過山車黎啦﹗

 

**************

外交部發言人前排講韓戰，咁我原本都想講衣樣野。不過，長話短說，講下東九龍線衣壇攪笑野先。

**************
以下係補打字時間﹕

先旨聲明，我都覺得今次打字就真係長得過份。

打打下字補補下字，最後，發現，原來想講既野好簡單，睇最尾個段就已經講曬鳥。

**************

開波。

**************
政府終於公佈左衣個東九龍智慧綠色集體運輸系統最新建議方案，計劃係東九龍觀塘山上面，起條所謂既輕軌，由彩雲邨經順天秀茂坪之類落藍田去油塘。

你有興趣睇歷史既話，其實WIKI都唔錯﹕

唔講遠古時代，其實係2014年公佈既 香港鐵路發展2014，入面已經提到要研究東九龍線，不過就攪左好耐，其實政府係2020年甚至再早之前，就已經話攪唔掂，個計劃都係，算把啦。

咁李家超上台之後，就九唔搭八話有替代方案，攪個高架無軌捷運系統，連接彩虹到秀茂坪。之後係建制所謂爭取之下，而家，最終，就攪左個延伸去到馬油塘藍田既方案。

*****************

個野點解攪左咁耐﹖就算話真係要攪，開頭又點解淨係攪到去秀茂坪寶達邨﹖

先答第一個「點解攪唔掂攪咁耐」既問題。

好簡單，成個秀茂坪之類都係幾多百米既山，要起重鐵，跟本攪唔掂個隧道緊急出口之類。所以，當年出左鐵路發展2014個時，張良已經比人問，衣個係米政治決定，賣個人情比推左衣樣野好耐既左仔。咁當時張良緊係否認，仲話會攪得掂添 -- 之後攪唔掂，就佢都唔係度啦。

咁好啦，點解早幾年，政府攪左好多年之後，又話淨係將條輕軌興建到秀茂坪一帶﹖

我文件資料都唔洗搵，都可以答到你﹕

1.秀茂坪寶達 同 藍田中間有個將軍澳隧道，你要經過條隧道或者隧道廣場，就算係攪輕軌都好，成個工都好複雜；

2. 過左將軍澳道，去到藍田公園對上個山坡，其實係當年既馬油塘中堆填區。而家個堆填區修復左，不過大部份地方都係擺左係度，事關衣類埋填區上面唔可以做大型建築，亦都可能有沼氣等問題 -- 你想攪隧道就等同玩爆破沼氣。葵涌公園荒廢左30年就係好例子；

3.工程之外，就係實際效益問題﹕你睇藍田站或者個上蓋屋苑匯景商場個catchment，你由佢而家propose個藍田北站，即係連德道個位行落去都係10分鐘左右。再遠小小既興田邨康華苑，可能要行15至20分鐘，不過衣度既人口係成個藍田站catchment大約一成都冇 -- 個批咩平田邨藍田邨甚至部份德田邨，行去匯景都唔洗10分鐘甚至5分鐘，咁有幾多人會搭個輕軌落個propose既油塘東站﹖仲要係，落到油塘東，你仲要行段路先到油塘地鐵站架下。

3.1.至於左仔顏汶羽成日九唔搭八講咩要處理廣田邨，就真係弱智既典範﹕佢都識講係兩個站中間，成條碧雲道既包括廣田邨既屋苑其實都係好小人口，廣田邨都係得4座7千人唔夠；班友都係搭慣小巴，所以有冇輕軌同佢地根本冇關係，事關佢地點都係兩個站中間 -- 反而，輕軌入左藍田之後，就會有更下家產既野，陣間會講。

(拿拿拿，為免太抽象，我補返個圖﹕個藍田北站就係幅圖藍田公園近德田邨個位，對上淨係沿連德道有幾個屋苑；而藍田北站睇落同匯景好遠，其實個個位行落去都係10分鐘左右 -- 匯景商場就係啟田道，上面幅圖啟田商場對面。至於廣田邨就係右下角好Q遠，所以班友講咩改善行人接駁就係痴膠雞，10個人入面冇1個人會行去個藍田北站到，事關條路係暗斜得黎都斜斜地仲要起碼行15分鐘)

