都係POINT FORM。
**************
1.以前李先知好睇既，事關佢除左有政府同政黨放風之外，仲有好多正常唔出得既消息，都係度講下。近年零，都有小小放風，例如之前係度QUOTE過，佢話阿家超係黎緊立法會入面有「一人一票」，就真係幾好睇啦。不過，佢而家更多係變左做 小罵大幫忙，說好香港政府故事。所以，衣個欄既價值，就真係，WELL。
1.2.都係個句，我唔會比錢睇明報，所以我係就住佢個題同個段仔，去講兩句。
2. 佢個題話，「官僚系統價值缺失」，講到「有建制中人認為，事件反映官僚系統過於重視程序合法，欠缺人文關懷及人道主義精神」。咁我想問句，由保護維港d咁左膠環保野，去到今次同志案，又再去到延安整風咁款整頓香港文藝界甚至娛樂界，又係米「欠缺人文關懷及人道主義精神」-- 已經唔講其他再敏感野。
2.1. 你而家扮放風聲稱有良心建制派，咁條建制友講到咁大件事，又夠唔夠膽開名﹖
2.2.當然，而家成個官僚包括司法體系都仲有「人道主義精神」架 -- 你睇好多案，阿天之嬌子開車撞斷人隻腳就成個精英部門發揮人道主義精神寫曬求情信，最後阿嬌子被判社會服務令；阿海關case就九唔搭八落charge真係未有結果都知唔會告，咁係米好有人文關懷呢﹖
2.3.衣d咁多cases，有咩建制派出黎講野﹖所以，你放風洗白都唔好放得咁核突啦。
3.李先知另一精彩既係，佢話「官僚系統價值缺失」，「官僚系統過於重視程序合法」，咁你又係攪笑。
3.1.佢唔係唔記得最近個單觀音水麻﹖官僚重視咩程序﹖法律，係要用黎運用好法律工具；程序，都係一樣架咋麻。
3.1.1.唔明我講咩﹖我之前米講左，大陸最鐘意講既係，要運用好法律武器。香港既，之前唔記得quote過譚耀宗講咩，米又係話，攪唔掂米立法授權政府去做野囉。近排既，係爆炸案入面，有陪審員丫麻，最後好多被告都告唔入丫麻，咁以後米「會積極引用《國安法》和《維護國家安全條例》」。
3.1.2.所以，唔係題外話，都話國安法係定海神針啦，用佢去落CHARGE，其他法例就可以死埋一邊 。
3.1.3.即係咩﹖好多人唔明，我再講白d。新聞講既反恐條例，其實係香港法例575章《聯合國(反恐怖主義措施)條例》》。條例個詳題咁講個宗旨﹕
本條例旨在進一步實施聯合國安全理事會2001年9月28日第1373號決議中關於防止恐怖主義行為的措施的決定，並就此使聯合國《制止恐怖主義爆炸的國際公約》、聯合國《制止危及海上航行安全非法行為公約》以及聯合國《制止危及大陸架固定平台安全非法行為議定書》得以實施；實施財務行動特別組織的某些建議；進一步實施聯合國安全理事會2014年9月24日第2178號決議中關於防止以恐怖主義行為或恐怖主義培訓為目的的旅程的決定；並就附帶或相關事宜訂定條文。
3.1.4.明未﹖即係，因應聯合國制訂既《反恐條例》原來容許陪審員存在，定罪原素都好煩攪到告唔入所有爆炸案被告喎﹗咁以後我地唔好理聯合國既要求，我地用返國安法去告人啦。
3.1.5.我市井d講﹕聯合國你食屎啦，都冇料到，睇下國安法勁幾多。文雅d講，或者用返大陸或者本地左仔既說話，我地要運用好法律武器。
3.1.6.咁你話，香港官僚包括埋敏感部門，係米好專重法律，尊重程序呢 -- 有法律有程序唔適用既，就唔好理佢，搵D更加值得尊重既去尊重。
3.1.7.唔講衣d，你睇傑出既關愛隊，再加上民政署環保署咁多撥款，就真係全部都重視程序。
3.2.所以，返去正題，你話「官僚重視程序合法」，其實係真既；不過近期觀音水就開始攪笑；其他case就係，「官僚重視佢地認為合適程序既程序合法」。
3.3.至於「官僚系統價值缺失」，乜唔係成個議會都認同以結果為本，KPI為本既咩﹖你講以結果為本，就係一個價值啦 -- 咁所以，唔係「官僚系統價值缺失」，只係一種價值取代另一種價值。
4.當然，李先知篇文，最有價值既地方係衣句，真係得幾隻字。所以，我要特登開一行比佢﹕
拿拿拿，我真係冇睇錯何永賢架。
我上個POST話，「咁兩個跳左，比政府收回個單位，都係幫政府滿足到KPI啦。所以，你估何永賢下次又幾時報喜丫拿﹗」，我又真係冇估錯，佢應該真係覺得自己「做得好好」 -- 當然，原來佢為左件事好唔開心，我都唔知點解會咁架麻，更加唔認為自己做得好好，就係明報屈佢，或者原來上面唔係講佢啦 。不過，今次我信明報呀。
5.講完李先知，再講兩句HK01。
5.1.又係好簡單。先講大政策。
