ANYWAY，衣篇，都應該係最後一篇啦。
********
之前個篇冇proofread就是但出左，所以有D亂，不過明我講乜就得啦。
事實上，篇文都係唔錯，事關點出左個問題 -- 海洋公園個成本入面，僱員成本 (以至我quote左出黎但冇講既表演成本) 其實係不停上升。無論你有冇生意，個僱員成本都係隨經濟發展而上升。
海洋公園就算冇請多左人 (我估就算水上樂園係2022年開萬，不過都唔會請多左好多人。事關，水上樂園未開，係2018/19年，個僱員成本已經係7.717億)，但係每年加薪，都會令你個僱員成本由2013年既6.183增加到2024年既8.1億，即係增加左超過3成。
衣個，其實係香港整個社會一個問題。
不過，講定先，衣個其實唔係問題，不過香港政府以至好多人，以為係一個問題，亦都令到衣個問題，成為一個真正既問題。
**********
你睇香港經濟，政府或者所謂商界衣幾年最鐘意講乜﹖
請唔到人，僱員成本高，所以我地要輸入外勞。
係商界角度，衣個好似係事實，最低工資不停上升麻，所以人工不停上升麻。
咁我地睇下面兩幅圖，又好似係喎﹗
兩幅圖都係統計署入面既「按行業主類劃分的就業人士.....平均薪金指數 (1999年第1季 = 100)」，不過第一幅圖係名義指數，第二幅圖係減左通脹既實質指數。
兩幅圖，有幾樣野可以睇﹕
1. 淨係睇第一幅圖「名義指數」既話，所有行業既工資係2012年開始已經好過1999年，即係個指數都超過100 (係呀，你睇最尾兩欄，係2011年都仲衰過1999年)；
2.淨係睇第一幅圖，都可以睇埋各行業由2011年至2025年既升幅﹕
2.1. 「零售」由2011年113.4升到去今年既173.8，好似幾好，係有大約70%升幅；「住宿及膳食活動」增長都有75%；
2.2. 但係「製造」、「金融及保險活動」、同埋「專業及商業活動」升幅係接近或者超過1倍；
3. 之但係，睇第二幅圖，扣除左通脹之後既「實質指數」，先係精彩﹕
1. 所謂既請人好難，零售餐飲出高價都請唔到人，你如果睇返通脹，其實個價係有幾高﹖扣埋通脹個實質價，係同2018年差唔多，甚至係衰過個幾年。
3.1. 將2025年同2010年比 (丫，點解我上面就係由2011年開始比呢....)，個名義指數好靚既畫面就收左大半皮。食曬屎個堆「社會及個人服務」、「地產活動」個批，衣15年黎個累計實質指數增幅係10至20點，計返每年增幅連屎都冇得食 -- 「進出口貿易及批發」就冇增加，「運輸....」就直頭係下跌左，係負數；
3.2. 「成本好高好難請人」既「零售」同「住宿及膳食服務活動」好小小，不過個增長由名義既75%，跌到去前者實質14%，後者就實質18.9%；
3,3,「製造」、「專業及商業活動」都係麻麻，不過表現最好既「金融及保險活動」都仲有32.41%既實質增幅。
3.4.除左增幅之外，最精彩既係，你將2025年同2018、2019甚至2020年比，「進出口...」、「零售」、「運輸...」、「膳食...」個實質指數都仲係跑輸，而「零售」仲要係仍然輸得幾多下。
3.5.相對上，「金融...」、「地產...」、「製造」、「資訊....」、「專業及商業服務」就已經跑贏2018年，仲贏得幾多。
********
衣幾幅圖可以睇到幾樣野﹕1. 所謂既請人好難，零售餐飲出高價都請唔到人，你如果睇返通脹，其實個價係有幾高﹖扣埋通脹個實質價，係同2018年差唔多，甚至係衰過個幾年。
1.2. 我唔睇上面個工資指數，好多人包括張宇人之流話用3萬蚊都請唔到洗豌，咁我又同你睇下統計署顯示既洗碟工、以至廚師同侍應係幾錢，再睇埋衣幾年加左幾多人工丫拿﹕
1..洗碟工，平均月薪，都仲係$15,835，2022年係$14,700。聲稱咁難請人，3年先累計加左7.7%人工。
1.4. 你要3萬蚊請人，係唔知做幾多個鐘，唔知係米現金出糧，唔知洗唔洗供MPF，就唔好講啦。再者，如果真係3萬，而家幾多鋪轉左外判比人洗﹖
2. 你再睇廚師，侍應，其實都係類似情況。人工又加得唔多，時間又長，侍應而家都仲係平均薪金$16,783，咁請人點會唔難﹖
