咁佢入面有好多數，我想講既係衣句﹕
2023/24年度醫療衛生經常開支為2512億元（撇除新冠疫情開支），按年增加8.6%，其中公共支出達1301億元、佔51.8%，較上年度增加1個百分點，但同時較2020/21年度少。
即係咁，社會整體醫療開支係2512億，公共支出係1,301億。前者就係包括私人醫院診所之類既支出，後者就係純粹政府支出。
雖然養和就不停加價，之但係個比例應該唔會太大改變。咁所以，你只係講公共支出，基本上都推算到整體社會醫療開支 -- 當然，因為我懶，所以淨係講公共支出啦。
*********
正題。
睇個新聞，講到香港醫療開支好似增加好多 -- 因為人口老化，所以而家增加好多，未來都會增加再多，最後暗示既就係，有機會對公共財政構成壓力，所以要引導多D人去私營醫療機構。
咁我地睇政府個開支分析先啦。
以下圖表，全部都係政府財政預算案附篇。
講上面四幅圖之前，先remind返大家政府財政常識﹕
1. 政府有分經常開支同非經常開支﹕經常開支係人工燈油火蠟以至對某些機會恆常資助，非經常開支係購買設備基建建築以至對好多特別款項 (例如早幾年派幾百億錢，就屬於財庫局既非經常開支)；
1.2.咁我諗諗下，就唔好煩，上面既表淨係講總開支 -- 無論係政府開支定公共開支，都只係講總額，而唔講經常開支；
2.就好似上面咁講，預算案入面又有分政府開支同公共開支﹕你見政府經常開支「房屋」個數好細，係2014/15年得3.29億 (上面D圖冇顯示的)，係因為衣欄只係包括房屋署 -- 如果包埋房委會既 公共經常開支，係2014/15既「房屋」公共經常開支就有122.19億 (上面D圖又係冇顯示的)。
2.1.又再複雜小小，因為政府開支有分經常同非經常，所以用返上面「房屋」例子，如果講「房屋」個開支總額，2014/15年係243.49億，係2023/24年就係429.79億，即係計埋非經常開支，條數會大好多的。
3.所以，technical小小咁講﹕
3.1. 除左「房屋」之外，政府開支總額 (包曬經常同非經常的) 同公共開支基本上差別不大，有差別都可能係幾千萬或者幾億個隻 (用百份比講就準確D -- 差別唔會超過，SAY，5%啦 -- 衣個係估，因為我冇計過)。
3.2. 個原因係，好小機構會好似房委會咁大，特別係房委會非經常性開支 (即係起樓) 每年金額都好龐大，咁會將個「房屋」政府開支同公共開支個分別拉到好闊 -- 記住，興建公屋個開支係由房委會支付，衣個係公共開支，唔屬於政府開支；
3.3. 不過，都要留意，另一個 政府同公共開支 差別較大既係「經濟」，因為證監保監個批係政府比左筆公之後就自負盈虧，政府唔會每年再比筆資助金佢地，所以佢地產生既係「公共開支」。
3.2.又要再留意，雖然醫管局同房委會一樣，都係公營機構，不過醫衛局每年都會為醫管局提供「資助金」去營運，衣個資助金係每年醫衛局盤數入面，醫管局資助金屬於政府開支。所以，「衛生」個政府開支同公共開支係差不多，以至基本上係一樣的。
*************
講完政府財政常識，講正題﹗﹗
上面第一幅圖，係出自2016/17年預算案附錄，幅圖話比你聽by sector既政府經常開支。由於政府盤數成日要做「預測」同「實際」之間既調整，所以去到2016年預算案，先會有2014/15年既by sector實際開支。
你睇第一幅圖，「衛生」係2014/15年既政府開支 ，係575.08億；第二幅圖，係2023/24年，個數係1194.71億，增幅係1倍多小小 -- 如果你睇第四幅圖，2023/24年既「衛生」公共開支同政府開支一樣，都係1194.71億，不過都係同明報講既「其中公共支出達1301億元」唔一樣。不過，百份比差唔遠就是但啦。
不過，同期入面，其他sector既政府開支增幅係點﹖
你睇第一同第二幅圖﹕
1.「教育」就明顯跑輸大市，去到2023/24年只係升到1135.41億，增幅大約54%，咁唔詳細講佢。當然，適齡學童減小之類，係增幅跑輸大市原因 -- 不過，衣幾年遊學團大茶飯同其他愛國教育，都幫補到維持開支既；
2.「社會福利」由580.91億增加至1157.95億，增加左563.67億，剛好接近1倍。原因除左人口老化，仲要加上長生津係2013年開始之後攪左幾次改革，整左個高額長生津，所以開支又再上升，衣個係人口老化之外既原因。另外，我就唔記得2023/24年有冇派綜援長者金雙糧之類，都係谷大個金額；
3.「保安」由389.06億增加至628.68億，增幅接近7成 -- 入面其中一個大戶 天下無敵部門請唔到人就令個「經常開支」增幅減慢，之但加埋個非常經開支同其他野呢，就扯高個政府開支啦。再加上，2013/14年開始多左咁多口岸，都要多左好多人，所以開支增加又係解釋到；