*********************

上面講左歷史，亦都順手講左個輕軌拉去藍田其實技術會有難道，亦都有多少無謂，唔合成本效益。

當然，你可以話，將條輕軌拉埋去藍田油塘，其實可以令到秀茂坪各站既人可以選擇去彩虹或者油塘，會分流到彩虹站以至觀塘線既乘客，亦都可以比乘客多個選擇。

不過，用多咁多錢，興建多咁多公里，就政府開頭都覺得戇居啦 -- 特別係，要重伸一次，佢唔係去到油塘地鐵站，佢係去到高超道，之後好神奇地興建天橋或者隧道，再穿過油美苑油塘邨個批屋苑，再穿埋個基座，先落去油超地鐵站。

衣條天橋或者隧道，由油塘東去油塘站，直線距離就唔遠，不過點可以穿過個居屋範圍或者插入個基座呢，就好神奇。

所以，衣度個結論係，條輕軌拉去油塘，其實係有多少無謂。

**********************

可以順手講多句。

你睇佢彩虹東站，即係彩雲邨個邊，其實都有類似情況。

(廢事講得咁抽象，我補返個GOOGLE MAP出黎﹕而家PROPOSE個彩雲東站就係新清水灣道彩雲商場對出；彩虹東站就係新清水灣道玉麟樓對出，而家應該係個冇人用既小巴站。)

你熟悉甚至只要經過個區，行過條新清水灣道上彩雲邨，你就會覺得個彩虹東站同埋彩雲站又係戇居。

彩雲邨係山上，而家大部份人住個頭既人都係行5到10分鐘落山去彩虹站。

如果要夾硬fit落輕軌個plan，就係有個咁戇居既情況﹕你用google map去計數，由個proposed既彩雲站沿新清水灣道行落去彩虹東站，係行落斜路5分鐘；你再之後由彩虹東站行落彩虹地鐵站，係加多3分鐘。

咁唔係智將既都會問，我住彩雲邨，要去彩虹站，如果搭輕軌既話，就係彩虹東站落左車點都要行返原本個3分鐘先去到彩虹站，仲未計上上落落等車，繁忙時間又唔知上唔上到喎。咁，我點解唔直接行落去﹖

衣度講既路程，其實仲未計我由屋企可能要DOU路先去到彩雲站，衣度又要加幾多分鐘 -- 而事實上，彩雲站係彩雲邨既外圍，你住另一邊又要行遠好多路先去到車站的。

咁唔講彩雲邨，就算你住再上小小既彩輝邨，你都唔會突登去搭衣個輕軌再轉車，情願行15分鐘落山，或者搭小巴啦，下麻。

至於上山，其實住近彩虹站既彩雲邨人，其實又係行路多；唔行路，而家一出地鐵站，就有幾架似專線小巴多個巴士既幾條線不停出現，搭2分鐘車就去到而家propose既彩雲站 -- 當然，有幾條巴士線係去西貢科大，班阿毛遲d冇得長車短搭架啦。

咁結論係，個彩雲站其實又係廢的 --落山唔會搭佢。我上山既話，我出地鐵要行3分鐘上山先去到彩虹東站，咁我一係行多幾分鐘返屋企，一係就搭巴士上山啦。

**********************

上面講既，係好走線好地區為本既問題，太過micro，要講大把野可以講，不過就無謂，所以唔講啦。

你只要記住，佢兩邊既站，其實都係無謂就得，成條線只係for山上面即係順天秀茂坪安達臣既人 -- 對兩邊站既居民黎講，佢地冇幾可會上山，所以對佢地黎講，條輕軌唯一用途，可能就好似政府咁講，可能係比你搭輕軌方便你去聯合醫院。

又不過，好攪笑既係，彩雲邨係屬於黃大仙區，係屬於醫管局九龍中聯網﹕即係，你自己睇盧寵物講，九龍中聯網係唔包括聯合醫院的，就算係所謂聯合醫院急症室有幾會服務埋黃大仙，不過其他康服好多野都係九龍中聯網攪掂，唔會去聯合醫院的 -- 你去得聯合，佢既服康跟進就係將軍澳醫院攪，你話彩雲既人會唔會山長水遠咁去將軍澳﹖

衣個所謂方便去聯合醫院，都係比秀茂坪順天個批本身好方便去聯合既人用，或者係遠小小藍田油塘個邊，先有D用。

*********************

講返正題。

係，而家先入正題。

成條東九龍線，而家未招標都知用輕軌，用高架路攪架啦。你睇下面兩段智將係明報講既野，其實就係重點﹕

顏期望當局招標時加入條款，愈快建成、系統客量愈靈活的入標者應加分。他說，東九系統定位是便利沿線山上居民日後毋須再搭小巴接駁鐵路，如系統可按需要增減車卡調節客量，將有助梳理整個九東交通，按沿線居民數十萬人計，相信系統每班車至少可載200至800人。

