早排聽左小小
羅家聰講香港經濟講咩K型經濟，不過聽左陣就冇聽，事關佢地應該都係亂UP。
佢地係亂UP，因為講咩滴漏效應就係隨口UP冇數冇方法；講到咩貧富懸殊，就連香港同英國有幾多人年收入超過1百萬都唔係好知個數係點，就知佢地係亂黎。
所以，聽完之後，早兩日搵左D野。
點知，今日就見到明報篇文，又講左小小我想回帶講既野。
咁簡單用唔同方式黎到講兩句。
********************
先講明報個報導。
基本上，明報就講曬份野架啦；你如果睇明報或者睇立法會份野，都應該有D熟口面﹗
後面個篇我原本HIDE左，不過而家放返出黎。
********************
你睇明報個報導或者立法會個數據透視，其實大部份數據都係統計處網站搵到出黎。
但係，要留意既係，你睇衣D數據，係要好小心咁樣分開返，究竟有邊D數據係用「當時市價計算」，有邊D數據係用「某年環比物價計算」。
衣樣係重要，因為如果唔係用「某年環比物計」做個錨，你就根本唔係做緊數據比較。
例如，係明報新聞入面，阿李兆波係咁講﹕
經濟學者李兆波指出，《數據透視》涉及貨品的部分銷售額未計算通脹，相信計算通脹後零售業部分類別的銷售額實質跌幅將超過五成，強調本港零售業在高租金、人工成本影響下，價格優勢已不顯著，而珠寶和百貨商品在境外替代品較多，無論境外旅客或本地旅客都不會傾向在港購物。
咁李兆波講既係冇錯，立法會個數據透視真係用左個「名義價值」去交代條數出黎，咁真係未反映通脹之類。
咁你再去統計處網站去睇，佢又真係冇個「某年環比物價計算」 -- 你有睇開，
就知佢網站有唔同數據主題，佢係「經濟」個欄好多數都有「物價環比」，之但係「行業」個欄係冇「物價環比」。係「行業」入面，好多時都只係有個「指數」比較。
又之但係，其實行業入面講既銷售，好多時你用「物價環比」既概念，即係你計算埋咩通脹就好奇怪 -- 「經濟」入面好多項目係扣除埋通脹，係因為要計算 (或者比較) 個購買力甚至個購買量/消費量有冇變化；係某些行業既銷售額入面，其實你扣除左通貨膨脹係代表咩，或者有咩意義﹖
又或者係咁講，如果我要知個量扣除通脹後有冇變化，其實用返「以環比物價」計算既「私人消費開支」就會睇到。例如，
衣個係「經濟」SECTION既表就會睇到咁多年香港「私人消費開支」既環比變化。當然，個表就冇「行業」入面將唔同行業銷售分得咁仔細。
************
咁講正題。
你去統計處個網頁，睇佢衣個
主題導覽，其實就有好多唔同數據，之前我都係度quote過。
用衣個網頁去睇香港經濟，其實係睇下面幾個表就得，之後就可以有個框架，去睇香港經濟。
不過，你睇下面所有link，其實都要做幾樣野﹕
1.我會將個年份範圍set做「2016年至最近一年」﹕咁做既原因係，香港經濟最好個年係2018年，咁理論上做比較就要用2018年做錨，去同今年比較；我set做2016年，係因為想確認2018年係米peak左咁解；
2.統計處好煩，佢好多時default係有衣兩年既季度數據。所以，我會click走佢所有季度選項，淨係睇年份。
3.做完之後，你會得出既數據，就會由下面第一幅圖，變成第二幅咁樣﹕以往我貼出黎既數據，都要咁麻煩咁樣整的﹕
4.咁所以，你明我以往打衣D字講香港經濟係幾咁麻煩啦﹗亦所以，黎緊落黎，我淨係會貼LINK，唔貼圖﹗
***************
咁你睇最開頭羅家馮智政講咩香港經濟，你最首先要攪清楚既係，究竟香港經濟而家係有幾好。
我之前都有講過，官府成日話咩香港經濟疫後強勁反彈，之但係去到早兩年，個實質本地生產總值即係GDP都仲係差過2018年。
你睇我上面幅圖，其實係出自下面條LINK﹕
表310-31003：按主要開支組成部分劃分的本地生產總值 - 以2024年環比物量計算
https://www.censtatd.gov.hk/tc/web_table.html?id=310-31003#
你由幅圖或者條LINK睇到，用2024年環比物價計算，2018年個本地生產總值係3,194,466百萬，即係3.194萬億。去到2024年，2024年個本地生產總值係3,186,526百萬，即係3.186萬億，亦再即係仲未及2018年。
