2026年11月19日星期四

立法技術文.中大條例寫錯字.不止文盲咁簡單 (3)

原本唔想打字。不過,擒日出左衣單我最鐘意既新聞題材,咁點都要打下字。

我鐘意衣D題材,因為一般人唔識講;就算係律師,都未必識。

所以,衣D技術文,就真係睇完長知識,亦都唔會係流於吹水。

**********
先講個程序。

今次幾個尊貴修訂《香港中文大學條例》,係以議員私人條例草案形式將個修訂草案交比立法會,再建議由立法會通過法例修訂。

係基本法同議事規則既規限下,絕大部份立法都係由政府提交既政府法案形式去做;議員要做立法建議,基本上就好困難,有好多關卡要行政長官批准。

咁點解今次係由議員以私人條例草案形式去做﹖

原因係,理論上,再加傳統上,政府尊重大學自主運作,咁大學要修訂規管佢地運作既相關法例,就會由大學校董會研究完再提出,之後再以身兼校董既議員提交立法會,以議員私人條例草案形式去立法或者修訂法例。

今次就係中大建議修訂條中大條例,攪完一大輪就再由幾個校董議員向立法會提出 -- 至於成個修訂係米校董會自主去做,政府有冇影響呢,就心照。

等同於,早兩年張宇人之流提出修訂中大條例,之後CHEAP到連個唔夠一百萬既律師費都要追返中大校董會。咁你話,當時政府同張宇人之流,係米好尊重中大校董會呢﹖

講返正題。

除左各大學條例之外,以往有D專業團體都有咁做。例如,梁繼昌係一路都有consult會計師公會之下,攪過幾次修訂《專業會計師條例》。

咁講返今次件事,就係中大校董會草擬左個修訂草案,再由幾個校董議員走程序﹕先將草案提交相關事務委員會 (今次係教育事務委員會)討論,討論完就會再走正式首二三讀程序,係立法會大會表決。

**************
今次星島個報導就值得一讚。

佢除左比左個草案文本LINK出黎,唔洗我搵之餘,佢仲將條草案打錯字既段落原汁原味咁COPY埋出黎,比你知道班人係幾咁弱智。

你再望下幾條弱智尊貴既解釋,就真係無敵﹕

針對文本錯漏問題,鄧家彪接受傳媒查詢時表示,歡迎外界就草案字眼提出修正建議,相信校方會吸納意見,待正式提交法案階段再作修訂完善。另一名身兼校董的立法會議員梁進亦解釋,由於中大方面早前已就草案文本修改逾十至二十次,反覆更正期間或難免出現混亂,將會重新校對及修正。

佢地係弱智,原因好簡單﹕

1. 份文件係中大校董會秘書處發出。佢地出份野,你班校董議員冇睇過﹖出左事,就話「校方會吸納意見」﹖咁你作為校董,你係米校方呢﹖

我唔同你講常識,我同你講返法例﹕根據而家未修訂既香港法例第1109章《香港中文大學條例》第7(a)條,大學校董會「是香港中文大學的管治及行政機構」。

咁你作為議員校董,坐係中大既「管治及行政機構」,咁你班議員校董唔係校方呀﹖你唔好出左事,就話自己唔係校方啦。

2. 更加根本既問題係,份草案係用你地個名提出。用得你個名,就係代表緊你,或者起碼係你同意個內容。

而家出左事,就話唔關你事,係「反覆更正期間或難免出現混亂」。你個說詞你個邏輯成立的話,咁成個社會好多公私營機構既文件唔係「反覆更正」﹖咁係米出左事就唔需要負責﹖

***************
當然,寫錯字,只係證明中大董事會秘書處同幾個尊貴既水平係有問題,可能係文盲、大意、求求其其,whatever啦。

不過,個修訂草案文本,我求其睇,都有好多問題,就唔係文盲咁簡單,而係法盲既問題。

份文件我睇左5分鐘,太技術既我冇睇 -- 好多條文,其實都可以抄人,應該唔會有太大問題。

例如,條例草案修訂第4B條「香港中文大學的權力」,建議中大可以訂立合約、可以採購之類,其實都係抄《香港科技大學條例》或者其他大學條例,就可以。

另外,亦有D條文其實係擺個唔同次序鋪排,咁我都唔講。

我淨係講,明報同埋較多人提到個幾樣野。

****************
明報係咁講﹕

中大今年5月預告擬修例,焦點包括將罷免校長及副校長的理由,除了現時「好的因由(good cause)」外,增加3項理由,涵蓋「行為不檢、不稱職、效率欠佳」;

草案文件建議列明教務會是中大「最高教務機構」.....該會職能包括「可因例如學術不端、偽做學歷……等原因,撤鎖任何人的香港中文大學學位、文憑、證書或其他資格頒授」。

衣兩樣修訂建議,就好精彩啦,所以用Point Form講。

先講罷免校長、副校長個班友既攪笑野。

1. 你睇現時香港法例第1109章《香港中文大學條例》,成條第1109章,只係附表1入面既規程24提過「好的因由」衣4隻字。

2.你睇規程24,係於(由2023年第28號第18條修訂),即係當時張宇人個修訂新加落去第1109章。

3. 咁你再睇返今次修訂草案,就好精彩啦。

3.1. 今次個修訂草案,由於係交比事務委員會討論,所以就用左一套較簡單易睇既方式去展示佢做左乜野﹕紅字underline就係新加入條文,藍字就係劃線就係取消條文。

3.2. 當然,有D紅字新加入條文,可能係原先放係法例入面第二度,不過因為要從新排列,所以就用藍字劃線取消左,之後再用紅字under加返係另一個位置。例如,有D原先既規程就取消左,不過加左落去新列出既條文,例如上面講既第4B條「香港中文大學的權力」,就係規程11入面有小小著墨-- 今次修訂草案就刪除整個規程11,將中大校董會權力搬左去第4B條入面從新寫過。

4. 咁精彩既位就係度啦。你試下GOOGLE個修訂草案,搵下good cause衣兩隻字,或者搵下「好的因由」衣4隻字。你係見到好多個RESULT。不過,最重要既RESULTE,係衣個,我CAP埋圖比你﹕




4.1. 係而家既第1109章入面,「好的因由」係由張宇人2023年既修訂引入,放左係規程24入面;除左規程24,成條1109章都冇「好的因由」4隻字;

4.2. 最重要既係,規程24定義左「好的因由」,列出左第2(a)、2(b)同2(c)3,以及第5(a)、5(b)、5(c)同5(d)定義;前者第2條就係針對「罷免任何大學校董 (主席、庫主席.....)」,後者第5條就係針對「校長、副校長、各原有書院....的院長.....」;

