至於系列(1)阿徐立之個訪問，原本save左想講，不過唔講都冇所謂啦。
anyway，我想講既係，回帶講香港政府財務，再用人口政策做總結。
有回帶，不過係提供一個完整既架構咁樣去回帶。
**********
以往係度，其實講過好多唔同公營機構既財務野，佢地反映既係，唔同財務結構之下既問題。咁我回帶，先簡單講下。
第一個係香港海洋公園。
佢要擴建，要攪水上樂園，就係幾次唔同情況下，問政府借左百幾億。衣百幾億，係低息貸款，係要還的。
除左問政府借錢，海洋公園係2010年左右都問過中銀借錢，都係還唔到，所以最尾係2018年左右問政府借個唔知幾多億入面，其實部份係要黎還比中銀。
係海洋公園情況，如果你係徐家健或者斷sir，你就會話，海洋公園衣幾年經營越黎越好，冇問題丫；你都可以會話，海洋公園衣幾年侵蝕佢盈利既係折舊，而折舊係SUNK COST，過左去架啦，所以唔需要理會，唔計折舊海洋公園係營運上賺緊錢的。
不過，海洋公園既擴建同埋新設施係用借貸finance返黎，係要還，折舊就係側面反映衣舊野。
所以，折舊係「關事」 -- 如果海洋公園既盈利cover唔到個折舊，就代表佢之前投資落去擴建水上樂園之類既投資，係cover唔到個要連本帶利既利息同本金。
如果用財務或者投資角度，你用return on investment即係 roi 對比個 息率，就大約明上面係咩回事。
第二個係香港迪士尼樂園。
迪士尼樂園由第一日建園，再到佢要攪擴建拆左個城堡攪個新野，其實都係問政府扲錢。
不過，同海洋公園唔同，迪士尼樂園係扲錢，係注資，好大部份都係唔駛還的﹗
即係，董建華年代係一開園既時候，當時政府係有注資、借貨同埋地價等等既資助，去成立左香港國際主題有限公司。衣筆錢係百幾億，換黎既係香港政府佔新公司一半股份多小小。
去到香港迪士尼係2017年左右打後又要攪擴建，香港政府都係按股份比例去注資；上面講既擴建，就係注左57億左右。
衣個係注資，唔係借貸，所以係唔需要還款。
所以，理論上，香港迪士尼既折舊係「唔關事」-- 政府都比左出去，擴建之後賺唔賺錢，就係SUNK COST啦。
之但係，用投資或者政府財務或者納稅人角度，就都係ROI既問題，都係「關事」的﹕政府比左57億落去新擴建資產到，究竟以後香港迪士尼每年可唔可以因為擴建有盈利，幾時先可以cover返個57億投資。
不過，都係個句，你要記住，海洋公園同迪士尼係財務上最大既分別係，一個係向政府借貸，一個係要求政府注資。
所以，當好多友係網上話，二期唔擴建，就浪費左塊土地時，咁我就想同佢講，咁呀，攪二期擴建，不如攪埋公眾入股，每人十皮野，有錢賺就按比例比返你，你肯唔肯呢﹖
你要記住，之前2017定18年個次城堡IRONMAN擴建，係注資完100億之後，仲年年蝕錢，係上年同今年先開始成個樂園每年賺緊5億左右。
第三個係，市建局。
市建局既FINANCING就更加簡單。除左開局由土發局過渡之外，市建局就係靠政府注資，同埋政府得閒比塊地佢，去攪掂一旦出現營運虧損儲備唔別既情況。
第四個我想講既野，就係香港政府。
*************
香港政府既財務情況，如果你唔好理佢發咩債之類，亦都唔好理佢成立北都咁多公司要用既開支 (即係政府帳目入面既投資基金開支)。
用最簡單既角度睇，佢而家既情況係咁的。
香港政府盤數分開做經營帳同非經營帳。
經營帳就係日常營運開支同收入。開支就係公務員人工啦，外加其他恆常社福教育開支之類。收入主要係包括係一般稅收即係利得稅薪俸稅，外加印花稅差餉同埋其他比政府既費用，例如水費康文署BOOK場呀好多注冊費用之類。
基本上，恆常開支入面，係一般稅收再加印花稅差餉，就佔左絕大部份政府恆常收入。
講政府經營帳，最重點既係得一樣野﹕
因為基本法要求咩「量入為出」，再加上由殖民地時開始既公務員傳統或者公共財政紀律，所以以往衣盤經營帳就開支同收入都「大致相稱」。衣幾年就因為發債收入，所以衣條數會出現幾百億盈餘，不過就唔好理住。
所以，理論上，你睇政府條數，係可以假定個經營帳係balancing，唔需要特別理會佢。
