香港當前面對的結構性問題 (4)

當然，香港第一把膠椅係管政治問題，係處理大政策問題 -- 雖然有D去到操作層面既，佢地都會插手。之但係，太細既，我都唔相信佢地會有能力，或者有心力去處理。

所以，有d較細既事，都應該係第二把膠椅自己處理的。

例如，近排好HIT既咩「工作暑熱警告」，以至邵善波同易思行都有講既之前巴士安全帶之亂，就證明，香港第二把膠椅同成個官僚機構都有問題。

咁我打開字，都抽兩句水。

************

首先講個「工作暑熱警告」。

由林超英開始講衣個「工作暑熱警告」，話有部門反對公開黑球同濕球數據， 再到現任勞工處處長講話睇住個天氣咁熱，不過個警告都冇升級，所以「我哋都好多問號」。

咁，你就知道，成個警告既制訂過程係幾攪笑。

而，更加重要既係，阿現任勞工處處長已經瀨野鳥。

佢瀨野，除左係因為佢咁講的話，變相即係射波，即係想話成件事，原來係唔關佢事之餘。之但係，佢記唔記得，佢上幾任即係負責衣壇野個前任勞工處處長係邊位﹖

無錯，負責既，就係現任勞福局局長阿孫玉菡。阿孫玉菡係2022年7月做問責官員前，成個警告整套指引，都係孫玉菡負責的。

而你睇去到2022年7月上電台講套《預防工作時中暑的風險評估》，都仲係阿孫局自己走去講，講到套指引天下無敵。

之前唔同訪問，林超英都好搶口，又話個指引係擺設，係離地，勞工處冇諮詢過天文台，仲要搶口到話，某部門反對公開數據，係「擔心引起勞工界擔憂」。

如果黎緊幾個禮拜，香港有40度，跟手幾個地盤工人或者清潔工中暑死，就會係巴士安全帶2.0鳥。

************

除左巴士2.0，易思行講既牙醫問題，又係一絕。

不過，易思行講既，係唔完全正確。正確既，應該係咁﹕

香港人北上睇牙，其實通關後就又再開始。之但係，最重要既時間點係，2024年，醫療卷可以擴大到去大灣區7間醫療機構，包括幾間堔圳牙科診所。

當時牙醫學會係有出聲，不過結果係點﹖醫衛局除左出新聞稿澄清話內地都有嚴格監管牙醫所以唔洗擔心之外，盧寵物之後仲親自約見牙醫學會，出聲叫牙醫學會要尊重內地同行。

你唔睇上面條新聞LINK，當日會議個新聞稿就仲經典，佢重點係衣句﹕

「香港牙科專業服務是否貼心，市民最有話語權。我期望香港牙醫積極推動自身專業及服務發展，以及保持服務市民的初心，盡其社會責任，繼續與政府攜手推進多項強化香港牙科服務的措施，以提升市民口腔健康整體水平。」

衣句野既潛台詞係乜﹖就係，你班牙醫學會係香港做成點，就係人都知，市民最有話語權。咁我期望你做好D，拉返個初心，盡社會責任啦。

嘿﹗

咁好啦，牙醫學會見完盧寵物之後，收皮左兩年，係早個月就頂唔順，先開個記招，話好多友上大灣區整牙之後整到成PAT屎，要香港牙醫執手尾之餘，衣幾年仲有好多無牌牙醫係香港幫大陸診所招攬生意。

牙醫學會開完記招，天下無敵部門先識係香港拉無牌牙醫，不過最絕核既係HK01衣個題﹕揭無牌牙科執業今拉人　牙醫學會感謝政府執法及時堵塞衛生漏洞。

你早幾年先比盧寵物星左兩巴，D招攬生意既無牌牙醫開左咁耐，而家先拉人封艇，你竟然可以感謝政府執法及時堵塞漏洞﹖

當然，易思行講既香港監管真空，執法被動就係正確。之但係，佢講既「最後竟然要靠深圳衛健委出手發文規範、劃定紅線，香港當局反而要多謝對手執法」，就唔完全正確，事關醫衛局聲稱係佢地於香港執法後主動聯絡深圳，所以先多謝佢地執法既。

