海洋公園的公關藝術

海洋公園又出業績。

以往我年年都講，咁諗住今年唔講，事關又係回帶jak。

不過，佢太過仆街，所以點都要講，就算星期六都要打字去講。

*********
係2024年11月28日上午，各大報評都用社評或者即時新聞方式，去講海洋公園業績點點點，講佢今年都係要蝕錢。不過，所有評論都係用「消息人士」黎去講。

事關，海洋公園係要去到11月29日，先將佢份業績上網 -- 我11月28日去到黃昏都未係網頁見到份業績呀下。

即係話，你11月28日出新聞去評佢，就只可以用佢放風出黎既消息去講。

你可以做既，就只係可以跟住佢既官方說法，不停講話今年雖然唔掂，不過有大熊貓就會天下太平架喇。例如，經濟日報、明報、HK01既即時新聞，都係咁講，當一刻都只可以用官方口徑去廢UP。

你話，咁既公關藝術，係米仆街丫。

*********

往年我都每年評過海洋公園，早兩個月都講過。

我好有自信咁講，我評既係全香港最好，亦都係最中個重點 (拿拿拿，我求其係BLOGGER SEARCH返衣度海洋公園四隻字，我放返曬D文出黎 -- 雖然有d好似唔關事，不過事但喇)。

上年我就講到，海洋公園個業績最賤既地方係，佢用左個九唔搭八既回撥手法，用財技，去令到自己有錢賺。今年光傳媒睇左佢份業績，就用衣個角度講多次今年份業績既問題。

回撥當然係問題。不過，今年海洋公園個業績，其實係有另一個問題，會令到佢未來幾年都唔洗旨意有錢賺。

個問題係，水上樂園。

***********

早個月我就係度講過，海洋公園最新近既既神奇之處係，立法會財委會2020/21年批左筆救命錢比海洋公園。當時個重新方案既條件係話，海洋公園要係山下整個零售區，令到海洋公園可以日後有穩定既現金流去應付營運關支。點知，市道唔好，招標無人理，就竟然可以無啦啦擱置左個山下零售區 -- 咁當年立法會批錢係因為有衣個條件，而家你可以自己決定擱置就擱置﹖

我提衣樣野，唔係離題。因為，水上樂園，其實都係有同樣情況。

************

上年我係度評海洋公園既業績時就話，水上樂園可能係救海洋公園既唯一希望。

不過，今年唔洗睇份業績，我都知道，水上樂園又已經賴野鳥。

點解我會咁講﹖你自己SEACH「水上樂園+ 全天候開放」，仲會見到海洋公園係2021年PROMOTE水上樂園既時候話，水上樂園係全年都會開放。

不過，早排已經有新聞話，水上樂園要維修，出年夏季先開放，你鐘意可以睇衣個報導，我求其SEARCH出黎。

睇完上面幾行字，你就大約SENSE到個問題，知道個大獲野係邊喇﹕如果有生意，或者個水上樂園有錢賺，咁點解唔係KEEP住全天候開放既﹖

*************

我無心機得黎好好心機(﹗﹗﹗)，係佢份年報GOOGLE左水上樂園，就會見到個情況真係何其狀觀。

你可以自己睇下面既圖﹕

第一張圖係個損益表，話你聽公園連埋水上樂園既營運賺蝕。

第二張圖話你聽個收入breakdown，水上樂園今個財政年度竟然收入小左 -- 頭幾年開張，咁快吸引力已經下降﹗水上樂園係2022/23個財政年度收入係1.661億，去到2023/24年度，收入竟然下降到1.297億，可以無啦啦小左幾千萬 -- 本身收入都唔多，幾千萬已經好大件事架喇﹗anyway，1.297億衣個數，係好重要。

第三張圖話你知，係經營成本個brekdwon，水上樂園今年既經營成本係1.844億。即係，你將水上樂園今年個收入減成本，水上樂園淨係個營運成本已經蝕緊。

第四張圖係水上樂園既折舊，衣樣野我講左好多，今年個折舊係1.301億，每年都會差唔多。

第五張圖話你聽，個水上樂園入場人數，兩年都係30萬人 -- 入場人數相同，不過收入小左咁多，係米小左好多人去訂VIP飛，或者D人醒目左唔租佢個D設施用品。

睇完衣幾個圖，你就會見到，水上樂園原來又係蝕錢，所以今年開始，要係冬天開始封館維修止蝕﹗

你話丫，個水上樂園已經係新投入既項目，不過其實都係蝕本貨。

唔講咩會計咩IRR個D野，你淨係要問，個1.297億收入都COVER唔到個折舊，個收入仲要跌緊，咁個水上樂園黎緊個20年定30年折舊期，係米之後幾十年，每年都要蝕錢﹖

