解決提出問題的人或資料

仆你個街丫，特登開個新post講先﹗

我上個post講，ICU其實係唔夠資源去應付強制驗樓。

咁我係上個post都回帶，再講多次，係油治及興，尊貴要求，再加上有法緊係要執既情況下，強制驗樓個步伐係早幾年開始加快返既。

打打下字，我仲記得，我幾個月之前個post，係搵到居屋/出售公屋個強制驗樓目標樓宇名單。

咁懶，諗住上網搵會快手，點知搵唔到。

咁我CLICK返之前個post，咁就真係，仆你個街，入面個目標樓宇名單條LINK而家唔work，比政府剷走左喎﹗你有興趣可以睇返我之前寫乜，不過而家click左條link，就係衣個畫面﹕

頂﹗真係小佢老尾﹗

*********

ANYWAY，所以，你估個所謂調查委員會，會唔會研究埋，以往同而家既ICU，其實夠唔夠資源做執管工作﹖政府衣幾年興建左咁多新居屋綠置居，強制驗樓又「提速提量」，咁ICU既資源又有冇相應增加過丫拿﹖

當然，有咩問題，就緊係你唔知唔問既，就唔係問題啦。

所以，我咁好心機係度打字，就真係，WELL，我應該唔會再洗衣度的，事關之前洗完，要回帶搵返之前講過既野，就好煩。

當然，如果昌哥洗左佢段video，我就都會洗埋衣度啦。

嘿﹗

**********

題外話。

而家班智障尊貴同好多人，都講要削減公務員人手。成日講衣樣，因為易講，亦都唔會政治不正確。

咁有D部門，係值頭成個部門都多餘。之但係，你睇ICU負責強制驗樓或者現存樓宇小組個編制，就會見到，得個幾丁友，就真係點做野﹖想認真做野，都好難。

唔講強制驗樓，而家出售資助房屋有46萬個呀﹗你叫「現有樓宇小組」加埋「小型工程」小組個廿友，可以點做呀﹗

而我唔洗fact check，都幾肯定，就算而家多左咁多居屋盤又多左咁多強制驗樓，佢地既部門編制，係冇相應增加的。

當然，睇預算案，應該搵到條出黎的。不過，衣樣太煩，不做鳥。

**********

完。

ICU．資源

見到裝修佬阿昌哥整左條片叫「遲來的正義」，咁開篇文，講兩句﹕開篇文，主要係想留低佢條片係度JAK，所以真係兩句。

係條片入面，阿昌哥後半部份就講房署既獨立審本組ICU。阿昌哥講既係﹕

佢做過個居屋單位裝修，比隔黎投訴，懷疑佢拆左間屋既結構牆。咁ICU就打比業主，叫業主聯絡阿昌哥開門比ICU睇；阿昌哥唔記得左件事，冇開到門，跟手ICU擺左封信係信箱比業主。幾個月後，業主開信箱見到封信，就再同昌哥講，昌哥先醒起件事。最後，業主搵ICU再安排，跟手ICU就話要book期先再上去，事關ICU要BOOK政府車期，先可以上去單位再睇。最後，開門，影相，冇問題，件事就完左。

成件事，再加埋其他，阿昌哥就話，ICU做既野，就係要影相交差，跟手就完左件事。

**********

講完條片，可以講埋條片入面既comments，有兩個可以貼堂﹕

1. 「關於返工容易解既, 如果你返工返何文田, 有單野係上水, 有單野係屯門, 咁你每日返工有8個鐘, 如果你冇安排到車, 上午一轉上水, 下午一轉沙田, 咁即係公司一啲野都冇做過. 食環係簡單好多, 因為每區都有辦事處. 仲有依家政府內部因為財赤cut人， 以前仲可以請合約， 依家合約cut，公務員都要cut人。 你提議開新部門處理， 最後都只會有一大班高官出糧， 落手做既冇幾個。」

2.「獨立審查組 係成個區全部單位 都係得兩條友做 一年食過千單case你問佢點做。」

衣兩個呢，大致都幾好，不過有小小錯，同埋可以再講多D。

首先，獨立審查組係under房署或者房屋局啦，個組係龍翔道返工 (我都驚記錯，特登睇返政府電話簿confirmed)的。

獨立審查組呢，入面亦都有分唔同組，所以就算係每區幾條友，不過因為組入面有唔同部門，所以係有專人睇唔同範疇既野的。

我都驚記錯，所以特登CAP埋個電話表出黎，見下圖﹕





如果要再深入D，你自己去政府電話簿，其實個「現有樓宇小組」係有17個公務員，不過有兩個就係「老闆」，即係高級屋宇測量師，所以每區可能得一個係前線睇「現有樓宇」-- 所以，「成個區全部單位 都係得兩條友做 」衣個說法，可能都係唔準確的，事關全港應該各區都有公屋同居屋，最終可能係每個區得1個 (或者係油尖旺得海富同富榮，就半個人去睇，再分半個人去隔黎區啦)。