工聯會九龍東立法會議員鄧家彪估計，系統不會採用架空電纜，以電池推動，其次採用膠輪，以增強爬坡能力。

為左清晰簡單易明方便快捷，用pt form講﹕

1. 點顏汶羽強調「系統可按需要增減車卡調節客量」﹖原因好簡單﹕非繁忙時間根本冇客冇需求。就算繁忙時間有客量，都係上繁 冇人上山，下繁都冇乜人落山。

1.2.見佢咁講，就知佢都驚非繁時間冇客，條線長遠蝕到扒街。咁佢以為增減車卡可以控制成本﹖上山係要電，不過最大成本其實點都係capital works，增減車卡對成本控制有幾大用呢﹖

2. 第二樣想講既係，佢話每班車可載200至800人，衣個係重點，因為你睇衣幾日新聞政府放風區議會文件，都冇講個系統載客量。

2.1.咁我搵資料，你睇又係民建聯既柯創盛咁講雲巴，你就 OOOOOO 曬個咀的﹕

他又稱，雲巴每卡車廂載客量為70人，且可增至8卡車或以上，充電40分鐘便可駕駛200公里，相信可便利東九龍市民出行。

2.2. 「雲巴每卡車廂載客量為70人」，我又用GOOGLE MAP度返彩虹東站同彩雲站沿新清水灣道既距離，係500米多小小。咁即係，係衣兩個站之間，可以擺到幾多卡車廂呢﹖你當雲巴係海洋公園纜車都好，上落客要幾多時間，要幾多車廂之間既安全距離﹖

2..3 再搵資料，雲巴坪山線官網話列車長度33.6米有4節，即係每節列車大約8米。再睇NOW同一般人都話，坪山線成條列車載客量係280人，即係每節載70人 (280人/4節)，MATCH 柯創盛個講法。

2.4. 咁你要MATCH到顏汶羽個講法，要每班車最高載客量800人黎計，即係800人/70人，亦即係要有11.35節車卡，我當12節車卡啦。咁12節車卡，再乘返每節大約8米，就要有96米長既列車。

2.4.好啦，知道個列車長度，就有樣攪笑野啦。你彩虹東站同彩雲站得個500米距離，再加埋兩個站既月台其實都佔地方，咁如果真係要放架96米既列車落去，兩個站既月台距離其實會係幾多呢﹖到時，係米我企係前一班車車尾，其實已經望到後一班車既車頭呢﹖

2.5.再者，如果真係要載800人，個月台起碼要100米之餘，咁佢全程高架軌道麻，咁係繁忙時間點樣安排月台出入口呢﹖你見地鐵係繁忙時間疏導到好多人，因為佢個月台夠長夠闊，比例上都多電梯，D人可以慢慢係月台排隊。咁雲巴既月台有幾大裝到幾多電梯幾多人呢﹖

2.6. 上面既數字好抽象，你用輕鐵做現實既例子就最簡單﹕衣度話輕鐵一卡載200人，兩卡即係一列車就載400人。咁衣度又話輕鐵一卡20米，兩卡即係40米。咁又，即係話，一列輕鐵係40米，載到400人。對比返雲巴既大約96米列車載800人，咁輕鐵其實都係差唔多，兩列輕鐵大約係80米載800人 -- 咁邏輯上，兩者都係輕軌，咁載客CAPACITY差唔多，都係應該啦。

2.7.咁，個結論係，如果要好似顏汶羽咁講，雲巴要每班車至少可載800人，即係要有兩列或者4卡輕鐵。

2.8.好啦，睇完之後，你就可以visualize個情況啦。你就算未搭過輕鐵，都知一列輕鐵有幾長，人流有幾多架呵﹖你要個月台企到咁多人，可以疏散到咁多人，究竟要幾大個月台呢﹖都係個句，輕鐵係地面，東九輕軌係高架喎。

2.9.再者，最最最重要既係，如果真係要載800人，不過疏導乘客又要時間。咁係繁忙時間，究竟整條東九輕軌既最高有效運力係幾多﹖你要清左前排列車，後面個班先可以開架麻﹗

