多微細裂痕，影響長遠維修保養與結構安全。她說樓宇雖無即時倒塌危險，但不宜長居，難覓復修方法以符合《建築物條例》要求，故需拆卸。

銀行願考慮按揭轉至新單位

黃偉綸表示，宏福苑約200多戶尚有按揭貸款，若接受現金方案可用款項還款，同時金管局亦已初步聯繫銀行，如正供樓業主選擇樓換樓，銀行願考慮將相關按揭從宏福苑單位轉至新單位，過渡期間亦期望銀行提供優惠，免還款和免息直至入伙。

測量師學會會長溫偉明說，自去年9月大埔錄得約100宗二手居屋成交，未補價每方呎約6000至7000元，已補價單位約9000元，宏福苑業主若接受收購，將有不少選擇，相信有關收購價已涵恩恤補貼成分，以助居民盡快安置，用公帑協助有需要者亦屬無可厚非和合理。

明報記者

原文網址：https://news.mingpao.com/pns/%e8%a6%81%e8%81%9e/article/20260222/s00001/1771697246965