唔講「現有樓宇小組」，你再睇埋個「強制驗樓小組」，個組成就更加攪笑，真係CAP埋個圖比你啦﹕

當然，宏福之後，有幾個測量師既資料係網上消失左。不過，就算加埋個幾位消失左的公務員，其實成個「強制驗樓小組」都係得咁多人。

ANYWAY，我想講既係，成個ICU其實真係得咁多人。如果要認真做，邊夠人手做野﹖而家開左既強制驗樓project，我之前貼過，都好似有好幾十個做緊。

亦所以，衣度，亦同我早幾個月講強制驗樓時所講既一樣﹕好多年前，屋宇署知強制驗樓真係攪唔掂，所以放慢手腳慢慢黎做。不過，係由治及興，再加上班尊貴既要求下，米重新加快囉。

再加快返去做強制驗樓，但係資源又得咁多，咁，米咁囉 -- 衣樣唔係幫公務員說話，係事實來的。

*********

當然，可以再elaborated。

如果你要再精準D，獨立審查係under房屋局，你見房委會/房屋署個結構圗，都有個remarks講清楚衣點的。

我要講上面個D野呢，其實係想講，房委會同房屋署係好麻煩既機構。係2千年之前，係有好多次既重組合併，我都唔識個段歷史。

2千年後，相對簡單，唔記得幾時開始，房委會就將好多管理工作外判，房屋署就保留返最核心既建屋之類既服務。

所以，你見我之前講財政預算案，我都有特別講過，「房屋」既「政府開支」係好細，不過「公共開支」 (即包括埋房委會)就好大。

如果你再睇個詳細預算，房屋署係衣幾年個帳目就併埋入房屋局，再加上因為有簡約公屋之類既開支，所以房屋局個開支大左好多。

之但係，好簡單咁拆返開今年預算案房屋局帳目，佢2026/27年各綱領預算開支加埋係13.447億，「屋宇管制」(你當係ICU啦)係2.26億。睇返屋宇署，同期預算係20.911億，不過佢係包曬所有工作。

屋宇署既資源，已經係ICU既10倍。

當然，其實係好難比較既，無論係工作性質定好多野，都比較唔到。例如，屋宇署係好多資源，用係潛建之類，亦都較多新樓入則之類既野；ICU，就肯定小好多類似既工作。

之但係，睇政府個房屋統計，而家大約有170萬個私人單位，再係上面房屋個預算入面，話而家有約46萬個資助出售單位，咁ICU「屋宇管制」個2.26億預算，又係米合理呢﹖

仲有，唔好唔記得，ICU入面，都係有地盤監察組、土力工程審核小組之類，都有人要做類似屋宇署管新建樓宇既野的。

所以，係資源分配既角度，就算係同屋宇署比較，其實ICU係執管上，係米真係比例上都較小，小到去一個非常唔合理既程度﹖

衣個問題，我冇答案，事關屋宇署冇衣條數拆出黎 -- 而家講緊立法會財委會咩budgetQ，HK01講到好多人好擔心乜春野。咁你又估下，有冇人識問，叫政府拆條數比你睇丫拿﹖

*********

上面我好似係幫ICU講野。

不過，之但係，其實我心底，係認同阿昌哥講既野﹕ICU好多時比佢既感覺係，佢地旦求影到相就算。

即係，我下面講既係偏見黎的。

當年，即係2000年頭，政府/房委會將公屋管理既職能，逐步移交比私人外判公司管理。跟手領展出現，就好多商場直頭比埋領展啦。

係2000年頭之前，由房署管既屋邨同埋商場，好多真係衰到阿媽都唔認得。除左食環，房署班公務員真係出曬名 -- 所以，點解我由最開十幾二十年前 (﹗﹗) 係度寫文，就已經贊成領展既出現。

我唔知ICU係米維持左以往房署公務員既傳統。不過，你可以話，因為資源所限，就會出現阿昌哥講既情況。

咁由於偏見關係，都係唔打咁多字。

不過，又to be fair，房署策略及建築署個班官僚，即係負責起樓個班，又真係唔同講法，真係做野的。又當然，再fair D，佢地既資源又真係多好多，人數都多好多啦。

*********

ANYWAY，無論ICU班官員係米求求其其，定因為資源唔夠，所以已經盡做都攪成咁。之但係，如果真係要評，真係識個問題，或者個咩獨立委員會想攪清楚個問題的話，衣個資源問題就要處理。

如果比多左資源，ICU都係咁攪笑，就真係攪笑啦。

又當然，政府會唔會比多D資源﹖

油治及興，北都係重中之重喎﹗

其他野就，WELL。

**********

最後，宏福個聽證會，真係全面地攪笑。

我唔記得，前排邊個報導話，麥美娟係處理宏福既問題上面，解說同其他安排都值得讚賞。

聽完，就真係小曬老尾。

小佢老尾既係，大廈管班係邊個局負責架話﹖

擒日就出左單新聞，經濟日報衣個題幾好﹕「置邦」文員指業主授權票打個交叉都當簽咗名　ICU電郵早五日通知宏業巡查。

麥美娟衣排成日講要修訂建築物管理條例，仲講到要檢討授權票要點做，除左簽名仲要點點點。

不過，實情係，條例其實係2024年同之前幾年，已經修訂過好多次。成個民政署，仲有百幾個大廈聯絡主任理論上去協助大廈管理，有業主大會就會坐埋落去。

咁不過，而家仲有管理公司夠膽講「業主授權票打個交叉都當簽咗名」，你又估民政署知唔知丫拿﹖

大廈聯絡主任既問題，我好好好耐之前講過，咁唔長氣，唔講。

不過，而家「置邦」出黎打左你一巴，咁唔該你解釋下，民政署不停講協助大廈管理，講要修例要完落大廈管理，咁其實係執行層面上，係做左乜春呢﹖

前排個聽證會先有人話，有居民告前法團主席敗訴，黃碧嬌仲要好人到幫手比埋仲費。而家不嬲一直都有人冒簽授權票，管理公司又唔守建築物管理條例「授權票打個交叉都當簽咗名」，咁有冇人比政府告過管有或者行使虛假文書，甚至輕D啦，犯左建築物管理條例呢﹖

