不過，佢講既問題同我講既一樣，但係解決方法就有D似，不過本質上唔同 -- 而佢講既解決方法，其實都同佢提出既問題，關係唔太大，有邏輯既問題。
*********
先講歐錫熊篇文既邏輯問題。
佢篇文既邏輯係(我下面幾句全部係QUOTE自佢篇文)﹕
1.經濟似由「無就業式復蘇」（jobless recovery）進入「無就業式增長」（jobless growth）。
3. 按此理論的思路，維持市場公平競爭和促進科技持續發展，是有必需性，亦必然要接受夕陽行業會收縮和低生產力的公司會被淘汰。另一方面，「創造性破壞」會引起「打工仔」的不安和焦慮，
4. 特區政府在教育和再培訓方面，已投放不少資源，但為基層工人而設的社會安全網或有完善空間。
5. 如果依賴「涓滴效應」（trickle-down effect）來解決問題，難免是較消極的做法，效用需時而且不確定。
6. 香港是有能力於轉型期為基層工人提供更強支援，在失業綜援、在職家庭就業不足津貼及再就業津貼試行計劃之外，加建安全網，減低基層墮入貧窮的風險。在經濟發展策略上，是可以做到雙管齊下。
7.增財政收入 建立「失業援助金」
佢成篇文個邏輯，其實係建基於第2點﹕
「經濟前景樂觀」，但係轉型期間「有頗高的不確定性」，所以佢篇文認為最重要或者最需要解決既問題係，轉型期間既「無就業」/失業問題。所以，佢個解決方法就係「建立失業援助金」。
***************
SEE﹖
衣個就係佢篇文既問題。
佢話香港轉型，不過你點同我解釋，因為要做創科轉型，所以咁多餐飲零售食曬屎﹖
我當你解釋到啦。咁轉型成功，新產業已經開花結果，又點可以解決到餐飲零售既失業問題﹖
佢係米想話，香港而家玩所謂既創科轉型，所以D友就唔洗食飯唔駛買衫褲鞋抹；創科轉型成功，新產業開花，跟手茶餐廳阿姐就可以去攪創科做工人啦﹖
又或者係，新產業開花，D友有錢啦，市旺啦，茶餐廳又突然翻生，傳統酒樓又突然之間客似運來，結婚都要去返酒樓唔去酒店擺酒呀﹖
佢個所謂新產業開花，其實可唔可以同以往未來一直最賺錢既金融比較 (無論係個GDP/GDP PER CAPITA或者請既人手)﹖做個批產業既專材，又有幾多係香港消費丫拿﹖
***************
歸根究底，而家既所謂無就業式增長，究竟同失業率既關係係點﹖
佢緊係唔敢答。
不過，其實好多人都知原因，之但係唔夠膽同你講。係阿龐健貽低低能能，前排講水上樂園點解收皮時先唔覺意同你講左。
我重覆多次，我講返佢UP個乜，再加我既註解，套返落個香港大環境﹕
1. 外國人中產離港，水上樂園目標消費客群小左 -- 套用香港社會，就係餐飲中檔消費死既原因；
2.所謂旅客跟本唔會比錢入場 -- 套用旅遊業，就係窮遊對經濟冇幫助；
3.鄰近水上樂園競爭 -- 套用香港經濟，即係我講既不可抗力，內地同香港好多野個價係要拉平；
4.香港人力成本高昂，水上樂園開一日蝕一日 -- 套用我之前篇文，都係玩緊不可抗力。
上面講既經濟問題，其實就會導致所謂既「無就業式增長」。
即係，你要倚賴大陸做低端做下沉市場 (即係而家既海洋公園或者所謂既無處不旅遊)，根本商家就冇錢賺，撐唔起就業，結果就係無就業。