去到2025年個本地生產總值先升到去3,301,474百萬，即係3.301萬億，先正式超越2018年。
咁你話，香港經濟個實質增長，真係有幾好﹖特別係，如果你同老美呀台灣呀新加坡之類比，我唔CHECK數字，都知一定係差過人。
***************
上面衣條係GDP大數。
你再睇個細數，衣幾年個本地生產總值組成，其實又有咩變化﹖
ANYWAY，佢個季度報告係咁講的﹕
以開支面編製的本地生產總值，是把用在貨品及服務方面的最終開支減去進口成分。其計算方法如下：
本地生產總值 = 私人消費開支
+ 政府消費開支
+ 本地固定資本形成總額
+ 存貨增減
+ 貨品出口及服務輸出
− 貨品進口及服務輸入
咁你睇上面幅圖，就算2025年本地生產總值個數已經超過2018年。不過，「私人消費開支」、「本地回定資本形成總額」、同埋「貨品出口與服務輸出總額」都係仲未超過2018年；相對上，係計算GDP要扣減既「貨品進口及服務輸入」都小過2018年，衣個就合乎比例。
你睇好多數都唔及2018年，咁點解個GDP會升﹖
正如我年幾前係度講過，係因為政府消費開支大增丫麻。
咁你可以睇下衣個表﹕
表310-32022：按組成部分劃分的政府消費開支 - 以2024年環比物量計算
https://www.censtatd.gov.hk/tc/web_table.html?id=310-32022
個表顯示，政府消費開支由2018年既3245.76億，增加到2025年既4133.44億，多左成千億，或者係多左成27%。
當然，相對3萬億GDP，衣4千億好似好小。又之但係，你又要好小心，唔好以為政府既開支係咁簡單。事關，如果你詳細睇上面個表，表入面列出既政府開支，其實只係有「僱員報酬」、「購買貨品及服務」同埋「非參與商業活動政府部門售予住戶及企業的銷售額」。
你見衣幾項，小左樣好大既政府開支 -- 就係基建。
所以，如果你又睇另一個表﹕
表310-32032：按組成部分劃分的本地固定資本形成總額 - 以2024年環比物量計算
https://www.censtatd.gov.hk/tc/web_table.html?id=310-32032#
咁就首先會睇到，個表D數都係唔MATCH架。
不過，就咁睇條大數，「私營部門」既開支係2018年有4,610.08億，2025年就跌到3,600.28億；「公營部門」既開支係2018年1,493.46億，2025年就升到1,941.41億，多左接近500億。
你睇衣條數，「私營部門」開支大跌，係因為佢地唔起樓唔玩重建商廈之類，所以個開支大跌啦。
不過，衣個接近2,000億既「公營部門」開支，又或者係多左接近500億，就係政府近年講既咩加快基建開支，即係咩北都呀之類。
咁所以，如果你將衣條「本地固定資本形成」入面「公營部門」條數，再加埋「政府開支」條數，咁衣幾年GDP增長，「政府總開支」其實佔比係大左好多。
兩條數加埋，係由2018年既3245.76億+1493.46億= 4739.22億，升到去2025年既4133.44億+1941.41億=6074.85億。
如果再計埋佢地既GDP佔比，2018年GDP係3.194萬億，「政府總開支」(即係上面既政府開支+公營部門本地回家資本條數) 即係佔約14.8%；2025年GDP係3.301萬億，「政府總開支」即係佔約18.4%。
咁所以，衣幾年所謂既經濟增長，其實係好靠政府開支，特別係基建開支 -- 而好多野係萬變不離其中的，你睇財政預算案，其實都會睇到類似政府開支加快既野。
咁相對政府開支，你可以睇下面個表﹕
表310-31012：按組成部分劃分的私人消費開支 - 以2024年環比物價計算
https://www.censtatd.gov.hk/tc/web_table.html?id=310-31012#
你睇衣個表，就會睇到類似上面份立法會數據透視份野，即係大部份私人消費開支係2025年都係未追得返2018年條數。