你自己睇下，建築物管理條例第36條係講咩﹖

36.虛假的陳述或資料
任何人 ——
(a)按本條例規定的格式或為施行本條例而發給、發出或制訂的通知或文件中作出陳述或提供資料；或
(b)提供本條例所規定提供的資料，
而明知或理應知道其中有虛假要項，即屬犯罪，一經定罪，可處第3級罰款及監禁6個月。
(由1993年第27號第42條修訂；由2000年第69號第17條修訂)

就算當你唔識字打個交差都算。

不過，咁多年黎，咁多假授權書，有幾多人係比政府告過﹖

麥美娟喎﹗妖。

************

完。

威廉．兩句

近排偶然間聽到何CC「新歌」威廉，又幾好，去返佢最初頭個隻喎﹗

不過，原來首歌係2023年的。

WELL，即係咁呢，我係有何CC頭四隻CD的。佢頭三隻碟，特別係英師傅寫既幾隻歌，真係好好聽的。

例如，衣首出自第三張大碟既Ecoutez moi，佢個studio ver其實仲好聽過上面條link既live純結他版本。但係，衣個版本更加突出首歌既鋪排有幾靚。

佢衣批2千年頭既碟，係我當時小數聽既仲要係真金白銀去買既廣東歌來的。

去到第四隻碟，我覺得係跌WATT，好多歌而家都冇咩印象。

之後第五隻 艷光四射，我已經冇買，係之後聽返 -- 隻碟入面既同名主題曲呀、明目張膽呀、如無意外呀，其實都幾好。不過，就係成個風格唔同左，有D普通，唔太係自己杯茶。

之後仲有聽既，係去到2008年既Ten Days in the Mad House (衣度斐宇梧的中文唱片架有個樂評 -- 我當年有睇佢既評，真係好睇的；而家想搵返個隻碟既簡介，竟然搵返佢出黎，真係好耐冇睇佢，亦都唔記得左佢添)。當年應該係download黎聽，成隻碟係聽到，佢又想轉變風格方向，亦都預視左佢之後選擇既路。

講返隻碟，係用概念形式去寫，大部份歌都係陳奐仁同何秉舜去作編，歌既質素有D參差，想玩新野亦都普通；隻碟入面既少年維特、揚子經書，無啦硬玩電野，就擺明唔係何秉既強項，亦都唔覺得陳奐仁係玩衣D。

不過，如果張成隻碟去聽一次，佢第一首青山黛瑪開頭，去到最尾用風見志朗同埋美空雲雀，又開得同埋收得好靚，成隻碟好完整，亦係成隻碟最好個幾首 -- 上面風見志朗個live同studio ver係一樣，一枝結他，將成隻碟想做個種混亂抑壓，搵返個出口。

佢再之後既碟或者歌，WELL，其實都係麻麻，最後個隻我鐘意既歌，已經係滿地河 -- 而家睇返，原來首歌又係周國賢作的。

原來，周國賢幾多歌，我都幾鐘意 -- 我想講既，就緊係佢寫比SICA既再見有時啦。衣個合唱版，又係好聽的。

ANYWAY，講返何CC。

威廉就去返佢早期風格，不錯的；佢真係近排出既另一首新歌，我又麻麻。但係，佢新碟聽日出，都可以期待下既。

***********

其他兩句。

支聯會案真係好好笑  -- 如果你將擒日阿李運騰講既野，再同另一單新聞擺埋一齊，就真係好笑之餘，亦都要為阿李運騰擔心。

阿李運騰衣兩日審支聯會時，講左樣咁既野﹕

鄒繼續提問，問關在「六四屠城之後，你有冇繼續參與支聯會嘅相關活動？」李再次打斷，指「呢個問題唔正確，係六四事件之後有冇參與支聯會」。鄒語速加快，質疑「正正係法庭沒有事實證據，不能夠話呢個不正確」。

李指若鄒繼續使用「呢啲字眼」，法庭會考慮「係咪真係畀你繼續問落去」。陳仲衡歸納鄒的提問是，「1989 年六四事件之後，你仲有冇參與支聯會嘅事情或工作？」關回答有繼續參與支聯會主辦的活動。

如果我係馮晞乾，我一定會用衣段歷史博物館香港故事重開既新聞黎到質問佢抽佢水。段新聞係咁講的﹕

與翻新前的展覽對比，英殖年代事件的表述有變，之前的「割讓」香港改稱「強佔、強租、割佔」，「六四事件」稱為「春夏之交的政治風波」，過往展示1989年「百萬人遊行」的圖片不復見，「六七暴動」改稱「反英抗暴」。