同經營帳唔同，非經營帳就係非經常性開支同收入。開支就主要係公務工程，收入就係地價或者其他修改地契收入 (農地補地價起樓就係修改地契收入一種)。
我一路都回帶講，以往COVID前每年地價收入都過千億甚至1800億，所以當時公務工程開支每年接近1千億，都係冇問題的，仲淨左錢可以全民派錢。
而家個問題就係，每年地價收入係得百零億，黎緊幾年可能有幾百億。
不過，波叔講左，每年公務工程開支係1200億。
所以，簡單講，你當COVID開始，以至未來幾年，每年政府個非經營帳係有1000億赤字。
即係，最簡單講，由COVID開始，唔計發債的話，去到2030年，係衣10年間，政府既赤字係有10,000億，中文係1萬億。
1萬億係乜概念﹖
就係，政府係賣地最好景既時候，即係2017/18年度，當時地價收入係1,755億 ，(另加經營收入因為稅收強勁而有640億盈餘)，所以政府整體財政盈餘係1,379億。
咁假定未來經營收入條數係「大致相稱」，咁即係要差唔多重溫9次2017/18年既賣地好景，先可以透過政府自身盤數 (即係非經營盈餘)，去還清衣1萬億赤字。
所以，我成日話，香港唔靠賣地，唔攪掂返每年賣地盈餘有1千億以上，根本個財政赤字就衣世都攪唔掂 -- 而家要靠發債，就仲要比埋息添喎。
***********
當然，如果你唔好簡化，認真睇政府條數，政府自己個PROJECTION其實就仲更加恐怖。
都係個句，你睇最新一份財政預算案個「中期預測」，政府條數係咁的﹕
第一張圖係政府兩盤帳，你見佢經營收入因為有回撥有好多野，所以2025/26年係有5百億經營盈餘，之但係往後每年都係估百零億盈餘，就係經營收入及開支「大致相稱」啦。
第一張圖既非經營帳目，先係重點。
2025/26年既非經營以入 (主要係地價收入啦) 係355億。之但係，佢估計由2026/27年開始，每年個非經營收入都係1千億樓上，衣度應該好大部份都係咩北都洪水橋用地 (2027/28年條數突然間跌返去578億，就下面解到比你聽點解 -- 政府係今年同出年條數估過千億，係有做數的)。
而家2026/27年度過左一半，非經營收入即係賣地收入係有原先估計既幾多丫拿﹖
早兩個禮拜，係度講屯門南延線塊巨無霸地補地價金額係105億，就算計埋衣塊地，今年點樣可以達到個1,131億既非經常收入目標呢﹖
當然，我再check真d，如果淨係睇大表，上面既講法係唔準確。
再精確D，你睇埋上面個非經營收入BREAKDOWN，非經營收入裡面，原來個「基本工程儲備金」既2025/26年預計收入只係930億，即係佢估土地收入原來只係930億衣個數。
你又再睇，佢有個remark (4) 講話，衣930億，係包括埋係2026/27同埋27/28年外匯基金每年轉撥個750億。即係，佢估衣兩年賣地收入，原來只係930億-750億，即係等於180億。
不過，就算今年餘下落黎賣咩地都好，係米真係收到180億地價收入﹖
我記憶中，早排賣左幾塊地，都好似幾好價，咁衣180億都好可能達標。
不過，我有仲小小懷疑，事關，我未計，亦都唔會CHECK，究竟而家港鐵咁多項目可以容許入標發展商分期付款，咁究竟港鐵向政府補地價既時候，又係米可以按發展商既期數去分期補地價。
當然，而家政府當港鐵係提款機，高鐵延誤都要港鐵賠22億。咁所以，會唔會發展商未補價都要港鐵嘔住出黎先，就都唔奇既。
最後，佢衣兩年個數係包左外匯基金回撥。不過，佢話2028/29年開始，可以賣返近600億地。衣個數，真係非常之難相信。特別係，衣排大陸不停講境外徵稅。
上面講既收入係好困難，真係唔知點先達到。之但係，第二張圖同先係恐怖。
你見第一張圖，其實會有個疑惑 -- 點解個非經營開支，會由2025/26年既1,872億開支，升到去之後幾年既2,269億開支既﹖
阿波叔話，而家每年基本工程開支係有增加，不過係增加到1200億之麻，點解上年已經係18,72億，之後幾年要再進化﹖
原因係，第二張圖解左比你聽。
第二張圖係個非經常開支BREAKDOWN。你會見到，係「政府投資基金」入面，個開支係由衣兩年既30億左右，之後連續3年，爆到上去130左右浮動。
