即係，唔講佢篇文最核心既問題，佢篇文講到咩「官員要善於放下身段，以實幹取信於民，以價值語言（而非秩序語言）感召大眾」，佢夠膽既就講明，班友日日國安日日依法施政就係取唔到信於民，攪亂正常社會運作；佢講到、「治理執行力不單靠政府目標清晰、上下盡責」，夠膽又可以講明，咩以結果為目標就係唔識咩叫管治，攪咩高層問責制其實就係攪亂公共行政，或者唔係對症下藥。
佢講完一大輪，連D咁現實簡單既野都唔敢講明，要人心神令會，就算把啦。
當然，佢篇文最大最核心既問題係，佢講到英國同美國係點點點，之後講「雙負責制」講到「看世界各大城市（包括倫敦、東京、紐約等），皆行市長主導，但受市議會監察制衡」，你就知道佢係為左要繼續可以又傾又砌去做國師，所以要九唔搭八，亂用比擬。
***********
個重點係，當我地講外國係行政主導，講到港式行政主導之下突然出現既「雙負責制」同「雙首長」，究竟香港個行政主導同外國有咩唔同﹖
張良不停講英美點點點，個重點係，人地係玩政黨政治，個行政首長 (無論係國家定係市) 都係依付係政黨。就算 美式政黨/總統制入面 政黨角色冇咁強，總統有更大行政權力，不過阿美國總統最後都要同佢個黨有合作有拉扯交易，唔可以唔理自己個黨。
咁香港係咩情況﹖
2003年曾鈺成講完做建制派「有辱無榮」之後，衣四隻字耐唔耐都仲有左仔係度提。
求其搵，梁志祥就好得意，佢收皮時好誠實提到有辱無榮，當中講到，「好多時如果政策對市民傷害不大，我們都會支持」--即係，哦，有傷害，不過唔大，都支持啦；當然，佢冇講既係，如果傷害大，佢都會繼續支持。
又係2021年，當時已經人之中龍既李慧琼都仲係度講緊，「建制派「有辱無榮」 冀建執政聯盟關係」。
衣十幾年黎，左仔不停係度講「有辱無榮」，講政府當佢地鍾無艷或者係杜月笙既尿壺。講白D，就係所謂既行政主導下，班官就睇唔起你地，亦都係制度上唔需要理你地，所以你地既角色，就只係淨低支持政府。
用文雅D既講法，就係香港既唔攪政黨政治，咁都唔該攪執政聯盟丫。用政治現實講，阿爺唔會比香港有執政黨，咁都唔該你班官侵埋我玩，唔好當我係臭四丫。
套返落張良篇廢文，其實就係所謂香港行政主導既問題。
香港既行政機關，同外國相比，最大既問題就係，所有政治任命官員，都係冇政黨背景，或者做左官之後，就理論上同原政黨無關。
班官唔需要諗選票，即係唔駛諗民意；甚至你同佢講民意，有D官會同你講民意又如何，官既智慧先係真理。
而係問責制，再加上「雙負責制」之下，佢地要負責既對象，就更加唔係民意。咁你話，張良係度講外國點點點，就係米食左屎呢﹖
再去到2021年改制度後，「雙負責制」既影響更加明顯。
係議會入面，我上幾個post已經不停QUOTE左，班尊貴自覺既職責係乜﹖佢地唔係取代政府，係協助架咋；好多例上立法會，係幫眼架咋。
係政府入面，就仲簡單。有ORDER，我要落力做；冇ORDER不過如果係講國安係講政治正確，我要更加落去做。
其他野﹖唔識做。不過，我要跟習主席吩咐，所以我要扮做野。
咁所以，如果你要講港式行政主導，就唔該唔好咁九唔搭八，死都要講埋外國點點點，去夾硬JUSTIFY港式行政主導啦。
*********
未完。
沒有留言:
發佈留言