3.咁所以，衣度又拉到去另一個重要問題啦。講多次，顏汶羽講既「相信系統每班車至少可載200至800人」其實好重要，因為佢講衣句野既前面一句，又係重要﹕「按沿線居民數十萬人計」。

3.1.即係咁，雲巴係輕軌，唔係重鐵。你講到每班車最多載800人，其實已經唔係雲巴既服務範疇。你再睇比亞迪自己講，其實佢都係咁講﹕

「雲巴」是一款純電推動的列車，用橡膠輪胎在專用高架軌道行駛，全程無人駕駛，但每趟列車都設有一名安全監督員，應付突發情況。每列列車最多載客量約560人，屬於「小運量」的軌道運輸系統。劉學亮表示，「雲巴」行車時相對寧靜，目前在深圳坪山區運行的路線亦相當成功。

3.2. 比亞迪自己都話雲巴個市場係「小運量」最多載560人。560同800，比例上差好遠喎﹗咁當然，就算你話將來東九龍輕軌唔係雲巴都好，或者可以載夠800人都好，不過究竟市場上有咩技術選擇，點樣可以刻服到我上面講既問題呢﹖

3.3.更加核心既問題係，上面講到800人載客量，其實係米滿足到觀塘山上面既繁忙時間需求﹖顏汶羽淨係講到，「沿線居民數十萬人計」，不過無論係佢或者政府咁耐以黎，都冇official講過估計實際需求係幾多，at least我點都搵唔到啦。

3.4.政府唔講，我好相信，係因為用輕軌根本就計唔掂數。你有心機，可以用人口普查條數睇入面既非本區工作人口黎估。而我都好肯定，政府攪個東九龍線顧問研究，以至運輸署睇巴士繁忙時間個數字，都一定知道整個東九龍山係早上繁忙時間既落山需求，不過就係唔同公眾講。

3.5.用個最懶既方法，當年鐵路發展策略2014係咁講﹕

這些發展項目完成後，預計安達臣道地區的人口，會在現時觀塘北山上地區約300000的人口之外，增加約73000人。

3.6.我估而家成個觀塘北上山地區唔止30萬+7.3萬。你當係40萬先算，只要繁忙時間有一成落山需求，都有4萬人 -- 而一成肯定係小既，因為除左工作人口外，亦都有好多學生。

3.7. 咁我當最繁忙時間即係返學7點到8點，點都有2萬以上需求，咁係個一個鐘頭，究竟要有幾多列輕軌呢﹖每列輕軌載800人，即係要有25班列車；我又再當個需求或者出行需求係平均地雙向，分別去彩虹同油塘，即係於最繁忙既一個鐘頭內，每個方向要有12.5班列車，先可以滿足個2萬個乘客需求。

3.8.你再將60分鐘除12.5班列車，即係5分鐘一班列車﹖個咁既輕軌月台，真係可以有地鐵一樣既效率﹖

3.9.再者，我講多次呀下﹕40萬人口，得一成人口，即係4萬人係上午繁忙時間要落山，係嚴重低估既數字。如果將個數加一倍去到兩成，就條輕軌點都計唔掂數 -- 不過，一個家庭，淨係計工作同返學人口，又點只兩成出行需求﹖

3.10.同埋，個輕軌冇可能可以一列車載到800人架下，除非佢D車站係好似港鐵咁大，即係重鐵既規模。衣個，就係我上面2.9講既，整條東九輕軌最高有效運力既問題。

4.當然，個4萬需求係亂估，亦都估唔到有幾多人死都唔搭輕軌要搭巴士 -- 順天搭巴士直出旺角尖沙咀，係驚塞車囉，不過一定方便個輕軌，甚至會快過輕軌添。不過，如果輕軌真係咩「小運量」，咁對於成個觀塘山既交通有咩幫助﹖

4.1.而更加攪笑既係，佢非繁忙時間係冇乜客，不過佢點都有D客。例如，D 海岸線買完送飲完茶返上秀茂坪，都可能會搭輕軌而棄巴士小巴。

4.2.咁衣度，就係我係好開頭講既，「反而，輕軌入左藍田之後，就會有更下家產既野，陣間會講」。

4.3.即係，而家有好多小巴甚至巴士，其實係吊住條命，主要靠繁忙時間賺錢補貼非繁忙時間。而家有輕軌，你估咁優秀既巴士公司會點做呢﹖小巴圍唔到數，係加價定唔玩呢﹖

4.4.你而家睇下去順天秀茂坪個D巴士咩27呀1A呀，有左輕軌之後點都有D影響，到時CUT佢老尾班次都好喎﹗越CUT就越小人搭，到時起碼旺角道唔洗咁多人排27號巴士阻住條路。