3. 出唔起錢請人，後生個批冇野做，都緊係唔想入行情願轉行炒散做kol。咁即係乜﹖米係其中一部份既jobless recovery原因，亦都解釋到之前我講jobless recovery個post入面，點解勞動參與率咁低既原因囉。
4.如果係結合埋實質工資指數將圖去比，做零售膳食，個實質工資比5年前，其實仲係跌左。所以，你話點解咁多人個對經濟個感覺差，唔捨得消費﹖
5.所以，衣個就係我之前講過，香港所謂既經濟增長，李家超話平均月薪創新高，其實就係食屎啦；
5.1. 衣批中低收入既所謂薪金增長，其實名義有增長，實質收左皮；「專業及商業服務」(即係律師會計師之類) 個批係有增長，不過實質增長同2018年比，都係唔過10%，仲要衣幾年交多左好多稅；「金融及保險活動」個批實質增長就OK啦，不過佔勞動人口幾多﹖
5.2.上面衣個唔同行業實質工資增長既圖，其實就再次反映緊我一路都講既野。
6.當然，你睇我早一兩年前擺過出黎既餐飲業收益指數，中式酒樓茶餐廳都唔多掂，中式酒樓個收益好似係跌左好多 --跌咁多，又點加工人請人﹖
7.衣個，就係海洋公園同香港經濟面對既問題，就係我想講既野啦。
************
正題。
終於正題﹗
海洋公園既問題係，佢成本不斷上升，但係佢過去衣5到10年，其實係唔敢加價 -- 無論係門票或者餐飲，一加價，就預左冇人黎，到時個margin可能上升，不過收入同盈利一定跌。
所以，海洋公園其實係搵緊辦法加價。上幾個POST不停講水上樂園，個水上樂園門票其實係另類加價，入面租個LOCKER要100蚊，都係另類加價 -- 同其他樂園內消費相比，水上樂園既消費/價錢係加左一大截，咁仲唔係加價﹖﹗
你唔好將水上樂園分開黎睇，當佢只係樂園入面既其中一個設施，咁水上樂園其實就係一個嘗試加價既策略。
不過，佢開幕後兩年，去到前年，頂唔順，就玩買一送一好多野，變相又係減返價去吸引人流。
海洋公園係票價上既可以做既野，其實就係同迪士尼相反。
HK01有時真係幾好，我想搵既野，佢都有做。
你睇HK01早兩年衣個報導，係講海洋公園同埋迪士尼既門票價格。
篇報導話，由2005年開始去到2022年，海洋公園門票累積加價係169%，迪士尼就係100%。不過，佢都好FAIR講到，去到2022年，海洋公園門票都只係$498，而迪士尼就係$699。
迪士尼個門票價，一路都係高過海洋公園。
你再細心睇，你會見到，迪士尼加價幅度，其實2012年左右開始，其實係高過海洋公園；而海洋公園，去到2019年開始，其實已經唔敢加價添。
當然，之前講過，海洋公園其實有好多旅行團票、淘寶折扣票之類，所以海洋公園門票加幅，其實冇帳面咁多。迪士尼呢，都係有折扣票，不過佢係玩兩日票減價之類，仲有好多唔同combo。
除左咁，迪士尼更加痴線既係，佢由2022年開始年年加價，同埋佢節日票又一直會貴D之餘再貴D，可以攪到成千蚊一張。
又再除左咁之外多次，佢除左有唔同fast pass，又有酒店bundle票，賣你酒店兩日一夜4千蚊都得。
海洋公園都學迪士尼，玩提早入園見熊貓證，不過之前個post講過，個提早見熊貓係好貴要$1,500，不過每日只有40個名額，仲要只係用得一半呢。
**********
我想講既係，你將海洋公園同迪士尼比較，兩者都係主題樂園，不過兩者就有唔同運作模式。
海洋公園個定位係平；就算有熊貓，要玩高檔次，我都只係夠膽預40個名額。當然，海洋公園其實仲有咩設施，可以吸引高檔客，可以玩fast pass﹖ 唔通你比$100，可以優先搭攬車，優先睇海龜﹖本身海洋公園就冇乜人，fast你老尾pass咩。
迪士尼既定位就係，佢知自己好彩，淨係衣十幾年收返黎既ip，都可以攪多活動賣點，實會吸引到人黎，可以賣到fast pass；佢有酒店有盛，可以做到唔同sale combo；佢知自己有特別賣點除左機動遊戲巡遊煙花之外，仲可以係節日攪特別野，所以節日票又可以賣貴一貴。
海洋公園，除左哈囉喂之外，佢有特別咩賣點可以提高個價﹖
**********
衣兩個唔同發展方向，米係香港而家既問題。