衣個表由消費層面去睇，仲會睇到條數叫做「非本地居民在本地市場的開支」，即係類似立法會數據透視入面遊客條數。如果你CLICK入去睇，衣條數係2018年係3497.58億，去到2025年係1975.21億，小左4成有多。
即係，政府成日講咩旅客數目返黎，用咁多錢攪咩盛事經濟。但係，旅客條數，係仍然小左4成。當然，個2千億唔係大數 -- 旅遊不嬲都佔GDP好小架啦 -- 之但係，你用咁多人力物力，仲攪到西貢都無處不旅遊，最尾竟然返到條咁既數出黎，就真係精彩。
ANYWAY，我真係要提多你一次﹕衣個數，係以2024年既環比物價計算，係實數，唔係名義數值黎既。
睇完消費開支層面，你可以睇經濟活動既層面。你有興趣，就自己睇衣兩個表﹕
表310-34501：按經濟活動劃分的本地生產總值 - 以2024年環比物價計算
https://www.censtatd.gov.hk/tc/web_table.html?id=310-34501#
表655-82101：四個主要行業的增加價值及就業人數
https://www.censtatd.gov.hk/tc/web_table.html?id=655-82101¶m=N4IgxgbiBcoMJwJqJqAjDEBaADHkANCAPoAuxmOhJADhdGgL5ECSAcgCKonmYZHE6MHEQDWAUwCexDNBAA1ahOkAmTAHYKYqcQDMmXcQqNmIAM5RYteiqLyAgsQDSAUUTF7nYgGUXAGRc4ABUXDmJ2LmgAbRAAJQBDAHdiAFliAAtRABNiLOoABQAnAHs6NCy6AFJiADsQAF0iFxT8vwB5d1d3TzDfAODQ8M4YGITkmnFC2oKSsoriarr60wAbGFJCgFdxRiA
咁我唔詳細講，不過你睇第一個表會發現到樣野﹕
1.你就咁睇，比較返2018同2025年，有D行業既表現都係差唔多個數；
2.不過，你睇咩「進出口貿易、批發及零售」、「住宿及膳食服務」，其實個「生產總值」跌得慘烈；
3. 升得明顯既係有「金融及保險」同埋「公共行政、社會及個人服務」；
如果睇埋第二個表講四個主要行業，你會發現到樣仲有趣既野 (不過要留意佢衣個表係當時市值，唔係環比物價)﹕
1.「金融」佔GDP比重由2018年既19.8%，升到2024年既26.2%；其他3個主要行業，全部都跌；
2. 你睇個「佔總就業人數的百分比」，「金融」佔GDP比重係上升左，佢個增加值實數都係升左好多；之但係，「金融」「佔總就業人數的百分比」係由2018年既6.8%，只係升到2024年既7.2%。
2.1. 如果你以實際人數去睇，「金融」「人數」條數，都只係由2018年既264,300升到去2024年既265,000-- 冇錯，「金融」「人數」條數係2018年之後係有升，不過去到2021年高峰之後係年年都跌。
3.相對上，「專業服務及其他工商業支援服務」其實係佔GDP條數唔靚的，不過人數就上升 -- 上升既，主要係科研資訊科技既從業員，衣個就係政府政策。
4.衣個金融佔GDP上升，但係人數下跌，係好有趣既野；資訊科技呀科研個批GDP貢獻唔大既野，就唔知點解發展左咁多年比左咁多錢都仲係冇乜貢獻，之但係人手又升左咁多。
5. 你話，係米好有趣呢。
**********
睇完上面大經濟環境條數，你就可以睇埋下面幾條數。
第一條係本地居民收入，即係下面個表﹕
表310-36201：本地居民總收入、實質本地居民總收入、按人口平均計算的本地居民總收入及按人口平均計算的實質本地居民總收入
https://www.censtatd.gov.hk/tc/web_table.html?id=310-36201#
唔洗開黎睇都知，收入無論係以名義或者實際去計，都係上升，事關個GDP升左麻。
亦都唔洗開都知，個「按人口平均計算的實質本地居民總收入 (以2024年環比物量計算)」都係升，原因好簡單﹕香港小左人口麻。
咁你睇衣個本地居民收入條數，好似好靚，係由2018年既444,741元，去到2024年已經被超越；個數係2024同2025年分別係465,636元同埋481,446元 -- 你要記住，衣個係實際環比數來的。
