唔洗評施政報告 (4)

最後，我真係冇睇份施政報告。

不過，擒晚食飯時，聽到個所謂施政報告論壇，有個記者就好抵死。佢大約係話，金管局今年初就話無意增持黃金，咁點解特首而家又有個轉變，話金管局會研究增持既呢﹖

我特登搵返新聞，當時金管局應該係每年去立法會講外匯基金表現時，講左類似既野。當時係咁講﹕

黃金價格不斷飛升，市場亦關注金管局在貴金屬資產的涉獵程度。余偉文指，外匯基金的配置須兼顧港元穩定與高流動性需求，即使黃金具避險屬性，但目前仍未有大規模增持計劃。金管局副總裁李達志補充，外匯基金沒有任何貴金屬的實物投資，去年也沒有提升實金投資；強調配置要考慮5年、甚至15年的回報及風險，且會多元化投資，不會因短期市場變動而調整持倉。

金管局一直都唔扲貴金屬，其實原因好簡單。

除左係余偉文講既，「外匯基金的配置須兼顧港元穩定與高流動性需求」，咁你扲住實金就好煩。另一個原因係，貴金屬冇息收架麻﹗咁米影響外匯基金回報囉﹗阿波叔今年講預算案時，又話要轉撥外匯基金盈餘去投資北都，咁我扲多D金，每年利息收入又小左，咁我比返自己私己錢阿波叔去填數呀﹖

當然，阿家超回個記者，就更加一絕。求其搵報導，家超係咁講的﹕

《五年規劃》及《施政報告》提出研究容許外匯基金適度增持黃金，以及將現有黃金庫存，逐步轉移至港金結算公司指定倉庫。

行政長官李家超在電視論壇上指出，金管局作為政府的重要政策單位，在支持香港整體發展上很重要，除了確保對銀行和貨幣體系的管控，增持黃金以分散投資亦都值得考慮，特別是本港正建立國際黃金交易市場，朝著政府政策作出決定是正確方向，既是支持香港，亦是合理的風險管理措施。

李家超強調，香港在黃金市場發展具有優勢，不少內地單位都有黃金交易的需要，本港能夠提供相關服務，內地單位長期在港存放黃金，能夠降低交易成本，而當本港倉儲愈來愈大，亦能夠激發黃金交易市場的自身動力。

我唔知有冇人會識，會覺得唔對路 -- 金管局班老鬼可能暗啞底覺得唔對路，不過就唔會有人講。

即係，金管局由任志剛時期開始，就比人叫獨立王國，知唔知點解呢﹖

因為，金管局係要獨立運作，理論上唔受政府干預。衣個，係金管局作為維持聯繫匯率，管理外匯基金既最重要角色 -- 你唔係獨立，唔受政府干預，我點信你呢﹖

應該冇人記得，亦都冇人識得，想當年財政司同金管局其實係有封信，清楚明確兩者關係。

我竟然係金管局網頁個管治架構入面，見到梁錦松作為財政司司長比金管局總裁 (即係金融管理專員) 既衣一封信 (網頁入面話有份報告，條LINK就死左啦)。

我覺得封信會隨時唔見，比相關人事洗左，所以COPY埋係度。

封信最重要個句係，「金融管理專員須自行負責達成貨幣政策目標，包括決定有關的策略、工具及執行方式、以及確保香港貨幣制度的穩定與健全」。

「須自行負責達成貨幣政策目標」。

SEE﹖

金管局係政府架構既一部份。不過，就好似佢而家個「管治架構」頁面都仲係咁講﹕

「金管局是香港特別行政區政府架構的一部分。金管局的日常運作，在金融管理專員所獲賦予或轉授的法定權力範圍內高度自主，並輔以高度問責性和透明度。」

你如果唔係「高度自主，並輔以高度問責性和透明度」，即係有咩要聽特首講既，就早講丫。

當然，你可以話，唔係既，金管局有4個主要職能，包括維持聯繫匯率、監管銀行體系、鞏固香港國際金融中心、同埋管理外匯基金 -- 咁上面封信係講「貨幣政策目標」，即係淨係講維持聯繫匯率之麻。

咁其他職能，都未必一定係「須自行負責達成」既。

你夠膽敢講，我真係服左你。

當然，講咩都冇用，你余偉文年頭先話外匯基金唔會扲黃金，而家就轉軑話要研究，仲講到話「外匯基金增持黃金有助金市發展」，咁米係囉，你年頭未訓醒，而家訓醒左，米要研究增持黃金囉。

ANYWAY，唔該，係咁的話，你唔好再講自己係專業啦 -- 雖然你早幾年係金局管年報已經講咩由治及興大灣區已經九唔搭八。

咁你而家降到去同家超一樣LEVEL，你夠唔夠膽學家超講，「金管局作為政府的重要政策單位，在支持香港整體發展上很重要」。

如果你夠膽講，咁快手叫波叔未換屆前寫多封信比你，話以後金融管理專員既職責係支持政府、支持國家、支持香港融入大灣區啦。

小。

************

施政報告其他野，我就真係唔講啦，事關冇睇過。

我特登講金管局，係睇唔過眼，又預左冇人會講JAK。

以往十幾年，圍住金管局既角色，就有好多鬼故，絕大部份都係亂UP。不過，衣D金管局法定或者制度上既角色，官方既書信內往，就冇人識的，所以要講兩句。

************

完。