咁我想講既又冇人講，咁就寫兩句，由細講到大。
***********
其實仲有野講，都係我上個post講既問題。
*****
林世雄被炒，其實我當日佢上任我簡評新問責官員時，已經解釋左。
當時我話，佢幾十年黎既工程師training，一路都係技術官僚，又點可能做到局長﹖
之後係咩世紀暴雨既時候，我再評家超作風時，仲特登quote左林世雄個句經典，又係一個完美既預言，或者係完美既解釋﹕
當時，林世雄話，如果石澳道唔安全，就算特首要求開路，佢都唔會放行通車。當時我就話，行政長官係香港有超然既地位，佢咁講係完全政治唔正確。擒日，有線係回顧林世雄既時候，都特登quote返衣幕。
所以，林世雄表面既死因係，佢技術官僚出身，唔熟政策決策，亦都唔識同尊貴業界打交道。即係，阿阿家超講既，解說能力不足。
不過，佢實際既死因，其實係佢既技術官僚以至工程師身份 (做緊局長喇，仲講自己係工程師 -- 你見房屋局何詠賢有冇咁蠢丫，就算講都唔會拉埋特首講喇)，令到佢冇家超所謂既「有改革意識」、「認同施政理念」。
仲唔明我講咩﹖用個例子，就會講得白D。
我成日係度講，用技術部門角度黎睇，天文台係示範左咩叫做改革排頭兵，成個掛風球考慮同公佈方式，都真係劃曬所有時代，可以係十幾個鐘頭之前預告幾時掛8號波，仲可以一早預告幾時落波。
衣樣野，林世雄又點會做到﹖同樣係工程部專業部門出身，你睇陳帆出黎講野，就係另一端例子喇，所以陳帆米撈到政協囉。
你再唔明，可以睇埋發展局寗漢豪近幾年不停講要檢討工務工程既流程，要降低建築成本。咁我都仲相信甯漢豪同埋新聞入面講阿董事會主席 (衣世人兄係呀林世雄前老細，最終又係退休前做埋常秘呢)既integrity。又之但係，你話搵個唔識既人做局長，定搵個有專業資格既人做局長，會易d「改革」丫拿﹖
再講多句﹕黎緊有咁多工程，除左鄧家彪會同你講阿中東王子個fd間公司係啟德攪單軌就一定掂之外 ，北部都會區黎緊咁多大查飯 (﹗﹗﹗)，你話如果有個「冇改革意識」，成日同特首say no既人係度做運輸基建既局長的話喎，你估係米會阻住緊「改革」丫拿﹖
所以，林世雄被炒既意義，其實大過楊潤雄好多，不過一般人唔識唔留意，林世雄本身亦都冇咁juicy，所以先冇人講佢。
至於好多新聞講林世雄既甩碌事件，例如咩易通行計劃延遲，旅客元旦訓街，其實，衣幾壇野唔係運輸署事既咩﹖當時既署長係邊個﹖米係羅淑佩囉。
******
楊潤雄被炒，就更加簡單，不過都可以有個唔簡單既解釋。
簡單既結論係，佢真係能力有問題之餘，做人都有問題。hk01今年其實有報導過衣個好有趣既新聞，話阿楊潤雄在上任兩年後先主動約班尊貴，不過食飯飲茶灌水時講既野，都係遊花園。
你連飲茶灌水都唔識，咁鬧你米可以大聲d囉。
至於佢講咩taylor swift個d，就算把喇，其他局既解說能力又好好咩。
***********
不過，上面係廢話，較唔簡單既解釋就係，最宏觀咁睇，係政府入面，任何人攪旅遊盛事，都係死緊，事關個大局就係咁，香港既吸引力真係大到，你攪咩都吸唔到海外旅客 -- 就算吸到大陸客，都係同你玩特種兵唔會消費。
丫，題外話，你可以好似旅發局咁話，香港多左好多菲律賓東南亞旅客。不過，實情係，同大陸客相比，個量仍然係唔需要理個隻，同埋亞洲其他國家都多左好多衣類客，根本同香港吸引力冇關係 -- 我fact都唔駛check，不過你去日本睇下就知。
*************
講返正題，亦都係另一個潤雄之死既重要原因。
冇咁宏觀咁睇，楊潤雄之死，其實就要睇阿家超改革左三司十一局之後，今屆文旅局其實係攪笑定位。
先講返上屆政府架構。
上屆民政事務局下面有一系列既署或其他機構，係包括民政事務總署、康文署、西九發展局、新聞署等等。而家係政府網頁好難搵返出黎，你睇wiki喇。但係，以往民政局以至下面既署，係比較純粹對內，真係攪本地民政。
同一時間，係上屆既商經局下面，係有旅遊事務署、貿發局、投資推廣署、經貿辦，再加上工貿署等。你見攪旅遊發展所有對外事務，係商經局負責，基本上係統一處理。
