所謂的管治藝術 (6)

好耐之前係度講 雙雄啟示，其實我唔係想講「長官意志，AO治港」。我想講既係，所謂既管治藝術。

之前想講好耐，不過唔記得左。之但係，見到衣個系列第(1)個篇文，係度講 美國財長背心 同 盧比奧，就令我醒起返衣樣野。

**********
先講結論﹕所謂既管治，其實係需要有技術，亦都要有好長既經驗累積。除此之外，仲要有個制度整合，先可以做到有效管治。

而不過，而家個制度要既核心唔係有效管治去推政策，個制度本身亦都鼓勵所有人做RENT SEEKER，即係扼錢。

所以，結論係，所有野攪到成PAT屎咁，係必然。

係米廢話呢﹖

呵。

***********

所以，原本打左好多字，不過都係唔好長話長說啦。

講兩句抽水算啦。

***********

阿副司長卓永興話，「有客觀數據顯示」，「旅客到港過夜個時間並未變少」，其實就係九唔搭八。事關﹕

1.係麥當勞訓覺都係過夜。咁就算真係「旅客到港夜時間並未變少」，又代表咩呢﹖同「市民不應憑一兩個畫面就認為旅客不消費」，個關係又點呢﹖

2.所以，明報殺曬所有介事去搵旅發局數據，去求證阿副司長講既野係米正確--仲要只係求證過夜旅客數目，而唔去睇埋個平均消費 -- 就無謂；

3.1.而當你又好似明報咁去旅發局到搵旅客既「客觀數據」，其實又係攪笑。你可以CLICK衣度睇旅發局個網係點整合旅遊數據 -- 冇錯，佢個網竟然係得2025年既數據；佢叫你去個旅遊網搵咩數據，原來又係得過去12個月既數據；

3.2.我記得以前旅發局個網係齊數據，不過，ANYWAY，冇所謂，你都可以係其他門路搵數據。例如，統計署再GEN返旅發局季刊個數據出黎，話比你聽近幾年過夜客同不過夜客個消費情況。我GEN完CAP埋圖，個「客觀數據」如下﹕

3.2.1.幅圖睇到幾樣野﹕

3.2.1a. 第一樣係，COVID幾年冇旅客黎我就索性冇統計，幾仆街呢 -- 不過佢冇統計個平均消費，但係其實有統計個幾年既旅客數目架下；

3.2.1b, 第二樣係，中國內地個欄，無論係過夜或者不過夜旅客個欄，即係個平均消費，係2024年都跌左，小過2023年；

3.3.所以，你睇衣個表，再對比返阿副司長講既野，其實都唔知佢up乜。個「客觀數據」就係，內地旅客個人均消費係小左囉。咁佢話，「市民不應憑一兩個畫面就認為旅客不消費」，其實即係咩呢﹖

3.4.當然，平均消費小左都係有消費，並非「旅客不消費」。不過，佢既意思係咩呢﹖

4. 拿，唔係題外話。我特別想講衣野，係想話，唔止申訴專員，咁優秀既旅發局其實都係做緊類似既野。你要搵數據，佢會叫你去個旅遊網入面搵；

4.1.你去個旅遊網入面搵，佢就同你講個 旅客入境消費季刊 係要比錢去買，又或者可以網上免費閱讀 -- 不過佢個網要登記，登記個頁仲寫埋「歡迎蒞臨「旅業網」，本網站專為旅遊專業人員而設，以協助互相交流，發展業務」 -- 咁所以我都唔登記廢事理佢；

4.2.當然，你可以去統計署、立法會慢慢搵旅客資料。不過，而家攪到咁麻煩，你都知咩事啦﹖

5.其實唔止申訴專員或者旅發局。其實，好多局呀署呀，好多數據研究都冇左。

5.1.頭先一睇，我致愛既規劃署，其實好多「已完成研究」都收左皮 -- 你見我係講市建局個post入面講既 九龍城市區更新計劃規劃研究，係可以google返係規劃署到搵出黎，不過你上佢網就唔會搵到的。

5.2.佢係個網叫你「如需要索取上表沒有列出的研究，請聯絡我們」，就真係劃龍點曬d精添﹗佢連index都冇，你唔知有份咁既野，又點索取呢 -- 所以，死左知道有衣份野個批人，或者知道有份野不過老人痴呆之後 (即係在下，我，就黎痴呆架啦)，就冇人會記得規劃署同市建局係某時某刻做過乜，咁就咩問題都唔存在的鳥。

6. 所以，係香港，講管治，真係攪笑。

7. 亦所以，點解咁多資料唔會係網上出現 -- 衣個，米又係管治問題囉。

*********

當然，抽多獲水。

前排阿家超去左阿聯酋講咩成果，講咩成功爭取30日免簽證入境。佢講完之後，就好多人話，其實而家入境都唔洗簽證。

咁你睇貿發局，其實係咁講﹕

阿拉伯聯合酋長國駐港總領事館阿拉伯聯合酋長國駐港總領事館於2024年1月22日發出以下通告：

1. 香港特區護照持有人：抵達阿拉伯聯合酋長國時免費獲發30天旅客簽證。入境檢查時，會直接在護照蓋上旅客簽證。

2. 香港簽證身份書持有人：阿拉伯聯合酋長國不承認香港簽證身份書為旅遊證件

3. 政府官員出訪阿拉伯聯合酋長國的簽證申請將個別處理。

well，即係，而家特首爭取到免簽真係好方便喎﹗不過，之前個落地簽證，其實就係入境時會直接幫你 吸個引就入得境 -- 而家個免簽，係做小左一個步驟囉。

咁樣都可以係成果﹖

係，可以係成果。你睇返阿拉伯工商協會主席希偉政個訪問，當佢講到下面段說話，你就明點解家超要特別講衣個成果﹕

他認為最重要是從經驗中汲取教訓，不重蹈覆轍，倡政府停止諮詢「錯誤的人」，讓協會等熟悉伊斯蘭金融的持份者參與，從國際角度而非本地人或機構重塑政策。

唔解啦，你唔係咁都唔明麻﹖

***************

題外話﹕

上面統計署除左有公佈旅客平均消費之餘，其實仲有個統計表講唔同旅客來源地，入面有中東來港旅客數目，我又cap埋出黎先﹕

well，睇個表就真係潛力無限呀﹗香港繼續力谷中東旅客，的士司機努力學阿拉伯文啦﹗

*****************

完。