4.2.而家個修訂建議,係建議將整個規程24刪除。

4.3.不過,你睇明報或者睇返個修訂草案文版,個修訂草案仍然保留以「好的因由」為理由,去免除上面人等既職務的。我copy返條文出黎呀下﹕

第7A. 校董會的成員
(8) 大學校董會可以其行為不檢、不稱職、效率欠佳或其他好的因由為理由,藉決議免去任何(除主席、副主席、司庫及根據條例第7A(1)(j)及(k)條獲委任的人士以外的)人士的大學校董身分。

7D. 校長、常務副校長、副校長、行政副校長及其他教職員的聘任
(b) 校長可被大學校董會以其行為不檢、不稱職、效率欠佳或其他好的因由為理由並藉不少於大學校董會當其時全體校董的四分之三投票通過的決議而免職。 

除左上面校董同校長之外,呀副校長、書院院長、學院院長仲有一班人,都可以用「其他好的因由」去免除職務;

4.4. 咁個問題係,你刪除左規程24「好的因由」個定義,之後唔係任何段落加返上去,咁假如通過衣個修訂,咁點為之「好的因由」﹖

4.5. 我特登查返香港法例,同你攪下笑既就係,第124A章《屠場規例》其中有條就話,「獲授權人員如覺得某人無好的因由而留在屠場內,可命令該人立即離開屠場。」,咁入面係冇「好的因由」既定義;不過,你中大唔落定義,我日後係米要參考《屠場規例》;

4.6.我唔同你攪笑,就可以睇返第1141章《香港科技大學條例》第12條,入面都有講到校長同副校長之類,可以因為「好的因由」再經投票而被免除職務;而第1141章,又真係冇就「好的因由」去落定義;

4.7.不過,你望清楚,第1141章第12條係(由2008年第24號第7條修訂)。科大係2008年冇為「好的因由」落定義,不過第1109章即係《香港中文大學條例》係張宇人2023年個修訂,係有為「好的因由」落定義。

4.8. 咁的話,你係米想講,當年張宇人個修訂係錯誤,今次修訂完之後就唔需要理當時「好的因由」入面定義既元素﹖定還是,當年冇錯,我今次唔知做乜修訂時刪除佢,日後炒校長都要考慮返已經刪除左既「好的因由」元素﹖

4.9.再者,你今次刪除左「好的因由」個定義,不過將衣個「好的因由」作為炒校長既理由,咁你真係天下無敵架喎﹗阿校長得罪左中聯辦,甚至只係得罪左大公文匯,之後攪到中大比佢地針 -- 咁到時炒左個校長,都係「好的因由」啦,下麻。

4.10. 你話如果你係第1141章一直都冇就「好的因由」落定義,都是但啦;之但係,你早兩年先落左個相對清楚既定義,不過而家就將個定義刪除左,咁係咩意思﹖法律唔係要講確定性架﹖

講完校長副校長之流,就講撤銷學位個攪笑位。

1. 你見個修訂草案係咁寫﹕

8. 教務會
(3)教務會可因例如學術不端、偽做學歷、違反道德或專業操守、刑事定罪或行為有損香港中文大學聲譽等原因,撤鎖任何人的香港中文大學學位、文憑、證書或其他資格頒授,但該人有權就教務會的決定向大學校董會提出上訴。

2. 而家對於撤銷學位文憑個規定,其實係規程26 學位及其他資格頒授入面有所規定,佢係咁樣寫的﹕

規程26第14條
何人如被裁定犯了可逮捕的罪行,或被教務會認為曾作出不名譽或屬醜聞性質的行為,教務會可撤回該人的香港中文大學學位、文憑、證書或其他資格頒授,但該人有權就教務會的決定向大學校董會提出上訴,亦有權就大學校董會的決定向監督提出上訴。

3.你比較衣兩個寫法,就更加清楚咩叫法盲;

3.1. 你見原先規程26個寫法,係將可撤銷學位既「原因」分做兩大類。一類係「被裁定犯了可逮捕的罪行」,第二類係「被教務會認為曾作出不名譽或屬醜聞性質的行為」;

3.2. 就算你話第二類其實都冇清楚定義,不過都大約有個範圍,係某些情況下有個一般人認知 (丫,抽下水先﹕黃錦輝就醒,自己拿拿聲辭職);

3.3. 之但係,你望清楚而家修訂草案第8條,佢將個「原因」分左做 (1)「學術不端」、(2)「偽做學歷」 (佢打錯字我照COPY)、(3)「違反道德或專業操守」、(4)「刑事定罪」、(5)「行為有損香港中文大學聲譽」、(6)「等」,衣6大原因;

3.4. 我特登咁樣打曬6個原因出黎,包括埋個「等」字,係因為衣個就係最LAYMAN都睇到既問題,亦都係成段條文最大既問題﹕佢係衣6個原因之前,其實有「例如」衣兩隻字;佢係6個原因之後再加個「等」字,米即係無上限原因﹖

3.5. 你個6個原因都係「例如」咋;你再加左個「等」字,其實係米你求其講個原因都得﹖

3.6. 以法理例計,你連埋個「等」字黎討論,就仲大獲﹕你見偽做學歷就好specific同埋有客觀標準證據;刑事定罪都有客觀標準證據。但係,學術不端同埋違反道德或專業操守,其實就未必係好客觀;

3.7. 更加大既問題係,最後一項,「行為有損香港中文大學聲譽」。「行為有損香港中大大學聲譽」其實係一個好大既Category或者Class。

3.8 佢其他原因講咩「學術不端」(冇咁客觀的)或者「刑事定罪」(好客觀啦),其實好可能 (我強調只係「好可能」) 只係衣個「行為有損香港中文大學聲譽」既sub-category或者sub-class。

3.8. 你將衣D唔同既理由或者可撤銷學位既元素平排咁放埋一齊,之後再加個「等」字,其實只會製造混亂;

3.9. 再更加基本既問題係,就算唔計個「等」字,而家都可能產生好多混亂既問題。我比多個例子﹕「違反道德或專業操守」而家係一個撤銷學位既元素丫麻。咁如果有人做左衣樣野,之但係維持到中大既聲譽,咁係米可以單憑「違反道德或專業操守」去撤銷佢既學位﹖

3.10.仲有冇人記得邊個係鍾庭耀﹖我知佢係港大畢業港大做野,不過假設佢係中大畢業啦。幾十年前佢爆左董建華助理路長安施壓要求停止特首同政府民調,咁好多人都覺得唔道德架,咁不過維持到大學公信力,變相維持聲譽喎。咁的話,有人用「違反道德或專業操守」去要求佢辭職,咁點呀﹖