SEE﹖ 

咩叫「六四事件」﹖衣件明明係「春夏之交的政治風波」。

李運騰用D咁既字眼，同官方唔一致，咁係米否定官方對「春廈之交的政治風波」既政治定性﹖係米想做假新聞，煽動香港人憎恨中央政府﹖

結論係，無敵大法衣家野，就真係無敵的。你同官方立場唔同，就真係唔知係米煽動鳥。

如果你話講「六四事件」四隻字唔係煽動，咁你返大陸，試下扲住個大聲公講「六四事件」四四隻字，睇下一分鐘後，你會點﹖

當然，你而家過關講出黎，又可能冇乜點既，事關大陸好多人，都唔知咩係六四 -- 不過，如果你六月初去天安門廣場講，又係另一回事，真係李運騰可以試下咁做呢。

************

第二樣想講既係，宏福成個調查委員會又係好好笑。

你見房署個獨立審查組市建等等，全部都係出黎攪笑。

獨立審查組就不嬲都係攪笑，所以係評宏福時，你見我開頭都主要係講屋宇署責任，差D唔記得獨立審查組。

差D唔記得，事關，獨立審查組班人，聲稱係做房委會擁有既樓宇執管。之但係，以我理解，一路以黎，佢地好多野，其實都係要consult屋宇署，睇屋宇署頭。

至於點解有獨立審查組同埋有咁既情況出現﹖明報衣度有講小小歷史，個報導最精華既係衣段﹕

然而，及後房委會改以與屋宇署簽訂諒解備忘錄方式，由房署獨立審查股繼續採取措施，確保房委會樓宇設計和建築標準，與條例及相關要求對私人發展項目監管標準一致；屋宇署則繼續借調高級專業主任級人員到該部門，支持各審核小組工作。

要理解衣段新聞，其實要識小小歷史，即係背後既政策邏輯，點解要有個咁既安排。

個邏輯大約係，我好耐之前唔記得邊度睇過，房委會要成立獨立審查組，維持房委會既樓係唔受建築物條例管 (而家 只係要確保房委會同私樓人發展項目監管標準一致架咋)，個原因係，要確保公職人員係履行公務時不受檢控既原則。

即係咁，如果房委會既物業係受建築物條例去管，咁一出事 (例如明報新聞入面講既短樁案)，屋宇署就可以及需要用條例去控告房委署既建築師。

如果真係檢控，當時政府聲稱，係違反左一般公共行政既原則，即係公職人員唔會因為履行公職而受檢控既原則。所以呢，房委會同屋宇署就有衣個諒解備忘錄方式既安排。

亦所以，你會見到明報段新聞亦都好畸呢咁講，「截至去年底ICU編制則有333個職位，其中154個負責執行屋宇署長授權的屋宇管制工作」、「屋宇署則繼續借調高級專業主任級人員到該部門」 -- 要借調，即係有咩事，都要consult屋宇署啦。

亦所以，你話個獨立審查組而家做野做到咁，又好奇咩﹖

至於市建，就算把啦，之前講到招標妥有幾好，有幾多第三方顧問提意見。而家就話，佢地資源唔多，唔好有咁大期望喎。

**********

最後，消防未出場，不過都已經好好笑。

你睇早幾年光榮冰室係駱駝漆大廈幾受地政食環消防關照，最後收皮。咁你米問下消防，宏福咁多野，又關唔關消防事丫拿﹖

淨係講警鐘，都一定係消防問題。

即係，宏福出事之後，政府出新聞稿，話「消防處加強巡查並推動業界檢查消防裝置及設備」，仲要特別講到「特別針對正在進行大維修的大廈，主動檢查大廈消防警鐘系統運作」。

咁不過，其實，好多攪大維修既大廈，其實會熄消防鐘消防警報，根本就唔係新聞；熄警報警鐘，就差唔多係行規添啦，下麻 -- 你唔熄衣D警報，班裝修佬下下推門都trigger警報，咁仲得掂﹖

你估一直以黎，消防知唔知丫拿﹖

我求其再search返，原來宏福前保安主管都講過點解要熄警鐘，同我講既一模一樣。衣D，真係樓宇管理既常識 -- 仲要我冇做過物管，都知啦，下麻。

咁消防，又點會唔知﹖出事之後，先黎做大龍鳳，就真係有趣。

************

真係最後，我都係唔死心，當年獨立審查組同屋宇署份policy paper就搵唔到，不過搵到香港法例第123章，即係建築物條例點樣講去保護公職人員。第123章37條係咁講的﹕

37.公職人員的法律責任的限制

(1)政府或任何公職人員均不會因任何建築工程按照本條例條文進行，或該等建築工程或其圖則或其所需物料須經公職人員檢查或批准而負上法律責任；本條例亦不規定建築事務監督有義務檢查任何建築物、建築工程或物料或任何擬建建築物的地盤，以確定本條例條文獲遵守，或確定任何向他呈交的圖則、證明書、表格、報告、通知及其他文件屬準確。
(由2011年第16號第23條修訂)