**************

你再睇返遠古歷史，當年水上樂園申請撥款既時做係點講﹖

衣份文件有個好簡單既附錄，而家睇返真係攪笑，咁我CAP埋出黎﹕

當時預計，水上樂園每日訪客人次係10,500人。當時仲係講到明會全年全天候開放，咁全天候開放即係10,500人*365日，即係3,832,500，齊頭即係383萬人。而家實際係幾多﹖係30萬人。

就算當年係亂估都好，不過你係根據衣個入場人數去問財委會去申請成個項目既貸款。而家全年100萬人都冇，你當年個Projection米錯曬，項目米肯定蝕錢，扲既錢米注定還唔到囉。

**************

所以，結論係，海洋公園其實就係我2020年係度講既 主題樂園typical例子﹕而家所謂既主題樂園，除非你有好強既ip去賣周邊產品，如果唔係一定做乜都蝕到訓街 -- 強如迪士尼有咁多ip咁多公仔扼錢野，其實都好難賺錢，或者樂園賺到既錢都比左好大部份母公司比母公司，分曬版權錢喇。

咁你話，海洋公園以往入場券平，餐飲仲未加得價，又冇咩具吸引力既產品ip賣錢。未來真係靠個幾隻熊貓，就可以令年幾億收入去平衡返條數﹖仲未計，未來幾年要還錢比政府。

所以，你見田北辰講咩唯一出路係大熊貓，或者海洋公園更新緊山上設施就實掂，我就會話，攪多d就死快d。

特別係，大佬，陳勇同班講廣東話唔正既唔知咩人，攪個隻大熊貓真係樣衰到，連班尊貴都頂唔順話「熊唔似熊、貓唔似貓」，就真係，你估海洋公園多左幾隻熊貓，就會多幾億收入呀﹖

******************

結論係，海洋公園醒呀，未出份業績，就用「消息人士」放風，令到所有報紙電視台都跟住你有限既「消息人士」資料去comment。

不過，其實又唔洗咁驚既，黎緊份業績都應該上立法會，不過唔會有人識睇，班智將淨係會講點樣利用熊貓經濟去返轉個業績既jak。

又不過，出年份業績都應該會繼續收皮，再黎多年就要還錢比政府，到時就真係精彩，d友又會九唔搭八懷念盛智文架喇。

******************

anyway，我估，遲下一定有人放風，話海洋公園係旅遊係公益項目，唔可以淨係用賺蝕去衡量 (其實而家都有人咁講架喇)。

不過，如果係咁既話，就唔該唔好不停充大頭鬼攪咁多野，每年都要蝕億億聲囉 --- 過兩年每年要還錢比政府，到時蝕既就係每年唔止幾億 -- 或者政府個幾十億又要撇左佢架喇。

都係個句﹕如果真係公益項目，就唔該唔好擴充，攪咁多壇野不停更新d所謂設施，簡簡單單做下教育米算囉。

當然，明既，唔攪咁多野，班高管又點會出到咁多糧，又點可以得閒就用唔知幾多千萬請顧問攪個重新方案 -- 攪完但係又做唔到要推返喎。

所以，真正既結論係，反正政府其他project都係蝕錢，咁蝕比海洋公園，有熊貓睇下，市民又真係用到，又唔係用百億咁蝕法去計數，都無所謂喇。

真係估唔到，我最後都有所覺悟。

********************

最後，睇返上年評論，攪到我特登去睇返海洋公園今年個現金流添。

唔講咁多，cap出黎，又係精彩的。

用返明報即時新聞條題，「海園去年蝕7160萬 稱大熊貓熱未至 收入、人次創疫後新高」，不過個經營活動現金流係負數，個營運現金流同之前幾年比又小左喇 (我之前cap左圖，所以cap埋今年先)。