亦所以，上屆講海洋公園迪士尼遊輪碼頭，係邱騰華出黎講，事關睇上面海洋公園幾壇野，係旅遊事務署負責。
好喇，今屆政府重組左，文旅局無啦啦橫空出世，扲左以前民政局既 康文署 同埋商經局既 旅遊事務署返黎。所以，成個文旅局除左對內，亦都要對外。
亦所以，康文署下面好多野，除左要考慮本地用家之外，無啦啦九唔搭八要滲入「旅遊」既政策考慮。例如，say喇，我攪博物館講香港本地史喇，無啦啦要考慮埋旅遊原素，理論上都要諗下點吸遊客喎。
你有興趣，就睇最新一屆政府架構圖，睇下文旅局幾騎呢。
咁冇咩既，學家超咁講，好多野都跨部門架麻，局長講既係領導能力架麻。不過，你要講旅遊，特別係講商務旅遊講高質客，講到會展吸引力，其實係組織架構上，就唔關楊潤雄事。
事關，衣d野係貿發局負責，而貿發局係under商經局，你睇而家政府budget貿發局都係由商經局睇住。
而貿發局除左招商吸引之外，佢亦都係睇住成個會展管理，即係吸引商務旅遊吸會展客個part，以至成個會展中心營運策略，又係由貿發局去睇，即係都係商經局負責。
再講深入D，你可以睇下貿發局個理事會，除左九唔搭八整左個新聞處處長入去之外(即係之前立廿三條比鄧炳強表揚個副秘呢)，政府既局方代表係，商經局邱應樺，而非楊潤雄的 (我知，旅發局主席都係理事會入面，不過份量同局長完全唔同喇)。
咁你話，楊潤雄以至文旅局同貿發局可以有幾大關係，甚至有幾清楚貿發局既所謂發展策略、年度計劃、日常運作等等﹖
所以，你見羅淑佩擒日上任就去貿發局攪個個個咩文創設計活動，其實就有d攪笑；你見本研社擒日抽水話展覽業谷唔起又係攪笑。
亦所以，如果你話要重組政府，要改革的話，就算唔改變經貿辦貿發局等架構，不過係米起碼都要擺埋文旅局局長落去貿發局個board度呀﹖
至於點解唔擺，有冇人發現衣個問題，就真係，另一個問題。
**********
再者，比多個實際操作例子，個例子係打緊字即時諗既，所以對有留意開既人黎講，係常識黎既。
係實際層面操作上，而家跟埋國策玩另類一邊倒，乜春都講中東東南亞，無論係投資經商旅遊，都講中東丫麻。不過，你試下google旅發局+中東，你係最前既result會見到咩野﹖旅發局飛去中東做巡迴宣傳喎，同阿聯酋航空簽合作備忘錄喎。
即係，我一路都話，旅發局一直都係廢廢地，再加上冇錢，其實真係燒下錢當做左野咁。
**********
補多句﹕
我再check返旅發局年報，或者應該咁講。政府每年向旅發局提供好多資助，衣幾年係10億以上，資助額仲多過經貿辦同貿發局。不過旅發局人工好貴，2023年10多億開支入面3億係人工；係2022年疫情時，開支跌到6.6億，不過人工都仍然接近3億。
所以，我都講過，旅發局係2022年疫情差唔多完，佢就攪好多煙花同埋無謂野，燒左好多錢係無謂野度，淨係向旅客派九唔搭八消費卷都用左好多錢，事關佢真係要燒錢證明自己既存在。你再睇埋，佢近幾年搵好多海外kol拍下片宣傳香港，不過最終黎既又係咩客﹖
************
講返正題。
而事實上，我睇完旅發局個新聞稿都覺得唔對啊，所以再用多幾分鐘SEARC下，就會見到，你睇下衣位尊貴問阿楊潤雄係中東點推廣香港時，阿楊潤雄答左咩野﹖
係個回覆入面，基本上，大部份做野既都係經貿辦以至投資推廣署，旅發局淨係九唔搭八派下野簽下合作備忘，再整下網站就當做左野 --佢做既野肯定係九唔搭八，事關如果有人問旅發局做完咁多野之後，香港多左幾多中東客呢，佢一定唔敢答你，或者答話咩建立形象要時間，慢慢黎喇之類。
相對旅發局，經貿辦篇制上真係政府部門，真係官方機構，係個AO管錢之餘上面又有內部睇住，所以又真係D錢要用得準D。所以，所謂真係做野做推廣既，特別係講緊吸引投資商務客既，其實都係經貿辦囉，亦所以你會見到上面答立法會個度，D野係冇咁虛既。
亦所以，上面衣個咩中東推廣，你睇完，好多實際工作，其實又係唔關文旅局事 -- 你話楊潤雄幾有統籌領導能力都好，真係有錢有官方角色既經貿辦同投資推廣署都唔係under文旅局架囉。
