2023年12月8日星期五
定位不清 (3)
原本唔想講，不過打開字就講多兩句。
好感動，施政報告話，「我們會於明年設立「香港抗戰及海防博物館」，由「香港海防博物館」改設而成，重點介紹抗戰歷史，提升民族自信和愛國精神；並與深圳市文物局合作，展覽介紹港深兩地共同抗戰的事蹟」。
上面提到份文法會文件就仲激，講到話「專館的內容將涵蓋國家歷史（包括列強侵華和奮勇抗戰的經歷、中國共產黨的發展、新中國成立、國家改革開放）」。
睇完就真係好感動。
不過，如果要講抗戰歷史，我真係唔知香港政府會唔會講講下，講到犯左國安法或者係大陸新個條保護英雄烈士法。
************
即係，講共產黨抗戰，其實共產黨自己講黎講去，都係得平型關大捷同埋百團大戰，咁你就知道係而家世道下講抗戰史既難處 -- 情況亦等於，你話香港東江縱隊點勁一樣，都係唔知點講好。
用返官方說話，你睇東江縱隊要去到2020年先納入「第三批國家抗日英烈英雄名錄」，你就要問，國家係米遲左小小呀，佢地咁勁都要攪左咁耐先入到英雄名錄﹖東江縱隊喎，香港抗戰及海防博物館要特別講佢地既功績喎，點解咁遲先做到英烈架﹗
************
正題。
講返兩場戰役先。
平型關大捷就唔多講，事關衣次戰役入面共產黨既主角係林彪，所以共產黨自己都唔講太多；再加上個事實就太明顯，當時所謂既平型關大捷都只係整場平型關戰役既一小部份，大規模戰役係國民黨打，林彪突襲既都只係日本仔輜重隊伍，所以共產黨自己都唔敢大吹。
反而係百團大戰就攪笑D。你睇WIKI其實就真係嘖飯，例如﹕
.....在1959年的廬山會議上，這也是彭被批判的罪名之一。1959年7月31日，毛澤東在廬山會議上說：「一些同志認為日本占地越少越好，後來才統一認識：讓日本多占地，才愛國。否則變成愛蔣介石的國了。國內有國，蔣、日、我，三國志。」
咁即係，WIKI講既史料全部都有LINK，你話佢亂UP就再搵黎研究。再唔係，你求其google百團大戰，就除左有多少亂up既禁聞網之類，好多共產黨新聞網都唔記得刪走過時既野，仲係度講毛澤東批評百團大戰既宣傳。
而衣個係國防參考既文就仲攪笑，間接證實埋wiki講既野。
又當然，to be fair，係早大約十年前，「百團大戰功過是非」之類其實係大陸不斷有人討論，甚至係官方渠道不停咁講。不過，而家，well，毛岸英蛋炒飯都唔講得啦。
************
咁，其實，已經講完。你話抗戰期間共產黨既抗日功績，其實講黎講去都係衣兩樣。就算你點吹都好，就算我當佢衣兩場戰事真係好重要打得好勁都，就真係點都得衣兩場比共產黨去吹。
所以，我唔會話共產黨同東江縱隊係抗日完全冇角色。不過，真係冇可能扭曲歷史；你話邊個係主力打日本仔，其實真係常識。
如果你要用用抗戰歷史黎到提高民族自信同埋愛國精神，咁如果我睇左真正史實之後愛左國民黨既話，咁米大獲 -- 大佬，而家既國民黨喎，真係邊愛得出手呀。
當然，如果你唔係講唯物論講邊個主要負責去戰場打日本仔，而係要攪共產黨衣幾年成日講既 抗日戰爭裡面既中流砥柱，講到咁鬼「唯心論」，咁又真係只要你唔尷尬尷尬嘅就係人哋。
而又更加當然既係，well，其實你都會知將來既成就館會係點講抗戰喇。
*********
well，講開中流砥柱，其實可以多幾句。
有d野又真係唔怕尷尬既。
不過，你要再講，唔講共產黨係延安度唔知做咩，係都要講共產黨戰時敵後工作的話，咁不如我同你講下栗裕，講下南方三年遊擊戰爭，同埋講下抗日戰爭時間新四軍主要打既係邊個丫﹗
好簡單，你又係睇下wiki入面，係栗裕軍旅生涯簡介入面既黃橘戰役，又會見到當年栗裕率領既新四軍，主要打既其實係國民黨部隊。
