你要講，就要講個所謂既「部門首長責任制」。
除左我之前問過，有個精英部門成日都有人貪污強姦犯毒非禮女下屬，咁個部門首長連最簡單既管理下屬都做唔到，咁係米應該革職之外，我最想問既係，局長有個KPI，或者有條例係度又執行唔到，咁呀首長係米又要革職呀﹖
我講既，當然唔係收公屋收到死人都好點都要達成KPI啦。
我想講既係，之前土瓜灣益豐大廈火燭，跟手有線新聞話「益豐大廈全部四座都有驗樓令及渠務修葺或勘測令，至今仍未遵辦，部分2012年已經發出」，阿麥美娟仲話「強調維修責任在於業主，同時批評物管公司未提供專業協助」既。
益豐大廈喎﹗以前既土瓜灣北選區喎﹗而家既區議員就唔知邊春個啦，不過之前十幾年既區議員係邊位﹖係而家尊貴既李慧琼。
咁，咁多年黎，屋宇署都唔執法，係米有區議員阻攔，定係屋宇署唔執法﹖有法不依，有法唔執行，咁係「部門首長責任制」之下，阿部門首長應該點處理呢﹖
施政報告又話，「 政府明年會修訂《建築物條例》，加大違反法定通知或命令和嚴重僭建的阻嚇性，並加強規管承建商」，之前又已經修左條消防條例有咩事法團要負責，咁阿部門首長幾時先嚴正執法呢﹖
上面既，唔係抽水。
個所謂既部門首長責任制，究竟會點玩呢，就真係可以好精彩。你睇收樓收到死人，就知咩事。好多民生野，如果認真跟條例或者跟policy去做，可以係翻天覆地，好大影響的。
當然，所有野，都可以好flexible既 -- 你睇環境局攪咩都攪到一獲泡，阿肥局長近排攪東霸唔比的士行又可以講完冇左件事，就知好多野，都好flexible既。
********
最後，其實可以講土地政策，講下舊區重建講市建局講私人發展商地積比轉移。
不過，今次真係賣大包大茶飯，就是但啦。
又不過，施政報告話，「在北都古洞北及粉嶺北新發展區預留三幅土地讓市區重建局籌劃興建新樓，作為將來「樓換樓」的替代單位」，就真係精彩 -- 我收你市區樓，比返個古洞單位你樓換樓，就真係SO比你啦。北都喎﹗香港未來既重心喎﹗點都好過你中環呀佐敦棟舊樓啦﹗
********
咁其實呢，都冇真係點講施政報告。
不過，其實都唔緊要啦，事關好多野，做就得啦，唔洗講咁多，反正都唔關你事。
**********
完。
沒有留言:
發佈留言