再者，好實際咁講，楊潤雄如果交單比經辦辦同投資推廣署叫佢做野，你估佢地會聽幾多丫拿﹖要交單交order，用多左錢用多左人，你文旅局跨部門比錢呀﹖
你睇下上面條link，預算案經貿辦最頂個版寫住咩﹖寫住阿管制人員係經貿辦常秘呀﹗controlling officer睇住經貿辦個budget既係商經局呀。你唔比錢，我又點做額外野呀﹖
又之但係，李家超九唔搭八將旅遊彈左比楊潤雄，所以佢先要九唔搭八代商經局去答個尊貴既問題，不過成個回應內容有一半係商經局負責的。
**************
所以，你話楊潤雄以至下任羅淑佩可以點樣無處不旅遊，點樣推盛事經濟，點樣推廣中東旅遊丫拿﹖係米一句話，羅淑佩有領導能力就要領導埋商經局下面既組織，定又要搵阿副司長出黎拆掂佢呀﹖
淨係靠個咁多年唔知存在為咩既旅發局 (講多次﹕旅發局十幾年黎不停講係世界做唔同推廣，不過就算係2019年之前，香港都係超高度集中內地客，仲要係內地客黎香港唔關旅發局事的)，你覺得文旅局可以點樣攪咩無處不旅遊﹖
如果你話要活化旅發局，就真係另一回，我亦都唔相信有人會做到囉 -- 況且攪起成個旅發局，做埋商務旅遊個D，你又要同貿發局經貿辦投資推廣處重新理順個組織，又唔係人攪的鳥 (特別係而家大家都UNDER唔同局)。
講開商經局，你睇邱應樺，佢係繼我成日提既曾國衛之後，另一個人間蒸發既所謂局長 -- 而家旅遊事務署唔係UNDER商經局，佢就真係超好命。
**************
結論係，楊潤雄之死，故然係佢個人問題，係抵死。
不過，由宏觀環境，去到政府架構，你要文旅局做無處理不旅遊，講到要吸亞拉伯旅客，就點都係會死。
**************
講完雙雄之死，咁再講多幾句。
你睇今次升上黎既，兩個都係前常秘，你就知道，李家超所謂既改革，其實都係要靠返班AO。成個所謂團隊有咁多副局，又有咁多建制尊貴，最後都係要搵現任AO上黎。
即係咁，你睇返而家既局長入面，可以咁樣分類同評價﹕
1. 技術官僚或者專業職系/紀律部隊出身，有6個﹕謝展寰蔡若蓮曾國衛都係極品，解說能力又係一絕；盧寵物既解說能力又係一流，可以成個業界同尊貴都要媽差佢；至於何詠賢，越黎越入戲，越黎越似AO，睇佢講簡約公屋講到九唔搭八就知；最後，炳強就no comment，事關佢既標準係另一回事。
2.建制出身，有2個﹕麥美娟+許正宇，佢地做過咩話﹖
3.街外出身，都係2個﹕孫東、邱應樺，前者係內地sales，絕對合格，後者你幾何見到佢﹖我淨係記得，好開頭上任時，佢又講錯野，講話要向外國解決23條係「迎難而上」；又或者係，佢講電話實明制係防止罪案時，又亂up唔知道個line to take。
4.其餘局長既係，全部AO出身，原本4個，而家5個 (楊潤雄都係AO喇)。唔數名啦，不過你見到個TREND喇，換人都係換多個AO返黎、
當然，你睇新任既陳美寶出黎，就係典型AO，講野既語氣內容，係翻版甯漢豪，基本上係冇感情，代表既係個職位。
羅淑佩衣排出黎講呢，其實唔似AO，係好似一個人，故下邊個﹖唔係何詠賢，不過都係一個係人都知，又係AO出身既女人。兩個都係自以為特別，會九唔搭八講講下公事就講私事，但係老細有ORDER就會咩都唔理加倍去交單個隻。
咁你明我講咩喇﹖
所以，睇羅淑佩咁既款，似係遲早出事。
***********
***********
結論都係，搵AO做局長有好多好處。執行上，佢地最熟政府，最能夠推動公務員系統去做野；其他方面，佢地既training係就係按程序辦事，不過另一個特點就係聽老細話，有單就會接單。
所以，阿家超就算點偏好紀律部隊都好，點都係要靠AO囉。
***********
其實仲有野講，都係我上個post講既問題。
咁遲d先講。
***********
完。
1 則留言:
你打咁多隻字，其實用8隻字可以概括：長官意志，AO治港
米
發佈留言