累進差餉 -- 大政策方向

累進差餉終於通過左。

五六七八年前，政府話要引入累進差餉，其實當時個概念係變相空置稅，想迫發展商起好樓之後盡快賣樓。

不過，條例就審審下收左皮，今時今日個累進差餉就變左質，變成所謂既能者多付，即係變成應課租值55萬以上既單位先要交累進差餉，徵收率大約8%；去到80萬以上，就收12%。

衣個能者多付概念基，本上就同當年因為空置稅而考慮改變差餉制度呢，就原全無關，純粹係想收多D稅咁解。

**********

政府攪D咁既野，基本上又係因為財赤啦，所以係唔同地方都要搵錢。

即係咁，條例原本話首55萬應課租值既徵收率仍然收5%，55萬至80萬就8%，之後80萬以上先收12%。

不過，簡單起見，我劃一用12%去計，咁即係一個80萬租值既單位就每年要交9.6萬數差餉，即係將個半月租比政府。

而我都特登睇埋，衣類單位基本上就係港島半山或者九龍站一千尺以上既單位，或者係太古城最大個隻單位都勉強要衣個價錢。

咁衣類單位要2千萬入場 (九龍站最cheap個隻)到5千萬左右 (中西半山喇)，咁每年個9.6萬蚊差餉又真係唔係野黎 -- 買得衣類單位，個租金回報咁低，本身都未必會出租，好可能係要黎擺，所以累唔累進差餉都冇咩所謂。

所以，政府點解夠膽死整個12%稅率，就係咁解  - 阿哥，12%稅率即係冇左成個幾月租金喎。

***********

又不過，政府咁樣改個差餉制度，其實就真係又應驗我一向講既野﹕社會資源有限，你要搶錢，其實就真係點都有影響既。

即係，上面豪宅就冇影響喇，不過55萬至80萬應課租值既單位 (即係月租5-6萬蚊既單位)，個25萬租金收入無啦啦要收多3%喎。3%好似唔係好多，都係$7,500。不過，衣類4.6-6.6萬月租單位業主，原本係交3-4萬蚊差餉，而家無啦啦要交多5-7千蚊，比例上你話係點呢﹖

再者，你有樓，其實都會發現，政府因為無錢，所以衣幾年冇左大部份免差餉。再加埋額外免稅額之類又冇埋，你有冇計過衣兩年如果有樓，月入5萬以上既家庭要交多幾多稅同差餉呢﹖

我唔計，但保守估計都要交多幾萬蚊，即係冇左成個月糧。

咁所以，阿茂波成日叫人多消費，咁所謂支撐一般消費既中下產，又會點回你丫拿﹖

當然，又老實講，要交多幾萬蚊稅，其實又對消費未必有好大影響既 -- 反正yen平，米去日本食多兩餐再加消費補數囉，咁對我既消費又冇咩影響既。

***********

我無啦啦講又回帶講上面樣野，其實因為前排睇到個好好笑既新聞。

段新聞係，銀債申請24手都會全數獲批。

係銀債開賣個日，中銀作為sales就話，預計銀債認購人數同金額又會創新高。

咁係既，美國又似會減息，銀債又保你4厘息，咁估個認購金額同人數都正常既。不過，turn out出黎既結果係，認購人數同金額都下跌；星島仲好好心咁幫你review埋，過去發過咁多次銀債既紀錄。

睇見個表，你知唔知我即時既反應係咩﹖

第一個反應就係，佢下年再出銀債，發行額又唔變既話，就算keep埋個保底4厘息，分分鐘都仲會派到30手以上比你。

第二個反應係，政府一方面話要攪活個股市，不過衣幾年不停發銀債抽左2千億水 -- 你估下，原本係股票行玩即日鮮個班老野炒鬼，有幾多投降唔炒股，又有幾多情願扲舊錢買銀債算﹖

**************

所以，結論都係，冇咩結論。

政府財政唔掂，不停係市場搶錢，但又九唔搭八話要鼓勵市民消費之餘，而家仲開始叫零售業界反省，叫佢地要革新添。

****************

講起搶錢，又醒起多段新聞。

今日好多新聞都講，機管局要攪個機場城市，仲話個成本要成千億。

咁林一嗚就咁樣講﹕

1000億元？！我很同意興建這個項目，但1000億點計算出來？項目包括500房間的度假酒店、600個遊艇泊位、港版築地「鮮活市集」、增加公眾活動空間、藝術產業生態圈等....點解會咁貴？以500房間的度假酒店為例，假設每間房建築成本500萬元，加起來也只是25億元，至於遊艇泊位、港灣鮮活市集等，估計興建的單位應該是「億」不是「百億」。如果誰人可以計算到這條數學題又解釋得合理的話，應該可以拿到2025年的諾貝爾數學獎（這個獎由2025年香港政府設立）。

咁呢，所有公營機構學埋政府咁，鐘意吹大就係潮流喇。不過，係上面明報條link個內文都有講到，個1000億係「連同「11 SKIES」等已展開項目」。

又之但係，新世界之前自己已經講到，11 skeies咁Q大個項目都只係200億，咁難怪林一嗚就要問，個1000億係點計出黎。

當然，成段新聞，其實最精妙既係，政府唔需要注資架，不過機管局又會發債80至100億，再加上好有信心會搵到投資者喎。

機管局喎，近年最出色既係咩﹖就係因為三跑要拆Q左個用左十年既二號客運大樓，個度半年係28億，如果係2019年建築成本就唔知幾多億 (我特登COPY TVB條LINK呀下)。

咁你話，搵機管局去攪衣個所謂既機場城市，係米好振奮人心呢﹖

你睇佢攪三跑，由開始到而家要收多幾多年旅客徵費，又真係再次振奮人心。

********************

咁睇到明報段新聞，其實我又再醒起樣野。

早兩日，見到明報李先知講咁既野。咁我冇ACC，淨係COPY睇到免費個段出黎﹕

【明報文章】特首李家超在上周發表的《施政報告》中，指北部都會區是香港經濟發展的新引擎。在政府財赤高企的情况下，發展局為減少政府的現金流壓力，提出多種開發模式，增加巿場參與，例如片區開發。《施政報告》亦透露，政府正探討選取試點產業園區，批撥予由政府成立和牽頭的公司，負責招商引資等工作；李家超上周曾公開提及機管局模式。政府消息人士表示，政府正在研究設立公司的不同模式，機管局模式是其中一個方案，亦可在財政司轄下成立政府全資擁有的公司，目前未有定案，目標是增加彈性，容許在巿場上揀選合適的拍檔，發展產業。

睇完上段，你就會見到，而家市建局同機管局做得咁好，真係fulfill度佢地既mission，又真係做到衡工量值，咁一定要支持喇。至於「增加彈性，容許在巿場上揀選合適的拍檔」，就更加係應該喇，反正就算係政府自己攪，而家個方向都係「在市場上揀選合適的拍檔」，個彈性都已經好大喇 -- 你睇好多工程呀招標呀就知喇。

*******************

未完。