再兩句五年規劃 (5)

最後，鄒烈篇文，其實我淨係想講BOLD左個段。即係，衣段﹕

7. 北都在住宅的pipeline上，已規劃的長遠供應量近700萬方呎，尚未包括鄰近的周邊地皮，已經判定了住宅是難賺大錢的。更重要的是北都希望與深圳以至大灣區融合，當模糊了邊境界線後，住宅的真實供應量應計及深圳周邊的住宅供應，商業上更難以計算。

衣段，就係個重點啦。

無論係講緊北都咩片區，利用住宅地去補貼物流創科又好，又或者係講緊香港賣地經濟又好，而家個問題係，你要玩兩地溶合，玩模糊邊界的話，咁我做咩要買古洞既樓﹖

又或者係，如果古洞洪水橋既樓價同福田南山樓價差唔遠，咁我做咩要買香港樓﹖

所以，以北都既角度考慮，佢個批咁既住宅，以至希望用住宅補貼產業發展既思路，就真係攪笑。

以土地經濟既角度，市區港島既住宅地都仲值錢，事關我讀國際學校、返港大科大之類，或者去養和，都方便D丫。但係，古洞洪水橋，甚至而家小欖爛緊尾個D樓，就真係會繼續慘不忍睹，黎緊就要享受大灣區溶合，或者係大陸最鐘意講既「同城化」紅利烏。

至於香港既財政，靠北都賣樓，又或者靠北都個批所謂既新經濟產業﹖

而家做就未有意思，不過你過多兩年，再睇下稅局年報，睇下個稅收，就知到李家超最近講既，「北都已經從紙上藍圖進入收成期」既實際情況係點鳥。

**********

講起收成期，之前就講過，北都未開始收成期，但係中電就因為投資北都而收成緊，個批資產可以入帳收你電費啦。

中電就醒，淨係講為北都做左幾多基建，唔會同你講增加左幾多資本開支。

不過，煤氣早排就食左誠實豆沙包，竟然咁講喎﹕

煤氣公司強調，一直對調整收費十分謹慎，由於過去兩年營運成本增加，燃氣行業人力成本上升，未來數年須投入龐大資本投資以維持安全可靠的服務，以及為北部都會區等新發展地區供氣，預計2026年及未來五年的資本投資總額將達131億元。經充分考慮客戶的承受能力，作出溫和的收費調整。

WELL，個131億資本投資總額，有幾多係北都丫拿。

**********

完。