******
早兩年外媒就話衣個債務比率好高，咁九唔搭八既渾水都寫過下外媒點樣計錯數，話唔應該將外匯基金票據之類當做債務。
不過，求其SEARCH，衣個九唔搭八既CEIC唔知係乜黎，不過都仲講緊個債務比率係超過4成，咁就繼續九唔搭八啦。
******
咁好啦，LOCAL既智將又會點講呢﹖
除左工聯會，個個禮拜都出黎攪笑既 尊貴洪雯就話，香港政府當前債務佔GDP比率僅約11%，咁衣個數都常見，不過又唔知係邊度走出黎。
咁佢個數點得出黎呢﹖大致都係咁樣﹕2024年香港GDP大約係30,000億多小小，再加上政府發左仲未到期既債券大約4千億左右，咁所以around10%係差不多的。
當然，你見我上面最尾個段冇quote source，係因為2024年GDP未正式公佈，而政府仲有幾多未到期債券係手，我亦都冇搵 -- 我用另一個方法搵左，陣間再講喇 -- 所以你可以assume波叔講既9.3%係正確，in a sense啦。
********
所以，就咁睇，坊間講政府債務有幾多，好似就全部都同官方有出入呀麻﹖
咁亦所以，我地都以波叔為準。
又不過，其實，波叔講既，都只係某角度係正確。
*********
我又最簡單，扲返我最鐘意既政府帳目按應計制present出黎，睇下政府有幾多負債丫拿。
*********
我之前幾個post係度quote過既個份帳目，係2023年；今次QUOTE衣份係2024年，係最updated的鳥。
你睇衣份帳目，佢係個資產負債表入面有個負債，個圖如下﹕
衣幅圖話你知，嗯，按應計制，政府而家既債務係14,875億。如果除返3萬億GDP，即係個債務比率係49.5%。
我地再睇返衣個負債ITEM入面，個3樣野係咩黎﹕
第一樣係FOOTNOTE 24，係退休金準備，即係舊制下長俸既退休金預計總開支，咁籍單易明，我唔CAP圖。
第二個係FOOTNOTE 25，係政府發行債券，咁我上面話政府係2024年底未到期債券大約係4千億，其實係度搵出黎。
第三個係FOOTNOTE 26，係其他負責，即係比公務員既福利同其他細項野喇。
咁下面我CAP返FOOTNOTE 25同26出黎。
咁好喇，公道咁講，就好似我之前所講，我地既然用現金制睇政府盤數，咁公務員退休金準備同其他福利個D細項，就唔計落政府負債。
如果係咁，就應該好似波叔或者坊間咁講，我地睇政府負債，就應該主要只係睇政府發行左幾多債券。
又之但係，最吊鬼既係，其實就算係波叔每年PRESENT既財政預算案入面，其中附錄入面個中期預測裡頭，其實又有同你講返公務員退休金係無撥備負債架喎，你睇下下面CAP圖既FOOTNOTE17﹗
而再睇埋下面CAP圖既FOOTNOTE18，佢竟然又會同你講我幾個POST之前不停講既基本工程承擔額喎﹗佢係上年預算案，話個承擔額係6323.68億。
又講開，我之前話，2023年份應計制帳目入面，個基本工程儲備金個承擔額係8千億多D。今年個數已經跳到去9,554億喇，同立法會每年批既1千億差不多 -- 當然，入面有咩機器設備非經常資助金，所以同預算案FOOTNOTE18個數，又會有千零億分別。
ANYWAY，下面幅圖係應計制個承擔額最新數字。
**********
好啦，聰明既你，睇完之後，都應該知我想講咩啦。
即係，當波叔或者好多人話，香港政府既負債只係計發行左既債券同相關利息開支既時候，咁係財政預算案入面講到明係既「政府主要的無撥備負債」下面既「法定退休金承擔額現值」究竟應唔應該算做負債﹖
個度係有1萬億喎﹗
係呀，係現金制之下係唔撥佢老尾個備，咁可以唔當負債。又之但係，你係預算案又要咁形容佢做「政府主要的無撥備負債」喎。
另外，個9千億基本工程儲備金加埋咩設備資助金，其實都係類似既CONCEPT，係政府COMMIT左出黎既承擔額，即係已經或者將會差落黎既街數，咁又算唔算負債呢﹖
都係我之前個句 -- 如果每年個非經常收入，即係賣地開支可以COVER到衣筆非經常性開支，咁你可以唔當衣筆數係問題 -- 雖然佢本質上都係負債啦，特別係佢預算案又講到明，「基本工程尚未支付的承擔額分別為6,139.46 億元及6,323.68 億元，當中部分為合約承擔額」。
咁，衣D未支付既費用點可以唔當係負債呀﹖
**************
咁所以，就算我成日都好心咁話，我地唔應該用應計制盤數去COMMENT現金制盤數。
又之但係，波叔係自己用現金制盤數都PRESENT左衣兩筆無撥備或者係承擔左既大數，咁當你討論香港政府債務佔GDP時，又點可以唔睇埋衣兩條數。
又當然，如果加埋衣兩條數落去 -- 就算唔一次過將兩條數加埋成2萬億打落去債務而係將佢分做SAY10年 -- 咁條數都係好甘，咁就一定唔止波叔講既9.3%負債比率。
***************
又再當然，你唔將衣兩條數打埋落去，其實又係不可能的。
