幻術政治的藝術 - 補編 (2)

痴呆，其實我上個POST仲想講埋衣單。

不過，頭先睇明報個社評，先醒起衣樣，咁求其講兩句。

至於明報個社評，佢個題係正確，不過內容就麻麻﹕你將今年1月同明年1月個淨電費比較，其實係廢話。

要講香港電費，你要知香港淨電價係分 基本電費 同燃料費。

前者係兩電固定投資成本上升 (再加人工之類啦，不過相對上細數)，有新機組新設施 (最主要係要配合政府減排目標麻；所以明報社評話咩「兩電只要斥資搞硬件，固定資產投資不斷擴大，基本電費就可不斷加」，其實就要問，政府減排目標，究竟要點樣埋單)，所以成本同投資上升，咁基本電費就要上升。

後者燃料費，就係因應直接發電燃燒成本價格變化，包括天然氣同煤同油，再去做調整。

理論上，燃料費係實報實銷既概念，用戶今個季度交多左，下個季度會扣返 -- 所以政府係2019年檢討個利潤管制協議，其實係攪左個「更頻密燃料費調整機制」，聲稱更加反映個成本變化。

所以，好多人講今年淨電費因為個燃料費下調，話衣個係「明減實加」(即係明報個社評)，其實係戇居 -- 個淨電費係實報實銷，亦都會因應個燃料價調整，所以同「兩電係米賺多左」無關；再者，如果個燃料費可能會再減，咁到時係兩電真係大發慈悲減價「賺小D」﹖

你要講加價減價，其實就冇所謂，你米繼續講「明減實加」。

不過，如果你要講，兩電既實際利潤，或者係佢有冇用盡個管制協議去所謂既「賺盡」，就要睇佢基本電價，衣個先係佢真實賺到既利潤。

咁你睇明報既報導，其實就好簡單講左兩電個基本電價同燃料費既變化﹕

現兩電向客戶徵收淨電費由基本電費及燃料費組成，中電及港燈因資本投資及成本上漲等，明年起分別加基本電費3.2仙及5仙；但燃料調整費分別減6.9仙及8.7仙，不但抵消基本電費加幅，整體淨電費按年可分別下調2.6%及2.2%。

SEE﹖ 兩電基本電費加左3.2同5仙，衣個米先係兩電加價既真實情況囉。你要話兩電「明減實加」，其實就係應該比較個淨電價同基本電價 -- 淨電價好似減左，不過個基本電價其實又係加左，而衣個基本電價加左，係市民硬食，兩電真係淨袋架囉。

你要比較今年1月同明年1月，就係無謂，事關燃料費唔係兩電淨袋，亦都可以好大變化。

例如啦，如果出年燃料費唔知因乜原因勁升 (例如唔知點解油價升到2百蚊啦)，咁你又話不滿兩電大幅加價呀﹖

咁又如果油價跌到10蚊，燃料費跌9成，不過基本電費升你1倍，咁拉埋淨電費加小小，你到時又讚兩電好克制，淨電費冇乜加呀﹖

ANYWAY，上面係見到明報，同埋HK01係衣度亂UP，所以求其係度打兩句，有心機先認真打字講衣個題目啦。

不過，兩電同政府係度，都係玩幻術，好似兩電出年減電費，咁囉。

完。