(2)建築事務監督或按其指示行事的公職人員所進行的任何事宜或事情，如屬為執行本條例條文而真誠地進行的，則不會令建築事務監督或該公職人員個人承受任何訴訟、法律責任、申索或要求。

(3)除非有條文明確制定，否則本條例並不豁免任何人於任何履行義務令、強制令、禁止令或其他命令的法律程序之外。
(由1966年第31號第102條修訂)

你會見到，第37(1)條係2011年修訂過，不過睇落就係冇大改，只係技術修訂。

ANYWAY，係而家第37條之下，其實公職人員睇落就係冇咩法律責任的 -- 唔知日後既調查委員會有冇人講衣樣呢。

結論係，上面我憑記憶講返點解獨立審查組要出現，亦都應該係因為衣個第37條既立法原意呢。

**************

完。

電力市場暨電費簡單數學

好耐冇打字，咁簡單打兩隻字。

************
擒日冇新聞，所以明報頭條整左個沙嶺數據園用電既問題 -- 兩篇新聞係衣個post既最尾入面，貼埋出黎。

新聞入面，環保團體就主要講咩碳中和，不過入面就加多左句，「他又說，電力公司為配合用電需求增加，有可能增加投資成本，帶來加電費壓力」。

跟手，係連帶新聞入面，政府就回左句﹕

「環境及生態局回覆稱，政府在《管制計劃協議》框架下審批兩電提交的五年發展計劃，嚴格審核兩電建議的資本項目投資（包括為未來大型數據中心供電的項目），避免兩電作出過大、過早、不必要或不合理的投資，影響電費水平」。

即係咁，我一直都好懷疑，環境局或者政府個發言人其實識唔識香港電費既邏輯同埋政策 -- 衣樣幾有趣，陣間先講。

不過，我主要想講既係，政府發言人講既咩「嚴格審核兩電建議的資本項目投資....避免....影響電費水平」，其實係廢話。

**************

我之前講預算案時，米離左題，講到下面衣樣野既﹕

「中電指出，已建好的河套西、馬適路及古洞北變電站，合計供電能力相當於現時4至5個香港科學園的用電量；而河套西變電站現正為河套香港園區已落成的建築物供電，現階段用電仍在起步，遠未達設計總容量」。

當時我仲話，衣批資產係起好但未發電，不過個8%回報已經生效，米要由現有客戶食左佢既。

中電衣段說話，其實亦都話比你聽，引證左個政府發言人係講緊廢話啦，事關河套西變電站就肯定係「過大、過早」，因為「現階段用電仍在起步，遠未達設計總量」 -- 咁環境局話會咩「嚴格審核兩電建議的資本項目投資」，仲唔係廢話﹖

另一樣更加深既野係，當河套區北都興建咁多變電站之類，再加沙嶺又用咁多電，就算政府真係「嚴格審核兩電建議的資本項目投資」，其實都會「影響電費水平」，到頭來市民都係有份要更食。

************

即係咁，明報段新聞係咁講架麻﹕「單是沙嶺數據園區估計年耗電量已達約17.5億度，相等於全港用電量約3.8%」。

如果用直覺去睇，沙嶺園區用咁多電，咁係佢既事JAK。

不過，你要明白，香港既電費政策係under 兩電既 管制計劃協議，最新一份協議寫明，兩電既准許回報係佢地既平均固定資產淨值。

用個極度簡單形象化既例子，你就知沙嶺園區會令到電費點變化﹕

假定全香港係得沙嶺堆填區同你屋企。為左衣兩個客戶，中電要興建一個發電廠同變電站同其他輸電野，個度要100億。咁100億，係8%准許回報之下，就收你每年8億電費 --咁堆填區唔用電，所有電費就你食曬啦。

咁而家政府話，我要將沙嶺由堆填區變做數據中心，所以就要將中電個發電設施加碼去到1000億，咁個准許回報就變成80億。

咁個好好笑既問題就黎啦﹕沙嶺變左數據中心係要用多左電，不過係現有電費率之下，佢每年都可能只係用60億電費，咁仲有「剩餘」20億既准許回報，可以問邊個扲﹖

你而家比緊8億電費，係可以cover個「剩餘」20億准許回報既部份。不過，就算計埋你原先比個8億，都仲有12億准許回報係未實現到。

咁衣12億，係邊個要比﹖米係加電費，數據中心同你一齊比囉。

上面係個超簡化既例子，不過就好簡單說明個問題係邊 -- 中電興建一個新資產，其實佢額外新增既電費收入好難會cover到個8%准許回報。

cover唔到，就可以加電費，現有客戶一齊食埋。

*************

興建新電廠變電站等設施，係好難cover個准許回報，其實個原因係好簡單。

一黎，供應一定要早過需求，衣個係「時差」上引起既回報cover問題。

即係，而家河套北都個批，電力設施投入左，不過需求就未到﹕而家河套仲講緊第一期仲未完全攪掂，第二期更加未動工，所以個批變電站真係生緊金蛋，唔駛做有錢收，其他現有客戶就點都要硬食個准許回報。

(當然，所謂既基建先行，就係一定有咁既情況 -- 又之但係，而家河套一期本身就比計劃遲，而河套二期其實更加係遲左好多，仲未知用咩方式集資去興建架下)