當然，事實係米醫衛局有聯絡，就不知道。

***********

最後一單想講既係，網約車。

網約車好多例係8月3日過左啦，所以衣排條街小左網約車。你睇阿九唔搭八莊豪峰，就話「昨日從位於九龍的住所召喚網約車到金鐘立法會，可見等候時間稍長，但認為分別不大，認為在「5分鐘之內有車」仍屬可以接受」。

你自己開uber個app，都知CALL車貴左好多，亦難CALL左。你睇車CAM人，佢最近都話，應該係因為條例生效，小左網約車，所以佢都好生意左。

咁唔講黑的，唔講遊客，之前都講過，你網約車發1萬個牌，就一定死緊，事關有好多需求，係的士取代唔到的。

早兩個月，上網求其睇到，巴士台又講，有學校招標搵校巴公司，竟然就冇人入標，所以黎緊一個學年冇校巴服務。

即係，你睇條LINK，都有講到，「FB 有 group 可以湊車」。除左湊車，我之前都講，好多家長係CALL UBER比小朋友自己返學，或者至多係搭多個姐姐陪住返學。

你話冇網約車，你會唔會比你個仔自己搭的士﹖就算唔係普通的士，你都唔會比個仔搭UBER TAXI啦 -- 仲要假定，的士佬肯接你幾十蚊車程既接送返放學。

所以，黎緊9月，就精彩囉。

*********

上面幾單係較細較民生較LOCAL既POLICY。

不過，你就會全面地睇到，而家班官既能力或者政策點考量。

你睇暑熱警告，就係勞工署唔想得罪勞工界 (怕工人手停口停)，亦都唔想基建工程停工 (你北都每個月停3日都好，遲左進度的話，驚唔驚比寶龍問責 -- 再者，正經d講，你地盤停一日，其實好多相關工序都唔知點再安排的鳥)，所以就油治及興，多快好省，借天文台過橋，但係唔諮詢天文台之下，整左個暑熱指數。

當然，要發展經濟，要全力推進北都，就有人犧牲都冇所謂架啦 -- 如果唔係林超英夠彊的話，其實都冇人夠膽出聲的。

再睇牙醫學會單野，我地要溶入大灣區丫麻，咁醫療券一定要擴展到深圳架。衣個唔講係米利益輸送，不過就係要方便長者返大陸丫麻。所以，反對既例如牙醫學會，就要收皮。

當然，你而家出左個記者會，話好多人整牙整到爛尾，講到香港有無牌行醫，咁我點都要做野既 -- 不過，上年立法會已經過左個《2024年牙醫註冊（修訂）條例草案》，有內地訓練牙醫已經係衛生署返緊工。

遲下，再修例，可以私人執業，米解決到個問題，歡迎佢地係香港搵生意囉。到時，你班香港牙醫就唔該「積極推動自身專業及服務發展，以及保持服務市民的初心，盡其社會責任」啦。

所以，盧寵物既考量係乜﹖你唔係唔明咩叫大灣區溶合呀麻。

最後，陳美寶就更加簡單。除左保的士牌，你見佢做左蘿蔔快跑代言人，記者會又去又出POST講自己係第一位乘客。咁你就知道，其實佢係無人車SALES。

至於其他policy，無論係巴士安全帶呀牌照處亂黎呀香港D路爛到阿媽都唔認得呀，其實你見佢真係冇咩好做的。

至於停車場唔夠呀粵車南下亂黎呀車隊的士攪到成PAT屎咁呀，佢就睇唔到啦。

所以，阿局長米淨係不停吹水講智慧出行，再親身做SALES「推動內地企業來港發展」囉。

*********

由上面3個唔同政策範疇，再睇班局長既表現，你就會睇到個問題係咩﹕政府既所謂施政，最主要既目標係乜﹖

衣個，同上面個POST講既結構性問題有同一原因，都係最大既政策目標之下，下面所有細政策，都會攪到成PAT屎一樣。

*********

未完。