4.「基礎建設」冇乜升，由739.26億增加至860.54億，升幅得16%，事關每年個工程量係有上限。不過，入面個經常開支其實升好多，請多左好多人；
5.「經濟」就由157.03億增加至699.54億，增加接近3.5倍。升幅咁大，原因簡單﹕除左個幾年派錢派消費卷就每年都谷大左個非經常開支之外，疫情就玩好多百份百擔保，再加上創科局衣幾年駛左幾多錢攪基金攪資助甚至攪基建去攪創科，所以條數谷到咁大；
6.「環境及食物」由215.21億增加至420.39億，增加左116.94億，升幅有95%，就真係唔知做乜 -- 當然，衣幾年攪好多環保野，之前講過已經八萬五既 垃圾徵費計劃 淨係請人開支每年都要幾億，咁仲要買垃圾袋呢，咁就真係是但啦。再者，衣十年多左好多乜春新能源試驗項目要黎比人扼錢，個度又用左好多錢；
7. 1. 咁呢，衣度其實真係可以好多野講。不過，因為今次唔係講衣樣，所以長話短說﹕「房屋」既政府開支增加左咁多倍，好明顯係因為有好多乜春簡約公屋計劃，一方面要請多左人做審批監管，二黎政府要食左條數，即係簡約公屋個幾百億唔係房委會出錢，就每年要打返落去政府開支條數囉；
7.2. 另外，個「房屋」公共開支條數雖然只係升左76.5%，就好似升左唔係好多。不過 衣個數用absolute黎睇本身係好大，用百份比計按年或者累積其實都好大，事關個經常開支唔會增加好多，就算請多左人都只係幾億，冇太大影響。所以，個開支增幅主要係起樓。衣個數可以好易搵，不過唔搵啦。又，如果同上面「基礎建設」去比，就會睇到「房屋」個增幅真係好痴線；
8.「社區及對外事務」由126.18億增加至289.87億，升幅係1.29倍，咁康文唔會增加到咁多，咁你米問下派多左幾多錢比關愛隊同埋社區人士囉；
9.「輔助服務」由427.34億增加至761.93億，升幅竟然都有78.2%。衣個ITEM包括咩政制及內地事務、立法會支援、政府內部服務之類，米知點解囉 -- 多左咁多尊貴議員，每年開支多幾多﹖認識祖國，就除左教育局同公務員事務局外，政制局唔洗比錢呀﹖
******************
睇完上面咁煩既數，你有咩結論﹖為左方便易睇，又再point form﹕
1.「 衛生」同「社會福利」幾似，大家個政府開支都係2023/24年剛好1.1千億左右，10年間升幅都係1倍左右；
2.教育都係過千億大戶，不過出生率減小，增幅其實放緩左好多，增長唔可能再同「衛生」「社會福利」相比；
3.「保安」「環境及食物」升左7成同9成幾就唔理佢啦，雖然環保會繼續比人食大茶飯；
4.「社區及對外事務」升左1.29倍，都唔理佢啦，事關都係去到300億，個大茶飯繼續比人食都唔算大；
5.「輔助服務」都要用成761億，升左近8成，不過立法會完善左之後，增幅都唔會繼續咁跨掛；
6.「經濟」就可以講啦 -- 衣個item無論係增幅同實際開支，都係痴線地離譜，增加3.5倍去到700億。咁你話，政府比左咁多錢攪「經濟」，香港GDP係衣十年增加左幾多﹖未來十年，家超要繼續攪創科，又河套區又北都，你估衣個數幾時過千億，超過「衛生」同「社福」﹖
6.1.更加攪笑既係，到時個開支增加到過千億，個GDP又升幾多丫拿﹖
7. 最後就要將「房屋」同「基礎建設」合埋黎睇，事關兩樣都係基建類。兩者開支，加埋接近1千億，其實就係波叔講個條數 -- 當然，今年施政報告話會額外預留多300億丫麻，咁事但啦，不過就超過左「衛生」同「社福」既政府開支囉。
********
咁所以，結論係乜﹖醫衛局話人口老化已經會增加醫療開支政府負擔。
不過，近十年政府開支增加得最快既，唔係醫療囉。
********
原本仲有好多野可以講，不過打上面段字已經攪到我想死 -- 先唔講我開頭戇居左諗住用政府經常開支條數，所有數我都冇入EXCEL要自己打同計，真係煩到死左。
所以，都係算數。
********
不過，你見到明報入面，阿醫衛局副秘咁講架麻﹕
胡偉文預計人口老化下醫療支出維持上升趨勢，「咁樣係唔係可持續性成疑，係有個挑戰」。他說發展基層醫療會降低醫療支出，並改善市民健康。
胡偉文預計人口老化下醫療支出維持上升趨勢，「咁樣係唔係可持續性成疑，係有個挑戰」。他說發展基層醫療會降低醫療支出，並改善市民健康。
咁當然，你都係管自己個範。又之但係，衣十年個政府開支，其實駛到你擔心﹖你睇經濟同基建條數，就真係開心死。
所以，以後再有同你講，因為人口老化，香港公共醫療開支增幅驚人，所以真係要諗下點樣可以減輕政府醫療負擔。聽完，咁你就可以問返佢，衣10年係創科同基建開支係增加左同實際上用左幾多﹖做完之後，投資左咁多，香港經濟又有幾出色﹖
咁咁擔心政府醫療開支，不如擔心下個幾範野做完出黎，係米倒左落咸水海之餘，仲要加返你稅啦。
********
完。
沒有留言:
發佈留言