二黎，所有電力設施都要有備用capacity，一有備用capacity就會影響個資產回報，變相要加價既機會大左。

(我下面打打下字，講講下，你就會知﹕中電既備用發電量係兩至三成的。衣個備用發電量，會有好大影響的 -- 特別係好似沙嶺之類既大project)

三黎，衣個就係沙嶺同成個河套區既問題，衣個可以講多小小。

而家兩電聲稱為左鼓勵節能，家居用電係用累進式收費。工商用電就係另一樣野，佢地可以申請「大量用電項目」，跟手用儲水式冷氣又可以申請電費折扣。

你有興趣可以睇中電個收費表，冇興趣就簡單D睇HK01衣個舊小小既報導都得，更加簡單話比你聽，當個家居累進式收費去到某個水平之後，其實係貴過工商大量用電個收費率好多，可能係一倍以上 -- 即係，個工商大量用電係可以收平你家居用電好多。

咁去到沙嶺河套，就更加突顯個問題﹕佢地係超大額用戶，個電費折扣一定好大，要扲返個8%准許回報既難度更高，變相要其他客戶補貼既機會更加大 -- 仲未計，因為佢地用電量大，所以所有備用安全設計，一定更大，變相中電個資產投入又上升。

用個簡單例子。段新聞係咁講﹕「單是沙嶺數據園區估計年耗電量已達約17.5億度，相等於全港用電量約3.8%」。

沙嶺用17.5億度電，當佢基本電費係$0.8每度電，即係一年要比14億電費 。再換句話說，沙嶺既發電資產加埋，係175億，就剛好滿足到8%回報等於14億衣樣野。

(拿，衣度有小小問題﹕環團講既17.5億度電，應該係計埋燃料費，所以個數據中心每年要比電費可能要20億樓上，個發電資產可能要2百億樓上。不過，是但啦，明我邏輯就得啦)

175億睇落去好似好大。我唔係電力設備專家，都唔知沙嶺需唔需要額外有咩輸配電設施，甚至會唔會因為佢用咁多電，而要係發電廠機組層面做野，令到佢成個資產投入要175億。

又之但係，沙嶺數據中心涉及既電力設備投資，必然係好多個億，必然會增加電費壓力。

**********

唔係題外話，不過開新段另寫會清楚D﹕

衣度，就涉及上面講到，備用發電量層面既問題，其實係好大影響的﹕我印象中，再加上而家搵埋比你睇，中電個備用發電量係十幾年前有三成左右，所以好多機組都延遲退役，擺係度做備用的。

(當然，你話三成多唔多，就實有人話多既。之但係，香港發電廠就係得咁多，兩電又冇聯網呢 -- 如果要維修或者出事，就真係要靠備用裝機，所以佢要多小小備用發電量，又係合理的。)

咁而家沙嶺用電量去到「相等於全港用電量約3.8%」，咁其實已經影響到個備用電量 -- 所以，沙嶺除左要攪幾十億既變電站同輸配電之類既野以外，其實係成個電廠既發電裝機都會影響到 -- 衣度，係涉及百億既設備。

所以，上面話，沙嶺數據中心會唔會令到中電係電廠層面要做野，其實我估係要的 -- 所以，我先特別係上面計條數出黎。

***********

ANYWAY，相對沙嶺衣隻穩定高用電量輸出，河套區個批實驗室同其他設施，其實又有另一個問題﹕佢地用電量更加唔穩定 (起碼好大部份設施唔會好似數據中心咁樣，需要24小時都用電)，好大機會同其他工商機構一樣，都係玩峰值用電，同其他工商業係辦工時間搶電，之但係一到夜晚電力需求就大幅下降。

咁河套區個批既發電資產，可以係河套區入面提供到8%既回報，其實就更加困難 -- 所以，米要其他用戶「補貼」囉。

另一個效果係，如果河套區個批同其他一般工商業用電模式一樣，其實會拉高個峰值用電量 -- 後果係，個備用發電量下降，咁中電又係要投資更多發電機組囉。

所以，你話中電為左河套同沙嶺，要攪咁多輸配電設施，甚至有機會拉高峰值用電/減小備用電量，咁最後其他現有客戶點樣唔需要分擔個電費加幅丫拿﹖

我仲未計，之前我copy明報段新聞時，唔記得cop新聞入面好重要既最後一句﹕

「至於古洞北和馬適路變電站則分別為古洞北、馬草壟新發展區，以及粉嶺北新發展區供電，支援區內多個基建項目，包括北環線、住宅項目及社區設施等。他續指，以上三個已投產的變電站目前使用率遠低於設計容量，預計足夠支持未來所負擔區域未來十年的用電」。

「預計足夠支持未來所負擔區域未來十年的用電」-- 即係未來十年慢慢先需要既設施，已經提前十年入曬帳，可以打落現有客戶既電費入面。

咁個結論係，就算我當環境局真係有個超級嚴格既審批都好，個所謂既電費水平，就一定會被影響。

***********

講完上面，再講D 官僚架構上technical既野啦。

如果你識，就會知道，成個環境局咁大，負責電力運作監督既，係有個「電力小組」同埋under佢既「電力市場發展分部」，入面係一班機電工程師。

之但係，負責監管兩電執行管制協議既，又唔係上面個「電力小組」，而係另一班人﹕負責睇住兩電盤數同投資既，其實係「財務監察科」；衣個科入面，除左個首席助理秘書長之外，其他全部都係會計師來的。

