歸來吧﹗抗生素戰士﹗

我講既係我。

食左兩個禮拜抗生素，竟然都唔死得。

*****
anyway，特別開post打字，係因為邵家臻。

我一向都唔係死者為大個類人，對公眾人物就要更加要特別公允。所以，我會咁講﹕

．有睇衣度既，都會知我對佢早年開始走紅，即係大約2010年再之後打後既評價，就係，佢既才智能力唔配合佢做人態度。簡單講，即係自視過高。

．去到佢做立法會議員，唔知係米佢終於見識到更多，又或者係老左一節，所以反而係冇左個種無理頭既傲氣。當然，佢係立法會議員既崗位上，對業界對界別對社會，其實又真係唔太多發揮，或者冇令人記得既地方。

．當然，而佢入獄，之後留係香港，攪埋石牆花，就更加令人respect。即係，好多人會低調、會走，其實係一個合理、正常選擇。不過，佢係選舉留係度，繼續做野，仲要唔係收收埋埋去做野。衣樣，就應該respect喇。

．又再當然，其實佢係一個畸形時代既反映。無論係佢，黃碧雲，姚松炎，或者某程度上某些既公民黨人，其實係冇能力，或者係擁有既能力其實唔適合去攪政治。如果唔係衣個畸形既大環境，衣班人繼續係象牙塔或者專業入面，其實成個人生都會唔同，亦都會係更加適合佢地。

．anyway，佢由確診到咁快走，都未嘗唔係好事。食唔到講唔到訓唔到，係好痛苦的。

*******

講其他野。

*******

花墟重建城規申訴會，主流傳媒都冇乜報，衣個下家產明報更加只係即時新聞講兩句，每日明報係冇出的。

咁集誌社又有個最詳盡既報導。

報導入面問，點解太子大廈維修完兩年就要重建，市建局就係策略性位置所以一定要重建喎 -- 究竟市建知唔知自己講乜，佢既mission係乜，佢以後仲叫人做定維修保養既時候會唔會面紅丫拿。

報導入面又有人問，點解做完維修得64年既太子大廈就要重建，不過75年樓既唐樓就要單枝並冇包括入重建圍，市建局就話想「保留返d白位」比私人發展商去做喎 -- 咁你唔係一路都講單棟樓重建冇規劃效益，唔係講話咩要街道整合既咩﹖

一個花墟項目，就見到市建局係阿韋志成或者最近衣幾屆政府之後，市建局係幾咁仆街的 -- 你話以往重建長沙灣觀塘既時候，阿朱凱迪個班人不停媽差市建局，不過當時做出黎既，真係合理好多，唔會為左「策略性位置」就九唔搭八去收購。

你睇而家成個長沙灣青山道，當年朱凱迪好多人反對，重建左之後，其實係好好多的。

**********

又要講財政預算案。

唔洗睇羅兵咸喇，衣度早個月已經話比你聽，下個月公佈財政預算案既時候，儲備只會淨返政府開支10個月鳥。

不過，近排好多人講財赤，我又真係忍唔住要講多幾句。

***********

最想講既係，擒日又見到管浩嗚出黎講兩蚊乘車優惠，佢竟然話，倡乘車優惠調回65歲 管浩鳴:沒理由補貼有工作人士。

用佢既邏輯，政府係米要即時除消個在職家庭津貼計劃呀﹖

黎緊政府又話要講咩銀髮經濟，仲講到咩鼓勵65歲以下長者都仲有工作能力「要加強職業配對工作」，咁班友到時又洗唔洗精神分裂，或者要老人痴呆突然康復，醒起兩蚊車調低到60歲既其中一個理由係鼓勵長者就業丫拿﹖

作為局長既羅致光當年係咁講架，個邏輯都冇錯架，咁遲下卓永興講鼓勵長者就業，到時係米要將兩蚊計劃改返去65歲，不過又要開個政府常額職位去督導鼓勵就業，之後又要比返幾千萬去做研究丫拿﹖