3.11.再者,而家個修訂用左「違反道德或專業操守」去做其中一個元素,我就真係完全唔明點理解同操作﹕佢講既「違反道德」,包二奶算唔算呀﹖離左婚唔比贍養費又算唔算呀﹖又或者阿講師教授同學生拍拖又算唔算呀﹖又再或者,幫NVIDIA走私晶片返大陸又算唔算呀﹖

又再再或者,早兩年,衣條中大政政助理教授除左用長者八達通之外,仲堅到係街邊食祭品,又有冇違反道德或者影響聲譽﹖

3.12.你將咁多唔同元素並列放埋一齊,我都唔知點理解衣d元素;如果你話,所有示素其實都只係指向「有損香港中文大學聲譽」,咁我就可以好簡單清楚咁將「違反道德或專業操守」放落去「有損香港中文大學聲譽」既衣個category入面。不過,你而家係並排咁放,再加個「等」字,咁我要點理解呢﹖

3.13. 你其實而家係規程26已經有個講法。如果我要修訂,用最常見既法律草擬句式去處理米得囉。你唔識,我寫埋比你﹕

8. 教務會
(3)教務會可因刑事定罪或行為有損香港中文大學聲譽 (包括但不限於學術不端、偽做學歷、違反道德或專業操守)的原因,撤鎖任何人的香港中文大學學位、文憑、證書或其他資格頒授,但該人有權就教務會的決定向大學校董會提出上訴。

你將個修訂草案,用「包括但不限於」既形式去寫,衣個D唔同元素包係「行為有損香港中訣大學聲譽」既框架入面,就會所有元素都清楚好多,唔會有人問你假設阿男校長同某男教授通姦算唔算「違反道德」,可唔可以被撤銷校長身份、學位或者教席。

 (我上面講既通姦,係舉個誇張D既例子等你易D明JAK...我原本想舉個例子係雞姦添,不過係刑事就唔舉,廢事混亂左)

4. 當然,講埋我心入面個句﹕

而家個條例草案要寫明「例如」再加個「等」字,其實就係要寫到唔清唔清,方便日後操作啦。如果係咁既話,你求其寫「任何教務會認為正當的原因」米得囉 -- 反正你而家既寫法,都係任何講曬之餘,仲產生無限混亂 -- 你與其要咁核突,你用「正當的原因」米求求其其算數囉。

***********
我上面淨係講左明報提個兩樣野,亦都應該係最重要個兩樣。

我唔講政治,淨係講law drafting,修訂草案入面衣兩條,其實真係好核突。

而家上事務委員會,就求求其其,我都唔認為有人會問或者識問。

過左事務委員會,就正式開法案委員會討論。

如果條例係政府提交上黎,立法會法律事務部位法律顧問,理論上會就條草案既問題,去信政府問返D問題攪返清楚。

衣類私人草案,例如之前梁繼昌條《2018年專業會計師(修訂)條例草案》,就阿法律顧問會問返起草既議員。

咁衣條咁既擬議《2026年香港中文大學(修訂)條例草案》,就真係要睇到時法律顧問有冇GUTS,問我上面既問題啦。

我上面淨係睇兩條條文,我都肯定條草案其他地方一定大把問題。

***************
未完。

立法技術文.中大條例寫錯字.不止文盲咁簡單 (2)

《中大條例》修例草案被指錯漏多 校政關注組:「撤銷」誤植「撤鎖」

發布日期 2026年11月19日星期四

【明報專訊】中文大學今年初成立專責小組提出修訂《中大條例》,立法會前日(17日)上載由中大議員校董鄧家彪、陳恒鑌、梁進及陳曉峰聯名向教育事務委員會提交的修例草案,下月4日開會討論。「中大校政關注組」昨日在網上發文指出文件誤植多個錯字,如將「撤銷」寫成「撤鎖」等。立法會傍晚上載更新版文件,已改正錯字。

立會昨更新文件改正

中大今年5月預告擬修例,焦點包括將罷免校長及副校長的理由,除了現時「好的因由(good cause)」外,增加3項理由,涵蓋「行為不檢、不稱職、效率欠佳」;擬提升副校長任命門檻;於《規程》中以校友顧問委員會取代33年歷史的校友評議會;禁止未經授權使用中大名稱;刪除多項涉學生會的條文,如「學生會長是教務會組成部分」。中大當時稱,《中大條例》自1976年生效,基本上無重大修訂,已不合時宜,盼與其他資助大學的「現代化版本條文」看齊。

草案文件建議列明教務會是中大「最高教務機構」,須在符合校董會的指示下「策劃、發展及檢討學術課程」、「指示及規管在大學內進行的教學和研究工作」、「規管及訂定有關學生行為及紀律的事宜」等。文件另列明,該會職能包括「可因例如學術不端、偽做學歷……等原因,撤鎖任何人的香港中文大學學位、文憑、證書或其他資格頒授」。中大關注組指出,當中「偽做學歷」應為「偽造學歷」、「撤鎖」應為「撤銷」。關注組又指文件英文部分字眼「The The Chinese University of Hong Kong Ordinance(即《中大條例》)」,誤植多一個「The」,形容文件「錯漏百出」。

原文網址:https://news.mingpao.com/pns/%e6%95%99%e8%82%b2/article/20261119/s00011/1795025191987

立法技術文.中大條例寫錯字.不止文盲咁簡單 (1)

四議員聯署提修訂《中大條例》草案現多處錯字 鄧家彪:歡迎提意見再完善 | Kelly Online

更新時間:19:01 2026-11-18 HKT

發佈時間:19:01 2026-11-18 HKT

四名兼任香港中文大學校董的立法會議員,昨日(17日)向立法會提交聯署文件,建議修訂《香港中文大學條例》。惟草案文本被發現存在多處字眼錯漏,中大校董鄧家彪回應傳媒指,歡迎各界提出修正意見,相信校方會從善如流,在正式提交法案時進一步完善文本。

擬納高層任免入主體條例

是次提出修訂草案的四名中大校董兼立法會議員,包括梁進、陳恒鑌、鄧家彪及陳曉峰。根據已提交的立法會CB(3)1413/2026(01)號文件,建議將校長、常務副校長、副校長及行政副校長的聘任與免職程序,正式納入主體條例規管;若相關管理層人員出現行為不檢或效率欠佳等情況,校董會有權將其免職。