事實上，你見波叔話要發債去做北都去做基建，話未來幾年係基建高峰所以要靠發債，其實米即係將會擺返個9千億既基建承擔額落去佢盤數囉。
不過，波叔極有可能擺條數落去個帳目既方法係，未來幾年每年發債千零億咁樣，令到盤數好好睇睇。
又之但係，政府其實會點樣發咩債﹖
咁衣個就攪笑喇。就算我用上年預算案條數，係2024年「基本工程尚未支付的承擔額」都仲有6,323.68 億元，咁個發債上限5千億可以COVER到咩﹖我仲未計，今年立法會又多左1千億基本工程儲備金加咩設備資助金喎。
阿波叔唔係諗住，未來幾年賣地或者經常性收入即係稅收好勁，咁淨係發5千億債都可以攪掂個1萬億基本工程麻﹖定真係諗住唔知點樣「配對式債券」，發左北都債喇，發展商買左喇，之後發展商會填埋北都既部份工程幫政府出埋錢，EVEN係個筆錢係立法會批左出黎既政府承擔額﹖
衣個世界係痴線，不過唔會痴線到咁麻 -- 你同新世界講，佢會同你講自己公司盤數都唔知要填幾耐呀。
***************
咁所以，而家好多人話，政府可以提高個債務上限，阿波叔都九唔搭八將香港同其他地方比較，話香港政府債務有上升空間。
咁好啦，你話究竟香港要發幾多債丫拿﹖
上面講既，都只係講緊基本工程儲備金個部份，仲有公務員退休金個部份未有人講架。
****************
又再當然，波叔將香港同其他地方比較，就攪笑喇。
我已經唔講，波叔話要發長債喎。美國10年期國庫債券而家息口係點話﹖
我淨係要講，香港係行聯繫匯率架，咁已經小你老尾，唔好講其他野喇。
****************
至於上面條LINK阿麥萃才又出黎講，話「政府債務比率僅約9.3%，相比經合組織大部分成員國介乎50%至80%，美國逾1.2倍，日本超出2倍，香港作為已發展經濟體的債務水平超低，相信把比率提高至20%以下也沒有潛在問題」，咁我當政府將個比率提高到20%，咁即係發幾多債﹖
3萬億GDP既20%，即係6千億，咁米即係上年通過左發債上限既5000億多小小囉。
就算我當香港GDP未來幾年繼續每年增長個2%咁大把，個20% GDP可以去到幾多，幾時先可以COVER基本工程儲備金呢﹖
*****************
結論都係，由上年到而家，D友不停講咩公務員減薪，講咩2蚊車改革完之後每年可以慳幾十億，其實就係弱智，或者係政治操作，轉而下你既視線。
最大盤數，始終係基建度。
就算好多人講咩公務員改革，其實有多少係多餘。
*****************
見講開又講，講多句。
林少陽衣排又參隻腳講香港政府財赤，佢開頭講得正確，政府開支特別係基建係不合理增加，不過佢之後講咩公務員薪金同增薪點又係錯錯地。
即係，謝偉銓衣排都成日講要改革公務員增薪點制度架，不過佢自己寫文，都話原來有4成公務員已經到左頂薪。咁你講話咩檢討增薪點制度，又可以慳幾多呢﹖
跟手葉劉又話，AO入職已經有6萬蚊人工唔合理，不過政府個首長薪級表去到第49點即係D8，都係33萬人工唔夠 -- 如果要講合唔合理，33萬月薪即係年薪396萬，咁你求其睇阿旅發局總幹事7百萬年薪又係乜﹖
再者，就算而家有好差多個政策局，但有幾多個首長級D8甚至D6呢﹖
又再講，阿謝偉銓講咩改革公務員制度，你問返佢政府有幾多總工程師﹖唔係總工程師都未到首長級，一般薪級表唔講最高個幾級，做到高級工程師，最多都係十萬多小小，咁同出面好境個時點比較 -- 已經未計前幾年出幾多花紅﹖
當然，有D部門唔係專業職系既話，個頂薪真係同市場脫節，例如食環呀郵政呀民政呀甚至淨係識攪破壞既運輸署之類。又之但係，個度有幾大條數，要討論咁多呢﹖
如果你點都話公務員薪級表要調整既話，最應該調整既就只有某個部門，不過冇人夠膽講喎。係邊個部門，你自己睇下政府咁多個薪級表入面，邊幾個同一類別係最離譜丫拿。
*****************
又再當然，你話香港公務員制度特別係薪級表會唔會改﹖最尾都係會改，衣個係地心吸力既問題。
即係，當成個經濟包括埋商界都死左既時候，商界個PREMIUM就已經唔存在，咁所有法定機構以至高級公務員都唔再需要比衣個PREMIUM出黎。
又用返旅發局做例子，冇咩人會記得阿總幹事上任之前做乜。佢上任前，係國泰做高層，做過恆隆董事。衣D人，冇7百萬年薪係唔會加入法定機構。
所以，要等地心吸引，到時公務員制度先會改。
如果而家因為所謂既財赤而去改，就只會加速地心吸力 -- 當然，你而家要改，咁上面薪級表入面最物有所值個班，一定會第一時間衝出黎囉。
你睇，之前信報講左兩句消息人士，話財赤下要CUT佢地BUDGET，講唔夠一日都要即刻跪低呀。
咁你就明，公務員制度係唔會改架喇 -- 又事實上，都係我一路以黎個句，係個就黎1萬億既基本工程開支入面，你將政府任何洗費同工程開支相比，之後話要減工程以外既開支去填數，其實都係攪笑。
******************
完。
沒有留言:
發佈留言