咁好啦，個平均收入咁靚，「金融」條數又做得咁好，咁仲唔係有滴漏效應﹖
你要睇咩滴漏效應，除左隨口UP之外，最簡單既MEASURE方法，就係睇上面講過既咩消費開支，另再加之前係度QUOTE過既食肆收益。
即係，可以睇衣個表﹕
表625-68004：按食肆類別劃分的按月食肆收益
https://www.censtatd.gov.hk/tc/web_table.html?id=625-68004#
衣個表我上面幾年前個POST條LINK都POST過。不過，我而家特登貼多次個表出黎，你睇完就知點解﹕
見到麻﹗個表竟然多左個COLUMN，叫做「食肆收益數量指數」﹗
我兩年前睇衣個表，係冇衣個數；衣個數，你睇佢註釋，係咁解的﹕
食肆收益數量指數是把食肆收益價值指數內的物價變動因素扣除後所得。消費物價指數的相關組成部分會用作平減物價指數。食肆收益數量指數是以環比連接法編製並按年重訂權數。
即係，以往個表只係得未扣除通脹既食肆收益價值指數。而家，統計處竟然會整左個扣減脹既食肆收益數量指數出黎喎﹗
所以，你見我幾年前上面條LINK講餐飲個POST，我當時係話，所有餐飲類別都跌，淨係「「雜類食肆場所」都勁，不過係向好果方面勁，由2018年118.8，大升到131.2」。
但係，如果你用佢扣除通脹個食肆收益數量指數去睇，其實就算係「雜類食肆場所」都好，係2018個數已經PEAK左，就算係之後幾年，都追唔到2018年個數，咁個收益根本就冇大升過。
又再當然，如果要睇分項，「雜類食肆場所」(你當係兩送飯啦)個食肆收益數量指數係2025年係開始跌，同期「非中式快餐」、「快餐店」同「酒吧」係開始回升。
又再之但係，你如果將食肆收益價值指數同食肆收益數量指數比較，你就會見到個真實慘烈景像，我特登將上面幅圖尾個部份貼埋出黎﹕
你睇個「所有食肆」既收益價值指數，由2018年既139.2，慢慢追，去到2025年追到去127.7，咁都好似OK啦，個差距都收窄左好多啦。
但係，如果你睇個收益數量指數，係由2018年既143.2，擴大去到2025年既112.8。衣幾年係有追，不過個差距扣左通脹之後，仲係好大。
咁即係咩﹖
即係，食肆執左咁多都好，都係加唔到價，或者有加都追唔到通脹。你睇「酒吧」條數，係特別恐怖 -- 就算減左烈酒稅個D，都唔會咁樣影響架麻。
**********
你見上面幾個表，經濟有增長，本地居民平均實際收入都有增長，咁點解消費同食肆都係咁差，好似滴咩效應唔存在呢﹖
你要驗證滴漏效應係米消失，最嚴謹既方法，就係要做個regression，去睇GDP同上面幾樣野係衣十幾年黎既關係。
之但係，我唔會得閒做 -- 要做，亦都冇咁簡單。
因為，上面講既係本地居民平均收入麻。
要睇真正有冇滴漏效應，又或者消費點解轉變，其實係要睇多樣我之前一路有睇既野。
冇錯，就係上面講jobless recovery條link入面個樣野 -- 去稅局搵年報，睇返每年薪俸稅納稅人既分佈。
要睇既係，係3百幾萬勞動人口入面，有幾多人要被評稅同交稅。衣個要被評稅交稅既人，係大約3百萬就業人口 (即係勞動人口入面扣除失業之類既人) 入面，又大約通常係佔2百萬唔夠 -- 之前講過啦，香港要交稅薪俸既，一直都係唔夠2百萬人的 (至於點解咁多人唔駛交稅，你問下的士佬，或者去街市睇下米知)。
而再要睇既係，衣2百萬左右既納稅人入面，有幾多係年薪5百萬、1百萬，1百至50萬、再同50萬樓下。
你睇衣幾個數，係因為個稅階唔同，以及，最重要既係，50萬年薪大約係4萬蚊人工，以往大約佔左一半既納稅人的鳥。
你要咁樣睇稅局份年報，係因為，究竟經濟有咁多增長啦，究竟相應上，要打工既香港人，係收入分佈有冇相應上升﹖又或者係，會唔會就算政府成日話家庭平均收入上升左，之但係因為失業率上升又或者外勞之類崏其他原因，所以某類納稅人例如2萬蚊左右人工既清潔保安人數小左﹖
當然，係香港既情況，其實有D煩，事關衣幾年改過個稅階，免稅額個D又變。
不過，我唔查稅局年報，直覺都話到比我聽，應該係最頂層年薪1百萬既係多人左 (起碼通脹都係度啦。再唔係，我米比個你睇市建同機管局班高層，衣批高收入人士佢地既人工係點變囉)。但係，佢地只係佔總人口甚至勞動人口好細百份比，所以唔會有太強既滴漏。