此外,草案亦建議撤銷現有的「校友評議會」,改以「校友顧問委員會」取代。立法會教育事務委員會將於12月4日討論有關議程。

英文條例名誤寫「The The」 「偽造」變「偽做」


然而,草案文本公布後,隨即被「中大校政關注組」揭內文出現多處明顯的錯別字。當中包括將「偽造」學歷誤寫為「偽做」學歷,以及將「撤銷」誤寫為「撤鎖」;英文版本的條例標題「The Chinese University of Hong Kong Ordinance」,亦出現「The The」的重複字眼錯誤。

梁進指文本反覆修改致混亂

針對文本錯漏問題,鄧家彪接受傳媒查詢時表示,歡迎外界就草案字眼提出修正建議,相信校方會吸納意見,待正式提交法案階段再作修訂完善。另一名身兼校董的立法會議員梁進亦解釋,由於中大方面早前已就草案文本修改逾十至二十次,反覆更正期間或難免出現混亂,將會重新校對及修正。

來源網址 : 四議員聯署提修訂中大條例草案現多處錯字-鄧家彪歡迎提意見再完善-Kelly-Online | 星島頭條

https://www.stheadline.com/politics/3638590/

2026年11月18日星期三

法團定位須革新﹖ 革你老尾(2)

早兩日,係youtube見到佢推左條片叫「法團核實授權票問題政府完全卸責」比我。

段片係出自am730,我睇到個標題,就心諗,am730唔通有d料到﹖

我冇睇段片,不過對個題好有印象。

頭先講開大茶飯團伙,就醒起段片,咁搵下am730,就見到段片既文字版社論。

睇完,就知道,唔太對路鳥。

**********
個社論唔對路,係因為佢用左政府個立場、思路、同埋說詞。

好多我之前講過,不過我又唔介意回帶。

1.「與此同時,管委會成員還要承擔各種各類法律責任,社區中有心有力的人根本不會願意承擔。現在政府的方向反而是讓人更害怕擔任這些崗位。」

個社論衣句,其實係政府一直唔願意收緊344章,加入更多罰則既說詞,話咩「參與法團既都係義工,太多懲罰會降低佢地參與意欲」之類既野。

我之前都copy過梁耀忠衣個質詢出黎,咁我copy多次時任民政局長曾德成點答﹕

由二零零四年六月至今,政府總共收到25宗個案,要求主管當局引用權力或採取檢控行動.........對上述每一宗個案,民政事務總署人員都進行了深入調查,經上級審核並且經過徵詢法律意見,然後向民政事務局局長提交處理建議。至今為止,民政事務總署向我提交的每一宗個案報告,都不建議採取法律行動。

你睇唔睇到最尾兩句寫乜﹖

個質詢係2011年答,條例當時修訂完都過左好多年,期間繼續有圍標有好多問題 (我上幾個post米QUOTE過傳真社,講呀翠湖比人拉個判頭,米2004年開始已經向ICAC投訴囉),不過民政局對所有投訴「都不建議採取法律行動」。

不過,我都好肯定,去到衣一刻為止,就算過左成廿年,政府用條例去檢控,一定係兩隻手數得曬 -- 甚至有冇因為違反344章而作出檢控,我都好懷疑 (而家拉既法團委員係因為貪污,唔係因為違反344呀下)。

事關,政府一貫既立場,係好神奇。我copy埋條質詢另一更精彩部份比你睇﹕

第二、在不少個案中,法團並非蓄意違反《條例》。民政事務處就業主的申訴展開調查的過程中,會積極勸喻法團切實遵守《條例》的規定。在大多數情況下,法團經勸喻後都會作出矯正。有時法團是對《條例》缺乏了解,或是受到其他因素影響,引致部分業主不滿。例如,有業主投訴法團沒有根據《條例》第27條聘請會計師審計財務報表,要求主管當局檢控法團委員。我們在調查後,了解到有關法團並非蓄意拒絕聘請會計師核數,而是由於聘用的物業管理公司在幾年間多次更換,過往未有妥善備存帳目及相關紀錄文件,使當屆管理委員會未能在指定時間內擬備財務報表以及聘請會計師進行核數。雖然法團確實未能符合《條例》的規定,但經民政事務處勸喻後,已盡快召開法團業主大會,把實情及如何進行補救措施的計劃告知業主,讓業主共同商議及進行議決。在這個情況下,我們認為沒有必要進行檢控。

政府既立場係,唔係蓄意違反《條例》,就所以唔告喎;多次更換管理公司,唔能夠按條例做核數,不過「經民政事務處勸喻後」,開左個大會,做到補救就得啦喎。

衣個,就係民政署同民政局既一貫立場。

咁我唔講而家最興講既「犯法就係犯」啦,不過政府係之後修訂過344咁多次,有冇處理衣個所謂「換左管理公司就成盤數簿都比人燒左佢老尾唔知去左邊」既情況﹖

我唔講法團,你估有冇管理公司因為冇做好備存紀錄而被釘牌罰款或者係任何做樣個隻,例如個物管經理要被除牌﹖

嘿﹗

所以,過去幾十年,做得法團既,其實都知所謂既法律責任係攪笑 -- 如果唔係,阿炳強前排記者會又點會發現到新大陸,發現原來過去係有「職業法團委員」,特別坐入法團去圍你標﹖

至於將來法團委員會有幾多法律責任﹖

well,你問下民政點答你啦。

最後,關於上面換左管理公司就做唔到核數個樣野,最核心個樣問其實係,聰明既你,就應該要問一條問題﹕

法團同管理公司無啦啦唔按法例保存帳目文件,咁當中又有冇人學左國粹,即係查數就燒糧倉﹖你唔告佢比佢補救,咁其實佢盤數係有冇問題﹖

補完救,就冇問題架啦﹖好多上市公司盤數都係燒你老尾,咁班老千比證監拉時,係米話,我補救左米得囉。

2. 「更關鍵的是,法團成員從來沒有完整的制度被政府表揚,建立良好的範例作為參考,遑論形成一套可複製的治理標準。」

法團成員係冇完整表揚制度。不過,幾多法團主席委員,去做左所謂既三會成員﹖我早兩個post quote過既蘇麗珍,選地保輸左,如果佢唔係法團主席,再加上仲係咩九龍社團聯會既人,佢仲有冇機會做選委,有份選特首﹖

衣種唔係表揚,唔係可複製的治理標準﹖

當然,嚴格黎講,衣個唔係治理標準;不過,衣個係將你納入愛國管治團隊既認證囉。

衣個認證,仲緊要個你套「表揚制度」。你做得三會做得選委,先加入到個圈子,先可以分享油治及興帶黎既好處 -- 唔好講幾年前九龍城夜繽紛班人唔熟手攪到一獲泡,衣D地保關愛隊三會成員先係熟手技工,做得好好睇睇,大家安安樂樂。

