離地到上太空 (2)

真係攪佢唔掂，頂佢唔順。

同盧寵物一樣，佢都一樣真係離地到上太空。

佢早兩日講話，入住簡約公屋，慳到租金，一年慳萬零蚊，咁入住既居民幾年後或者有機會夠首期買居屋。

講得出衣返說話，就知係離地，不食人間煙火。

咁所以，算數，睇完都唔打字。

不過，頭先做緊野，見到佢上面個篇講年青人點點點，就真係點都要打字。

**********

即係，先唔理年青人有冇錢買居屋，佢知唔知居屋分左綠白表﹖分完之後，又有咩implications既呢﹖有幾樣重要既implications。

***********

最重要既係，綠表既話，你比既首期只係5%，白表就要比10%。

用返佢新聞入面條數，白表要比既係「連同律師費共30多萬元」，仲未計裝修，當中最緊要既係拆曬房委會九唔搭八唔係人用既廚房設施。咁上面30萬再加埋裝修，你估買間居屋到入住，要幾多錢﹖

律師費同裝修費係謹局。所以，個5%首期，即係白表要比27萬，綠表要比13.5萬，其實就係差好遠。你買得越大單位，個分別就更加大。

所以，結論係，雖然個綠白表資產上限係唔同，白表係高好多。不過，個首期同樣都係高好多。而事實上，我都唔認為MEET到佢個二人資產上限既人，會有幾多走去買居屋囉。

所以，個5%既分別，對抽居屋既人黎講，其實係大既。

************

第二樣重要既係，綠白表比例究竟係點呢﹖以往好多年前，係我有記憶既時間啦，其實係7:3比，即係綠表7白表3。

係咁多年黎，又綠白表又白居二，攪到公屋聯會係2019年嘈過，都唔知佢嘈乜春話衣個7:3綠表比例過高。

去到2020年開始有變化，唔知點解攪到變左4:6比，綠係4白係6。個理由應該又係咩白表人士買唔起私樓呀，需求大呀，咁米白表比例多D囉。

不過，又好神奇既係，係上年施政報告，比家超又九唔搭八話，要將個綠白表變返做5:5比喎，應該又係D咩加快公屋流轉，希望公屋居民置業騰出單位比有需要人士之類。

而更加神奇既係，施政報告講完之後，衣幾轉居屋都仲係5:5比，阿房委會資助房屋小組主席黃碧如仲係度話未有調整個綠白表比例既時間表喎。

ANYWAY，上面簡單自己GOOGLE CONFIRM完再講返個綠白表比例歷史，係想話比你聽，以往年青人排公屋，有時唔係為左上公屋，或者上公屋只係個Bonus或者保險，主要係為左個綠表資格。

即係，你入住到公屋，就有綠表資格去抽居屋。又再者，你兩條友排幾年隊，過左資格審查，不過未上到樓，其實都可以扲份綠表資格證明書去抽公屋。

所以，當何永賢講緊，年青人唔好輪公屋啦，而家大把居屋供應，咁佢其實知唔知輪公屋，其實就係個保險，起碼有間屋訓覺之餘，仲可以等時間抽居屋 -- 用白表定綠表都好，你估咁易抽到架，要抽中仲要合心水既，要等幾年呀﹖

而吊詭既係，當佢講話而家居屋供應多左啦，年青人唔好排公屋啦，不過阿特首又話將個白表比例CUT左佢喎，咁係米又鼓勵返人排返公屋，用綠表條隊增加抽居屋機會呢﹖

****************

所以，何永賢真係好吊詭架。

每次都見佢笑笑口懶係親民咁講房屋政策，講咩要提升公屋居民幸福感，你就要明，一個住半山，咁多年都係技術官僚既人，其實點解要作賤自己，做D咁既官呢﹖

至於佢離唔離地，其實都唔洗問啦，下麻。

又再至於佢熟唔熟房屋政策，同埋佢做既野有咩implications，咁我又會話，佢同  盧寵物唔明點解有人半夜三更傷風感冒排門診  一樣，佢可能真係唔熟政策，亦都唔明好多政策會有咩效果，所以就算個政策隻隻字都識，不過就係唔明點解結果會係咁囉。

*****************

題外話。

係抽佢水架啦，反正HK01都抽佢水。

睇佢講簡約公屋個POST，佢內文就話﹕

她指，女童一家四口的單位月租1600元，簡約公屋有助他們一家節省每月數千元的租金，一年便可儲到幾萬元。

之後HK01抽佢水，就HIGHLIGHT quote佢話﹕

儲得三、四年有廿幾萬，足夠畀居屋首期，一步就人生目標再提高啲。

咁真係，一年儲幾萬，三、四年又點有廿幾萬呀﹗唔通佢想話，住簡單公屋班友，本身就有幾廿萬，之後每年儲幾萬，所以幾年後就有廿幾萬首期呀﹖

佢唔只離地，做左咁多年建築師，數學都仲唔多掂添。

*****************

完。