*******
好多人話波叔將發債當收入係打橫黎講係整靚盤數，咁我就唔同意既。
因為，都係之前講過，衣個係應計制同現金制既唔同入數手法﹕咁一般而言，以至係財政預算案而言，香港盤數係用現金制去睇，咁發債當收入係好正常，事關你評香港有冇財赤時，都係用返佢個現金制盤數黎講架麻。
好喇，咁衣幾個禮拜，你見莊太量同好多友 (最新就有佢同麥萃才) 不停講，香港財赤其實唔係一般人諗得咁嚴重架，因為香港仲有好龐大既外匯基金，遲D做大個餅又可以改善收入喇。
好喇，咁衣幾個禮拜，你見莊太量同好多友 (最新就有佢同麥萃才) 不停講，香港財赤其實唔係一般人諗得咁嚴重架，因為香港仲有好龐大既外匯基金，遲D做大個餅又可以改善收入喇。
咁聽完，我又真係覺得唔對路。
其中，莊太量衣期都講幾多野，甚至係文匯有個詳細訪問比佢解釋，講話外匯基金可以封頂，超額部份撥返入去庫房。睇完，我又真係會問，佢係米真係識架。
除左衣1萬億，佢FOOTNOTE31先係最精彩既數字。
其中，莊太量衣期都講幾多野，甚至係文匯有個詳細訪問比佢解釋，講話外匯基金可以封頂，超額部份撥返入去庫房。睇完，我又真係會問，佢係米真係識架。
*******
先講外匯基金。
好多人例如莊太量都講，外匯基金有好龐大儲備，所以香港政府財赤其實冇想象中嚴重。
咁好喇，要理解莊太量個講法，你就要先了解，而家外匯基金有幾多資產﹖外匯基金又有咩作用，咩先為之超額呢﹖
去到2023年年結，外匯基金個負債表係咁樣﹕係大約有4萬億資產。
咁你睇個表，其實會睇到幾樣重要但冇咩人提既野。
第一樣係，累計盈餘。係2千年頭，個時又係財赤，咁其實好多人已經提出，既然外匯基金有咁多錢，兼且有咁多累計盈餘，所以可以將個累計盈餘劃入庫房去做民生工程。
衣度有份2005年立法會文件，入面有好多重要既資料，陣間可以再講。
第二樣係，外匯基金負債表入面有政府儲備同埋其他法定機構存款，咁外匯基金係每年要按返個保證息率 (我唔記我點訂，病緊，都冇心機查喇) ，將部份盈餘比返政府擺落財政儲備入面。
所以，你睇衣個外匯基金表現既表，係有兩個支付項目，係2023年係支付左355億落去財政儲備，另外都要比返法定機構。
所以，你見莊太量係文匯或者其他訪問講話，政府財政唔係好差，外匯基金係2023年都賺左2000億既時候，跟手話要將超額儲倫撥比財政儲備，又再跟手講話咩「另外一邊因為有好大儲備，所賺的利息會多過政府蝕的」，其實我係唔太明佢講咩既。
事關，外匯基金每年賺到既錢，其實已經係有機制分返比庫房，所以佢話將基金封頂超額部份放落庫房，其實而家都有分左多少既。
當然，個息率其實唔係美國定期或者咩 -- 不過我真係唔記得呢，但衣度話2024年既息率只係3.7%，低過10年期美國債券的。
再當然，文匯個報導入面都有暗示，莊太量自己冇講，而坊間亦都根本唔知咩係超額儲備 -- 換句話講，咩為之合適既外匯儲備水平。
************
好喇，我嘗試自己拆條數比你睇，或者解下以往官方有冇類似既講法。
最簡單既方法係，係2千年頭個時，D尊貴米話，我唔動用你外匯基金原本筆本金，不過每年得出黎既累計盈餘米應該放落財政儲蓄到囉。
當年份討論文件係2005年既數，當年累計盈餘係4千億左右。過左差唔多廿年，而家既累計盈餘去到6千5百億。
題外話， 個表現真係呢，好到唔駛理喇。
又不過唔好理，如果我係莊太量，我起碼都會講，個6千5百億累計盈餘係米可以撥去庫房，起碼我有個實數講到出黎咩為之超額。