當然，點解我特別想講阿管浩嗚衣個quote﹖

事關，佢做社聯主席，真係香港社福界之恥。佢做社聯主席，等同香港LGBT界別搵何君堯做代言人，工權會搵張宇仁做名譽主席一樣，點會搵個完全唔認同界別理念既人做主席﹖

而我係打衣篇字之前，仲特登搵埋社聯係點選主席。你睇佢個章程第39同40條，個主席係機構互選，你班所謂社福界選隻狗出黎都好過選管浩嗚下麻﹖

佢以後再講話咩急症室收費要收回成本，生果金唔好出雙糧，甚至要開衣個累退式既消費稅，咁係米社聯立場呀﹖

***********

再講多個人。

所謂既立法會議員洪雯又係明報九唔搭八，寫左兩篇文 一、二 去講香港政府財赤。佢兩篇文都唔洗睇架，不過佢下面第一篇文頭個段，就真係好難聽﹕

為立法會議員，為納稅人守好「錢包」，保障香港公共財政的可持續性，避免把沉重負擔壓在下一代人的肩上，並令資源用得其所，推動向上的階層流動，是我份內的責任。有些話縱然不好聽，但總得有人說出來。

佢係篇文入面，講左好多財赤既原因，例如咩支出快過增長呀，其實即係阿媽等於女人。

咁既然講左咁多阿媽都係女人既野，咁你又要「為納稅人守好錢包」，咁你係過去幾年係立法會財委會批左幾多九唔搭八既工程或者人事編制申請﹖

再者，香港財赤比我預計再早左出現，仲有個好簡單既原因﹕陳茂波冇理頭派錢。

即係咁，唔駛CHECK返舊POST，我都肯定自己係度估2022/23年既預算案時，我係講過，陳茂波應該唔會再派錢。事關，當時波叔係2021/22年派完錢既時候，財政儲蓄得返8千億，再派就真係食屎。

咁好喇，政府係之後竟然再派多兩次錢。懶，唔自己搵，咁你自己睇HK01衣個表，波叔係2022/23同23/24再派多兩次錢，個度用左1000億。

邊個要保守納稅人錢包話﹖你唔係金魚腦既話都應該記得，係復常後派錢，當時真係弱智既都識講，派錢係要黎去旅行，當時根本冇人信派錢會刺激乜春本地經濟 -- 而23/24年個財政儲備，係8千億都唔夠，邊有可能仲去派錢，仲要派成3百幾億架。

洪雯話要同納稅人守好錢包，管浩嗎就話要急症室公共服務收回成本，你要水費各項收費加幾多，再用幾多年先收返個兩年派左既1千億呀﹖

**************

洪雯出完黎，跟手擒日港大所謂既經管學院又出黎整左個攪笑既咩香港經濟政策綠皮書。

我冇睇佢個綠皮書，因為只要睇佢點回記者，就知佢出黎係攪笑。佢最好笑個句係下面﹕

金融學副教授劉洋分析，儲備仍遠高於2004年的水平，又指香港出現的是結構性赤字，與經濟週期性不景氣關係較低，故此不用太悲觀

2004年政府開支係幾多呀，請問﹖

我搵埋比你﹕2004/05既經營支出係2,122億，非經營開支係534，加埋即係2,656億。當年儲備係特於政府開支10個月，不過當時支出特別係基建支出細，要拖要減唔係難事；係收入面，當時經過沙士都衰到貼地，收入就算唔扭轉都唔會再跌。

阿副教授，你扲而家既情況同2004年比﹖我淨係要問，早幾年個1千億樓上賣地收入，幾時先可以有返一半﹖

當然，港大幾位人兄都有D真話。例如，佢夠膽死話財赤係結構性之餘，仲夠膽講話香港而家個REAL GDP仲未返到去2018年水平 -- 香港由治及興左架喇，李加超前排仲話香港住戶平均收入創左新高添。

吓﹗

**************

當然，無論係洪雯港大或者任何一個人講預算案，只要佢答唔到點樣彌補到或者解決到賣地收入個1000億缺口，咁你都唔駛再聽佢講任何野。

再睇返，近期最精彩亦都最值得討論既新聞，其實係甯漢豪下面個句，不過竟然冇人講。

明報即時新聞係咁講﹕

雖然賣地收益遠低於預期的約330億元，不過甯漢豪稱，近年經濟環境說明，政府不能夠純粹依賴地價收入支撐開支，而賣地收入是市場行為，政府不能為爭取賣地收入而定不符合市場狀况的地價。她又說，賣地收入雖然重要，但亦不是政府最高的收入來源，政府仍有薪俸稅及利得稅等收入，佔比都較賣地收入高。

「政府不能夠純粹依賴地價收入支撐開支」、「亦不是政府最高的收入來源」。

你話係米精彩﹖

我上個POST話，政府既經常開性﹖即係薪俸稅利得稅加印花稅，勉強可以頂住個6千幾億經常性開支 (我唔記得講既係，勉強頂得住仲要係因為近幾年改左個薪俸稅階、小左好多免稅額，改左差餉徵收方法，又多左好多罰款再加基金回撥呀下)。