5.2.係個報導既結論入面，唔知真係個社工講，定係HK01想為個制度洗白，所以屈Q個社工。佢話，「不過，該名委員認為，法律界人士的佔比高皆因個案或涉及虛假陳述，觸及一些法律條文，認為相關組成合理。」
5.2.1.好簡單，點解某類上訴委員會既委員，通常都委任好多唔同界別九唔搭八既人﹖米就係要反映唔同社會階層既意見囉。唔講咩上訴委員會，你睇一般市民較熟悉既城規會市建局之類，入面既member都係唔同社會代表，其實個組成目的，都係理論上要反映唔同社會階層意見。
5.2.2.衣個包括唔同階層意見，其實一方面就係要反映衣類法唔法定組織，以至好多上訴委員會，其實係要透過委任唔同界別既人，去取得代表性；另一方面，就係要將唔同專業價值取向，放返落去個委員會入面，去反映返條例既取向。
5.2.3.我唔講法定組織，又淨係講上訴委員會，新近D立既旅遊業條例，佢有個上訴委員會，個法例第117章都係咁樣寫明﹕
(5)局長在委任上訴委員團成員時，須確保 ——
(a)主席屬非業界成員；及
(b)最少半數其他成員屬非業界成員。
5.2.4再者，更加簡單講。當佢話咩「法律界人士的佔比高皆因個案或涉及虛假陳述」，咁其實所有上訴委員會都係涉及法律詮釋架啦，咁係米所有涉及法例上訴既委員會，都要全部搵曬律師呢﹖
5.2.5.亦所以，而家房委會個上訴委員會如果真係咁多律師，又係米合理呢，你自己諗啦。
6.第二樣係，其實我上個POST冇講既。
6.1.上個POST我QUOTE左明報話，「上半年取消遷出通知 166宗超去年全年」。其實，應該要搵既數字係，以往未要做所謂打擊濫用公屋之前，房委會係開左幾多FILE要收回公屋，之後幾多個CASE係要去上訴委員會 -- 之後先要再由上訴委員會去「取消遷出通知書」。
6.2.衣個數字就一定搵到，不過我懶，唔搵啦。
6.3.又不過，何永賢話，近年收回單位數目創新高麻，近年積極執法丫麻。調轉頭諗，其實，米即係以往唔做咁多野，唔下下都收回單位 -- 米即係我講既，有好多野，其實房署開左FILE，睇到就算係可能違例啦，不過告黎就社會冇好處，亦都同房屋政策違反，咁米唔做佢囉。
6.4.當然，你可以話，以往咁樣做，其實係官僚懶散，明知有CASE違例，甚至可能有人隱瞞入息以至資產都唔開FILE。衣樣，係真。又之但係，而家個鐘擺，成個文化，變返做 係CASE都做，KPI最緊要，咁所以米有人九唔搭八話「官僚系統價值缺失」。
6.5.又再當然，你話個鐘擺點先平衡，我就真係答你唔到，事關公務員既野，特別係而家搵埋退休紀律部隊做調查急先鋒啦喎，就真係「阿sir做野唔駛你教」。
6.6.又之但係，如果你個鐘擺去左KPI至高無上衣邊，咁個「安全網」係米要變，係個上訴委員會組成入面，以至有咩指引考慮，要擺返去另一邊呢﹖當然，如果你淨係諗KPI，收到單位就係「做得好好」，咁好多野就唔駛理啦。
6.7.所以，衣幾日何永賢出黎，講咩要有更多同理心，要細心D，要搵多D咩醫學背景既人加入上訴委員會，其實都係廢話 -- 你係調查係執行個鐘擺去左另一邊，咁個上訴安全網要點先可以做平衡呢﹖細心D係廢話；醫學背景都係廢話。君不見，盧寵物高永文之流，有幾優秀幾人民關懷﹖
6.8.再老實D講，你有咩政策目標，就會委任咩人架啦。被委任既，已經被委任既，其實全部都會心照。都係個個例子﹕雖然社聯主席唔係委任係所謂既選舉產生，不過管浩嗚做到社聯主席，就知咩叫心神領會，大家好好配合之餘，更加都知道社聯係變左做咩啦。
7.最後，上個POST我又係冇講既。要玩體恤安置，其實係要有心力，有技巧，要熟悉政策，先會玩得好既。
7.1.好耐之前都聽過，就算係醫生推薦你做體恤安置，佢封信寫suggest或者recommend，其實對社署同房署D官僚黎講，其實都係唔同意思 -- 醫生淨係suggest咋喎，即係冇急切需要啦，即係唔駛用體恤安置啦。想講既係，你要熟悉個遊戲規則，先可以行到個制度，去到進入個制度既門檻。
7.2.所以，點解衣幾年體恤安置可以跌到落去3百零宗﹖除左政府把關嚴左之外，另一個原因係，你去搵由治及興既所謂尊貴，佢都唔知識唔識架喎。如果你搵著阿梁文廣，佢會唔會自己係將資料交比社署同房署之前，已經同你嚴格把關。例如，你比老公打到豬頭都耍走你丫拿﹖你豬頭你既事，佢聲稱要對排隊既人公平丫麻。
7.3.嘿﹗見佢係CABLE個幾段新聞既comment，先唔講佢有冇所謂既同理心，佢識唔識體恤安置個遊戲點玩，我都有疑問。
8.結論係，快手打咁多字，其實我只係想讚自己，冇睇錯何永賢。
9.完。