衣個爆升，應該就係成立個幾間咩北都咩新田科技城公司之類既投資。
你要記住，衣個「政府投資基金」係放係非組營帳，即係理論上又係靠賣地收入黎FINANCE。
***********
睇完上面政府盤數既簡化版同小小詳細版，咁無論假設政府唔發債要還返衣10年個1萬億赤字，又或者係要還返因為發債而要連本帶利既財務成本，咁政府可以點樣還呢﹖要用賣地收入填數的話，洪水橋塊地就話到比你聽，其實賣地收入應該冇預期咁好。
要用其他收入，即係一般稅收同政府徵費等等既一般收入，咁你話比我聽點樣可以每年增加差唔多一千億收入。
要用其他收入，即係一般稅收同政府徵費等等既一般收入，咁你話比我聽點樣可以每年增加差唔多一千億收入。
當然，好多友話，香港債務佔GDP比重唔嚴重，同西方國家甚至最出位既美國比，香港債務升到去20%都無所謂。
不過，香港同其他國家有個最根本既唔同﹕
不過，香港同其他國家有個最根本既唔同﹕
老美同日本仔之類可以用QE可以勁到財政部買債，更加可以印銀紙做通脹減債。
不過，香港係行聯繫匯率，冇正式既中央銀行，你叫匯豐幫你印銀紙買債呀﹖
香港點攪都好，最尾都要用政府自己盤數儲返黎既錢，去還債，基本上唔可能好似老美或者日本仔咁，玩到債務點都唔爆煲 -- 或者係，講爆講左十幾廿年，都仲未爆呢。
所以，我上幾個POST講，最出位就係，還掂香港政府都想用人民幣，咁香港政府遲下米不停發人民幣債，之後大陸幫你買囉 -- 雖然我唔覺得大陸會幫你香港政府。
即係，好多浦開或者浦過大陸既人，都會同你講，你上去設廠做野，大陸人幾時有當香港人係自己人﹖
又當然，更加正確既講法係，你唔係同省甚至唔係同市，都唔當你係自己人架啦。我都講過，最多歧視大陸人既地方，就係大陸。
至於國家層面，我都講過，共產黨對黨員就係「惩前毖后、治病救人」。
你唔係黨員，你睇下馬雲同阿里既下場點﹖唔係要攪內需，又要攪返AI，馬雲同阿里真係仲食緊屎。
至於係黨員，你唔小心講錯野，都可以睇下近排紅返既任志強係點。
**************
ANYWAY，所以，香港發債最大既問題係，佢真係要靠政府收入去還。
咁你見我不停講，香港賣地收入，真係衣世都唔可能返返去2017/18年既每年1,800億架啦。咁其他收入，又可唔可能﹖
咁你見我不停講，香港賣地收入，真係衣世都唔可能返返去2017/18年既每年1,800億架啦。咁其他收入，又可唔可能﹖
都係個句。
香港經常收入最大個幾個稅收，而家利得稅就2,000億，薪俸稅就1,000億，再加印花稅上年好勁就都係得1,000億。
你要係衣4千億入面，再補返地價收入個缺口，即係要用幾多千億去補返發債出黎既赤字。
即係，你要將衣4千億一般稅收，提升到差唔多6千億先可能填到條數，咁你要加幾多稅甚至開幾多新稅種，先填到條數呢﹖
***************
最後，你仲要睇埋，其實衣個系列(2)入面講既野。
***************
最後，你仲要睇埋，其實衣個系列(2)入面講既野。
我唔知點解FB比左衣個廣告我。
但係，佢講既係好簡單﹕
而家講到AI天下無敵又講到創新係咩發展新引擎。
我先唔講你又話AI出現會令到大量中低層文職人員失業，即係減左你個稅收啦 -- 雖然衣批人既稅收貢獻唔係好多。
咁但係，你香港政府投資落去咁多數據中心咁多AI咁多創科野入面，究竟可以產新幾多盈利，提供到幾多稅收，去FINANCE你衣幾年不斷透過發債而投入既資本開支呢﹖
最更加根本既問題係，用返我上個POST講既，新加坡投資落去既AI，就算係政府層級，都係拍住GOOGLE去做AI政府。
香港政府拍住既，係DEEPSEEK定KIMI﹖
當然，應用上，都可能冇咩分別，事關過去甚至將來，都好可能繼續係要蒸餾返老美既AI。即係，到頭來一係用返老美技術，一係就因為國安，真正咁用返「自家研發」啦。
之但係，你用衣d國產野去發展所謂既國際創科中心，又會有幾大競爭力，成為到咩國際中心，之後再填返你個投資呢﹖
嘿﹗
***************
未完。
沒有留言:
發佈留言