而之但係，如果只係講個6千5百億，就算把喇 -- 當然，阿波叔係黎緊份預算案會唔會打衣個累計盈餘既主意呢﹖我覺得會。
如果遲下有人放風，就肯定會添 -- 識得衣樣野既，又肯放風既，就即係波叔放出黎架喇。
*************
當然，你又再睇返2005年立法會份文件，其實就好多野睇到。
份文件有講到，當年政府認為咩為之合適儲備，以至儲備同外匯基金既關係。
份文件講左儲備有3個需要，亦都講埋比你聽個大約實際金額應該係點。個解說好清楚，咁我COPY埋出黎﹕
7. 鑒於1997年及1998年發生亞洲金融危機，當時的財政司司長在1998年度財政預算案演詞中表示，政府當局有需要把相當數額的公帑留作儲備，以應付以下三方面的需要：
(a) 應付日常運作需要儲備可讓政府手上有足夠資金應付日常的現金流量需要，並用以支付年中入不敷支的月份的所需開支；
(b) 處變應急的需要儲備可用來抵銷經濟周期回落所帶來的衝擊，以及應付世界或區內的突發事件對公共財政所構成的壓力；及
(c) 應付金融需求儲備有助保持匯率穩定。
8. 當時的財政司司長亦就如何釐定須維持的財政儲備水平訂定指引。他認為，財政儲備應持有相等於政府12個月開支的數額(以3個月開支的數額作為增減幅度)，以應付日常運作及處變應急的需要。至於金融需求方面，他認為要界定在金融需求方面的適當財政儲備水平殊不容易，但經驗顯示，財政儲備越雄厚，公眾信心越強大。他表示，政府會採用M1定義的港元貨幣供應作為儲備的基準(增減幅度為M1貨幣供應量的25%)。
9. 在2002年度財政預算案演詞中，當時的財政司司長指出，自從亞洲金融風暴爆發後，金管局已落實一系列措施，強化港元匯率的穩定，外匯基金亦已有3,000億元的累積盈餘，加強了外匯基金捍港元匯率穩定的能力。當時的財政司司長表示，他認為財政儲備已無須與貨幣供應量掛，只須預留一筆相等於政府12個月開支左右的儲備，便應足夠應付政府開支的日常和應急需要。他亦指出，雖然財政儲備已無須與貨幣供應量掛，但政府的財政儲備將會繼續存放於外匯基金，令外匯基金有更充足的資源來支持港元及金融穩定。
****************
好喇，上面份文件，即係2005年既時候，政府認為，財政儲備既合適水平，係政府開支既12個月。
用衣個標準，係出年公佈預算案既時候，連埋發債之類，再加埋赤字比預期大，財政儲備大約係10個月左右既政府開支 -- 衣個估算好易做，你睇發表左既預算案既中期預測，佢估24/25年既儲備係等於11個月政府開支；咁而家收入小左咁多，所以10個月左右就唔會錯 (其實演詞都有講，不過睇中期預測個表就簡單好多，唔洗睇咁多廢話)。
咁你話，用返2005年既標準，香港政府而家既財政問題係米值得擔心呢﹖香港既儲備用返當時官方標準去睇，係米已經唔合格呢﹖
再睇埋外匯儲備，你話咩為之「超額外匯儲備」﹖其實咁多年黎都冇一個數既。又之但係，既然上面份文件話，「政府會採用M1定義的港元貨幣供應作為儲備的基準」，咁我好求其咁用貨幣供應既M1去講，你估2千年頭既M1係幾多，而家又係幾多﹖當時同而家既相對應外匯儲備又係幾多拿﹖
你唔洗去金管局搵，我又係KEYWORD SEARCH，統計署又會GEN到個貨幣供應既表比你﹕
2001年﹕M1=2,580億；M2=35,550億
2010年﹕M1=10,172億；M2=71,362億
2023年﹕M1=25,982億；M2=171,952億