同時間，香港仍然有增長，係因為有D野大陸做唔到，所以你仍然可以用高價去做。例如，香港有進出口 (去俄羅斯北韓或者東南亞洗產地)，又或者係攪金融 (陳志之後，香港人更加清楚香港要發展既係邊類型既 家族辦公室或者財資管理中心啦，下麻)，甚至係賣下保險理財產品比班高才，令到香港有所謂既增長。
所以，上面出現既無就業不過有增長，係米創科轉型可以解決﹖創科轉型成功之後，係米可以解決到「無就業」個原因﹖
***********
睇度衣度，所以，歐錫熊個邏輯就好奇怪，成篇文既立論亦都求求其其。
如果你唔認同佢講「新產業則需進一步開花結果，創造職位的速度有待加快」，「筆者對香港的經濟前景是樂觀的」，咁佢篇文你就唔洗睇。
事關，佢講既解決方法 -- 失業援助金 -- 係唔可以解決無就業既問題，只可以解決無就業之下，D友點生活既問題。
***********
講開又講，咁回帶都講多次。
某程度上，我同意張宇人所講，攪唔掂既餐廳真係「要結業就提早結業」。
不過，我唔認同佢話，輸入外勞係解決而家餐廳經營既方法。
即係，餐廳攪唔掂，可能係本身問題，又或者係大陸經濟，又或者係好多其他原因 (好多小店真係好難食架，大佬)。衣類餐廳，有部份真係不可抗力，要同大陸同經濟大環境去鬥。
之但係，近年唔止兩送飯，你見好多餐飲都開始攪新花臣，又或者係高中價向中價流，又好似係有起色。佢地做既，唔係輸入外勞鬥平，而係有新野出黎 (或者唔知係米業主都知死，減左租或者其他地方慳到個成本，所以好多中檔餐廳價錢好似「合理」左)。
衣個，係我講既創造性破壞，或者破壞性創新；你輸入外勞，就係阻止衣個過程，將個環境維持係鬥平既死循環。
***********
再用個MARCO既經濟環境或者其他行業去睇。
電梯業最出名係咩﹖
政府衣幾年要輸入外勞，早排仲話容許輸入8個技術工種，入面包括「升降機技術員」。
政府話，衣幾個行業都缺人，所以輸入外勞係最好最快既解決方法；你睇上面TVB條LINK，個咩電梯業總工會副理事長就話人手夠丫麻，根本唔洗輸入外勞。
人手夠唔夠，有個好簡單既指標去睇﹕人工。
電梯業最出名係咩﹖
電梯維修技工屬發牌制，黃國基指要先做滿4年學徒合約，然後讀書考試合格，即5年時間便可獲牌照，若不考試則需要工作滿8年才可獲發牌，「和醫生護士一樣，很厲害的，而且不一定考得到」。但電梯維修技工的專業價值，有沒有在薪酬上反映？黃國基說沒有。
陳家兒為持牌技工，有40年豐富工作經驗，根據其合約及更表，他服務同一公司25年半，日薪為673元，每月休息3至5天，薪金平均約1.7萬元。遺孀悲訴丈夫薪酬不合理，自己從事清潔日返8小時，月薪也有1.5萬元。黃國基對此無奈道：「底薪600多元，是不是一個正常（水平），我不知道怎樣評價，留給社會評價。」
又SEE。
點解我會係上幾個post話，你加最低工資，政府攪好個再分配，可能有機會令到個經濟有起色﹖
你睇，而家所有新樓座低收你5蚊管理費；衣排出曬名不過其實唔係好豪既朗賢峰都夠膽死收你7蚊 (2萬蚊尺都唔算好豪啦)。
收你咁多管理費，你話保安幾錢人工，跟手維修保養幾錢﹖原來，電梯維修工，未學滿師既收你萬四五蚊，學滿師有幾十年經驗有排既，都係收你萬七蚊，多過冇牌既幾千蚊。