所以,你話「法團成員從來沒有完整的制度被政府表揚」﹖佢地都唔係要衣D野。

3.「政府應該全方位設立「法團易」電子平台,讓業主授權結合政府資料數據庫和其他工具,將授權票的核實、業主身份的認證、會議程序的記錄全方位電子化,利用科技解決紛爭,而非將舉證責任層層下推至義工。」

衣句就有料到啦 -- 即係我之前講既,將所有會議程序用AI即時做續字記錄,就已經解決到好多核心既問題。

AM730都識講,你估班AO諗唔到咩﹖諗到,又點解唔做,衣個先係有趣既原因。

***********
我上幾個POST講既反駁對隨口UP,又或者係講到既江玉歡亂象,其實都係講緊好多人隨口UP,先係真正既「系統性失效」。

講咁多,其實都係回帶,都係同你講,好多所謂既問題,又因應所謂既問題而做出既所謂改革革新,其實都係隨口UP。

因為,你要真正改革,就係要攪掂個「系統性失效」既問題 -- 即係要攪掂利利益大茶飯既問題。

咁所以,其實真係回帶。

當然,去到國家戰略層次,利益大茶飯其實有個優雅D既稱呼,我決定以後都用衣個稱呼。個稱呼叫,命運共同體。

************
最後,講起愛國大茶飯團伙aka命運共同體,早兩日又見到陳國基開個督導委員會要落實宏福調查委員會報告,咁我又衰無聊,睇多次宏福報告個建議。

但係,我冇咁得閒,所以我淨係睇左佢最尾個附件1,同埋我淨係睇佢講授權票個幾版。

咁我真係copy多次我之前講過既授權票個部份出黎﹕



宏福調查報告就授權票有12項建議,由第108到119項,合共有兩大版。咁我淨係copy第一版,即係身108-114項算數。

你望衣7項建議之前,可以睇返我之前copy左明報相關報導個post既內文去做比較;你唔睇都冇所謂,反正我下面都係比較緊﹕

第108項﹕政府原先係諮詢期建議既大維修表決法定人數,係按金額調高至10%、15%同20%。不過,最終諮詢完,就劃一提高到10%。咁宏福報告話「支持政府的建議」,係支持諮詢期個建議麻。咁而家阿陳國基落實緊既,係諮詢完既劃一建議。咁算唔算係落實緊宏福報告建議呢﹖嘿﹗

第109項﹕衣個就好彩,真係由原先劃一5%或100人親自投票,就真係按金額提高左。咁樣,算係落實左個建議;

身110項﹕議決大維修前舉行簡介會,政府係會做,係落實個建議 -- 不過,衣個係笑話,開個唔知咩形式既簡介會又會有好大分別喎。你個簡介會答唔到人問題,業主覺得有問題,咁係米就會從頭開始做多次成個程序,夾多次錢,搵個新顧問公司又從新入過曬標呀﹖

第111項﹕設立個人授權票上限﹖麥美娟講左唔做啦;

第112項﹕公開展示授權票單位一覽表﹖麥美娟又話左唔做啦,你淨係可以查自己單位;

第113項﹕業主填寫委任代表投票指示﹖麥美娟都話唔做;

第114項﹕授權票列明虛假文書係刑事罪行,應該會做掛。不過,你冇寫衣句,咁而家冒充授權就唔係管有及行使虛假文書,唔係刑事呀﹖

所以,你望下衣6項宏福報告既授權票建議,第108項就退軑做一半,第111到113就banned左,第109、110、同114項就話做,不過其實除左第109項,其他就無謂。

個結論係,阿陳國基要督導政府各部門落實宏福報告各項建議,我淨係講衣6項都大部份係攪笑鳥。

再深層次d既結論係,大家都係命運共同體呀。

****************
所以,am730個社論話,法團定位須革新﹖

嘿。

****************
完。

法團定位須革新﹖ 革你老尾(1)

出版:2026-Nov-16 04:00

更新:2026-Nov-16 04:00

730社論

授權票冰山一角 法團定位須革新

負責支援業主立案法團的民青局,在最新修訂的《建築物管理條例》中,將核實授權票的責任推給作為義工的法團委員。經歷宏福苑巨災,香港的法團制度已出現崩壞到不能不改的局面,必須從根本上將業主組織與地方行政有機連結,檢討法團成員的角色和酬金,並設置「法團易」科技平台結合政府數據和工具,方能在制度層面回應現實需求。

麥美娟局長也承認,在修改授權票人數上限的建議上,局方收集到不同意見,所以最後不再推進。這恰恰證明授權票本來就是複雜問題,牽涉業主參與意願、會議法定人數、少數業主操控表決等多重張力。政府最新的解決方法,是將核實授權票的責任推給區議員、法團主席和管理公司。但是在整個法例框架上,法團和管理公司都沒有法定權力收集業主的簽名式樣,授權票的核實其實一直都很兒戲,完全依靠信任制度運作。將此等重任加諸義工身上,既不切實際,亦不公道。

核實授權票是一項相當繁複的工作,要逐一比對業主身份、單位記錄和簽名式樣,涉及大量文書處理和爭議裁斷。責任落在法團主席身上,是完全不合比例的工作負擔和責任。按法例,法團職員的津貼上限由1996年確立至今,不多於50伙每月最高600元,多於50伙但不超過100伙每月最高900元,超過100伙每月最高1200元,30年來從未調整。很多法團委員都沒有領取津貼,又或者領取了都交給法團作康樂用途。與此同時,管委會成員還要承擔各種各類法律責任,社區中有心有力的人根本不會願意承擔。現在政府的方向反而是讓人更害怕擔任這些崗位。更關鍵的是,法團成員從來沒有完整的制度被政府表揚,建立良好的範例作為參考,遑論形成一套可複製的治理標準。

放眼世界,新加坡的市鎮理事會由民選國會議員領導,直接接管公共住宅區的物業管理職能,將政治問責與樓宇管理合一。菲律賓的《業主協會法》明確將業主協會定位為地方政府的補充夥伴,協助執行地方與國家政策。韓國的地方自治體則為公寓協議會提供制度和財政支持,將其納入地方治理視野。香港現有的法團制度,是從1970年美孚新邨等大型屋苑落成後開始設立的《多層建築物(業主法團)條例》,當時也是面對1950年代開始分層大廈管理出現的問題。到今日,相關問題其實亦都已經到了不能不改的階段。

