政策力的急速衰退 (二)

衣排海洋公園好HIT，連王慧麟都寫左篇文，講「政策力的急速衰退」。

我認同海洋公園可以講，但大部份講既人都唔識講。

******
擒日立法會講海洋公園，最多人報導既係葉劉同譚文豪。

葉劉就話，海洋公園面對周邊競爭，注定係fail business；譚文豪就話，大樹灣項目已經超支，海洋公園所有資產都已經抵押左，所以仲邊有可能借錢還債。

其實，全部都係亂up。

*******
要評值唔值得注資海洋公園，其實係要睇盤數，背後要睇business model。

擒日有人問海洋公園仲淨返幾多現金，就知冇人睇過盤數。

而海洋公園總裁答話手持只有4億現金，報紙又大大隻字去報，我都唔知係佢報錯數定係update左定definition唔同。不過，根據2019年6月年結既年報 (footnote 9呀)，公園係有約5.4億3個月以下既存款；加埋超過3個月既定期，係有約11億。過左半年，公園會用左5億幾現金，但又一毫子都冇現金流入﹖

********
anyway，其實值唔值得注資海洋公園，係要睇盤數。

而政府冇係文件交代盤數 --無論係過去10年或者注資後既projection，都係冇盤數。衣個，先係份文件最大問題。

睇海洋公園盤數，個個都識講，公園係2014年盛智文走左之後，年年虧蝕。

衣個係事實，公園係2016開始蝕。但，都係廢話。

再詳細睇盤數，公園到2018/19年都有經營利潤。但問題係，2016年之後折舊升到3億甚至4億，再加埋財務費用，公園先要蝕錢。

衣個就係問題。

**********
海洋公園同迪士尼同所有主題公園一樣，你擺成百億落去翻新，設施落成後，就緊係好似邱騰華咁講，人數會上升；但係，折舊都會升。

係2009年，海洋公園折舊費用係1.18億左右，去到2014年就已經3.43億，再去到2019年就係4.24億。

點解會升咁快﹖因為2005年用左50億做公園更新工程，設施影響係2009年開設入帳。

*************
你要有咁大投資，其實就要睇個return on investment頂唔頂得住，可唔可以cover折舊同其他成本。

強如香港迪士尼都唔可以，都因為巨額折舊而攪到近年要蝕  (其實有其他原因喇)，海洋公園又憑咩可以回本﹖

**************
再睇海洋公園細數，係2019年既門票收入，係佔總收入超過65%；餐飲收入只係收到大約3億，即係佔收入既17%，再除埋570萬入場人次即係每人用左52蚊。

每個入場旅客淨係用左52蚊係餐飲，你係迪士尼樂園買杯野飲都唔止喇 (其實我未去過迪士尼....係亂吹)。

所以，海洋公園擴建後係多左餐廳，但文件根本冇講，公園憑咩會增加收入。

再者，迪士尼有咁多ip，賣咁多周邊商品，你海洋公園仲要賣威威司令公仔呀﹖

***************
當然，我同意王慧麟所講，一份好既政策文件係要有佢講既策略定位。但係，上面好直接既財務數據同business model，其實係要有。

但係，上次迪士尼冇，今次都冇。因為，大部份議員都唔識問囉。除左建制，泛民又好好﹖

****************
最後，王慧麟講管治衰落。

我同意。

不過，衰落既原因除左求其，仲可能有個人質素。

當然，更加大問題既係，而家公務員要忠於行政長官麻。

中西區區議會唔撐警，就黑警同民政署作為區議會秘書處都可以走人。

劉細良話，衣個係公務員幹部化。

其實，一早都係，由dq時已經公告左天下。不過因為而家整個政府要撐警，所以就成個政府都變左幹部。

當然，衰d講，衣個係另類社會評分制，你撐警就高d分，多d service咁囉。

********************
所以，政治衰落，係整個制度既衰落。

********************
真係最後，點解我會打衣篇野出黎﹖

因為，其實我真係想講海洋公園。大部份講海洋公園既人，都係唔識囉。

完