所以，每年去立法會講兩電電費調整，其實係衣個財務監察科去解畫架喎﹗

你有興趣，可以去政府電話簿入面睇下，衣個「財務監察科」部門除左最大個位首席助理秘書長之外，下面編制既人，佢地個TITLE係叫高級庫務會計師(財務監察)、庫務會計師(財務監察)，同埋一級會計主任(財務監察) (個部門每個title都係分1同2，即係分別監察兩間電力公司，加埋係得7條友 -- 當然，未計D文書主任啦)。

衣班人，連埋電力市場個班人，一班就係機電技術人，另一班就係會計技術人，又點會識得電力政策，識得同你點樣做所謂電力市場政策﹖

所以，又好神奇既係，環境局係2022年個時又同環保署做左個架構重組，整左個「氣候變化政策科」，轉門係睇碳中和之類既政策。

咁衣樣，就仲更加神奇啦。

你如果真係去睇環境局個架構圖，你就會睇到衣樣野﹕

佢新整出黎既氣候政策科，開多左個新首長級職位做咩氣候變化專員，領導個乜春氣候變化政策科，係度同你講碳中和。

不過，負責兩電既財務監察科，攪能源效益/能源市場個幾個科，其實又仍然係返under返環境2個副秘書長，佢又係同個咩氣候專員同級，不過就唔同科。

咁你話，其實無啦啦攪氣候專員，不過個分工仍然係畸畸呢呢，你話係米低能丫拿 -- 當然，攪個叫做「氣候專員」既職位出黎，其實可能係政治需要，咁又另一回事啦。

不過，我想講既係，米係囉，你話環境局係度講監管兩電，係度講電費，就真係九唔搭八，可能佢地自己都攪唔清楚要點做囉。

***************

最後，其實我特別講環境局個架構，係想講另一樣近排好hit既野﹕

前排阿局長謝展寰米硬膠膠走出黎話，每周公布折實油價 ，助市民監察既。其實，做所謂監察油價同之前講過既油站批地，就係上面幅圖 首席助理秘書長(能源) 個班人負責。

咁你明咩事未﹖

香港個油價發電能源政策，其實係由環境局負責。以前去講兩電加價，係去立法會經濟發展事務委員會去講，而家仲要走返去環境事務委員會去講添。

咁成個油價發電環境政策，其實係由「環境及生態局」去負責。咁佢地睇既，成個局既mission，就緊係環境，就緊係所謂既碳中和啦。

咁油價係點﹖電價係點﹖

well。

再者，都係個句，成個局既分工都係九唔搭八，淨係電力政策都散落左去個局入面唔同部門 (上面能源科又理下個發電組合攪下可再生能源架喎)，咁你話好多政策，米攪到九唔搭八，甚至同一般人有好大期望落差囉。

****************

醒起，比多個例子。

上面講到，環境局入面有個能源政策，入面有個電力小組。

你見環境局網頁自己講能源供應能源安全時，佢有講到個能源安全入面，佢地係咁講﹕

《電力條例》(第406章) 及《氣體安全條例》(第51章)有助監管電力及氣體的安全供應和使用，以及家用電氣及氣體產品的安全。這些條例主要包括發電設施、電業及氣體承辦商及工程人員的註冊，線路及氣體管道系統的標準，以及電力和氣體的安全輸送和使用。

不過，兩電出事時，交報告既，又係交比機電署，而非交比環境局衣班人。

交報告比機電署，事關電力條例，其實係由機電署負責；氣體安全條例，先係環境局負責。咁究竟環境局下面個電力科班工程師，係負責咩既呢﹖

可能淨係得佢地自己知自己有咩野做 -- 或者比亞迪要點樣發展，香港要有幾多電樁，就要靠曬佢地呢。

嘿﹗

****************

最後，個結論係，謝展寰係廢。

係佢改組之下，成個環境局同樣係廢廢地，或者一如以往地同社會市民期望有落差。

所以，真係精彩。

你當然可以話，衣個係黃錦星留落黎既難攤子。不過，黃錦星其實係好盡責 -- 佢真係守好本份，將所有野都當係環境問題，不問經濟成本咁去處理 -- 所以係政策上，米只係不停講氣候變化，將唔同政策炒埋一碟都當做碳中和問題囉。

(又所以，再史前時期管電力既，係經濟發展及勞工局，即係未有咩三司十一局之前，電力市場係以經濟既角度去管的)。

不過，而家既謝展寰係，比你改組完，除左整左個吉祥物呀氣候變化專員出黎之外，仲有咩改變，有咩做到﹖

而家既環境局，仲九唔搭八加埋生態，將食環擺埋落去自己度，就真係痴左線。

當然，而家既環境局都有野做到既﹕前排車用油加價，阿家超出黎話，叫兩電留意，需唔需要調整發電組合 -- 即係，油價一有事，就碳你老尾中和，氣候變化專員就，繼續做吉祥物囉。