值得肯定的是,民青局終於會引用「智方便」日後研究協助業主組織,但時間表實在太慢。政府應該全方位設立「法團易」電子平台,讓業主授權結合政府資料數據庫和其他工具,將授權票的核實、業主身份的認證、會議程序的記錄全方位電子化,利用科技解決紛爭,而非將舉證責任層層下推至義工。

「未爛不要碰」的原文是拉丁文“Quieta non movere”,即不要攪動安寧之物,這是十八世紀英國首相羅伯特沃波爾爵士的座右銘,後來美國商人伯特蘭斯在1970年代推廣成“If it ain‘t broke, don’t fix it”。但香港法團制度顯然已經爛到不能夠小修小補。在完善選舉制之後,政府也不能夠再將法團支援外判給地方政黨政治,須重視法團作為社會資本的角色,全方位融入地方行政,讓業主組織成為社區治理的正式夥伴,而非孤軍作戰的義工團隊。

江玉歡現象

睇左今日明報,我記得早兩日原本仲有咩想講。

********
你見江玉歡冇做尊貴之後,就好勇猛,不停係度扮做中立評論員,得閒仲要為民請命。

你睇佢最近講田土廳收緊查冊,佢講緊咩野﹖佢係結論話﹕

公共資源屬於公眾,公眾理應有權取用。今天我們為查冊服務加入目的門檻,無論有關理由聽起來多合理,都只容許符合條件的人使用,把其他人排除在外,這是否公共服務的本意?查冊作為公共服務,有什麼強而有力的理據,去限制公眾的使用權?如果我們可以輕易為這類公共服務加上使用目的與限制,保安、醫療、社福、教育服務是否也可依樣畫葫蘆?這背後的原則,值得我們的立法者深思,好好為市民把關。

之前車牌查冊又係有類似情況。

當時江玉歡做左咩﹖哦,去信促請運輸署跟進,就完鳥。

佢當時既身份仲係議事廳尊貴,唔係扮中立評論員。

即係,亦所以,你有個身份,除左寫封信比運輸署,就真係冇其他野可以做咩﹖佢除左寫左封信比運輸署,又點樣「好好為市民把關」呢﹖

佢今日就叫「值得我們的立法者深思」,咁佢係車牌查冊單野時,又深思左咩呢﹖

佢而家個個禮拜甚至日日出黎冇成本隨口up,仲唔知係米因為角色需要先走出黎,咁就證明d咩﹖

小罵大幫忙,冇成本,好多人米歡迎你做囉。

要龜隊時,就麻煩唔好咁多哆,快手龜隊。

所以,你見而家開始有人當佢係正義女神,就真係好攪笑。

************
江玉歡現象,其實就係油治及興以黎,不停loop緊,進化到去而家好多人用緊既政治藝術。

你望今日明報李先知,又係超級好笑。


聞風筆動:瑪麗升降機事故揭「系統性失效」 議員憂陸續有來 /文:李先知
發布日期 2026年11月18日星期三

【明報文章】政府上星期公布瑪麗醫院新臨牀大樓升降機工程問題的調查報告,揭示整個升機降工程由井道施工、升降機安裝、驗收到監管,整個過程都出現「系統性失效」,情况與宏福苑起火原因大為相似,但政府拒絕展開部門首長責任制下的二級調查。有立法會議員直言,立法會已難以跟進事件,坦言從公眾領域事件會不了了之,只由建築署對瀆職公務員作內部一級調查懲處,對此一結果感到無奈。他認為事件反映公務員「交功課」文化問題嚴重,若繼續坐視不理,擔心這種系統性失效事件會陸續有來。

大佬呀,你咩「對此一結果感到無奈」,跟手講咩「反映公務員「交功課」文化問題嚴重」呢﹖你放完風,知唔知醜架﹖

你咁無奈,不過又跟手容許件事「從公眾領域不了了之」,其實你米又係「交功課」,係度扮無奈囉。

唔講休班日常做開既偷拍非禮,衣幾年咁多休班車死人車斷人隻腳,都係不小心驚駛;休班海關打死人都已經冇人記得。

咁衣類野唔係「陸續有來」﹖又有冇人放風出黎話「感到無奈」﹖

而家既「系統性失效」,係成個社會包括議會傳媒係所謂監察上既「系統性失效」,放風個條友就係衣個「系統」入面既其中一個核心。

佢淨係夠膽放風扮「無奈」,將成件事BLAME ON「公務員」,就唔該中聯辦開班,教下班友點樣小罵大幫忙,點樣去轉移視線啦。

而家你話公務員交功課問題嚴重,你成個放風都係講監管。咁工程界班友,原來冇責任架﹖又係何君堯講圍標個隻,衣件係自然既事呀﹖

************
講返工程。

你話咩監管失效,睇thread d友講到,而家咁多工程圖係大陸乜乜研究院畫完,再由國企做個工程搵人簽個名認頭,再跟手外勞落手落腳去做。到單工程出左事,你就一定淨係夠膽話香港公務員文化有問題啦 -- 件工程係邊個負責,佢有冇問題話﹖

唔需要講國企,淨係講瑪麗醫院個間安保,我又要回帶講多次。

安保十零年前係葉國華個仔阿葉亦楠做行政總裁,阿仔而家已經唔係安保,繼續做緊愛國愛港管治團隊既一環,即係做緊地保。

不過,就算阿仔唔係安保行政總裁,不過衣間野出左咁多事,都仲不停接政府jobs,咁你就明咩叫愛國大茶飯 -- 大家都係愛國大茶飯團伙,咁出問題既,就自然只有大茶飯以外既人,即係公務員啦。

即係,阿仔係冇做行政總裁,不過你唔係咁天真以為,間野就會突然之間唔係愛國愛港丫麻﹖

又再講多次,安保係好多年前都出過事,之前都貼過衣篇挑戰正常人智商既新聞,段新聞標題係法庭:報價呃建築署逾170萬 前測量師候懲。

拿,我緊係信比人告個個安保測量師架,佢誠大個報價呃政府純粹係為左升職同花紅,間公司一定唔知情架喎﹗當時安保個行政總裁仲係阿仔,阿仔愛國愛港,又點會呃政府錢呢。

*********
所以,結論係,你話而家咁多人對公務員文化咁無奈,話要咩改單公務員利度。

我就會話,與其將公帑比曬大茶飯集團包括北都國企關愛隊之流,政府應該年年加公務員一倍人工,快手用曬個儲備仲好 -- 至於我指既公務員包唔包括天下無敵部門,就,well。