扲曬牌有幾十年經驗既電梯技工，原來人工底薪同坐座頭既保安差唔多 (WELL，你可以話，保安都要考牌既......)。咁，個電梯工個萬七蚊人工，代表既係咩﹖
我同電梯總工會條友一樣，都係唔知點評價。
不過，我就知政府點評價﹕電梯工底薪低冇人入行呀，咁輸入外勞囉。
*********
所以，結論係乜﹖
真係攪唔掂。
當歐鍚熊話，「顯示經濟似由「無就業式復蘇」（jobless recovery）進入「無就業式增長」（jobless growth）」，佢既解決方法係失業援助。由政府角度，政府話電梯工缺人呀，咁多工種都缺人呀，咁我地要解決呀，所以就輸入外勞啦。
如果唔輸入外勞，甚至唔攪最低工資，其實有冇方法解決﹖
用電梯工例子，其實有個好簡單既解決方法﹕
以後政府所有物管電梯合約，我設定個最低工資標價，提高電梯工底薪，咁係米有問題﹖設定左個底薪，拉高返成個電梯工行業既底薪，之後係米都吸引唔到人入行﹖甚至係米唔可以拉高返個整體社會勞動參與率﹖
政府有咁多物業，就算拉高唔到成個行業底薪，不過到時鐘意舒服唔搵命搏既，米專做政府樓，想繼續搵命搏去OT賺大錢既，米繼續做私人樓囉，到時市場會自己運作架啦。總之，政府改善到個合約，就點都吸引到人入行，改善到個所謂既無就業情況。
而家歐錫熊話要加稅要攪失業援助。相對上，其實咁簡單攪好返個外判合約，提升返個電梯工待遇，要用既公帑又真係多幾多呢﹖
你攪合約，提升待遇，本身要用既公帑就一定細過失業援助金既銀碼，唔洗講到咩加稅咁煩。
除左咁之外，提升待遇，吸引人入行，係提升勞動參與率，而唔係等運到。又再者，你輸入外勞，繼續壓低待遇，就衣世都係要靠外勞；外勞唔會係香港消費，對本地經濟冇乜貢獻之餘，一旦唔知做乜祖國強大要加人工，到時你又點解決﹖
************
開始離題啦。
不過，結合埋我上幾篇文，其實我想講既都幾清楚﹕
香港既所謂「無就業式復蘇」或者「無就業式增長」，其實同經濟轉型冇咩關係。無就業，係同大陸拉低香港物價人工，即係同purchasing parity power有關。
香港有增長，係因為金融保險係有所謂既獨特優勢，所以有增長 (香港醫療都係unique架，不過大陸人黎香港打疫苗去養和之餘，香港人竟然返大陸睇牙配眼鏡，攪到牙醫冇左好多生意)。
你要係就業方面減小purchasing parity既影響，就係要賣unique野。你可以賣貴，賣大陸冇既經驗體驗，先可以生存。
你要入外勞，要遷就內地賣平野，就等死，只會係個下沉市場冇就業既循環入面等死。
************
當然，你話點樣賣大陸冇既體驗﹖
你自己睇衣個，睇下點解咁多大陸人黎香港睇戲。當然，你可以再之後睇下，香港電檢禁左幾多部戲，咁你就知，香港仲有uniqueness可以賣，所以香港電影業點解會死，以至點解香港會死。
當然，得閒就不可抗力，對自己係冇成本，甚至有機會有賞賜。
所以，可樂而不為呢﹖
唔講工程撥款大茶飯，你睇西九，就知啦。
你睇下高雄係點攪，睇下佢地搵既係咩人。你香港之前攪COLDPLAY攪大陸人演唱會，真係當演唱會算，有人入場就完成任務。
再講，你覺得香港唔夠多大陸旅客，再搵大陸人黎吸引旅客，就會錦上添花呀﹖
ANYWAY，搵大陸人又有D唔同，事關，易攪，同埋政治正確麻。
**************
完。
沒有留言:
發佈留言