至於最基層，人數會較多，佢地人工都應該升左，但係佢地人工升左之餘，都唔見到會用多左好多錢 (即係咩marginal propensity to consume個D野)。最簡單﹕我懶，唔查，問左AI，佢話保安份工由2020年大約1萬4千蚊，加到今年最盡1萬9千，多左5千蚊一個月，咁之但係，計埋通脹好多野，你會駛多好多錢咩﹖
所以，如果要講滴漏效應或者內部消費需求，最重要係中間個層既納稅人數目，我相信分佈係唔會點變 -- 衣個中間個層，大約係上面講既1百至50萬。你唔同意，咁頂盡再放寬落到去40萬，即係月薪3.3萬個批，先係對內部消費最有影響個批人。
咁所以，滴咩漏JAK﹖ 結果就反映到去消費入面囉。
*************
補多句，題外話。
我一直既直覺，即係靠估既理解係﹕你有衣個3.3萬月薪，好多時家庭既就會買樓，自己一個就租樓，變相用黎消費既disposable income就唔多呢。
所以，我一般黎講會將100萬至50萬年薪當做最影響消費既中層。你有興趣去稅局睇，或者睇返我上面條LINK，就會發現，衣批人係較高薪得黎，比例上都仲算係較多個隻。
而我又真係去搵多次，係最新有資料既2023-24課稅年度，年薪50萬樓下既納稅人，係佔納稅人既60.35%。係同一個課稅年度，年薪50至1百萬衣個「中層數」，大約有27.5%左右。
我上面jobless recovery有幾個年度，係2015-16課稅年度，衣個「中層數」係22.79%；係2018-19課稅年度，衣個數係22.17%。咁你會見到，衣個「中層數」以往其實幾穩定；就算2023-24年升到27.5%，都係大約係20-30%衣個數。
*************
再者，最後，都係個句。
我之前講專才，就話左比你聽，班專才其實唔知係米要交大陸稅 -- 如果要交大陸稅之後，就應該抵銷左香港筆稅款，咁佢地就未必要交香港稅。
(題外話，財新好野呀，衣兩日爆左話大陸打算玩離岸信託徵稅，追捉你20年；衣幾日仲攪境外保單徵稅，
HK01入面講既CRS就係我之前講個樣野。)
咁你明我想講咩架啦﹖
香港近幾年咁多外勞咁多專才，理論上佢地會填補左我上面講既「中層數」就業人口，再加可能填補部份較基層既工作啦。
但係，我之前都講，你大陸長假期甚至淨係星期六日去啟德或者多專才住既區行下，你就唔會見到人影都唔多覺，事關好多專才就返鄉下 -- 而家長假好多「香港人」返大陸，咁固然真係有好多係所謂既「本地人」。之但係，專才都好多。
咁衣班人，我唔理佢有冇交稅都好，甚至我唔理佢佢地係RIDE ON到或者貢獻到所謂香港經濟復甦。
之但係，佢地扣左稅扣埋租數之類，實際可動用收入又會有幾多﹖又會有幾多係香港消費，有幾多滴漏﹖
你再睇埋，究竟佢地實際可動用收入，有幾多係要交比阿爺，有幾多唔可以留係香港 ，或者要洗都去歐州日本洗﹖
(補返句﹕WELL，你明我衣段講咩架呵﹖你留係香港，炒股賺左既，就追返你今年同之前廿年既收入收你增值稅啦)
你將衣個人口結構變化 (即係專才取代以往既本土中產)，加埋落去上面個框架，其實就可以或者係先可以解釋到，點解香港經濟好似好返，但係以經濟活動黎計，就淨係得金融同科研個邊好似係請多左人或者個經濟增加值上升；但同時間，其他就業，同埋成個私人消費都仲係唔掂。
*************
好簡單，我咩都唔講，上面既野，其實可以再引伸落去。
我淨係想問﹕
當經濟復甦係咁倚靠政府開支，當中又再要倚賴基建，咁係基建開支入面，官府又唔知判比咩公司，總之起樓又要返大陸玩組裝合成，玩輕軌又要搵大陸公司之餘，跟手又唔知有幾多係外勞之下。咁究竟而家個經濟復甦下，有幾多錢係做到咩滴漏做到咩政府開支產生既multiplier effect呢﹖
你明衣個道理，個框架就好完滿架啦。
*************
題外話。
我真係唔會比錢明報，所以睇唔到李先知。不過，佢衣個題真係好FUNNY﹕
聞風筆動：飛機拆解傳跟內地標準 業界憂損國際商機 ／文：李先知。
ANYWAY，淨係睇個題，我就諗，好奇怪咩﹖係咁都唔奇架﹗
*************
未完。