你話wiki作野的話，網上而家已經有 栗裕戰爭回憶錄既全文，你睇佢第七章「挺进苏北与黄桥决战」開始個幾章，就會知道，當時共產黨最著眼既係，擴大根據地同埋維持有生力量。
你唔知上面最尾個句點解，就我都幫你唔到。不過，你用國民黨既講法，就即係扯後腿。
************
當然，係共產黨口中，共產黨一直都係 抗日戰爭既中流砥柱。我唔擺link，不過你可以自己google。如果你睇完既感想係犯曬國安法同埋英烈保護法，我就真係幫你唔到。
都係個句，你睇衣度，早10年前，大陸民間都仲夠膽講抗戰係國民黨打，甚至胡錦濤都痴左線咁講「中國國民黨和中國共產黨領導的抗日軍隊，分別擔負著抗日戰爭中正面戰場和敵後戰場的作戰任務，形成了共同抗擊日本侵略的戰略態勢」。
你而家仲敢講，你唔犯國安法，都分分鐘犯左中華人民共和國英雄烈士保護法﹕唔信既話，你自己google而家共產黨點講佢地係抗日既角色。
************
結論係，香港政府其實都係醒既，你見到立法會份文件點講麻﹖佢係話﹕
結論係，香港政府其實都係醒既，你見到立法會份文件點講麻﹖佢係話﹕
雖然我們還在考察及計劃相關內容，但初步認為中國國家版本館、中國共產黨歷史展覽館、中國國家博物館《復興之路》等展覽內容能為專館的內容提供有用的參考
well，大佬呀，共產黨既宣傳係唔同時間有唔同需要，你睇上面點講百團大戰就知喇。你唔參考 -- 其實即係抄 --內地文宣內容，內地風向一轉出事既時候米大獲﹗
前排反緊美，近排同美國又要攪好關係，咁抗戰宣傳又駛唔駛改呢﹖
************
最後，真正既結論係，今次科學館改做國家成就館就一定架喇。不過，內容就真係可能好麻煩。
你睇下扮到好理性有宏觀視野又愛國既譚新強，早五六年前瘋狂吹奏阿里，講中國新四大發明超英趕美，甚至去到2021年仲講到螞蟻要扲nobel；反壟斷打殘馬雲之後佢提都唔敢提，淨係識得講習主席英明，係sun chanel入面真係同湯博士有得揮。
睇完辮新強衣類人辦，咁你就知道，冇咩既，你本身幾叻幾勁都好，不過係而家既環境之下，你都只係，well。
所以，攪個國家成就館，就真係麻煩。
我已經唔講抗戰政治敏感野架喇。你要講國家成就，咁我吹唔吹奏民型平台經濟好﹖今日電動車勁啫，成為左出口新引擎啫，如果聽日電車老細唔知得罪邊個又比人打壓，咁我仲吹唔吹好﹖
如果個成就館係度講電動車，到時個成就館，又要定位不清收多次皮呀﹖
丫，講起電動車，前兩日科技園公司先好型咁話搵到寧德時代黎香港。well，寧德時代而家係大陸好似冇乜運行，大陸管到個鋰價死左，就真係，well。
************
題外話。
講抗戰，醒起有套戲，更加形象化咁講到，其實大陸既紅線就真係勁過拓海。
所以話，香港政府要用抗日激起愛國主義，就只有用最保守既方法先得，即係要緊跟官方路線。你條紅線咁飄移，真係點跟呀。
最後，上面講八佰條link入面，最尾話有人想係大陸拍孫立人將軍。真係，唔好咁痴線喇。而家中美修好啫，不過唔知聽日點架麻。
同埋，你今次拍孫立人，下次有人拍張自忠同張靈甫咁點算﹖早十年前攪遺骨都攪到好大件事，到時又比人話你歌頌國民黨。
再者，就算你淨係拍孫立人，咁共產黨係抗日期間有咩高級將領可以比你拍﹖
你自己google北京日報既「牺牲将领多少不是评价国共两党在抗战中作用的标准」，其實就真係好野，佢開頭個段就咁講﹕
近来网络上流行这样一种极端说法：“抗日时期国民党100多位高级将领牺牲，共产党仅仅牺牲了左权（八路军副参谋长）1位高级将领。”以此来贬低共产党对抗战胜利所发挥的作用。对此，有必要进行辨析。
well，佢而家衣篇野，間接承認左個事實 (當然，我十分懷疑，其實係肯定，國民黨犧牲既高級將領一定唔止衣個數)，仲出唔出到街架﹖
************
完。
沒有留言:
發佈留言