擒晚睇到本土研究係FB講咩 旅客專門嚟香港體驗「窮遊」？，其實衣度以至好多人都講過﹕所有旅遊城市係COVID後都復甦左，旅客駛錢全部都返曬黎 -- 係香港收皮JAK。
個原因係，大陸經濟唔好。所以，本土研究社話「至少自十年前起，香港的旅客人均消費數字，已不斷呈現下跌趨勢，而非在疫後才出現」，其實我都好似講過。
個原因係，大陸經濟唔好。所以，本土研究社話「至少自十年前起，香港的旅客人均消費數字，已不斷呈現下跌趨勢，而非在疫後才出現」，其實我都好似講過。
香港旅遊唔掂，最大原因，就係香港最大旅客群既大陸，而大陸一般人其實係COVID前都轉差。而真係好有錢或者有D錢既，就直接去歐州去日本丫麻。
香港個情況係一樣，但係有小小唔同。
**********
咁好啦，去到衣度，先micro小小咁講，而家既香港，好多餐廳話，旅客消費力弱，我地就整D平D既野出黎；零售班友又話，旅客消費弱，咁香港零售模式都要變 -- 同埋要降成本，輸入外勞。
所以，旅客消費弱，其實係你都有份自製緊，去迎合佢地。等同，旅客淨係想體驗東霸，政府米係要改善東霸交通，等佢地可以去完東霸快手返內地囉。
你要自製消費降級，其實就係海洋公園條路。
你要自製消費降級，其實就係海洋公園條路。
海洋公園唔敢CUT COST，因為佢作為公營機構，減人工 -- 特別係基層人工 -- 就死緊 (當然，如果公務員減，佢就大條道理減啦 )。但係，海洋公園又冇吸力所，所以唔加得價，就提升唔到個margin，所以佢未來幾年都係要死。
香港個情況係一樣，但係有小小唔同。
香港要遷就窮遊，大部份餐廳就CUT COST，都同你玩「咁我整D平價D既餐出黎啦」。咁個margin跌左點算﹖好彩香港社會同私人企業唔係海洋公園，餐廳酒樓可以一係執粒，一係輸入外勞囉。
**********
上面純粹由旅遊角度去睇。
如果再marco睇，你會見到，衣篇文開頭講既實質工資指數，係衣幾年，「所有選定行業」都係升。不過，真係有意義既升幅，其實係由「金融及保險業」帶動。
衣個，真係唔洗CHECK，都知其實外國好多地方係post covid既環境都係。
之但係，我冇check其他地方唔同行業個薪金指數係點，又之但係，用常識 (即係吹水) 去講，你話外國人出街食飯，佢地既消費係幾多﹖
你唔講瑞士個D痴線野，百幾蚊食個麥當勞。我又唔講美國痴左線既小費文化，殺你20% service charge。你去日本仔食野，香港人覺得好平，但係對日本仔黎講，唔去居酒屋唔去迴轉壽司甚至唔去殺你亞之類既家庭餐廳，個消費都應該唔平。
事關，日本仔既最低工資，其實高香港一節。我唔特登搵，不過求其SEARCH日本仔各行業人工，衣度話東京最低工資係2021年係71蚊港紙。
我想講既係，你話香港係jobless recovery，香港經濟差，其中一個好大既原因係，衣幾年所謂既經濟增長，連帶既工資增長，其實都集中係金融服務，其他行業工資都係冇乜實質增長。
冇增長，咁你想job咩recovery呀﹖
再者，而家講兩地溶合，好多物價會拉緊睇齊，香港物價易跌難升，其實就係「不可抗力」。之但係，而家政府以至商界都選擇緊海洋公園條路，又有冇人諗過，點解迪士尼會咁成功，點解可以不停加價﹖
李家超九唔搭八話，經濟轉型，購物模式改變，商界要諗辦法轉型，其實佢又有冇諗過，咩叫轉型﹖
轉型就係，我唔要窮遊客，香港作為旅遊城市就係要SELL貴，而唔係SELL所謂既「下沉市場」。
當然，政治上，佢玩到不停 擴大二三四五六線自由行城市，就係玩「下沉市場」；攪咩廟街夜市經濟，就係 沉到落底既市場；再大肆宣傳咩深度遊遊山玩水，就係另類窮遊，都係「下沉市場」。
不過，衣D係政治正確，所以政府會不停SELL完再SELL。事實上，睇住班小紅書淨係黎打卡，佢夠膽大聲SELL貴咩﹖
**********
經濟上，或者local政治上，sell貴，其實係有另一個真正既經濟轉型問題。
好多人話，而家出街食野好貴，所以三送飯興起。不過，WELL，你見咁多米芝連外國食肆收皮撤出香港，咁以前又冇遊客以至香港人話貴，而家先話貴所以冇生意執粒﹖