懶，就咁GOOGLE，外匯基金係2001年6月既總資產係10,277億港元，當時M1係2,580億，比例大約係4倍。2023年外匯基金資產大約係4萬億港元，不過M1升到去25,982億，比例跌到去1.5倍。
當然，衣個比例其實係講黎曬氣。因為，外匯基金用作支持港元既作用，需要有幾多資產儲備做BACKUP，其實係冇客觀標準。
甚至金管局會同你講，衣20年做左好多優化措施，要衝擊港元真係超級冇可能。
又之但係，金管局夠唔夠膽講幾多儲備係足夠，幾多先係超額﹖莊太量自己都唔會夠膽講。而你睇返個外匯儲蓄同M1既比例，又真係跌得好多下。
*******************
所以，好多人話，香港除左有政府既財政儲備之外，仲有龐大外匯儲備，所以財赤問題唔係咁嚴重，其實就係廢話。
一黎，而家外匯基金本身就包括左財政儲備 (政府同法定機構放左落去既存款)，而外匯基金每年亦都會同政府分帳。
二黎，跟本冇人可以夠膽講咩為之超額儲備，講完有咩事咁點算 -- 所以，就算要講動用外匯基金去填庫房條數既話，識講既，都只係會講累計盈餘。
*******************
再當然，講到政府財赤，跟手又有人會講話，其實政府大把物業大把投資，其實可以變演黎到填儲備。
講得出衣樣野既人，就係睇到政府既資產，但冇睇負債。
衣樣，我好耐之前都講過，不過而家又可以UPDATE下。
*********************
你睇多次庫務署衣份用應計制編寫既政府財務報表，其實我之前都係講，識睇就一定係睇佢既承擔額。
你睇個報表入面既資產負債表，政府係有淨資產17,396億。不過，資產入面，好大部份係財政儲備，又或者係隧道政府建築之類既回定資產。政府當年就可以用五隧一橋發債去玩現金流等救命，不過而家咁多隧道唔洗錢，你仲可以發幾多債﹖唔通而家將軍澳隧道唔收錢，為左發債就重新收返呀﹖
除左上面既資產之外，係3,970億既「政府企業的投資及給予政府企業的貸款」，其實有千幾億係港鐵股權，都係唔可以變現 -- 你賣曬個千幾億既話，港鐵仲同你可加可減機制﹖你賣得個兩成之後保留返個控股地位淨係扲返幾百億，咁就不如唔好賣。
所以，好多所謂既政府資產，其實係唔可以變現。
再者，你睇佢個承擔額，其實係好精彩，先係真章。最精彩既係，之前都講過既，10,153億既退休金準備，衣條數係實數，冇得走既。
除左衣1萬億，佢FOOTNOTE31先係最精彩既數字。
衣個FOOTNOTE係叫做「於二零二三年三月三十一日及二零二二年三月三十一日，未包括在本綜合財務報表內的承擔餘額如下」。而係衣個ITEM入面，「基本工程項目、物業、機器及設備和非經常資助金」係2023年係8,373億，係2022年係7,653億。
浸大會計、經濟及金融學系副教授麥萃才則指，今年度財赤增加不是源於政府開支上升。他說，公共財政不能單求平衡預算，舉例基建工程無即時經濟收益，短期帳面上帶來赤字，惟實際上並非財政問題而是融資問題。他指出目前庫房尚有數千億元儲備，認為可透過財政儲備「買時間」，經濟上「做大個餅」，日後經濟復蘇可以有較大增長。
睇完，佢同我一樣GET到既係，基建係冇即時經濟效益。不過，興建完基建，有冇經濟效益，係要睇你塊地要黎做乜架麻。
衣個FOOTNOTE其實即係咩﹖主要既，其實即係每年係立法會財委會批既工程撥款。
係現金制之下，阿波叔就話每年基本工程開支係1千億左右；不過，立法會批既係整個工程項目由開工到工既承擔額，即係就算而家立法會唔再批錢唔比新項目開工都好，未來10年以內，都仲有8千億係要預留左去做工程。