********************

完。

東京遊記

上年有個遊記，今年又整返個。

不過，唔打咁多字同caption喇。

簡單講，去東京同近郊睇紅葉，輕井澤就落左大半，東京就多數都未開；不過，銀杏就OK。

所以，紅葉黎講，舊輕井澤雲場池同中輕井澤個批就水尾，不過都OK仲有野睇。

至於東京，原本想去多次高尾山就上網見到紅葉未紅，所以冇去到。

不過，去左奧多摩個邊既御岳溪谷，都唔錯，仲要真係冇乜人去，係得D日本仔去；佢隔黎個鳩巢溪谷，人地早兩年影出黎就好靚，不過我去到個日就冇野睇的，所以留左5分鐘就趕火車走人 (佢仲有個御岳溪谷遊記，我再遲兩日去就同佢影出黎差唔多款)。

至於銀杏，去完溪谷就順路，去多次國營昭和公園，好似靚過上次 (上次其實冇時間去得半個鐘咁大把)，今次仲有紅葉添。另外，之後去左東京銀杏名所，阿明治神宮外苑，頭個日去就算天陰陰d銀杏都唔錯，第朝再去就好好喇。

食方面，好似上次去金澤一樣，第一晚都係住minn hotel，貪佢可以自煮。

咁第一餐都係去上野吉池自己買蟹同牛打邊爐，仲買到日本仔鬼爪螺同其他野，不過就冇乜特別。至於北海道和牛太肥喇，唔出名既新發田牛反而幾好。蟹方面，友人話隻1820YEN既凍蟹返焗之後仲好食過隻新鮮毛蟹，甚至同遲兩日去 蟹地獄食既帝王蟹差唔多。

牛方面，除左第一餐之外，輕井澤就好多人去既aging beef神戶牛就普普通通，反而之後去新宿食既中價神戶牛就幾好。

仲有，除左係711同lawson買左好多次brulee之外，去明治神宮之前仲去左表參道食衣個GARIGUETTE。重點係，我知銅鑼灣係開左衣間野，不過我係食完先再check返，銅鑼灣衣間野係賣大約160蚊一個淨餅。係表參道，兩個餅加埋兩杯LATTE，大約3千YEN左右，即係兩條友150蚊，個日仲要唔洗排隊添。

所以，你話，而家睇多次個日本餐牌同價錢，咁你幾熱愛香港到要留港消費食日本仔野丫拿。當然，如果我有幾億身家，又冇咩所謂 -- 不過，比個咁既200%以上既premium去食，就點都會自覺係傻仔囉。

最後，早上10點幾係新宿行過見到間賣人氣芝士餅NY PERFECT CHESSE既舖頭，出面排左四五十人，就心諗班人都係痴左線，我同佢都係無緣架喇。又不過，旁晚去到機場竟然見到有得賣仲要唔駛排隊，咁米買囉。買完，食左，普通。可能係我唔好芝士既關係。

話時話，頂佢個廢，新橋蟹地獄個場竟然好多普通話 真．大媽 係度同你玩唔知係腳底定雀仔按摩，真係唔係咁都有生意呀麻.............

相。

先旨聲明，全部係用samsung電話直出冇執冇景深咩都冇 -- 大佬，係輕井澤同溪谷個兩日都係around零度，仲要得兩件普通外套，冇凍死都好彩，相就係咁是但影架咋。不過，samsung直出既相都已經好重味精，係唔知點解佢昭和公園棵好靚既樹佢又冇執到。又，不過呢，係現場睇都仲靚小小，特別係個溪谷，有時落住雨有D煙霞，真係幾仙境。

最後，真係不得不讚blogger，佢可以將我選擇既相由尾排返頭，咁事但喇，反正我都冇詳細按日子寫個遊記出黎。anyway，下面頭個D係神宮外苑既相，第一張又係D唔守法自己行出馬路既同包，所以要影低佢地既惡行。最後面個D，先係輕井澤呢。

完。

開估

得米一個答，咁照開估。

基本上米既思路同我諗既一樣，不過內容唔完全相同。

1. 侵侵

侵侵今屈最重要既關注點係，要令美國同自己GREAT AGAIN去到一個程度，係就算佢4年後落台，之後而家咁多個官司重新啟動又入曬罪都好，下一任總統都可以名正言順去特赦佢，等佢唔洗坐監。