**********
最後,明報社評又黎攪笑。

今日講到新世界供股同埋機管局點收four,佢結尾竟然有句咁講﹕

機管局作為政府全資擁有的法定機構,本業是搞好機場而不是做地產商,除非行使購股權可帶來策略性或重大金錢利益,否則沒理由冒險投資,尤其是認購條款還設有至少3年的禁售期。

以後明報社評講親咩機場城市吸引旅遊項目之類,我一定quote返衣句出黎。

機管局係做機場,唔係做地產商的。

明報既攪笑,又係江玉歡現隊 -- 唔同時間扮中立隨口up,就好似為民請左命,咁囉。

************
未完,開個題講多樣相關既野。

2026年11月16日星期一

雜談.反駁對.隨口UP

得閒就講幾樣野。

************
阿處長周一嗚話喎,「警方一向有責任向主辦單位了解公眾活動」,所以之前米搵阿天主教神父了解個關於宏福個宗教悼念活動。

真係唔需要馮睎乾QUOTE返個公安條例,都知阿處長係亂UP,或者係錯誤演繹公安條例 -- 公安條例之下,宗教活動同好多活動都係豁免,就係常識。

唔通你去酒店結婚擺酒去教堂行禮,都要根據公安條例去申請不反對通知書呀﹖

當然,你再熟公安條例,都知遊行同集會人數係某個數以下,就唔需要申請批准啦。我幫你查埋,私人處所人數小於500人既活動,就唔需要通知阿處長,都唔需要等阿處長出左不反對通知書先可以舉行。

咁一個教堂仔,坐唔坐到500人呢﹖

又再當然,更加根本既問題係,《公安條例》幾時話警方「有責任向主辦單位了解公眾活動」﹖《公安條例》係指明一套申請遊行集會既申請同埋不反對機制,根本就冇列明警方係「有責任了解」。

就算你話你有責任,咁有記者米問阿左阿夏志誠主教,其他日常彌撒阿警方有冇查詢過囉。

答案,緊係冇啦。

咁的話,如果處長咁堅持話佢地「有責任向主辦單位了解公眾活動」的話,咁阿處長平時係米唔記得左自己既責任呢﹖

之但係,而家好多野都係天下無敵,公安條例就更加一貫無敵。

所以,如果我夠無敵,我可以話,公安條例第2(1)(a)條係話,以下集會係獲得豁免﹕

為社交、康樂、文化、學術、教育、宗教或慈善目的而進行的聚集或集結,或真誠地擬為討論屬社交、康樂、文化、學術、教育、宗教、慈善、專業、業務或商務性質的論題,而以會議或研討會形式進行的聚集或集結;

不過,我點知今次天主教係係米純宗教活動,定係想以災亂港﹖

再者,而家最興講「兜底責任」。

咁第232章《警隊條例》講到明,警隊既職責係維持公安架麻,咁我咩都關心下,又有咩問題呢﹖

所以,結論係,都要回帶講多次,你就要明白,點解我咁憎宏福個聽證會入面,阿杜淦堃不停講話,消防有「兜底責任」。

你有個無限責任,變相就有無限權力,就比D友有機會可以隨口up -- 特別係而家既香港油治及興之下。

***************
第二個想講既係,阿商經局丘應樺擒日係度咁講﹕

商務及經濟發展局局長丘應樺:「做離岸貿易、轉口,對於金融、法律、會計、認證各方面,轉口商都會聘請很多人,轉口貿易聘請人數有大概十幾二十萬人。不是轉口就不香港關事,不是經過門口離開,其實就在門口經過裡面有很多手續要做、有很多事要配對,如果沒有轉口,航空公司都不會有那麼多航班,香港機場都不會那麼多貨運站。」

我懷疑佢係回應易思行同網上好多人講 (包括埋我啦),講到香港轉口貿易其實都係賺水腳,對GDP影響不大既問題。

易思行講GDP講存貨變動個D麻煩野,其實就唔好理啦,是關我都講過,政府GDP條數係有D麻煩解唔到既位。

不過,丘應樺個句,其實就係我之前講過既野,而家講多次。

又睇返之前我係度講過,統計處特別講到既香港四大主要行業既數據,即係
表655-82101:四個主要行業的增加價值及就業人數。我COPY埋個表出黎比你﹕













我都講過,我COPY衣D統計,通常個數就由2018年開始,方便做比較 (2018年係香港個PEAK麻)。

不過,今次方便睇,就由2021年開始睇起。

你望張圖,香港個「貿易及物流」個增加價值 (即係生產總值啦) 係2023年尋左底,2024年開始升返。不過,個就業人數都係跌緊,由2021年既60.82萬人,跌到去2024年既55.5萬人。

你睇衣個四大行業既統計,上面兩項數據就去到2024年。

不過,如果去另一個勞動市場就業統計表,條數就會UIPDATE小小。你望下
表210-06305:按主要工作所屬詳細行業及性別劃分的就業人數,我COPY埋比你﹕




衣條「進出口貿易及批發」既就業人數,係由2022年男女合計既31.89萬,跌到去2025年既28.26萬。

如果又用2018年PEAK個條數黎計,當時合計就業人數係44.73萬。即係,同2018年比,2025年個就業人數跌幅其實係仲誇張,係小左足足16.47萬人。

(衣條數淨係講緊「進出口貿易及批發」既就業人數,我冇講埋上面個表既「運輸及倉庫」個就業人數。不過,衣個「運輸及倉庫」就業人數相對穩定,係2018年最高峰都係29.97萬,之後個數去到2021年打後都係維持係26到27萬人。anyway,你將衣兩個數夾埋,就大致上match返上面「四大行業」個表入面顯示既就業人數)

另外,要特別留意既係,如果同樣以當時既生產總值黎計,用返四大行業個表條數黎顯示,2018年「貿易及物流」既增加值係5,716億,而2024年都只係5,884億。

(不過,你都要記住,衣個係nominal value;如果計埋通貨膨脹,用返個real vaule,就應該去到2025年都仲未超過2018年個peak啦 -- 雖然,你將當時進出口既野同而家芯片比較返個real vaule,就有d無謂。)

咁你明我想講咩未﹖

當丘應樺話,「轉口貿易聘請人數有大概十幾二十萬人」,其實我都唔知佢講乜。

事關你用統計處特別設立既「四大行業」統計,又或者係勞動人口統計去睇,香港「貿易及物流」或者「進出口貿易及批發」兩個統計口徑入面既就業人數,其實都係有好幾十萬人 -- 淨係計「進出口貿易及批發」,去到而家2025年,都仲有28.26萬就業人口。