當然，好多人唔明咩叫承擔額，連衣位尊貴都一貫弱智左，以為庫房批左錢就會係批出去個刻用曬，或者會放落去唔知邊到。不過，你只要明，個8千億係已經批左出去，政府幾時要用都得 -- 除非你話，SAY，立法會批左幾百億做填海，政府突然間唔填喇。
批左既錢，政府唔會唔用。反而係，個8千幾億批左出去既，超支就會再問立法會扲追加撥款囉。
ANYWAY，我就算假設政府由今日開始咩都唔做，不過佢都要為退休金同批左既工程找數，加埋係接近2萬億 -- 而衣2萬億，大約都係未來10-20年要比，即係分20年都好，每年都要比1千億出黎。
而你睇返當年份唔記得咩文件，退休金高峰唔係分20年或者20年後先開始，而係個高峰差唔多開始，即係20年後最後一批有長俸既公務員退休時，退休金承擔應該一早已經回落鳥的。
(即係，好簡單咁解﹕公務員長糧制係2千年頭完架麻，當時60歲退休後，而家過左20年就領取緊退休金既人已經80歲，開始正常死亡，咁退休金準備就因應一併回落喇 -- 當然，通脹加人工又會令個退休總金額增加，不過死亡人數會抵銷甚至令到個金額縮小囉)。
********************
所以，其實上面講咁多，又係回帶。
********************
當然，其實仲有個問題，不過麥萃才其實自己都講左 -- 不過佢係用樂觀角度去講。
佢係明報話﹕
浸大會計、經濟及金融學系副教授麥萃才則指，今年度財赤增加不是源於政府開支上升。他說，公共財政不能單求平衡預算，舉例基建工程無即時經濟收益，短期帳面上帶來赤字，惟實際上並非財政問題而是融資問題。他指出目前庫房尚有數千億元儲備，認為可透過財政儲備「買時間」，經濟上「做大個餅」，日後經濟復蘇可以有較大增長。
睇完，佢同我一樣GET到既係，基建係冇即時經濟效益。不過，興建完基建，有冇經濟效益，係要睇你塊地要黎做乜架麻。
又係回帶。
香港幾大收入，其實係利得稅+薪俸稅+賣地+印花稅，入面係利得稅 千5億，賣地以往 近千億，之後就係 薪俸稅7百億，再之後印花稅變動大難講D，你可以自己再睇。
咁而家講搵企業落戶呀高才通呀，個D黎香港係做咩架話﹖
咁而家講搵企業落戶呀高才通呀，個D黎香港係做咩架話﹖
我當你真係政府咁講，係做科研、做無人車、做藥企、做咩都好，其實係唔賺錢既。我唔講APPLE個D公司以往用好多SANDWICH避稅，而家就多左好多國際協定去攪衣類野喇。
不過，個D黎香港既初創咩藥企，幾多係有錢賺﹖就算當佢真研究有成果賣到product，最後真係有錢賺喇，不過佢地係香港只係做研發，藥品銷售唔係香港，咁佢地要比幾多稅﹖就算係香港賣，又賣到幾多﹖
唔講藥品，我講呀美團係香港用無人機送外賣咁勁喇，咁佢每年會有幾多盈利丫，要交幾多稅丫拿﹖
香港一路都係屬地原則，係香港產生既利潤先要比稅。
係2023年，政府總收入係5,500億左右，利得稅+薪俸稅分別係1704億+798億，即係加埋有2,500億，再加埋近500億印花稅，即係衣3樣野有3000億，係超過總收入一半。
以往都講過，利得稅同薪俸稅既貢獻者其實絕大部份都係大企業同高薪人士。交稅既，係各大地產商、係銀行、係大企業。你估今年新世界交幾多稅丫拿﹖除左新世界自己，由佢而帶黎既薪俸稅、印花稅，仲有好多稅，係黎緊衣幾年，睇見個樓市咁款，咩野稅都會小左好多。
而家你要做大個餅丫麻，咁你話一間年賺我當係1千萬既初創黎左香港喇，咁佢要交幾多稅﹖班所謂高才通就算年薪50萬甚至一百萬都好，加加埋埋又係交幾多稅﹖