以前個環境係，全部香港人都有錢；就算唔係好有錢，都有D錢。我唔check工資指數，不過你做茶樓阿姐，收既貼士賣下月餅年糕扲commision，都肯定好搵過而家 -- 而衣D係工資指數都未必睇到架啦。
以前因為炒樓又好中產未走 (取代左既專材就多數返大陸消費)又好，香港唔同階層都有錢賺，真係有所謂既滴漏效應。而家中下層，真係下家產或者向下流。
香港要改變衣樣，同好多國家唔同，係有個「優勢」-- 香港本身中下層，其實衣幾十年黎個實質工資增幅，其實都係麻麻。就算係上面講既最好景時，都係跑輸大市 (即係GDP或者中產以上)好多。
你夠膽每年增加最低工資10%，加夠5年，5年後最低工資差唔多70蚊，最底工資當係每日8個鍾做29日，月薪就會係1萬6千蚊左右。
早排報導話，清街招做假既 食環碧瑤外判工月薪約1萬元，每更做9個鐘。如果你係個清潔工，又係單身既話，冇公屋住劏房既話，粉糧就減左4千蚊租，每月有6千蚊用 -- 正常食飯搭車之類，每月用3千幾蚊 (你每日做9個鐘未計搭車就唔係仲煮飯麻，咁好痴線每日食麥記30蚊餐都用2千蚊以上啦)，即係每月儲得幾千蚊。病兩野，就收皮鳥。
咁既話，如果月薪由約1萬元，加到1萬6千蚊，你估佢每個月消費會多幾多丫拿﹖
*****************
上面講既，其實係幾左或者所謂左膠既野 (不過鬧人左膠既人，可能唔知衣D係左既)。即係，透過最低工資咩都好，係要做個主動既社會財富再分配，去增加中下階層消費，之後令到社會整體消費增加。
好左既人講完衣度，就會完。
我會再講既係，成個經濟，係會因為多人左消費而膨脹。不過，同時因為成本增加，到時真係會好似李家超講既「消費轉型」，真係有機會某些餐廳又會執粒。
不過，如果你用海洋公園個邏輯，係海洋公園或者餐廳既角度，到時消費者有錢 (竟然唔係我吸引力增加)，我可以加價，我先會有生機去轉型。
你要我靠每年3%既operation margin去生存，我轉乜春野型呀﹖我真係等死架咋喎 -- 當然，如果海洋公園margin有返當年既30%，佢就會起夠廿個熊貓館比你，到時一樣係死。
衣個，係好奧妙既經濟問題。
等同於，我話，迪士尼有賣點，所以可以賣得貴。咁香港班米芝蓮夠有賣點啦，不過佢地就同迪士尼相反，唔減價都係死路。
(題外話﹕我都唔明，海港城間 个園竹語點解可以咁痴線，玩到598有個8道菜既大閘蟹餐，仲要不停賣廣告唔知有冇人去個隻。)
*****************
所以，衣個真係好奧妙既問題。
而家香港係jobless recovery，我覺得其中最大既問題係，所有野都係向下沉，鬥cheap。衣個係死亡螺旋，以而家政府既思維，要全面擁抱窮遊，咁你要走出螺旋，就真係中國好，香港好。
不過，就算中國好，香港都未必好。是關，地心吸力係存在。
你要鬥藍海市場鬥平，你就係同大陸鬥。你係屯門北區開食肆，其實係同大陸同行鬥；就算你係九龍城賣大閘蟹都好，都唔知點解原來依然要同大陸鬥 -- 我都唔明點解有人會係買京東關口大閘蟹，不過衣件事真係出現左啦。
咁所以，香港係得金融保險既工資中位數仲增加緊，其他都係，有增長，餓你唔死囉。
亦咁所以，海洋公園同迪士尼，就真係啟示黎。
李家超成日話乜春香港要經濟轉型，零售餐飲要搵新方法。個新方法，係要有基礎 -- 你一日係搵三四五線城市黎香港，就點轉都死；你真係要local人幫手做本地轉型，都要諗方法點樣令local人有錢。
之但係，你而家做既，唔單止係唔嘗試令人有錢，仲要攪削資助 (好多社福機構減人會唔關你削資助事架呵﹖)，減免稅額加差餉，咁你話香港要轉乜春型，點樣唔係jobless recovery﹖
*****************
上面既野，有d亂，都有d回帶。
不過，我覺得用海洋公園同迪士尼黎比喻，黎去講香港經濟，唔錯。
你睇見海洋公園，就好似見到香港 -- 你冇吸引力，又要靠熊貓招呼班窮遊，攪到你唔敢加價，只係可以做下沉市場，原本有錢既都唔想再黎，變相你就要係個螺旋入面等死。如果唔死，都係要by luck，有日真係窮遊突然之間消失，變左正常遊客，變到可以真正做返正常生意，就真係，well。
*****************
完。
沒有留言:
發佈留言