所以，有幾樣野睇到﹕

．早兩個禮拜，有人話侵侵會搵pompeo做國務卿，我心諗，一定唔會。原因好簡單﹕pompeo早兩年係侵侵非法保留機密文件案出過聲話侵侵有問題。如果pompeo繼續留係團隊，政治上有作為，一個唔該下屆選到總統的話，咁到時侵侵個幾十條罪判左出黎喇，咁點算呢﹖所以，有人話咩pompeo唔夠忠誠，係事實；不過，侵侵要既唔止係忠誠，而係要政治保險

．題外話，前排 侵侵提名條身有屎Matt Gaetz做司法部長，咁我係日本仔時睇到CNN不停講係米要公開阿Gaetz Report，講佢點同未成年少女既唔知咩關係既時候，我就諗，丫，咁既用人標準都好正路喎。不過，咁湯狀點解做唔到律政司呢；

．好多人話，侵侵衣屆內閣好後生，就顯示侵侵好有遠見好想下屆政府繼承自己既政治理念，我就唔知有幾多係正確喇。不過，肯定正確既係，佢係想團隊入面有人做下屆總統，去確保就算佢做到成pat屎都好，又或者唔夠好去到可以特赦都好，個位當選者會特赦佢。

．當然，如果侵侵做到成pat屎，比民主黨返生，又或者黨內其他派系上位，咁上面講既都係廢話。咁所以，黎緊4年美國政治會好好睇 -- 究竟係侵做得好勁，政治保險自動生效丫，定係做到成pat屎所以要玩好多內部矛盾甚至要與天鬥其樂無窮呢，就真係好睇。

2. 內咩利亞湖

亞湖就仲簡單，就係米個思路。即係，打杖前，佢個司法改革攪到唔知幾多以色列人上街，跟手幾年前又有貪污指控 (有人話因為咁先要攪司法改革喇)。

而家哈馬斯伸個頭出黎，就fit曬，之前仲越打越開心，就算美國幾唔想以色列繼續打，亞湖就真係唔知又搵咩藉口點都要繼續打。如果唔係想無了期咁打，以色列之前又點會撩伊朗 (之前好多人估以色列唔會還拖伊朗架) -- 不過，又真係估唔到伊朗咁廢，打兩野就停手囉。

3. 習大

非常簡單。毛主席點解要捧江青或者華國鋒﹖彭麻麻係軍委步步高升既傳聞點解咁勁呢﹖唔知係米見到俄爹係烏克蘭攪成咁，諗諗下整頓完火箭軍都唔係好夠膽教訓下台灣。所以，真係唔知點好，係米要行返老毛舊路算。

又不過，習大得罪咁多人，又冇老毛個種威望，佢身邊既都係又唔搭八既人，就真係 -- 你睇李強蔡奇王滬寧做常委之前，係做咩崗位架下﹖﹗之前個屆就算唔係團派江派，都係特定系統既一方hill熊，而家個d就真係......

講開又講，前排唔記得報導李強去邊度考察，有個畫面真係震驚我三觀。個畫面係，李強自己擔住把遮行黎行去，仲要企第二排聽人介紹。大佬，去到縣仔班官，都要前呼後湧，阿書記企最前後面成班榜友幫阿書記擔住把遮，應該係內地人既常識喇，下麻。阿強哥真係服待慣阿習大，唔記得左自己係總理 -- 雖然政治局第二把膠椅就已經唔存在既。

********

所以，總結既係，唔一定係要靠打外敵，亦都唔一定係保住自己個位既。例如，憲制上 侵侵就點都唔可以連任 -- 就算，well，係戰爭狀態，其實係米都唔可以連任，我都唔知喇，當年二戰係羅斯福無啦啦死左杜魯門先上任咋喎 -- 又之但係有特赦就收貨架喇。

又之但係，我個思路其實同米都係一樣，上面三位人兄都係要某種形式上既保命。由衣個角度去睇，佢地既好多決策，又真係可以預測。

所以，衣兩日新聞就話侵侵單case暫停住先唔宣佈裁決 (之前有天才話侵侵會唔會單案判左之後自己特赦自己，就真係咁都諗到.......)，以色列又同黎巴嫩停火60日喇，就真係，之後會點呢，就應該要慢慢先睇到 -- 特別係阿侵會攪D咩出黎，就真係要放長雙眼，不過應該唔洗要去到打杖保命掛...........