咁你話，所謂既學者呀、波叔之流，成日都話，香港個經濟週期好轉喇，稅收就會返黎喇，政府盤數就會好返喇，咁我就問你，而家政府目標企業，吸引緊黎既企業同所謂人才，佢地係會做D咩﹖香港真係做到政府所講個種轉型喇，稅收又會點扭轉丫拿﹖
以往投行一個DEAL可能幾百億，高層花紅幾千萬，每年交稅幾百萬甚至過千萬。咁你話係而家所謂既經濟轉型之下，將來仲會有幾多衣類人﹖你要攪無人機外賣，間公司係香港衣個市場可以每年賺到幾百億呀﹖
我特登睇稅局最新年報，係2022/23年度，年薪1千萬既人有3,143人，每人平均要交346萬蚊稅。係2021/22年度，衣個年薪既係有3,643人。
如果唔睇衣類最高薪既人，再睇中層，我估個人數會跌得仲慘烈 -- 你睇匯豐投行炒既都係中產，而家流失既都係衣班幾百萬年薪既職位。
************
再講多次。
政府成日講乜春無處不旅遊，不過旅遊不嬲都唔係賺大錢既行業 -- 無論係公司或者個人黎講都係。咁既話，就算無處理旅遊好勁，咁政府又會從中收多幾多稅呢﹖
************
結論係，D所謂學者講既係冇錯架。
做大個餅，經濟好返，政府收入係會多左架。不過，問題係，你做返大個餅既時候，又係米之前個種 國際金融中心既餅﹖
************
最後，關於財赤，其實我個立場就一向都好清楚架喇。
李兆波同好多友不停話要減公務員人工去應付財赤，其實就係痴膠花。
一黎，政治上，你要減維護香港治安既良好公僕人工﹖
二黎，香港財赤問題，根本就唔係公務員薪金問題。最大獲既，係個D所謂做大個餅既基建 -- 而家已經係有8千億承擔額，再加埋黎緊北部都會區，其實已經有過萬億基建等緊扲錢。
再者，你減公務員人工，咁即係減埋香港其中一個消費主力。
又再者，最緊要既係，你減公務員，咁所有資助機構法定組織跟唔跟呀﹖
我早幾日係度講旅發局人工開支好勁既。如果你有心機去睇我條LINK，阿旅發局行政總裁年薪6百萬，佢下面管理層都係過好多百萬。你減人工，佢地班友洗小左錢，個市道又係一個deadloop -- 丫，唔洗搵喇，所有公共機構呀，乜春西九管理局阿CEO，人工仲多過6百萬添呀下。
****************
所以，結論都係，香港政府盤數，如果要繼續咁做建基，其實就真係諗想像唔到會點。
不過，衣個係大查飯，就算喇。
****************
講多句。
你話基建係米一定會做大個餅﹖
你問下麥萃才，就算啟德真係攪到個唔知點解咁平只係百零億既單軌，其實會有咩經濟效益﹖如果係都要攪，同攪個唔洗10億既BRT比，其實係社會經濟效益又有咩分別﹖
你諗下衣個問題，就會知道，班學者講既野，就真係唔洗理喇。
*****************
最後，再講多句喇。
如果你好似政府咁，將開支同收入分為經常性同非經常性，咁香港政府每年經常性開支大約7千億，經常性收入 (即係稅收加其他喇) 就係5千幾億，你要發埋債，其實都可能勉強應付喇。
至於非經常性收入主要就係賣地，非經常性開支就係基建開支喇。咁我當真係每年工程開支1千億，但往後10年加埋個承擔額係8千億，即係每年接近1千億。
咁你話未來10年每年賣到幾多錢地，每年賣唔賣到1千億，去找個8千億既數﹖我仲未計每年都有新工程撥款，即係承擔額係不斷增加的。
所以，你同我講話減10%公務員薪金，即係減個百零億可以解決到財赤﹖財委會求其一個項目都唔止百零億喇。
結論係，你攪唔掂非經常性開支即係基建條數，其他就唔駛諗喇。
******************
完。
沒有留言:
發佈留言