團結基金財政預算案建議 (4)

當然，團結基金衣期其實仲有好多野講，講既都係樣樣精彩。

例如，早兩日，佢係明報有篇咁既野，個題係「葉文祺、梁躍昊、郝亮：機場聯絡線具戰略定位 盡早規劃助推經濟民生」。

淨係睇佢個圖，就知佢唔識。睇埋內文，就知道係搭雞棚。

*********

好簡單，之前都係度講過，香港所謂航空樞紐點解收皮，點解衣幾年個客量都返唔到去疫情前 -- 原因係，你要封關封到阿媽都唔認得麻，人地美國西方日本韓國復左常你都仲封丫麻，咁航空公司走佬，航點取消，你米收皮囉。

大陸都係封到阿媽都唔認得，不過點解影響好似細D﹖因為有內陸航班需求麻。

咁所以，你睇佢個圖，香港緊係落後架。都係個句，維珍返黎香港未話﹖

至於佢幅圖同內文咁講，又係攪笑﹕

「數據已發出清晰預警，香港機場客量優勢早在疫情前已見收窄，疫後更被區內多個樞紐反超——2025年香港機場客運量約6100萬人次，而同期廣州、深圳機場分別達到約8400萬與6600萬人次；區域競爭對手如新加坡、首爾，亦分別恢復至近7000萬與約7400萬人次（見圖）。」

疫情後點解香港落後，就解左啦。

疫情前唔洗搵資料都解到﹕廣州機場有擴建架麻，香港機場有容量限制架麻 (如果唔係做乜要起三跑)，咁「香港機場客量優勢早在疫情前已見收窄」，就係弱智都知點解 -- 係得佢好似發現新大陸咁。

當然，我冇睇開航空野，不過之前又扮識咁講過，一個地方做唔做到航空樞紐，係睇地理位置同好多制度，之後再引伸出黎既航點同航權。

早排睇新聞，有評論就講到，話大陸要制裁日本，除消好多中日航班，不過取消既集中係關西 -- common，成田機場既航線大把航空公司爭住要，所以大陸航空基本上唔敢取消成田機場既航班；你取消左，就以後唔會比到衣條賺大錢航線比你，就算你認契弟都冇得再飛成田。

我廢事花時間搵返當時個評論。不過，你睇最近好多報導講乜﹖

早個月就話，中日46航線未來兩周航班全取消　大阪重災　航空公司啟動集中退票。你又睇下近排講咩春節取消中日航班，個題係咩﹖中日49條航線取消100%航班　包括2條從深圳出發航線。

講到咁英勇咁戰狼，你睇兩條link入面內文幅圖，見取消成田機場既航班，先係得幾條。夠膽用力取消既，都係關西呀、名古屋之類。

（題外話，衣個米係大陸既玩法囉。國家安全係緊要，我緊係要戰狼啦。不過，我做野，好多時係做樣，利益先係緊要。玩國安玩到認真過頭，係香港獨有特色。）

咁我想講既係乜﹖就係，機場競爭力，唔止係團結基金九唔搭八講乜「大灣區空鐵聯運集群」、國家高鐵網絡「最後一公里」的直接聯繫。

機場競爭力，講既係航點航權。

今次深圳無啦啦取消兩條航線，雖然係攪笑既咩中部同新千歲，不過香港機管局睇到米暗啞底笑緊囉。你要香港機場有競爭力，機管局都用D平D既方法做緊，之前米講過佢貼埋錢做咩中轉聯運之類。唔平但暗啞底既方法，就係祈禱囉，廣州深圳取消曬去成田既機，機管局米發達囉。

真係，唔洗咁複雜講咩政策航點，好簡單咁講，黎緊復活節，你係內地大灣區甚至再遠小小既同包，你去日本，會買由深圳出發既國航，定係香港出發既國泰？

香港未通最後一公里呀，咁同包一定唔會選擇又貴又要搭車過黎香港啦，就算深圳機又被國家DQ，米到時先算囉。團結基金如是說的。

明未﹖

團結基金九唔搭八講乜「最後一公里」，個度要幾錢幾多百億之餘，亦都唔係做所謂航空樞紐既本質。你睇台灣上年有個飛機文，雖然桃園機場都真係仲停留係攪笑既層次，不過睇下個coomment，就知發生緊咩事，連桃園都上緊力，香港就竟然仲有人講「最後一公里」。

***********

其實仲有野講。

不過，唔得閒，咁完。