4.5.當然，我勉強都可以話，橫掂都係蝕錢客量小左，巴士小巴比重鐵攪死都甘心命抵。不過，如果真係比輕軌攪死，就真係攪笑。

4.6.個情況等同，馬鐵其實係廢廢地架 -- 特別係對於沙田河東乙明沙角個D黎講，真係雞肋。不過，有左佢之後，成個沙田好多巴士已有藉口，被CUT鳥。

***********

最後，講幾句唔係題外話。

政府公佈個輕軌消息時，話要係馬油塘整個車廠同埋住宅用地發展，去減輕個輕軌財務負擔。

先唔講佢送幾多地，到時又點放寬合資安排 (唔通比亞迪中標之後起樓咁攪笑﹖)，以至唔講塊地其實賣到咩樓價。想講既係，你係個輕軌沿線又擺多唔知幾多萬人落去，其實繁忙時間食得曬咁多人﹖馬油塘個位喎，秀茂坪寶達都應該落油塘架喎，到時馬油塘繁時真係上到車咩﹖個度真係冇條好小小既路，係靠你條輕軌架啦。

另一個攪笑既係，好多智將尊貴例如顏汶羽話，希望入標者預留日後將輕軌擴展至慈雲山既可行性喎。

其實佢知propose個彩虹東站係邊，慈雲山又係邊架呵﹖

上慈雲山既話正路道要經斧山道，同彩虹東站中間隔左個牛池灣。咁佢知唔知牛池灣村攪緊重建做公營房屋架呵﹖佢九唔搭八話預留去慈雲山，係米隨口UP下，到時好似啟德咁又係樓中間整條高架橋，咁呀﹖

你要扮認真，就應該要求政府係重建條村既時候PLAN埋所謂既接駁輕軌，甚至個輕軌站其實應該係條村入面而唔係而家個位 ，而唔好擺明係隨口UP囉。

而更加攪笑既係，而家佢話，延伸去慈雲山既話最擔心就係影響到龍翔道交通，就知佢係攪笑，唔記得牛池灣攪緊重建，甚至唔知彩虹東站個位係邊 -- 如果死都要駁去慈雲山，而彩虹東站又係PROPOSE個位既話，就緊係經牛池灣村或者平定道近斧山運動場個山頭劈過去斧山道架喇，點會又無啦啦出龍翔道咁攪笑呀﹗﹖

佢真係唔識隨口UP架喎。

(拿拿拿，講開又講，如果彩虹東站擺係牛池灣個位，同而家PROPOSED個彩雲站有段距離，就sensible好多。再者，擺個彩虹東站係牛池灣村，其實係再近d彩虹站，分分鐘可以兩個車站無縫連接，同埋大地方好多啦)

最後，最攪笑既係，班智將既尊貴話，政府保證左個輕軌工程唔會影響到現有新清水灣道同其他交通喎。真係，唔係咁都信麻﹖

*************

最後，衣個POST最開頭張相，係去郵輪碼頭時影的。你睇，興建左個空中花園之後，要再係上面整多個啟德單軌列車，就真係何期壯觀。

遲下所謂既東九龍輕軌，都會係一樣。

***************

結論係，其實我又過於認真。

衣個項目，擺明係政積工程，同埋送錢。日後營運蝕幾多，又或者起完之後其實有幾大作用呢，就是但啦。

***************

真係最後，補多句。

人老痴呆，醒起好多年前，田北辰提過要拆Q左個輕鐵。睇報導，當時田北辰咁講﹕

輕鐵只適合通車初期，現時屯門、元朗人口大幅增加，輕鐵每日50萬人次使用，但無專用系統，要與汽車及行人爭路，屬全世界罕見，他指現時輕鐵月台在繁忙時間非常擠迫，但輕鐵又不能擴充，是埋下計時炸彈。

將來東九輕軌係有專用系統，唔需要「與汽車及行人爭路」。不過，輕軌個月台會係點，佢唔擴充個運量都預計到係點，就已經諗起都攪笑。

原來，講到尾，真係用返輕鐵做例子，就知東九輕軌點解雞肋味濃鳥。

***************

完。