不過，賣地既非經常收入就頂唔住每年1000億基建既非經常開支。

你而家竟然胎膽死講，賣地收入唔係政府最高收入來源，去justify賣唔出土地，跟手再講「政府不能夠純粹依賴地價收入支撐開支」﹖

我貼多次政府個中期預測出黎﹕

(題外話，睇上面個圖，政府近年既經營開支係6千幾億 -- 我上個post講話係7千億，擺明係我病到傻左，所以睇到新聞話政府開支係7千億我就照寫。anyway，唔影響我講既邏輯的。所以，我衣個post上面都改口，講返政府經營開支係6千億呢)

你睇上圖，以往政府做BUDGET一路都係兩盤帳即係經營同非經營帳睇送食飯。

(份圖見唔到既係，以往好景幾年，就真係太多錢，所以就要黎加下免稅額派雙糧甚至派錢，令到個儲備相對應返個所謂既合理政府開支月數。)

即係，好簡單，經營收入一向都係穩定增長，係可預見，所以當經營收入以至成個財政收入係2010年左右好返好多時，政府係由梁振英時代米開始攪好多低收入津貼之類，社福醫療既經營開支米不斷上升囉。同時間，當時賣地年年都過千億，咁非經常開支即係基建米有錢囉。

咁你而家突然講「政府不能夠純粹化依賴地價收入支撐開支」，咁近至衣兩年，你仲申請咁多基建撥款，咁其實你係想用邊忽收入去填數架呢﹖

再者，以後或者未來幾年睇財政預算案非經營帳目時，個非經營收入我全部當係得100億，衣個咁係米你既意思。

咁即係波叔下個月份BUDGET個非經營收入，我再見到好似上年咁估，未來幾年非經營收入有500億甚至800億既時候，我就要問究竟係佢錯定甯漢豪錯啦﹖

如果到時波叔真係話，非經營開支仍然有過千億，不過非經營收入得個100億既話，咁個非經營收入既deficit點填呢﹖

所以呢，甯漢豪講既野係好值得討論。不過，因為冇人用返政府財爺既角度去睇以往點制訂預算，所以冇人識得講。

************

當然，好耐之前我係度講過，我係估錯2019/20年既政府帳目，當時估佢已經要蝕近千億，不過最後只係蝕4百幾億。當時既原因係，好多基建合約批唔到出黎，最後非經營開支只係8百幾億，有興趣可以睇返當年個表。

最近阿波叔話，今年預算會小左，唔會過千億，其實又係用衣招。早排廢柴明報就難得有個好新聞，講政府近一年既延長招標CASE多左好多。

即係，你睇甯漢豪而家都放定風講明日大嶼收皮，又成日講基建要有先後綬急，就知政府係會放慢某些基建。

又之但係，都係個句，而家個8千億基建承擔額，其實大部份開左工唔可以停。咁如果「政府不能夠純粹依賴地價收入支撐開支」，咁衣8千億可以用咩去支撐呢，阿嬸。

你恰D唔識或者唔敢講既人就得JAK。又之但係，D錢係要找數架麻。

************

所以，都係個句，你見而家大部份人講政府BUDGET，例如上面港大經管同所謂既立法會議員之類，講咩做大個餅，減下兩蚊優惠，收回咩政府服務成本，甚至係CUT公務員人工醫療社福開支，就全部都係攪笑。

你攪掂個經營帳都好，個非經營帳每年千幾億，冇左賣地之後點死﹗陳茂波話而家每年基建1千億 (阿尊貴張欣宇講話每年9百億就肯定係錯，你自己望下個BUDGET喇)，

佢上年份BUDGET個中期預測仲更加估算未來幾年個基建開支每年去到1千3百億甚至1千4百億。而家話基建要先後緩急，咁即係點呀﹖

************

ANYWAY，黎緊下個月預算案，會非常之好睇 -- 特別係睇佢又點樣回撥唔同基金甚至外匯基金累計盈餘做靚條數，同埋個中期預測會點攪，都係好好笑。

最後，嗯，房委會加完租有錢賺喎。

所以，抵死架，之前米話囉，阿波叔自己扼自己，係2019年決定分幾年回撥房屋儲備金去整靚盤數，當時話房委會盤數絕對冇問題，最後攪到公屋要加租。

今年份預算案，又有咩可以撥起丫拿﹗

************

以往我打完POST都會睇一次有幾多錯字。不過，訓，唔睇喇。

************

完。