中東油價現形記 -- 兼講車用燃油市場 (2)

講完上面兩個，到講我真係想講既野 -- 講競委會同車用燃油市場啦。

阿家超叫競委會點點點之前，競委會早兩日已經約左油公司，叫佢地乜春「必須嚴格遵守競爭條例，呼籲油公司加強價格及折扣優惠的透明度」。環境局同樣，都係講乜「已向本地主要車用燃油供應商重申應加強資訊透明度，向消費者和公眾披露更多與油價變化相關的資料和數據」。

咁其實，早差唔多十年前競委會份車用燃油市場報告，當時係講乜，有咩建議話﹖

************

懶，唔搵份報告，求其搵到政府答呀琼子條質詢，我quote返競委會建議出黎﹕

（一）及（三）競爭事務委員會（競委會）作出四項短期及一項長期的建議以加強香港車用燃油市場的競爭。短期的建議包括重新引入95辛烷值汽油、推出更多油站用地、檢討油站用地的招標制度及油站應清楚展示牌價及門市折扣。長期而言，競委會建議探討不同的「結構性」改革方案。

競委會當年講既引入95汽油，黃錦星當佢透明，咁唔講住。

「推出更多油站」用地同埋「檢討油站用地的招標制度」，就係攪笑，兼且好多野可以講。

競委會出左份報告之後，係2018年，政府就攪左個28幅油站用地招標。

你睇上面條link，其實就唔明有咩特別既 --如果你開條link，再入埋去佢最底入面既「立法會經濟發展事務委員會資料文件」，咁先明政府係講緊乜。

我又懶，quote佢第3段講背景既部份出黎﹕

3.現時，六間油公司經營香港的 181 個油站(見附件二)。其中四間1油公司經營該 28 個油站。由二零零零年七月起，政府在現有油站的租約期滿後，取消讓現時的承租人自動續約的安排，並把油站用地推出重新招標。自二零零三年起，政府推行了多項促進車用燃油供應市場競爭的措施，當中包括引入分批招標安排，把油站用地以每批約二至五幅用地分批推出招標，以便有興趣進入市場的新經營者取得相當數量的油站用地和達致規模經濟效益(即“超級標書”安排)。自引入新的招標安排後，兩個新營辦商成功進入市場。原有的三個主要營辦商的油站數目份額由超過 90%降至約 70%。市場佔有率的改變反映招標措施已有效地促進車用燃油市場的競爭。

衣段野，見唔見到個嘔心位係邊﹖就係最尾個幾句。

好耐之前，我都好似講過小小。

即係，政府攪衣個超級招標，個結果係乜﹖林鴻達同汽車台最近都講左油站地價既問題，跟手好多人講，中石化係2020年用天價6.9億投左觀塘個油站地。

不過，實情係，其實之前一年，好多塊油站地都係去到接近甚至超過6億 。

即係，政府講到，用「超級標書」既安排，就真係「兩個新營辦商成功進入市場」喎﹗不過，中石油同東方明珠入左市場，其實都係攪緊現有營辦商既遊戲，都係高價投地，再高價賣油出去 -- 你唔玩衣個遊戲，你又點投到地﹖

所以，衣個新安排，竟然可以咁厚面皮話，「市場佔有率的改變反映招標措施已有效地促進車用燃油市場的競爭」，就真係無敵啦。

************

當然，講到油價同地價，林鴻達有句幾精警，「另外提返大家，要調整燃油稅需要經過立法會，但油站招標同起樓嘅賣地嘅操作方式係一樣的」。

除左林鴻達，求其search，港大衣位人兄，都講左個好簡單既邏輯關係﹕

因此有人認為，香港的油價貴是因為地價貴，而地價貴則因政府鼓勵使用公共交通工具，所以默許高油價以減少私家車的用量。這樣的說法邏輯上不能成立。地價貴並不是政府向油公司要高價，而是油公司自己主動在土地投標時出高價。他們之所以願意出高價，當然是因為預計到營收豐潤，足以超過地價成本。

當你睇清楚上面衣兩個說法或者邏輯，其實個問題或者個經濟邏輯就好簡單﹕而家個油站用地招標方式係價高者得。

衣個招標方法既結果係﹕

傳統油公司比得起衣個地價，係因為佢地可以有咁多利潤，即係賣到某個水平既燃油零售價；咁我就算當中石化中石油大發慈悲，作為國企作為新競爭者我都想賣平油架。不過，如果要成功投地，但係又賣平油，咁我一定蝕 -- 高價投地低價賣油，就年年蝕；每塊地個批租期仲要係21年，咁你可以蝕幾多年﹖

所以，係而家個招標方式之下，燃油零售價又點會平﹖

你想要油公司習體低價投地，之後一齊賣平油﹖定係你想玩dutch aution﹖我想象唔到囉。

**************

題外話，純抽水。

競委會10年前個份車用燃油市場報告，佢係開頭intro都竟然係咁講﹕

在本報告中，競委會指出多個相信有礙競爭的問題，這些問題很可能是造成香港車用燃油價格偏高的原因。本報告亦就如何解決這些問題提出建議。在公衆的支持下，大部分建議可望在不久將來實施。事實上，部分建議理應即時實行，尤其政府於2018年將為多個租約期滿的油站重新招標，正好成為加強市場競爭的一大契機。

嘿﹗

**************

當講到車用油，另一個要講既係稅。

競委會10年前個份報告，你有興趣可以睇衣個摘要 (佢個詳細版係得英文，不過摘要已經講曬要講既野)。

不過，競委會份報告，淨係好含糊講左稅衣樣野，亦都冇做各地比較。

反而，求其搵，好多年前個競爭政策諮詢委員會 (你當係競委會前身啦) 就夠薑好多，竟然有個咁既圖﹕

個圖雖然好舊 (仲講緊2005年)，佢亦都講到個圖既「利潤」其實只係減除地價後既毛利，即係好多野未扣同埋係估估下。

不過，個圖講到樣好簡單既野﹕就算你唔睇地價 (衣樣野係2018年攪「超級招標」之後升得好勁)，香港既燃油稅，都係佔油價好一大部份。

同而家成日講既新加坡比較，HK01就講到，就算新加坡係2015年加左燃油稅，個稅率其實都仲低過香港好多。

HK01係咁講﹕

新加坡汽油的產品成本、地價、折扣及利潤結構均與香港相近，當地政府在2015年大幅提高燃油稅四成，但仍然較香港燃油稅少41%及49%，故零售價低至相等於11.11港元。如新加坡燃油稅加至香港同一水平，零售價將與香港相若。

***********

所以，去到衣度既結論係乜﹖

就係，港大位人兄，其實有個幾好，亦都冇人諗過既建議﹕

針對本文的油價居高不下問題，筆者最後建議一個可行措施。特區政府目前徵收的車用燃油稅固定為每公升6.06元，不隨油價變動，然而只要改為比例稅率，如油價的30%，就可促使油站降價。原因很簡單，基於固定稅率，油價漲1元，油站就多獲利1元，但在比例稅率之下，油價漲1元，油站額外獲利只得0.7元，各油公司就有較大誘因降價。

當然，佢衣個建議，其實可以再複雜化。例如，個稅率甚至可以改做累進，越加價就抽越多稅 -- SAY，如果而家牌價30蚊以下抽每公升6.06元，30蚊以上抽10蚊，咁我肯定油公司唔會將個牌價加到30蚊。

又不過，咁就會係節扣到攪好多野。

咁如果個稅率唔係跟牌價而係跟實際節扣下去行，又會有好多問題。不過，由燃油稅方面既角度去諗，係可行既方向。

***********

未完。