當然,丘應樺冇提到,不過個吊詭之處係,你見香港係衣個範疇個GDP貢獻係尋左底,甚至就好似波叔所講,你睇埋衣個貿易統計數字,香港衣兩年進出口係多左好多 -- 之但係,個相關行業既就業人口係不停跌緊。

即係,回返上面帶,再講多次﹕當波叔講到香港出口新高之際,但係個「進出口貿易及批發」 (未計「運輸及倉庫」呀下) 就業人數係由2018年既44.73萬,跌到去2025年既28.26萬,小左16.47萬人,跌幅係41.71%。

當然,我係丘應樺,或者係行內小小既人,我米會同你講,而家有AI麻,又有報關單一窗口有好多自動化流程,所以減小左好多工序,咁就業人口米跌囉。

不過,你呃鬼呀,進出口咁好景,不過做野既人小左4成﹖

我唔理你以往進出口既野可能係貨值低不過量大就所以多野攪,而家你玩芯片之類就貨值高不過量小,所以就唔需要咁多人做野,運輸倉儲報關所有野都易攪好多。

之但係,咁你就就唔好係上面個訪問入面,口響響咁講到,咩香港出口或者轉口貿易帶動GDP,甚至好似丘應樺講咩「轉口商都會聘請很多人,轉口貿易聘請人數有大概十幾二十萬人」  -- 而家事實既係,你攪芯片走私.....呀,轉口,可能就多左comply或者律師工作,之但係成個相關就業人口就係收縮到你阿媽都唔認得囉。

咁所以,以往就真係可以話,香港轉口貿易係帶動到好多就業人口以至相關業務,即係帶動埋個GDP增長。

而家既轉口貿易﹖米講笑啦,真係有幾多高增值,有幾多係搬運工既層次呢﹖你睇個就業人口都大約估到。

即係,十幾年前你轉口做下garment做下偉易達做下電子玩具,都話有D增值野啦。而家,阿波叔講到電子產品轉口咁勁,咁香港轉口粒nvida芯片,阿黃仁勳會同你講,佢攪唔掂封裝設計呀,你香港幫佢手攪埋先轉口呀﹖

阿勳哥就算有咩要攪,都係新加坡攪啦 -- 包括個情婦就算係新香港人,不過最有油水個間公司都要係新加坡公司呢。

丫,再唔係,簡單d問個問題﹕前排先話有60萬粒NVIDA芯片係香港等緊轉入大陸,你話衣60萬粒晶片帶動到咩香港GDP丫拿﹖

又所以,我搵返,原來我早排已經講過衣樣野,不過當時冇講得咁仔細。

之但係,我都話自己係先知,知到班人點樣亂up架啦。

當時我話﹕

即係,做得衣D高毛利既野,係航空公司做,個量可以點高呢﹖你香港起完三跑,唔通再起四跑,比國泰增加個總運力呀﹖

再者,唔講運力,就算講左好多年既咩冷鏈物流,講配送藥物疫苗以至吹水講既新鮮食品,你個量又可以去到幾大,貢獻到幾多經濟呢﹖

跟手,丘應樺係上面quote個段有線訪問,就真係講航空公司,真係講機場貨運站。

佢地班人要唱好香港故事,真係會唔知醜,點都會隨口up架。

所以,佢地既野,真係好易估。

**************
最後一單,真係純抽水。

新世界玩供服,跟手中環十一少出左篇咁既文,入面開頭就好勇猛講到﹕

機管局,不是智力有問題,就是道德有問題。

這個由林天福掌舵的半公營機構,九月底放棄了新世界每年18億元租金,姑負納稅人,本已罄竹難書。豈料獲獲新鮮獲獲甘,現在被鄭氏家族的財技玩到謝,由「一齊贏」,變成CONDOM。

換在內地,這件事不會只是一則財經新聞。內地國資監管有一把尺:決策令國有資產出現重大損失,即使沒有私利,負責人一樣要被問責。按這把尺,一張價內14億元的期權,在大股東財技下變成價外13億元,簽約時沒有考慮攤薄?一定有人要交代,事前知情,抑或被人蒙在鼓裏?

大佬呀,機管局肯定係道德有問題啦 -- 不過,機管局或者好多人會話,用納稅人錢救新世界,其實又有咩問題﹖

你望下新世界衣幾年既新聞,阿金管局幾關照佢地,不停關心銀行做乜唔救新世界。

所以,都係要抽水講多次﹕當我講香港郵政時,米QUOTE過中大黃偉豪講話,香港郵政應該轉型為類似機管局既公營機構既。你提咩都可以,不過你提機管局,就真係侮辱左正常人既智慧。

機管局係衣十幾年黎,佢既錯誤決策,真係多到數唔曬。不過,做錯左,都冇所謂,反正無懲罰,同埋係納稅人埋單。

唔講肯定收唔到課既機場城市,再講多次我最鐘意既經珠港飛。

珠海市政府早個星期先講,「珠港澳機場合作不斷深化,「經珠港飛」客運項目自二0二三年開通以來累計服務旅客超十五萬人次」。

嘩,由2023年數到而家,旅客終於有15萬人次啦﹗

不過,你睇多次我衣個POST,機管局係2017年用左30億樓上話要攪個中轉客運大樓,就係要連接港珠澳大橋比旅客唔駛入香港境就可以直接出境,幫手攪衣個「經珠港飛」。

去到2022年,當時機管局同政府都仲估緊,2025年有143萬旅客用衣個大樓。

而家,3年加埋先有15萬人,真係要開香檳啦﹗

所以,你睇返我上面條LINK,機管局條友早兩年講到個經珠港飛時,仲講咩「強調並非只追求乘客數字,而是希望打通兩邊物流、人流和資金流」。

咁遲下有人問佢,新世界而家攪供股,機管局點算呀,你個認購期權係米廢左呀。到時,機管局班友都會繼續同你亂UP,話收返個K11SKIES係要配合成個skytopia既發展,供股權變廢紙都唔係佢地考慮既野。

機管局既厚面皮,蝕既係納稅人錢,所以咩都冇所謂,就真係天下無敵,反正阿現任機管局主席林天福係未做主席前,仲係做緊機管局行政總裁個十幾年,加加埋埋,都收左你過億人工鳥。

收左納稅人咁多錢,咁多野都做到成PAT屎,三跑又要咁多貪污,都冇所謂的。所以,再厚面皮既野,佢都做得出呀。

******************
其實仲有野想講,不過唔記得,都是但啦,反正今日講既三樣野,都係冇咩料到,仲要回帶。

咁,完。