為波叔喝采﹗

今年預算案，我早幾個月前真係完全估錯﹕佢竟然個綜合帳目有盈餘喎﹗

不過，點解有盈餘，就算之前講過野既乜乜學會公會之類，絕大多數都冇講過，更加唔會諗到點解有盈餘。

突然出現盈餘，唔係因為咩印花稅收入大升之類 -- 衣樣所有人都知，所以唔係突然出現。

個盈餘係咁黎，出自預算案第272段﹕

272. 二零二五／二六年度政府整體開支修訂預算為七千八百九十二億元，較原來預算低三百三十一億元。其中，經常開支為五千七百二十四億元，較原來預算低一百五十七億元。

經常開支，竟然可以小左157億﹖個度係經常開支接近3%喎﹗跟手非經常開支，即係又小左174億，真係好多工程拖住未做﹖因為宏福棚架，定係因咩事工程會拖慢﹖買小左電腦機電設備之類，唔會用小左成百億架喎﹗

而家講落，真係好似唔係我錯，係波叔上年估錯個政府開支喎﹗有乜可能差咁遠﹖真係各部門因為家超係大大面前講過，今年政府有財政盈餘，所以慳到咁多錢﹖

ANYWAY，唔得閒，聽日先講份野。之但係，你見佢繼續玩財技玩轉撥，其實全部都係為左北都。所以，要講份野，其實講北都，就已經足夠。

又不過，拿返渣沙先﹕全世界係得特許公認會計師公會香港分會 (同埋上面第一條link既德勤) 咁把炮，估個綜合帳會錄得41億盈餘。

但係，我特登搵返ACCA一月發表個預算案建議，佢地估政府有41億綜合盈餘，個原因都係錯的。今年有盈餘既主要原因，肯定唔係佢地新聞稿講既﹕

「儘管全球不確定性帶來的一些不利因素依然存在，金融和創新等重要產業為香港經濟增長提供動力，加上2025年第三季的強勁表現，令全年增長預期上調。有鑑於此，ACCA預計2025/26年度綜合盈餘將達41億港元。」

講多次，個盈餘主因除左係人都知既印花稅收入之外，另一邊係冇人預計既政府開支大幅減少。如果唔係開支大減，就算印花稅升咁多，個綜合帳目都仍然係赤字來的。

即係，大佬，個修訂開支係減小左331億喎﹗如果開支唔修訂，冇估錯到，咁米即係仲有3百幾億赤字﹗咁即係就算個印花稅收入大增，原來都係填唔到衣條數架喎﹗

至於我衣篇文開頭條link，入面德勤估政府有156億盈餘，就真係攪笑啦。同埋，你認真睇多次個條link，其實我又估得幾準的 -- 淨係講收入，我已經假設印花稅同利得稅超級好過預期，都仍然估個綜合帳目係赤字來的。嘿﹗

*********

過兩日得閒寫下預算案，包保係冇人寫既角度，或者冇人咁講既角度。

不過，而家點都要講句，波叔真係好野。

最後，補多句，熟悉本人文風既讀者，都知我上面其實解左點解今年政府可以駛小咁多錢啦，下麻。

有時D野，真係睇政治，就可以解釋同預測好多野的。係我衰在到而家都唔信邪，仲係太理性，係度計數，未學懂微臣思維。嗚。