衣個，係油治及興之後既政府特色，真係以結果為目標。

****************

完。

****************

港聞

2026年3月30日星期一

數據中心耗電巨 港未列PUE規管 環團料沙嶺年耗相若64萬戶 促訂上限「與世界接軌」

【明報專訊】政府銳意發展創科，數據中心正急速增加，用電需求顯著上升。現時全球多地已制定數據中心電力使用效率（PUE）標準及其他能源效益措施，例如內地去年底起規管新建大型數據中心PUE不得高於1.25（見另稿），惟本港仍未訂定PUE上限等規管措施。有環保團體推算，單是沙嶺數據園區估計年耗電量已達約17.5億度，相等於全港用電量約3.8%，足夠64萬戶三人家庭全年用電，成為本港一大耗電用戶，敦促政府與國家及世界接軌，及早更新政策，確保2050年前實現碳中和的目標不受影響。

明報記者 馬耀森

政府：現例已間接規管

年內諮詢業界PUE值

環境及生態局與機電署綜合回覆本報稱，現時《建築物能源效益條例》「已間接規管數據中心的PUE值」，機電署會持續檢視《條例》實施情况和建築物能源效益標準，並在今年內諮詢數據中心業界，探討如何加強規管數據中心的能源效益指標，包括PUE值；此外，機電署會持續「促進」業界應用相關實務指引，例如香港綠色建築議會制訂的《綠建環評數據中心》綠色建築評估工具，以及建築環保評估協會制訂的《綠色數據中心實務指引》。

根據政府早前公布，沙嶺數據園區耗電量達220兆瓦，創新科技及工業局長孫東前日（28日）出席沙嶺數據園區動工儀式後表示，沙嶺項目用電屬長期穩定的剛性需求，不存在突發用電，相關電力供應系統有成熟方案應對。

不過，數據中心是否具能源效益，足以影響電力需求甚至碳排放，國際間普遍已制定標準，並透過指標「電力使用效率」（Power Usage Effectiveness, PUE）衡量。PUE是以設施總用電量（數據設備和屋宇裝備裝置）除以數據設備用電量計算所得，數值必大於1，PUE愈接近1，代表非數據用途（例如冷卻、照明）的能源效益愈高，超過2則代表效率低下。

綠惜地球助理環境事務經理陳永傑以政府公布的用電量220兆瓦推算，若PUE為1.3，全年耗電約17.5億度；若以2018/19年度本地數據中心節能表現、即PUE平均1.6計算（根據《綠色數據中心實務指引》），沙嶺數據園區年耗電會增至約21.6億度（增加約4.1億度），當中增加的電量已等於全港用電約1%。

陳永傑指出，本港未來將會有更多數據中心建成，耗能和排放量與日俱增，惟至今未有訂定數據中心的PUE標準，更未有披露最新的用電數據，若不加以規管其耗電效率，會影響碳中和步伐，敦促政府及早訂立管控政策，妥善管理數據中心用電及碳排放量，與國家和世界接軌，並追上節能科技，例如採用液冷技術為數據中心降溫，以達到更具能源效益的表現。他又說，電力公司為配合用電需求增加，有可能增加投資成本，帶來加電費壓力。

2030年料增20間

環境局及機電署回覆稱，經修訂的《建築物能源效益條例》今年9月20日起全面實施，要求新建數據中心和現有數據中心在進行主要裝修工程時，屋宇裝備裝置須符合《屋宇裝備裝置能源效益實務守則》內訂明的能源效益標準，換言之，屋宇裝備裝置的能源效益愈高，將有助減低用電量，令數據中心PUE值降低，故《條例》已間接規管數據中心的PUE值。

數據中心用電 數字辦無數字

數字辦回覆稱，香港現時有61間數據中心，預期2030年將增至81間，當中包括沙嶺數據園區；目前，數據中心毋須向政府交代用電量，所以政府並無全港數據中心的平均能源使用效率數據。數字辦又說，儘管如此，電費是數據中心主要營運支出，因此業界非常關注其能源效益，為降低能源消耗，數據中心一般會安裝高效能的能源系統，以降低營運成本。


■明報報料熱線﹕inews@mingpao.com / 9181 4676


政府：嚴審兩電投資 避影響電費

【明報專訊】本港未來陸續有大型數據中心建成，電力需求將會顯著增加。被問到電力增長牽涉電力公司投資基建設施、會否構成電費加價壓力，環境及生態局回覆稱，政府在《管制計劃協議》框架下審批兩電提交的五年發展計劃，嚴格審核兩電建議的資本項目投資（包括為未來大型數據中心供電的項目），避免兩電作出過大、過早、不必要或不合理的投資，影響電費水平，而中電已根據五年發展計劃（2018至2023年）就香港未來發展供電需求作出建設，以配合創科產業（包括數據中心）發展，提供穩定電力。

沙嶺數據園區前日舉行動工儀式，投得該園區的香港潤江智算科技有公司披露園區模擬圖，日後園區將有兩個132千伏變電站，均由中電興建。中電早前表示將投資有關變電站的電力設備，並負責日後營運及維修，以確保供電安全穩定。

翻查中電向立法會提交2025年電費檢討的資料，2018至2023年獲批准的資本開支中，多個變電站均屬北都範疇，包括河套西、洪水橋、古洞北及牛潭美變電站等。